आज दिनभर के खबर ल अपन गुरतुर छत्तीसगढ़ी भाखा म पढ़व

राज्यपाल-महासमुंद

राज्यपाल रमेन डेका ह आज महासमुंद जिला के पिथौरा के गोड़बहाल म विकासखंड स्तरीय अधिकारी मनके समीक्षा लीन। ए बइठका म राज्यपाल ह आकांक्षी विकासखंड के अंतर्गत चलत विकास काम, शासकीय योजना के क्रियान्वयन अउ जन कल्याणकारी कारीकरम के प्रगति के समीक्षा करीन। ओमन ह आने-आने क्षेत्र जइसे स्वास्थ्य, शिक्षा, पोषण, कृषि कौशल विकास, वित्तीय समावेस अउ बुनियादी ढांचा म सुधार ल लेके घलो समीक्षा करीन।
राज्यपाल आज शासकीय हायर सेकेण्ड्री स्कूल गोड़बहाल पहुंच के विद्यार्थी मनले गोठबात करीन।

सीबीआई-एफआईआर

मेडिकल कालेज ल मान्यता देबर एक करोड़ बैंसठ लाख रूपिया के रिस्वत देके आरोप म रावतपुरा सरकार के नांव ले प्रसिध्द रविशंकर महाराज के संग कुल पैंतीस लोगन मनके खिलाफ पुलिस ह एफआईआर दर्ज करे हे। ए मामला म सीबीआई ह पाछू एक जुलाई के रईपुर के श्री रावतपुरा सरकार इंस्टीट्यूट ऑफ मेडिकल साईंसेस एंड रिसर्च म छापा मारे रिहीन। आरोप हे कि कालेज के डायरेक्टर अतुल कुमार तिवारी ह संस्थान के पक्ष म रिपोर्ट बनवाय बर निरीक्षण टीम के प्रमुख डॉक्टर मंजप्पा सीएन ल पचपन लाख रूपिया के रिस्वत के पेसकस करे रिहीन। रिस्वत के पइसा ल हवाला के जरिये डॉक्टर मंजप्पा ल देना तय होय रिहीस। जेखर बाद सीबीआई ह पूरा मामला के पर्दाफास करीन। ए मामला म राष्ट्रीय चिकित्सा आयोग-एनएमसी के अधिकारी, स्वास्थ्य अउ परिवार कल्याण मंत्रालय के अधिकारी अउ कतकोन निजी मेडिकल कालेज के डायरेक्टर के संग डॉक्टर सामिल हे। सीबीआई ह ए मामला म रईपुर ले अब तक छै लोगन मन ल गिरफ्तार करे हे, जेमा चार डॉक्टर अउ दू माईलोगिन कांस्टेबल घलो सामिल हे।
इही बीच, सबो आरोपी मन ल सीबीआई के बिसेस कोर्ट म पेस करे गीस, जिहां ले अदालत ह ओमन ल सात जुलाई तक रिमांड म भेज देहे।

हज यात्रा-आवेदन

केन्द्रीय अल्पसंख्यक कार्यमंत्री किरेन रिजिजू ह किहीन हे कि सरकार एक हफ्ता म बछर दू हजार छब्बीस बर हज आवेदन स्वीकार करना सुरू कर दिही। आज नई दिल्ली म हज समीक्षा बइठका के बाद श्री रिजिजू ह सबो आवेदक मनले फार्म भर के समय-सीमा के अंदर आवेदन जमा करे के अनुरोध करीन। ओमन ह भारती हज कमेटी ल समय-सीमा ले पहिली सउदी अरब सरकार ल भुगतान जमा करे के निरदेस देहे। श्री रिजिजू ह किहीन कि पैंसठ बछर ले जादा उमर के हज यात्री मनके देखभाल बर एक संगवारी के होना जरूरी हे।

उपमुख्यमंत्री-सुकमा

सुकमा जिला के सुदूर क्षेत्र के आत्मसमर्पित माओवादी मन ल कौशल विकास के चलत राजमिस्त्री, कृषि उद्यमी के संग आने रोजगारमूलक काम के प्रसिक्षण दे जावत हे। उपमुख्यमंत्री विजय शर्मा आज सुकमा पहुंचिन अउ ओमन ह प्रसिक्षण के जघा जाके आत्मसमर्पित माओवादी मनके संग गोठबात करीन। ए बेरा म श्री शर्मा ह अधिकारी मन ल आत्मसमर्पित माओवादी मनके आधार कार्ड, राशन अउ आयुष्मान कार्ड के अलावा बैंक खाता के संग सबो प्रकार के जरूरी दस्तावेज पुनर्वास केंद्र म ही बनवा के देके निरदेस दीन। ए दउरान उप मुख्यमंत्री ल आत्मसर्पित माओवादी मन ह बतइन कि प्रसिक्षण ले पहिली ओमन गुमराह रिहीन अउ जंगल म भटकत रिहीन। फेर समाज के मुख्यधारा ले जुड़के ओमन आत्मनिर्भर बने के परयास करत हे।

विशेष-प्लेसमेंट कैंप

विशेष रोजगार कार्यालय दिव्यांगजन बर रोजगार के अवसर सुनिश्चित करे के उद्देस्य ले मेगा प्लेसमेंट कैंप के आयोजन सात जुलाई के रईपुर के सड्डू स्थित शासकीय आईटीआई म करे जाही। ए संबंध म बिसेस रोजगार अधिकारी डॉक्टर शारदा वर्मा ह जानकारी दे हे कि कैंप बिहनिया ग्यारा बजे ले मंझनिया तीन बजे तक आयोजित होही। ए प्लेसमेंट कैंप म बीस आने-आने निजी क्षेत्र के राईसमिल, पेट्रोल पंप, स्पंज आयरन, वेयर हाउस के संग प्रतिष्ठित कंपनी मन डहार ले अस्थिबाधित दिव्यांगजन मनके भर्ती करे जाही। इंखर काम के जघा उरला, सिलतरा अउ रईपुर शहर होही। ए संबंध म जादा जानकारी बर दिव्यांगजन कार्यालय के दूरभाष नंबर सून्य सात-सात एक-चार सून्य चार-चार सून्य आठ एक म संपर्क कर सकत हे।

सीयूईटी-परिणाम

नेशनल टेस्टिंग एजेंसी ह आज कॉमन यूनवर्सिटी एंटें्रस टेस्ट-सीयूईटी दू हजार पच्चीस के परिणाम घोसित कर देहे। ए परीक्षा देस के आने-आने केंद्रीय विश्व विद्यालय अउ आने शिक्षण संस्थान मन म स्नातक अउ स्नातकोत्तर कारीकरम म प्रवेस बर आयोजित करे जात हे।

बीजापुर-गुणवत्ता आश्वासन मानक प्रमाणन

बीजापुर जिला के तुमनार स्थित आयुष्मान आरोग्य मंदिर ल राष्ट्रीय गुणवत्ता आश्वासन मानक प्रमाणन म छियानवे प्रतिसत ले जादा अंक पाय बर गुणवत्ता प्रमाण पत्र मिले हे। स्वास्थ्य मंत्री श्याम बिहारी जायसवाल ह ए   उपलब्धि बर खुसी जतात हुए किहीन कि ए जिला बर गरब के बात हे। ओमन किहीन कि सरकार के लक्ष्य हे कि राज्य के हर एक मनखे ल उच्च गुणवत्ता वाला स्वास्थ्य सेवा उपलब्ध हो।

दुर्घटना-मौत

कोरबा जिला के सिविल लाइन थाना क्षेत्र म नशा म धुत एक कार चालक ह दू मोटर साइकिल अउ एक साइकिल ल टक्कर मार दीस। ए हादसा म तीन लोगन मनके मउका म ही मउत होगिस। फेर आने तीन लोगन गंभीर रूप ले घायल हो गेहे। घायल मन ल इलाज बर अस्पताल म भर्ती कराय गेहे।

विषाक्त भोजन-मौत

गौरेला-पेण्ड्रा-मरवाही जिला के सेमरदर्री ग्राम पंचायत के भाठाटिकरा गांव म जहर वाला खाना खाय ले एक परिवार के चार सदस्य बीमार होगिस, जेमा ले एक युवती के इलाज के दउरान आज मउत होगिस। फेर आने तीन लोगन मनके इलाज अस्पताल म चलत हे। स्वास्थ्य विभाग के टीम ह घटना के कारण के जांच सुरू कर देहे।

बातों-बातों में

प्रादेसिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ म ए बखत जल संरक्षण अउ  प्रबंधन उपर भू-जल वैज्ञानिक विपिन दुबे ले लेगे भेंटवार्ता के प्रसारण करे जाही। ए कारीकरम के प्रसारण काली पांच जुलाई के एफएम चैनल म बिहनिया नौ बजे ले करे जाही अउ प्रायमरी चैनल म ए कारीकरम के प्रसारण बिहनिया साढ़े दस बजे ले करे जाही। एला छत्तीसगढ के सबो आकाशवाणी केंद्र मन ह एके संघरा रिले करही।

मोहर्रम

प्रदेस म छै जुलाई के मोहर्रम श्रध्दा अउ आस्था के संग मनाय जाही। एखर पहिली आने-आने जघा मन म तकरीर कारीकरम के आयोजन करे जात हे। उहें, कारीगर ताजिया ल आखिरी रूप दे म लगे हे। भिलाई के खुर्सीपार म दस दिवसीय शिया तकरीर कारीकरम के आयोजन करे जात हे। तकरीर कारीकरम के दउरान अंजुमन हुसैनिया कमेटी डहार ले समाज के होनहार लइका मन ल सम्मानित करे गीस। ए कारीकरम म रक्तदान सिविर के आयोजन घलो करे गीस। कमेटी के सदस्य कमालुद्दीन अशरफी ह बतइन कि ए कारीकरम कतकोन बछर ले आयोजित करे जात हे।

जीआरपी-मोबाइल

रईपुर के रेलवे पुलिस जीआरपी ह यात्री मनके चोरी होय पचहत्तर मोबाइल फोन ल बरामद कर ले हे। इंखर कीमत करीब बीस लाख रूपिया आंके गेहे। रेलवे पुलिस के टीम ह ए फोन छत्तीसगढ़ के संग मध्यप्रदेस, महाराष्ट्र, ओडिसा जइसन राज्य ले ढूंढे हे। आज रईपुर के रेलवे पुलिस अधीक्षक कार्यालय म ए मोबाइल इंखर मालिक मन ल लौटाय गीस।