मुख्यमंत्री विष्णुदेव साय ह काली मंत्रालय म अवइया खरीफ मौसम ल देखत खातू अउ बीजा के उपलब्धता ल लेके अधिकारी मनके बइठका लीन। बइठका म मुख्यमंत्री ह प्रदेस के किसान मन ल जरूरत के मुताबिक खातू के आपूर्ति करे के निरदेस दीन। ओमन बिसेस रूप ले डीएपी के जघा म एनपीके खातू ल बउरे अउ किसान मन ल एखर फायदा के जानकारी देबर किहीन। श्री साय ह कलेक्टर मन कोति ले जिलावार सहकारी समिति म खातू के उपलब्धता अउ ओला बांटे म निगरानी के संग समीक्षा के निरदेस दीन। ओमन कमती गुणवत्ता अउ नकली खातू बेचे म संसो जतावत किहीन कि अइसन मामला म कड़ा कार्रवाई करे जाय।
जीएसटी-बैठक
मुख्यमंत्री विष्णुदेव साय ह आज मंत्रालय म वाणिज्यिक कर विभाग के समीक्षा बइठका लीन। बइठका म ओमन विभाग के कामकाज अउ राजस्व संग्रहण के जानकारी ली। ओमन अधिकारी मन ल कर संग्रहण बढ़ाए के उपाय म काम करे के निरदेस दीन। मुख्यमंत्री ह किहीन कि जउन लोगन कर के चोरी करथे, उंखर खिलाफ सख्त कार्रवाई करत वसूली करे जाए। श्री साय ह फरजी बिल, दोहरा बहीखाता प्रणाली अउ गलत टैक्स दर के उपयोग करके अनुचित फायदा लेवइया मन उपर कार्रवाई करे बर किहीन। ओमन विभाग के नवाचारी पहल के प्रसंसा करत किहीन कि जीएसटी पंजीकरण के औसत समय-सीमा ल तेरह दिन ले घटाके दू दिन कर दे गेहे।
बइठका म अधिकारी मन ह बतईन कि पाछु वित्तीय बछर म राज्य ल जीएसटी अउ वैट ले कुल तेईस हजार चार सौ अड़तालीस करोड़ रूपिया के कर राजस्व मिले हे। जउन राज्य के कुल कर राजस्व के अड़तीस प्रतिशत हावय। अधिकारी मन बतईन कि छत्तीसगढ़ ह अट्ठारा प्रतिशत के जीएसटी वृद्धि दर पाए हे, जउन देस म सबले जादा हे।
बइठका म वित्त अउ वाणिज्यिक कर मंत्री ओ.पी. चौधरी अउ मुख्य सचिव अमिताभ जैन समेत आने अधिकारी मौजूद रिहीन।
मुख्यमंत्री-चिकित्सक दिवस
राष्ट्रीय चिकित्सक दिवस के मउका म काली रईपुर के स्वर्गीय अटल बिहारी वाजपेयी ऑडिटोरियम म राखे गे कार्यक्रम म मुख्यमंत्री विष्णुदेव साय संघरीन। ए बेरा म श्री साय ह कोरोना महामारी म मउत होय चौदह झिन डॉक्टर के परिवार वाले मन ल सम्मानित करीन। मुख्यमंत्री ह किहीन कि चिकित्सक मनके सेवा भावना ह स्वस्थ छत्तीसगढ़ बनाय म योगदान देहे। ओमन यहू किहीन कि ए आयोजन सिरिफ चिकित्सा समुदाय बर सरकार के प्रतिबद्धता बताथे, भलूक यहू बताथे कि छत्तीसगढ़ राज्य सरलग स्वास्थ्य सेवा के क्षेत्र म नवा ऊंचाई छूही। कार्यक्रम म राष्ट्रीय स्वास्थ्य मिशन के एक सौ नौ संविदा चिकित्सक अउ पांच सौ तिरसठ अनुबंधित चिकित्सक मन ल नियुक्ति पत्र अउ पदस्थापना आदेश जारी करे गीस। कार्यक्रम म स्वास्थ्य मंत्री श्यामबिहारी जायसवाल ह अपन बात राखीन।
शासकीय सेवक-निवेश
सामान्य प्रशासन विभाग ह छत्तीसगढ़ सिविल सेवा आचरण नियम म फेरबदल करे हे। एमा अब राज्य के सासकीय सेवक मन ल शेयर, प्रतिभूति, डिबेंचर्स अउ म्यूचल फंड म निवेस करे के मंजूरी दे गेहे। फेर, अधिसूचना म ए स्पष्ट करे गेहे कि इंट्रा-डे ट्रेडिंग, बीटीएसटी, फ्यूचर एंड ऑप्शंस अउ क्रिप्टोकरेंसी जइसे निवेस म रोक लागू रइही।
हर घर मुनगा अभियान
महिला अउ बाल विकास मंत्री लक्ष्मी राजवाड़े ह आज नवा रईपुर अपन निवास ले ‘‘मोर गोठ ल सुन गा, हर घर मुनगा‘‘ अभियान के सुभारंभ करीन। ए दउरान श्रीमती राजवाड़े ह प्रचार वाहन ल हरियर झंडी दिखाके रवाना करीन। उहें, मुनगा के पौधारोपण करके ए अभियान के औपचारिक सुरूआत करीन। ए मउका म ओमन कहिन कि मुनगा एक पौष्टिक साग हरय। उहें, ए ह लइका अउ महतारी मन म पोषण स्तर ल सुधारे म महत्ता के भूमिका निभाही।
सीबीआई-कार्रवाई
केन्द्रीय अन्वेषण ब्यूरो-सीबीआई ह तीन झिन डॉक्टर समेत छह झिन ल गिरफ्तार करे हे। उंखर मन उपर रिश्वत लेके अनुकूल जांच रिपोर्ट प्रस्तुत करे म मदद देके आरोप हे। ए मामला म नवा रायपुर के श्री रावतपुरा सरकार चिकित्सा विज्ञान अउ अनुसंधान संस्थान के तीन झिन अधिकारी अउ आने लोगन के खिलाफ मामला दरज करे गे रिहीस। ओमा जांच करइया डॉक्टर अउ बिचौलिया सामिल हे, जिखर मन उपर कथित रूप म रिश्वत लेके वैधानिक जांच के कामकाज म गड़बड़ी करे के आरोप हवय। जानकारी के मुताबिक जिखर मन उपर कार्रवाई होय हे, ओमा रावतपुरा मेडिकल कॉलेज के प्रशासनिक निदेशक अतुल तिवारी अउ सहायक प्राध्यापक डॉक्टर अतीन कुंडू सामिल हे।
बताय जात हे कि ए मामला म नामित मूल्यांकनकर्ता मन ह कथित रूप म रिश्वत लेके आने-आने मेडिकल कॉलेज ल अनुकूल रिपोर्ट दीन। एखर सूचना मिले म सीबीआई ह जाल बिछईस अउ रिश्वत के रकम के लेनदेन करत छै झिन ल गिरफ्तार करीन। सीबीआई ह ए मामला म छत्तीसगढ़ समेत कर्नाटक, राजस्थान, उत्तरप्रदेश, दिल्ली अउ मध्यप्रदेश म चालीस ले जादा जघा म तलासी अभियान घलो चलईन।
एम्स-कोविड टीका
भारतीय आयुर्विज्ञान अनुसंधान परिषद अउ अखिल भारतीय आयुर्विज्ञान संस्थान-एम्स ह केहे हे कि कोरोना के टीका अउ युवा मन म होवत औचक मउत के बीच कोनों किसम के संबंध नई हे। देस के दू परमुख चिकित्सा अनुसंधान संस्थान के व्यापक अध्ययन म एखर पुष्टि होय हे कि भारत म बउरे गे कोविड ेके टीका सुरक्षित अउ परभावी रेहे हे। एखर गंभीर दुष्परभाव के बहुत कमती मामला मिले हे। भारत म अचानक हृदय संबंधी मउत के ए घटना ल अनुवांसिकी, जीवनसैली अउ कोविड के बाद के जटिल समस्या समेत कतकोन आने कारण ल जिम्मेदार बताए जा सकथे।
कोंडागांव-ऑनलाइन ठगी
साइबर ठगी के मामला म कोंडागांव जिला के फरसगांव पुलिस ह ग्यारह ठिन राज्य म करोड़ों रूपिया के ऑनलाइन ठगी करइया अंतर्राज्यीय गिरोह के पांच झिन सदस्य ल गिरफ्तार करे हे। जिला के पुलिस अधीक्षक वाय. अक्षय कुमार ह बतईन कि ए आरोपी मन उपर करीबन एक करोड़ सत्तर लाख रूपिया के साइबर धोखाधड़ी करे के आरोप हवय अउ एमन ल छत्तीसगढ़ के बिलासपुर अउ उत्तरप्रदेश के प्रयागराज ले गिरफ्तार करे गेहे।
गांजा-जब्त
महासमुंद जिला के कोमाखान पुलिस ह एक ट्रक ले पांच सौ किलो गांजा जब्त करे हे। ए मामला म पुलिस ह ट्रक ड्राईवर ल गिरफ्तार करे हे। जानकारी के मुताबिक कोमाखान पुलिस ल मुखबिर ले सूचना मिलीस कि एक मनखे ओड़िशा ले ट्रक म गांजा लेके महासमुंद कोति आवत हे। एखर बाद पुलिस ह टेमरी नाका तीर ट्रक ल रोक के जांच करीन। ए दउरान बोरी मन म लुकाय गांजा बरामद करे गीस।
बारिश
प्रदेस के कुछेक जिला म पाछु दू-तीन दिन ले होवत सरलग बरसा ले जनजीवन प्रभावित होय हे। कोरबा जिला म पाछु दू दिन ले चलत बरसा के सेती हसदेव नंदियां के जलस्तर बाढ़ गेहे। उहें, ढोढ़ीपारा के भैंस खटाल बस्ती म पाछु रतिहा एक घर के छत ढह गे। एमा काखरो हताहत होय के खबर नइ हे। जानकारी मिलतेच पार्षद ह घटना के जघा म जाके जांच करीन। उहें, मौसम विभाग ह जिला म भारी बरसा होय के संभावना जताय हे।
ओति, जांजगीर-चांपा जिला म पाछु अड़तालीस घंटा ले होवत सरलग बरसा के सेती कतकोन निचली बस्ती म पारी भर गेहे।
उहें, सक्ती जिला म पाछु तीन दिन ले रूक-रूकके बरसा होय अउ हवा-गरेर के सेती कतकोन जघा पेड़ गिर गेहे, जेखर ले अवई-जवई परभावित होय हे।
बलरामपुर जिला म घलो सरलग बरसा के सेती नंदिया-नरवा उफान पर हवय। आज गेउर नंदिया ल पार करत बेरा एक मनखे पानी म बोहागे, जेखर ले उंखर मउत होगे। उहें, काली राजपुर क्षेत्र के गागर नंदिया म फंसे तीन झिन पहाड़ी कोरवा लइका मन ल गांव ले लोगन मन सुरक्षित बाहिर निकालिन। एखर पहिली, शंकरगढ़ थाना क्षेत्र के एक नरवा ल पार करत बेरा महतारी-बेटा बोहा गे रिहीन, जिखर सव काली बरामद करे गीस।