पाछु दिन होय बरसा ले उत्तरी अउ मध्य छत्तीसगढ़ सबले जादा प्रभावित होय हे। सरलग बारिश के सेती कई नदियां-नाला के जलस्तर बाढ़ गेहे। पुलिया के उपर ले पानी बहे के सेती अवई-जवई घलो बंद हे।
दुरूग जिला म पाछू दू दिन ले होवत बारिस के सेती कई ठिन निचला इलाका मन म पानी भर गेहे। जिला सेनानी अउ एसडीआरएफ प्रभारी नागेन्द्र कुमार सिंह ह बतईन कि नदियां तीर बसे गंवई मन म सतर्कता बरते के मुनादी करा दे गेहे। उहें, ईंट भट्टी अउ बाड़ी म काम करइया लोगन मन ल नंदियां कोति नइ जाय के सलाह दे गेहे। ओमन बतईन कि कोनों भी आपात स्थिति ले निपटे बर एसडीआरएफ अउ डीडीआरएफ के जवान मन ल तैनात करे गेहे। संघरा बाढ़ नियंत्रण बर कंट्रोल रूम घलो स्थापित करे गेहे।
उहें, सक्ती जिला म सरलग बारिश के सेती नंदियां-नाला उफान म हे। मालखरौदा थाना क्षेत्र के अंडा गांव के बगान नाला ल पार करे के बेरा एक मनखे तेज बहाव म बोहा गीस। डीडीआरएफ के टीम डहार ले मनखे के तलाश करे जात हे।
जांजगीर-चांपा जिला के शिवरीनारायण क्षेत्र के रिंगनी-कुकदा नाला के पुलिया ले चौबीस घंटा बाद भी अवई-जवई बंद हे। भारी बरसा ले ए पुल डूब गेहे अउ एखर दू फीट उपर ले पानी बोहात हे। मउका म पुलिस अउ डीडीआरएफ के टीम तैनात करे गेहे। सुरक्षा ल देखत नाला के दूनों कोति बैरीकेड्स लगा दे गेहे।
रायपुर जिला म घलो पाछु तीन दिन ले होवत सरलग बरसा ले सामान्य जनजीवन प्रभावित होय हे। राजधानी के प्रमुख रद्दा समेत गली-मोहल्ला के सड़क म पानी भर गेहे, जेखर ले अवई-जवई प्रभावित होय हे। प्रोफेसर कॉलोनी, परशुराम नगर, पुराना बस स्टैंड स्थित मल्टी लेवल पार्किंग के पास पानी भर गेहे। उहें, गुढ़ियारी करा स्थित रेलवे अंडर ब्रिज म बारिश के पानी जमा होय हे अवई-जवई बंद हे।
इही बीच, मौसम विभाग ह अवइया चौबीस घंटा के दउरान मध्य छत्तीसगढ़ के कुछेक जिला म भारी वर्षा होय के चेतावनी देहे। एखरे संग काली प्रदेस म आने-आने जघा म हल्का ले मध्यम बरसा होय या गरज-चमक के संग छींटा पड़े के संभावना हे।
भाजपा-प्रशिक्षण शिविर
सरगुजा जिला के मैनपाट म आयोजित भाजपा के सांसद अउ विधायक मनके प्रशिक्षण शिविर के दूसरइया दिन आज केन्द्रीय कृषि मंत्री शिवराज सिंह चौहान अउ भाजपा के राष्ट्रीय महामंत्री विनोद तावड़े सामिल होइन। ए मउका म भाजपा के प्रदेस अध्यक्ष किरण सिंह देव, मुख्यमंत्री विष्णुदेव साय, उपमुख्यमंत्री विजय शर्मा अउ अरूण साव अउ सांसद बृजमोहन अग्रवाल समेत मंत्री अउ विधायक मन उंखर स्वागत करीन। ए मउका म एक पेड़ मां के नाम अभियान के तहत केन्द्रीय कृषि मंत्री श्री चौहान ह मौलश्री अउ श्री तावड़े ह रूद्राक्ष के पौधा लगईन।
एखर पहिली, काली भाजपा के राष्ट्रीय अध्यक्ष अउ केन्द्रीय मंत्री जे.पी. नड्डा ह ए प्रसिक्षण सिविर के उद्घाटन करीन। ए दउरान श्री नड्डा ह पार्टी के विचारधारा, संगठन के भूमिका, कार्यकर्ता मनके जिम्मेदारी अउ जनसेवा के भावना उपर विस्तार ले चर्चा करीन। ओमन सांसद अउ विधायक मन ल संगठन के संग तालमेल बिठाके जमीनी स्तर म काम करे के सलाह दीन।
नैनो डीएपी
चालू खरीफ सीजन के दउरान डीएपी के कमी ल पूरा करे बर राज्य सरकार ह एखर विकल्प के रूप म नैनो डीएपी के भंडारण अउ वितरण के विशेष व्यवस्था करे हे। संघरा एनपीके अउ एसएसपी जइसे वैकल्पिक उर्वरक मनके घलो लक्ष्य ले जादा मात्रा म भंडारण करे गेहे। रायपुर स्थित इंदिरा गांधी कृषि विश्वविद्यालय के कृषि वैज्ञानिक मन किहीन कि नैनो डीएपी के उपयोग ले खेती के लागत म कमी आथे। संघरा ए ह खेत म पोषण के कमी ल पूरा करथे अउ उत्पादन के गुणवत्ता ल घलो बढ़ाथे।
बतादन कि राज्य सासन डहार ले किसान मन ल डीएपी उर्वरक के विकल्प के रूप म नैनो डीएपी सहित वैकल्पिक उर्वरक मनके पर्याप्त भंडारण समिति मन म करे जात हे। किसान मन ल एखर उपयोग के बारे म जानकारी दे बर प्रसिक्षण अउ जागरूकता सिविर घलो लगाय जात हे। कृषि विभाग ह किसान मन ल नैनो डीएपी अउ एनपीके, एसएसपी जइसे वैकल्पिक उर्वरक बउरे के अपील करे हे।
शिक्षक युक्तियुक्तकरण-समिति
स्कूल शिक्षा विभाग डहार ले प्रदेस म सिक्षक मनके युक्तियुक्तकरण के बाद सिक्षक मनके अभ्यावेदन उपर विचार करे बर संभाग स्तरीय अउ राज्य स्तरीय समिति के गठन करे गेहे। जिला स्तरीय समिति के निर्णय के विरूद्ध शिक्षक मनके आवेदन उपर संभाग स्तरीय समिति विचार करही। उहें, संभाग स्तरीय समिति के निर्णय के विरूद्ध शिक्षक मनके आवेदन उपर राज्य स्तरीय समिति विचार करही।
राज्य स्तरीय समिति के अध्यक्ष के रूप म लोक शिक्षण संचालक ल नियुक्त करे गेहे। उहें, सचिव के रूप म वरिष्ठ उप संचालक अउ सदस्य के रूप म वरिष्ठ सहायक संचालक लोक शिक्षण ल नियुक्त करे गेहे।
उहें, संभाग स्तरीय समिति के अध्यक्ष संभाग आयुक्त ल बनाय गेहे। ए समिति म संभागीय संयुक्त संचालक ल सचिव अउ सहायक संचालक स्तर के अधिकारी के नियुक्ति सदस्य के रूप म करे गेहे।
श्रम कल्याण मंडल-बैठक
छत्तीसगढ़ श्रम कल्याण मंडल के अध्यक्ष योगेश दत्त मिश्रा के अध्यक्षता म काली रईपुर म संचालक मंडल के बइठका होइस। बइठका म मंडल कोति ले संचालित श्रमिक कल्याणकारी योजना मनके संचालन बर बारह ठिन नवा पद के सृजन करके सासन ले अनुमति मांगे गीस। संघरा कर्मचारी मनके वेतन म घलो बढ़ाय के निर्णय ले गीस। एखर अलावा मंडल म पंजीकृत मजदूर परिवार के लइका मन ल रियायती दर म कॉपी वितरण के नवा योजना सुरू करे के घलो घोसना करे गीस। संगेसंग निःशुल्क कोचिंग सहायता योजना के तहत श्रमिक मनके परिजन ल कोचिंग देके घलो निर्णय ले गीस।
बइठका म बताय गीस कि श्रम कल्याण मंडल के अंतर्गत प्रदेस म बीस ठन श्रम कल्याण केन्द्र के आने-आने जिला म संचालन करे जात हे। ए केन्द्र के माध्यम ले श्रम मंडल म पंजीकृत मजदूर मनके परिवार के महिला सदस्य मन ल सिलाई-कढ़ाई के प्रसिक्षण दे जात हे।
कृषि उन्नति योजना-दिशा/निर्देश
राज्य सरकार ह कृषि उन्नति योजना के बेहतर क्रियान्वयन बर दिसा-निरदेस जारी करे हे। कृषि विभाग डहार ले ए संबंध म जिला कलेक्टर, संभाग आयुक्त, संचालक, प्रबंध संचालक अउ पंजीयक सहकारी संस्थान मन ल चिट्ठी लिखे गेहे। नवा दिसा-निरदेस के आधार म कृषि उन्नति योजना के क्रियान्वयन चालू खरीफ सीजन ले करे जाही। कृषि म पर्याप्त निवेस अउ खेती-किसानी के लागत म राहत दे बर ए योजना सुरू करे गेहे। ए योजना के फायदा उही किसान मन ल मिलही, जेन मन एकीकृत किसान पोर्टल म पंजीयन कराय हे।
हाईकोर्ट-जर्जर सड़क
बिलासपुर सहर के खराब सड़क ल लेके छत्तीसगढ़ उच्च न्यायालय ह नाराजगी जताय हे। मुख्य न्यायाधीश रमेश सिन्हा अउ न्यायमूर्ति बी.डी. गुरू के डिवीजन बेंच ह जनहित याचिका म सुनवाई करत नगर निगम आयुक्त अउ लोक निर्माण विभाग के कार्यपालन अभियंता ले शपथ पत्र के संग जवाब मांगे हे। ए मामला म अगला सुनवाई तेईस जुलाई के होही।
बतादन कि पाछु दिन म मुख्य न्यायाधीश ह अपोलो अस्पताल लिंगियाडीह रद्दा के दउरा करे रिहीन। ए दउरान ओमन सड़क के खराब स्थिति उपर नाराजगी जताय रिहीन। एखर बाद ए मामला ल जनहित याचिका के रूप म स्वीकार करत एखर उपर सुनवाई सुरू करे गीस। कोर्ट के निरदेस के बाद नगर निगम ह बसंत विहार चौक ले अपोलो अस्पताल तक अतिक्रमण हटा के सड़क चौड़ा करे के काम सुरू कर देहे।
केरोसिन आवंटन
खाद्य नागरिक आपूर्ति अउ उपभोक्ता संरक्षण विभाग डहार ले राज्य के गैर अनुसूचित क्षेत्र मनके गैस कनेक्शन धारी राशनकार्ड मन ल घलो सार्वजनिक वितरण प्रणाली के तहत केरोसिन प्रदान करे के निरदेस दे गेहे। एखर बर छत्तीसगढ़ जुलाई महीना बर आठ सौ सोलह किलोलीटर केरोसिन के आवंटन करे गेहे। सार्वजनिक वितरण प्रणाली के तहत प्रचलित जम्मो अंत्यादेय अउ प्राथमिकता रासन कार्ड मन ल केरोसिन के पात्रता होही। नगरीय क्षेत्र मनके रासनकार्डधारी मन बर एक लीटर अउ ग्रामीण क्षेत्र मन म अनुसूचित क्षेत्र अउ गैर अनुसूचित क्षेत्र के रासनकार्डधारी मन ल अधिकतम दू लीटर केरोसिन दे जाही। आवंटित केरोसिन के उठाव इकतीस जुलाई तक करे जाही।
मोबाइल वेटनरी यूनिट्स
बिलासपुर जिला म पशु चिकित्सा विभाग डहार ले छह ठिन मोबाइल वेटनरी यूनिट्स के माध्यम ले घर पहुंच के जानवर मनके इलाज करे जात हे। एखर बर विभाग डहार ले टोल फ्री नंबर – एक नौ छह दू जारी करे गेहे। मोबाइल वेटनरी यूनिट्स के संचालन हरेक दिन बिहनिया आठ बजे ले संझा चार बजे तक करे जात हे।
उहें, बलरामपुर जिला के पशुधन विभाग के खंड पशु चिकित्सा अधिकारी डॉक्टर राम लखन राम ह बतईन कि राजपुर नगर म सुरक्षा व्यवस्था के अनुरूप आवारा अउ घुमंतू मवेसी मन ल रेडियम स्टीकर लगाय जात हे।