डीएपी-वैकल्पिक व्यवस्था
राज्य सरकार ह डीएपी के कमी ल पूरा करे के वैकल्पिक व्यवस्था करे हे। किसान मन ल डीएपी के जघा विकल्प के रूप म एनपीके अउ एसएसपी खाद सोसायटी के जरिया ले उपलब्ध कराय जाही। सरकार ह तीन लाख दस हजार मीट्रिक टन एनपीके अउ एक लाख अस्सी हजार एसएसपी खाद के वितरण के लक्ष्य राखे हे। सोसायटी मन ले किसान मन ल उंखर मांग के अनुसार खाद बीज के उपलब्धता सुनिश्चित हो एखर उपर कड़ा नजर राखे जात हे।
मुख्यमंत्री विष्णुदेव साय ह किहीन कि डीएपी खाद के कमी ल लेके किसान मन ल परेसान होय के जरूरत नइ हे। एखर विकल्प के रूप म राज्य सरकार डहार ले आने रासायनिक उर्वरक जइसे-एनपीके अउ एसएसपी के व्यवस्था सुनिश्चित करे गेहे।
मुख्यमंत्री-समीक्षा बैठक
मुख्यमंत्री विष्णुदेव साय ह आज मंत्रालय म इलेक्ट्रानिक्स अउ सूचना प्रौद्योगिकी विभाग के समीक्षा बइठका लीन। बइठका म ओमन ह संबंधित अधिकारी मन ल प्रदेस के दूरिहा के जघा, बिसेस रूप ले बस्तर अउ सरगुजा संभाग म नवा मोबाइल टावर लगाय अउ फाइबर नेटवर्क लाइन बिछाय के काम म तेजी लाय के निरदेस दीन। ओमन ह किहीन कि अवइया समय म राज्य म पांच हजार ले जादा मोबाइल टावर लगाय के लक्ष्य राखे गेहे। मुख्यमंत्री ह किहीन कि ई-डिस्ट्रिक्ट ‘‘टू प्वॉइंट ओ‘‘ के जरिया ले वर्तमान म आने-आने विभाग के पच्यासी ऑनलाइन सेवा के बिस्तार करत हुए दू सौ पचास ऑफलाइन सेवा ल घलो ऑनलाइन सेवा म बदले जाही। ओमन ह किहीन कि योजना के लाभ लोगन मन ल घर बइठे ही ऑनलाइन मिलही, जेखर ले समय बांचही अउ कार्यालय आय-जाय म होवइया खर्च घलो कम होही।
लंबित मामले-अभियान
प्रदेस म लंबित मामला के निराकरण करे बर ‘‘मध्यस्थता राष्ट्र के लिए‘‘ अभियान चलाय जाही। ए अभियान ल प्रभावी तरीका ले चलाय बर काली छत्तीसगढ़ उच्च न्यायालय के मुख्य न्यायाधीश रमेश सिन्हा के अध्यक्षता म वर्चुअल बइठका होइस। ए बेरा म ओमन ह किहीन कि मध्यस्थता ले लंबित मामला के संख्या म कमी लाय जा सकत हे अउ पक्षकार मन ल संतोष जनक समाधान मिल सकत हे। ओमन ह सबो न्यायालय ल जादा ले जादा मामला के मध्यस्थता बर चिन्हे अउ रेफरल प्रक्रिया ल व्यवस्थित रूप ले लागू करे के निरदेस दीन।
फार्मेसी काउंसिल-निर्णय
छत्तीसगढ़ स्टेट फार्मेसी काउंसिल ह फीस बढ़ाय के निर्णय वापस ले लेहे। बाढ़े हुए फीस म दुबारा बिचार बर काली रईपुर म होय काउंसिल के बइठका म सबो सदस्य मन ह आने-आने बिन्दु उपर पुनर्विचार करके निर्णय लीस कि फीस म कोनो प्रकार के बढ़ोत्तरी नइ करे जाही। बइठका म ए फइसला घलो ले गीस कि कोविड महामारी काल म घटाय गे पंजीयन नवीनीकरण सुल्क ल तीन सौ रूपिया के जघा म पांच सौ रूपिया करे जाही।
जानबा के मुताबिक छत्तीसगढ़ स्टेट फार्मेसी काउंसिल ह पाछू आठ मई के नवा पंजीयन अउ नवीनीकरण के संग आने फीस ल बढ़ाय के निर्णय ले रिहीस।
चावल वितरण-समयावधि
खाद्य नागरिक आपूर्ति अउ उपभोक्ता संरक्षण विभाग ह सार्वजनिक वितरण प्रणाली के तहत जून ले अगस्त महिना तक के एकमुस्त चावल वितरण के समय अवधि ल इकतीस जुलाई तक बढ़ा देहे। ए संबंध म सबो जिला कलेक्टर अउ छत्तीसगढ़ स्टेट सिविल सप्लाईज कार्पोरेसन के प्रबंध संचालक मन ल निरदेस जारी कर दे गेहे।
पूर्व राज्यपाल-निधन
छत्तीसगढ़ के पूर्व राज्यपाल शेखर दत्त के काली संझा निधन होगिस। खराब स्वास्थ्य के चलत ओमन ल दिल्ली के एम्स म भर्ती कराय गे रिहीस। शेखर दत्त छत्तीसगढ़ के चौंथा राज्यपाल रिहीन। उंखर कार्यकाल तेईस जनवरी दू हजार दस ले चौदह जुलाई दू हजार चौदह तक रिहीस। शेखर दत्त भारतीय प्रशासनिक सेवा के उन्नीस सौ उनहत्तर बैच के मध्य प्रदेस कैडर के अधिकारी रिहीन। श्री दत्त भारतीय थल सेना म श्ॉार्ट सर्विस कमीशन अधिकारी रिहीन अउ बछर उन्नीस सौ इकहत्तर म भारत पाक युध्द म शौर्य बर सेना पदक घलो पाय रिहीन।
पूर्व राज्यपाल शेखर दत्त के निधन म आज रईपुर स्थित राजभवन म शोक सभा के आयोजन करे गीस।
विजय शर्मा-जवान मुलाकात
उपमुख्यमंत्री विजय शर्मा ह आज बीजापुर जिला के भैरमगढ़ विकासखंड के गांव फुंडरी म केंद्रीय रिजर्व पुलिस बल-सीआरपीएफ के जवान मनले मुलाकात करके उंखर हौसला बढ़ाइन। ए दउरान ओमन ह जवान मनके कर्तव्यनिष्ठा, साहस अउ समर्पण के सराहना करत हुए किहीन कि ए जवान मनले माओवाद प्रभावित क्षेत्र मन म सांति स्थापित करे अउ शासन के योजना ल आम लोगन तक पहुंचाय म जरूरी भूमिका निभाय हे। ए बेरा म बस्तर रेंज के पुलिस महानिरीक्षक सुंदरराज पी., डीआईजी कमलोचन कश्यप, कलेक्टर संबित मिश्रा, पुलिस अधीक्षक डॉक्टर जितेन्द्र यादव के संग सीआरपीएफ अउ पुलिस विभाग के वरिष्ठ अधिकारी मन मौजूद रिहीन।
थाईबॉक्सिंग चैंपियनशिप-पदक
तेलंगाना के खैराताबाद म होवइया ग्यारहवां राष्ट्रीय थाई बॉक्सिंग चैंपियनशिप म नक्सल प्रभावित दंतेवाड़ा जिला के नूपुर ठाकुर, छाया नाग अउ नेहल ठाकुर ह स्वर्ण पदक जीतिन। तीन दिवसीय ए राष्ट्रीय प्रतियोगिता म देसभर के आठ राज्य ले लगभग डेढ़ सौ खिलाड़ी मन ह भाग लीन, जेमा छत्तीसगढ़ के चौदह खिलाड़ी मन ह पदक हासिल करीन।
पदक जीतइया ए तीनों खिलाड़ी मन ह आज दंतेवाड़ा जिला के कलेक्टर कुणाल दुदावत ले मुलाकात करीन।
बारिश
प्रदेस के कुछेक जिला म पाछू तीन-चार दिन ले होवत बरसा के सेति सामान्य जनजीवन म असर पड़त हे। बस्तर जिला म पाछू तीन दिन ले होवत सरलग बरसा के चलत इंद्रावर्ती नदी के जलस्तर बाढ़ गेहे। उहें, चित्रकोट जलप्रपात पूरा वेग के संग बहत हे।
ऐति, कोरबा जिला म घलो लगातार बरसा के सेति बालको नगर के आने-आने जघा म जलजमाव के स्थिति बन गेहे। उहें, शांति नगर क्षेत्र म घलो लोगन मन के घर म पानी भर गेहे। एखर ले नाराज लोगन मन ह आज बालको रिंग रोड म चक्काजाम कर दीन। सूचना मिलत ही कोरबा के महापौर संजूदेवी राजपूत निगम अधिकारी मनके संग सांति नगर के प्रभावित क्षेत्र म पहुंचिन अउ परिवार मनले मिलके स्थिति के जायजा लीन।
रायगढ़ जिला म आज बिहनिया ले सरलग बरसा होय के सेति निचला बस्ती के कतकोन घर म पानी भर गीस। नगर निगम के लगभग दू सौ लोगन के टीम राहत अउ बचाव काम म जूट गेहे।
उहें, मुंगेली जिला म घलो आज बिहनिया ले होवत झमाझम बरसा के चलत लोगन मन ल गर्मी अउ उमस ले राहत मिले हे। सड़क म पानी भरे ले स्कूल-कालेज जवइया विद्यार्थी अउ ऑफिस जाने वाला लोगन मन ल परेसानी के सामना करे ल पड़त हे। उहें, खेती-किसानी के काम म तेजी आ गेहे।
इही बीच, मौसम विभाग ह अवइया चौबीस घंटा के दउरान प्रदेस म कतकोन जघा म हल्का ले मध्यम बरसा होय अउ गरज-चमक के संग छींटा पड़े के संभावना जताय हे। उहें, उत्तर अउ दक्षिण छत्तीसगढ़ म एक-दू जघा म गरज-चमक के संग अंधड़ चले, गाज गिरे अउ भारी बरसा होय के चेतावनी देहे।
ईओडब्ल्यू-छापा
मध्यप्रदेस के आर्थिक अपराध अन्वेषण ब्यूरो-ईओडब्ल्यू के टीम ह जीएसटी घोटाला म गौरेला-पेण्ड्रा-मरवाही जिला के कोयला कारोबारी शेख जफर ल गिरफ्तार कर ले हे। ए व्यापारी उपर फर्जी दस्तावेज बनाके करोड़ो रूपिया के कोयला बेचे के आरोप हे। ईओडब्ल्यू के जांच म करीब तेईस फर्जी फर्म अउ कंपनी के खुलासा होय हे। इही कंपनी अउ फर्म मन बर कोयला कारोबारी ह डेढ़ सौ ले जादा बैंक खाता के उपयोग करे हे। ओ हा इही खाता के जरिया ले करीब पांच सौ बारह करोड़ रूपिया के फर्जी बिलिंग करे हे। पूछताछ म कोयला कारोबारी ह बतइन कि ओ हा मास्टर माइंड विनोद कुमार सहाय बर काम करथे। र्ईओडब्ल्यू के टीम ह विनोद कुमार सहाय ल पाछू पच्चीस जून के झारखंड के रांची ले गिरफ्तार करे रिहीन।