प्रदेश में पाछु तीन-चार दिन ले रूक-रूकके होवत सरलग बरसा ले सामान्य जनजीवन परभावित होय हे। उहें, नंदिया-नरवा उफान पर हवय अउ खतरा के निसान ले उपर बोहात हे। कतकोन गांव के जिला मुख्यालय ले रद्दा संपर्क टूट गेहे।
इही बीच, कैचमेंट एरिया म बरसा होय अउ पानी के आवक बाढ़े ले जलासय म जलस्तर बाढ़त हे। जल संसाधन विभाग के कार्यपालन यंत्री देव शुक्ला ह बतईन कि दुरूग जिला के मोंगरा जलासय ले आठ हजार क्यूसेक, घुमरिया ले अड़तालीस सौ क्यूसेक, सूखा नाला ले छब्बीस सौ क्यूसेक अउ खातुटोला ले छह सौ क्यूसेक पानी शिवनाथ नंदियां म छोड़े जात हे, जेखर सेती शिवनाथ नंदियां के जलस्तर सरलग बाढ़त हे। उहें, महामरा एनीकट के उपर ले सात फीट पानी बोहात हे। सुरक्षा ल देखत जिला प्रशासन ह नंदियां तीर बसे गांव के लोगन ल सतर्क रेहे बर केहे हे। बाढ़ के स्थिति ले निपटे खातिर एसडीआरएफ अउ डीडीआरएफ के टीम ल घलो चेताय गेहे।
दुरूग के जिला सेनानी अउ एसडीआरएफ प्रभारी नागेन्द्र कुमार सिंह ह बतईन कि गांव थनौद अउ अंजोरा म भारत माला प्रोजेक्ट म शिवनाथ नंदियां के बाढ़ म फंसे बत्तीस झिन लोगन ल एसडीआरएफ के मदद ले सुरक्षित बाहिर निकाल ले गेहे।
उहें, सक्ती जिला के अंडा गांव के बगान नाला म बोहाय के एक मनखे के सव ल एसडीआरएफ के टीम ह छत्तीस घंटा बाद बरामद करे हे।
इही बीच, मौसम विभाग ह अवइया चौबीस घंटा के दउरान प्रदेस के कतकोन जघा म हल्का ले मध्यम अउ एक-दू जघा म भारी बरसा होय के संभावना जताय हे। मौसम विज्ञानी एच.पी. चन्द्रा ह आकाशवाणी समाचार ल बतईन कि पश्चिम बंगाल के उपर निम्नदाब के क्षेत्र बने हे। उहें, अरब सागर ले निम्मदाब के केन्द्र तक मानसून द्रोणिका गुजरत हे। एखर परभाव छत्तीसगढ़ म घलो देखे बर मिलत हे।
भाजपा प्रशिक्षण शिविर
सरगुजा जिला के मैनपाट म राखे गे भाजपा के सांसद अउ विधायक मनके तीन दिवसीय प्रशिक्षण शिविर आज सिरा गे। शिविर के आखिरी दिन पार्टी के राष्ट्रीय संगठन महामंत्री बी.एल. संतोष ह सांसद अउ विधायक मन ल पार्टी के रीति-नीति, अनुशासन, जनसेवा अउ नेतृत्व के जानकारी दीन।
उहें, प्रदेस अध्यक्ष किरण सिंह देव ह बतईन कि प्रसिक्षण सिविर म बारह सत्र होइस। ए दउरान सांसद अउ विधायक मन ल राष्ट्रीय नेता मनके मार्गदर्सन मिलीस। ओमन किहीन कि अइसन किसम के प्रसिक्षण सिविर ले सांसद अउ विधायक मनके कार्यकुशलता बाढ़ही।
सिविर सिराय के बाद पत्रकार मन ले गोठबात करत उपमुख्यमंत्री अरूण साव ह किहीन कि विकसित छत्तीसगढ़ बनाय के दिसा म ए प्रसिक्षण सिविर मील के पत्थर साबित होही।
माओवादी-आत्मसमर्पण
दंतेवाड़ा जिला म आज बारह झन माओवादी मन ह पुलिस के आगू आत्ममसमर्पण करीन हे। एमा ले नौ झिन माओवादी उपर कुल अट्ठाईस लाख रूपिया के इनाम घोसित रिहीन। एखर मन उपर एम्बुस लगाके फायरिंग करे, रद्दा खोदे, पेड़ काटे अउ बैनर-पोस्टर लगाय समेत कतकोन आने घटना म सामिल रेहे के आरोप हवय। आत्मसमर्पण करइया माओवादी मन ल राज्य सरकार के नवा पुनर्वास नीति म पचास-पचास हजार रूपिया के प्रोत्साहन रासि समेत आने सुभीता दे जाही।
अतिरिक्त सचिव-राजनांदगांव
केन्द्रीय ग्रामीण विकास मंत्रालय के अतिरिक्त सचिव टी.के. अनिल कुमार ह काली राजनांदगांव जिला के गांव-गंवई म चलाय जात योजना अउ विकास गतिविधि के जांच करीन। ए दउरान ओमन राष्ट्रीय ग्रामीण आजीविका मिशन, मिशन जल रक्षा, वन स्टाप फैशलिटी अउ चना प्रोसेसिंग यूनिट समेत कतकोन योजना के जानकारी लीन। श्री कुमार सबले पहिली गांव अंजोरा के मल्टी यूटिलिटी सेंटर पहुंचीन, जिहां स्व-सहायता समूह के माईलोगिन मन हर्बल गुलाल, चंदन, सिंदूर, रोली, कुमकुम जइसन जिनीस ल बनाके पैकेजिंग करत हे। एखर संगेसंग अतिरिक्त सचिव ह गांव टेडेसरा म वर्षा जल संचयन बर बनाय गे रिचार्ज सॉफ्ट इंजेक्शन वेल, पदुमतरा म आजीविका प्रशिक्षण केन्द्र, सुकुलदैहान म चना प्रसंस्करण केन्द्र अउ गांव बरगा म रिचार्ज वेल के जांच करीन।
मुख्यमंत्री-बौद्ध प्रतिमा अनावरण
मुख्यमंत्री विष्णुदेव साय ह आज सरगुजा जिला के मैनपाट म स्थापित भगवान बुद्ध के प्रतिमा के अनावरण करीन। समारोह म बोलत मुख्यमंत्री ह किहीन कि भगवान बुद्ध के प्रतिमा के स्थापना ले मैनपाट सांति अउ समावेशी संस्कृति के नवा चिन्हारी बनही। ओमन किहीन कि छत्तीसगढ़ म बौद्ध परंपरा के जड़ गहरा हे अउ भगवान बुद्ध के प्रेम, सांति अउ करूणा के संदेस ल अपनावत राज्य सरकार विकास के रद्दा म आगू बाढ़त हे। ए दउरान मुख्यमंत्री ह तिब्बती सहकारी समिति के मांग म मैनपाट के शैला रिसॉर्ट ले बौद्ध मंदिर तक सीसी रोड बनाय बर दस लाख अउ जुन्ना बौद्ध मंदिर म शेड बनाय बर बीस लाख रूपिया देके घोसना करीन। ए मउका म मुख्यमंत्री ह पौधा घलो लगईन।
लखपति महिला पहल-कार्यशाला
केन्द्रीय ग्रामीण विकास मंत्रालय कोति ले लखपति दीदी बनाय के दिसा म पहल करत आज ले राजधानी रायपुर म तीन दिवसीय क्षेत्रीय कार्यशाला सुरू होइस। केन्द्रीय ग्रामीण विकास मंत्रालय के सचिव शैलेश कुमार सिंह ह ए कार्यशाला के शुभारंभ वर्चुअल रूप ले करीन। ए कार्यशाला दीनदयाल अंत्योदय योजना अउ राष्ट्रीय ग्रामीण आजीविका मिशन म आयोजित करे जात हे। ए कार्यशाला म छत्तीसगढ़ समेत बिहार, झारखंड, ओड़िशा अउ पश्चिम बंगाल के अधिकारी, मिशन संचालक, आजीविका विशेषज्ञ अउ स्वयं सहायता समूह के प्रतिनिधि सामिल होवत हे।
कार्यशाला म बोलत केन्द्रीय सचिव ह बतईन कि प्रधानमंत्री नरेन्द्र मोदी ह तीन करोड़ लखपति दीदी बनाय के लक्ष्य राखे हे। ओमन किहीन कि लखपति महिला पहल नारी सशक्तिकरण के संग विकसित भारत के परिकल्पना ल पूरा करे के दिसा म एक मजबूत कड़ी बनही। केन्द्रीय सचिव ह महिला उद्यमी मन बर पंजीयन, वित्तीय मदद अउ कौशल विकास के महत्ता ल बतईन।
सहकारिता विभाग-पौधारोपण
केन्द्र सरकार के ‘‘सहकार से समृद्धि‘‘ म सहकारिता विभाग ह ‘‘एक पेड़ मां के नाम‘‘ अभियान ले जुड़के छत्तीसगढ़ म एक लाख पौधा के रोपण करे हे। केन्द्रीय सहकारिता मंत्रालय के निरदेस म प्रदेस के सहकारी संस्था मन म एक ले छह जुलाई तक आने-आने कार्यक्रम शिविर, संगोष्ठी अउ पौधारोपण के आयोजन करे गीस। अभियान के दउरान लोगन मन पौधा के सुरक्षा करे के संकलप लीन।
डीएमएफ-सम्मान
छत्तीसगढ़ ल जिला खनिज संस्थान न्यास-डीएमएफ म बने काम करे खातिर राष्ट्रीय स्तर म सम्मानित करे गेहे। आज नई दिल्ली म राखे गे नेशनल डीएमएफ वर्कशॉप के दउरान केन्द्रीय कोयला अउ खान मंत्री जी. किशन रेड्डी ह ख्निज विभाग के सचिव पी. दयानंद ल प्रमाण पत्र देके सम्मानित करीन। कार्यशाला म छत्तीसगढ़ के प्रयास ल मॉडल राज्य के रूप म देखाय गीस अउ आने राज्य ल घलो डेटा अपलोडिंग, साफगोई के संग अनुकरण करे के सलाह दे गीस।
हज-आवेदन
हज समिति ह हज दू हजार छब्बीस बर अरजी लेके काम सुरू कर देहे। हज यात्री आधिकारिक हज पोर्टल या हज सुविधा मोबाइल ऐप ले अपन अरजी जमा कर सकत हे। केन्द्रीय अल्पसंख्यक मामला के मंत्रालय ह ए बयान म केहे हे कि ऑनलाइन अरजी विंडो इकतीस जुलाई तक खुल्ला रइही।
अउ अब थोरकुन समाचार सार म –
– प्रधानमंत्री ग्राम सड़क योजना के निर्माणाधीन काम के गुणवत्ता के जांच करे बर राष्ट्रीय गुणवत्ता समीक्षक सोलह ले इक्कीस जुलाई तक नारायणपुर अउ बाईस ले छब्बीस जुलाई तक कोंडागांव जिला के दउरा करही।
– राजनांदगांव के जिला शिक्षा अधिकारी प्रवास सिंह बघेल ह छुरिया विकासखंड के मोरकुटुम्ब के सासकीय प्राथमिक साला म पदस्थ सहायक सिक्षक मुकेश कुमार मंडावी ल गजब दिन तक अनुपस्थित रेहे के सेती सेवा समाप्त कर देहे।
– कबीरधाम जिला के गांव भल्लिम-दादर म गाज गिरे ले दू झिन बैगा महिला के मउत होगे।
अउ
– जांजगीर-चांपा जिला के बारागांव म नवा बनत मकान के छज्जा गिरे ले एक मनखे के मउत होगे अउ एक आने मनखे घायल होगे हे।