देसभर म वस्तु अउ सेवा कर याने-जीएसटी राजस्व जोरे ल जाद पारदर्सी अउ प्रभावी करे बर बनाय गे मंत्री मनके समूह के बइठका काली नई दिल्ली म राखे गीस। बइठका म छत्तीसगढ़ के वित्त मंत्री ओपी चौधरी घलो सामिल होइन। ए मउका म ओमन फर्जी व्यापारी उपर कड़ा कार्रवाई, पंजीयन प्रक्रिया म आधुनिक तकनीक के उपयोग अउ फर्जी इनपुट टेक्स क्रेडिट ल रोके बर बहुत अकन जरूरी सुझाव दीन। श्री चौधरी ह बतइन कि टेक्स चोरी ल रोके अउ असली करदाता ल सुविधा देबर छत्तीसगढ़ म डाटा एनालिटिक्स अउ आर्टिफिसियल इंटेलीजेंस याने एआई टूल्स के उपयोग करे जावत हे। ओमन किहीन कि एखर ले राज्य के राजस्व म बढ़ोत्तरी होय हे।
बइठका के दउरान देस के आने-आने राज्य के वित्त मंत्री मन अपन-अपन राज्य म जीएसटी ले राजस्व म पड़ने वाला आर्थिक अउ आने कारक के बिस्तार ले विश्लेषण करीन।
विधानसभा-कार्यशाला
मुख्यमंत्री विष्णुदेव साय ह किहीन हे कि विधानसभा के कार्रवाई ले आम लोगन ल अवगत कराय म संसदीय पत्रकार मनके बड़का भूमिका रइथे। श्री साय ह आज विधानसभा परिसर के प्रेक्षागृह म संसदीय रिपोर्टिंग उपर राखे गे कार्यसाला म बोलत रिहीस। श्री साय ह किहीन कि पत्रकार मनके जरूरी भूमिका हे कि विधानसभा के कामकाज ल जनता तक पहुंचाय।
उहें, विधानसभा अध्यक्ष डॉक्टर रमन सिंह ह संसदीय पत्रकारिता के महत्ता ल बतात हुए किहीन कि छत्तीसगढ़ के पच्चीस बछर के स्वर्णीम यात्रा म पत्रकार मनके योगदान अतुलनीय हे। ओमन किहीन कि संसदीय पत्रकारिता अब्बड़ नाजूक जिम्मेदारी हे, जउन सदन के गोपनीयता, अनुशासन अउ गरिमा ल बनाय राखत हुए जनता तक सटिक अउ निष्पक्ष जानकारी पहुंचाय के काम करथे।
कार्यसाला ल नेता प्रतिपक्ष डॉक्टर चरणदास महंत ह घलो संबोधित करीन अउ बोलिन कि पत्रकार समय म अउ सजकता के संग लोकतंत्र के समवाहक होथे।
ए मउका म संसदीय कार्यमंत्री केदार कश्यप, विधानसभा के सचिव दिनेश शर्मा अउ आई.आई.एम.सी. के पूर्व महानिदेसक संजय द्विवेदी समेत बड़ संख्या म पत्रकार जुरे रिहीन। कार्यसाला ल राज्यसभा सांसद डॉक्टर सुधांशु त्रिवेदी अउ डॉक्टर संजय द्विवेदी ह घलो संबोधित करीन।
जशप्योर ब्राण्ड
राज्य सरकार ह जशप्योर ब्राण्ड के ट्रेडमार्क ल उद्योग विभाग ल हस्तांतरित करे के निर्णय लीन हे। ए निर्णय जशप्योर ल व्यापक उत्पादन, संस्थागत ब्रांडिंग अउ राष्ट्रीय अउ अंतर्राष्ट्रीय बाजार तक पहुंच देवाय के दिसा म महत्वपूर्ण कदम हे। अब जशप्योर के पहुंच देसभर के प्रमुख एयरपोर्ट स्टोर्स म होही। रेयर प्लेनेट के संग होय समझौता के पहिली चरण म पांच एयरपोर्ट म महुआ अउ आने-आने समान के बिक्री सुरू करे जावत हे। ए एमओयू म मुख्यमंत्री विष्णुदेव साय कोति ले ऑनलाइन दस्तखत करे गे रिहीस।
जशप्योर के समान म महुआ नेक्टर, महुआ वन्यप्राश, रागी महुआ लड्डू, महुआ कुकीज, महुआ कोकोआ ड्रिंक, कोदो-कुटकी-रागी ले बने पास्ता अउ ढेकी म कुटे चांउर सामिल हवय। जशप्योर के सबले खास बात एखर अगुवई करत माईलोगिन मन हे। इंहा नब्बे प्रतिसत ले जादा करमचारी आदिवासी माईलोगिन हे, जेनमन समान ल बनाय ले लेके ओखर पैकिंग तक के सबो बुता म सरलग लगे रइथे।
खाद भंडारण
प्रदेश म वैकल्पिक खातु के कोनो कमी नइ हे। रासायनिक खातु के भंडारण अउ उठाव के स्थिति अच्छा बने हुए हे। डीएपी के कमी ल पूरा करे बर एनपीके, सुपर फास्टफेट अउ नेनो डीएपी जइसन वैकल्पिक खातु के उपलब्धता पक्का करे गेहे। सहकारी समिति के अधिकारी मन बतइन हे कि राज्य म अब तक आने-आने तरह के बारह लाख सत्ताईस हजार मीट्रिक टन खातु ल जमा कर ले गेहे, जेखर ले खरीफ सीजन म किसनहा मन ल बेरा म पर्याप्त खातु देवाय जा सके।
माओवादी-मुठभेड़
बीजापुर जिला म आज सुरक्षा बल के संग होय मुठभेड़ म एक माओवादी मारे गीस, जेखर शव बरामद कर ले गेहे। बस्तर रेंज के पुलिस महानिरीक्षक सुंदरराज पी. ह बतइन हे कि जिला के नेशनल पार्क क्षेत्र म माओवादी मनके बड़का कैडर के उपस्थिति के सूचना मिले म सुरक्षा बल के टीम ह तलासी म निकले रिहीस। इही बीच, पहिली ले घात लगाके बइठे माओवादी मन ह सुरक्षा बल उपर गोली चलाय बर सुरू कर दीस। जवान मन कोति ले होय जवाबी कार्रवाई म एक माओवादी मारे गीस। ओ जघा ले हथियार घलो पाय गेहे। ए समाचार लिखे जाय तक सुरक्षा बल अउ माओवादी मनके बीच थिरा-थिरा के मुठभेड़ चलत हे।
मोहर्रम
काली छत्तीसगढ़ समेत देस के आने-आने क्षेत्र म मोहर्रम श्रध्दा अउ आस्था के संग मनाय जाही। करबला म सत्य अउ न्याय के रक्षा बर पैगम्बर मोहम्मद के नाती हजरत इमाम हुसैन अउ उंखर साथी मनके शहादत के सुरता म मुहर्रम मनाय जाथे। ए मउका म ताजिया निकाले जाथे अउ करबला के शहीद मनके बलिदान के सुरता म मजलिस के आयोजन करे जाथे।
मुहर्रम के मउका म राजधानी रईपुर समेत राज्य के कई ठिन सहर म काली ताजिया निकाले जाही। रईपुर के कर्बला म हजरत इमाम हुसैन के बड़का कुर्बानी ल सुरता करत हुए मजलिस याने धार्मिक बइठका के आयोजन करे जाही।
दलपत सागर-सौंदर्यीकरण
जगदलपुर के ऐतिहासिक दलपत सागर के सौंदर्यीकरण बर मुख्यमंत्री नगरोत्थान योजना ले नौ करोड़ अठासी लाख रूपिया के मंजूरी मिल गेहे। भाजपा के प्रदेस अध्यक्ष अउ विधायक किरण सिंह देव ह एखर बर मुख्यमंत्री विष्णुदेव साय के आभार जताय हे। ओमन किहीन कि बस्तरवासी मनके बड़ जुन्ना मांग अब पूरा होय हे। दलपत सागर ल योजनाबध्द ढंग ले सवारे के काम करे जाही, ताकि अवइया दिन बर दलपत सागर के प्राकृतिक स्वरूप बने रहय।
वन महोत्सव
वन महोत्सव के मउका म ‘‘एक पेड़ भविष्य के लिए लगाएं‘‘ बिसय ल लेके भारतीय कृषि अनुसंधान परिषद अउ राष्ट्रीय जैविक स्ट्रेस प्रबंधन संस्थान, रईपुर के आवासीय परिसर म पेड़ लगाय के कारीकरम करे गीस। कारीकरम म संस्थान के निदेशक, वैज्ञानिक, प्रशासनिक, वित्त विभाग के अधिकारी-करमचारी अउ विद्यार्थी मन ह बड़का भूमिका निभात हुए कीसम-कीसम के पउधा रोपिन।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ म आकाशवाणी के सबो केंद्र एके संग रिले करही। ए दारी के अंक म ‘‘सरगुजा‘‘ जिला के गतिविधि के बारे म जानकारी दे जाही।
मौसम
मौसम विभाग ह अवइया चौबीस घंटा म प्रदेस के एक-दू जघा म भारी बरसा होय अउ गाज गिरे के चेतावनी दीस हे। मौसम विज्ञानी एच.पी.चंद्रा ह बतइन हे कि गंगेटिक अउ पश्चिम बंगाल के उपर एक चक्रवाती घेरा बने हे। एखर असर ले प्रदेसभर म बादर-पानी के स्थिति बने हुए हे। आज राजधानी रईपुर समेत प्रदेस के कई हिस्सा म हल्का ले मध्धम बरसा होइस। उहें, काली घलो प्रदेस के अधिकांश जघा म हल्का ले मध्धम बरसा होय के संभावना हे।
अब थोरकुन समाचार सार म –
– मुख्यमंत्री विष्णुदेव साय ह शिक्षाविद अउ राष्ट्रीय विचारक डॉक्टर श्यामाप्रसाद मुखर्जी के जयंती म ओमन ल नमन करीन।
– मुख्यमंत्री ह प्रदेसवासी मन ल देवशयनी एकादसी के बधई अउ सुभकामना दीन हे। ओमन कामना करीन कि भगवान श्रीहरि विष्णु के कृपा सब मन उपर बन रहे अउ सबके जीवन म सुख, सांति अउ समृध्दि बाढ़य।
– दुरूग जिला के कोतवाली थाना क्षेत्र म आज बिहनिया दूपहिया वाहन के टक्कर ले एक सियान के मउत होगे।
अउ
– छत्तीसगढ़ अग्निशमन विभाग ह दू सौ पंचानवे रिक्त पद म भर्ती करे बर इकतीस जुलाई तक ऑनलाइन आवेदन मंगाय हे।