जांजगीर-चांपा जिला के रिंगनी-कुकदा पुलिया के उपर ले दू फीट पानी बोहावत हे, जेखर सेति अवई-जवई म परेसानी होवत हे। एखर अलावा बरसा के सेति शिवरीनारायण-जांजगीर के रद्दा ह बंद हो गेहे। प्रशासन कोति ले जिला आपदा मोचन बल के टीम ल तैनात करे गेहे।
ओति, गौरेला-पेण्ड्रा-मरवाही जिला म भारी बरसा के सेति नदिया, नरवा ह उफान म हवय, जेखर चलत इंहा घलो अवई-जवई म परेसानी होवत हे। कतकोन जघा म पानी भर गेहे। पेण्ड्रा बिलासपुर के रद्दा म घलो अवागमन ह प्रभावित होय हे। बिलासपुर पेण्ड्रा, जबलपुर ल जोड़े वाला नवा बनत नेशनल हाइवे ह घलो कतकोन जघा ले क्षतिग्रस्त हो गेहे, जेखर सेति कारीआम ले खोडरी के बीच के रद्दा ल बंद कर दे गेहे। पाछू रतिहा रद्दा खराब होय के सेति एक ठिन ट्रक ह बीच रास्ता म ही बंद हो गे रिहीस, जेखर ले बड़ लंबा जाम लग गे रिहीस। बहुत मसक्कत के बाद कइसनो करके गाड़ी ल धीरे-धीरे निकाले गीस।
इही बीच, मौसम विभाग ह प्रदेस म काली आठ जुलाई के जादातर जघा म हल्का ले मध्यम बरसा होय या फेर गरज-चमक के संग छींटा पडे़ के संभावना जताय हे। उहें, एक-दू जघा म गरज-चमक के संग भारी बरसा होय के घलो चेतावनी देहे। मौसम विभाग ह बस्तर, रईपुर, बिलासपुर, राजनांदगांव, दुरूग, जांजगीर-चांपा, कबीरधाम अउ मुंगेली जिला बर बरसा के ऑरेंज अलर्ट जारी करे हे।
किसान-खाद बीज
मुख्यमंत्री विष्णुदेव साय ह सबो जिला कलेक्टर ल निर्देशित करे हे कि कोनो भी जिला म किसान मन बर खाद-बीज के कमी झन होवय। ओमन ह बेरा राहत एखर उपलब्धता किसान मन बर सुनिश्चित करे के निरदेस दीन हे। मुख्यमंत्री ह किहीन हे कि सुदूर वनांचल के जिला म घलो अब खाद अउ बीज के पर्याप्त उपलब्धता हे। कृषि विभाग कोति ले किसान मनके जरूरत के हिसाब ले बीजा के भंडारण करे गेहे। उहें, खाद बांटे के प्रक्रिया ल पारदर्सी, सरल अउ सुविधाजनक बनाय गेहे। जेखर ले कोनो भी किसान छूट मत जाय। राज्य सरकार कोति ले किसान क्रेडिट कार्ड योजना के चलत किसान मन ल सून्य प्रतिसत ब्याज म ऋण उपलब्ध कराय जात हे।
कांग्रेस-जनसभा
प्रदेस कांग्रेस कोति ले आज राजधानी रईपुर के साईंस कालेज मैदान म किसान, जवान, संविधान जनसभा के आयोजन करे गीस। ए सभा ल संबोधित करत हुए कांग्रेस के राष्ट्रीय अध्यक्ष मल्लिकार्जुन खड़गे ह भारतीय जनता पार्टी के केंद्र अउ राज्य सरकार उपर कतकोन आरोप लगाय हे। श्री खड़गे ह किहीन हे कि प्रदेस सरकार ह कांग्रेस के जन कल्याणकारी योजना ल बंद कर देहे। उहें, छत्तीसगढ़ म जवान लइका मन बर रोजगार के अवसर ल घलो पूरा तरीका ले बंद कर देहे। एखर अलावा स्कूल मन ल घलो बंद करे जात हे। श्री खड़गे ह भाजपा उपर संवैधानिक संस्था ल कमजोर करे के आरोप लगाइन हे। ओमन ह पार्टी कार्यकर्ता मनके आह्वान करत हुए किहीन कि देस, संविधान, जल, जंगल अउ जमीन ल बचाय बर सबो लोगन मन ह एकजुट रहय।
जनसभा ल छत्तीसगढ़ के कांग्रेस प्रभारी सचिन पायलट, पूर्व मुख्यमंत्री भूपेश बघेल, नेता प्रतिपक्ष डॉक्टर चरणदास महंत, प्रदेस कांग्रेस अध्यक्ष दीपक बैज, पूर्व उपमुख्यमंत्री टीएस सिंह देव अउ पूर्व मंत्री ताम्रध्वज साहू ह घलो संबोधित करीन।
एखर बाद कांग्रेस के राष्ट्रीय अध्यक्ष मल्लिकार्जुन खड़गे ह रईपुर स्थित राजीव भवन म प्रदेस कांग्रेस के पालीटिकल एफेयर कमेटी के बइठक म सामिल होइन।
भाजपा-प्रशिक्षण शिविर
भाजपा विधायक अउ सांसद मनके प्रसिक्षण सिविर आज ले सरगुजा जिला के मैनपाट म सुरू हो गेहे। ए सिविर के सुभारंभ भाजपा के राष्ट्रीय अध्यक्ष अउ केंद्रीय मंत्री जेपी नड्डा ह करीन। ए बेरा सिविर ल केंद्रीय मंत्री जेपी नड्डा, भाजपा के प्रदेस अध्यक्ष किरण सिंह देव अउ मुख्यमंत्री विष्णुदेव साय ह संबोधित करत हे।
एखर पहिली, एक पेड़ मां के नाम अभियान के तहत सबो सांसद अउ विधायक मन ह आम, सिंदूर अउ रूद्राक्ष जइसे पउधा लगइन।
ए प्रसिक्षण सिविर नौ जुलाई तक चलही।
केंद्रीय कृषि मंत्री आह्वान
केंद्रीय कृषि मंत्री शिवराज सिंह चौहान ह देस म मक्का के खेती म बढ़ावा देबर बहु-हितधारक दृष्टिकोण अपनाय के आह्वान करीन। ओमन ह ए बात उपर जोर दे हे कि ए लक्ष्य ल पूरा करे बर राज्य अउ केंद्र सरकार के वैज्ञानिक,किसान, कृषि विश्वविद्यालय अउ कतकोन उद्योग ल जुलमिल के काम करना चाही। श्री सिंह ह आज नई दिल्ली म फिक्की के ग्यारहवां ‘‘भारत मक्का शिखर‘‘ सम्मेलन ल संबोधित करत ए बात ल किहीन। ए बेरा म श्री सिंह ह मक्का के खेति म ओखर आसाधरण योगदान बर किसान मन ल सम्मानित घलो करीन। श्री चौहान ह एक राष्ट्र एक कृषि अउ एक टीम के विचार उपर केंद्रित एक समूह बनाय बर घलो जोर दीन। ओमन ह फिक्की ले व्यापक चर्चा करे अउ अइसन सिफारिस देके आग्रह घलो करीन जउन ह किसान मनके संगेसंग आने हितधारक मनके घलो मदद कर सकय।
माओवादी-मुठभेड़
बीजापुर जिला म आज सुरक्षा बल अउ माओवादी मनके बीच होय मुठभेड़ म एक झिन माओवादी कमांडर ह मारे गेहे, जेखर उपर आठ लाख रूपिया के इनाम घोसित करे गे रिहीस।
जिला के पुलिस अधीक्षक जितेन्द्र कुमार यादव ह बतइन कि नेशनल पार्क क्षेत्र म माओवादी कैडर के गतिविधि के सूचना मिले रिहीस। इही आधार म बीजापुर अउ दंतेवाड़ा जिला के डिस्ट्रिक्ट रिजर्व गार्ड-डीआरजी, स्पेसल टास्क फोर्स-एसटीएफ, केंद्रीय रिजर्व पुलिस बल-सीआरपीएफ अउ कोबरा बटालियन के संयुक्त टीम ह अपन एक ठिन तलासी अभियान म निकले रिहीन, फेर इही बेरा म जवान अउ माओवादी मनके बीच रूक-रूक के मुठभेड़ होय बर लगिस। ए मुठभेड़ के बाद घटना वाले जघा के तलासी के दउरान एक झिन वर्दीधारी माओवादी के शव के संगेसंग एक रायफल अउ बड़का मात्रा म बिस्फोटक सामान ल जब्त करे गेहे। मारे गे माओवादी के पहिचान कन्ना के रूप म होय हे जउन कि पीएलजीए बटालियन के कंपनी नंबर दू के डिप्टी कमांडर रिहीस।
इही बीच, बीजापुर जिला म ही पाछू रतिहा अज्ञात मनखे मन ह मोदकपाल थाना क्षेत्र के चिन्नाकोडेपाल गांव के पूर्व सरपंच अउ वर्तमान वार्ड पंच विजय जब्बा के हत्या कर देहे। ऐति, घटना के सूचना मिलतेच पुलिस ह मउका म पहुंच के जांच म जुट गेहे।
ईओडब्ल्यू-चालान
शराब घोटाला मामला म आर्थिक अपराध अन्वेषण ब्यूरो-ईओडब्ल्यू ह आज आरोपी बनाय गे अट्ठाईस झिन आबकारी अधिकारी मनके खिलाफ करीबन तेईस सौ पन्ना के चालान ल बिसेस कोर्ट म पेस करीन। एखर ले पहिली पाछू तीस जून के पूर्व आबकारी मंत्री कवासी लखमा के खिलाफ ईओडब्ल्यू ह बिसेस कोर्ट म लगभग बारह सौ पन्ना के चौथा पूरक चालान ल पेस करे रिहीन, जेमा श्री लखमा के बड़का भूमिका के बात केहे गेहे।
दुर्घटना
अयोध्या ले आज दर्शन करके लहुटत छत्तीसगढ़ के श्रध्दालु मनके गाड़ी ह पेड़ ले टकरागे ए घटना म तीन झिन माईलोगिन मनके मउत होगे। उहें, पंद्रह झिन मनखे मन ह घायल हो गेहे। ए सबो घायल मन म माईलोगिन अउ लइका मन सामिल हे। ए घटना ह मध्यप्रदेस के शहडोल के जोरा गांव के हरय। पुलिस ह बतइन कि गंभीर रूप ले चार झिन घायल मन ल अच्छा इलाज बर मेडिकल कालेज शहडोल भेजे गेहे।
ऐति, दुरूग जिला के खुर्सीपार करा काली रतिहा एक ट्रक के टक्कर ले नव विवाहित दंपत्ति के मउत होगे। घटना ले गुस्साय लोगन मन ह देर रतिहा तक रद्दा म चक्काजाम कर दे रिहीन। छावनी के नगर पुलिस अधीक्षक के समझाय के बाद प्रदर्सनकारी मन ह चक्काजाम ल खतम करीन।