केन्द्रीय मंत्रिमंडल-निर्णय
केन्द्रीय मंत्रिमंडल ह विनिर्माण म ध्यान देवत सबो क्षेत्र म रोजगार पैदा करे अउ सामाजिक सुरक्षा बर रोजगार ले जुड़े प्रोत्साहन योजना ल मंजूरी दे देहे। सूचना अउ प्रसारण मंत्री अश्विनी वैष्णव ह आज नई दिल्ली म मीडिया ल बतईन कि ए योजना म पहिली घांव नौकरी म आय कर्मचारी मन ल एक महीना के वेतन पन्द्रह हजार रूपिया तक मिलही। ओमन किहीन कि विनिर्माण क्षेत्र म दू बछर बर विस्तारित लाभ के संग उपरहा रोजगार पैदा करे बर नियोक्ता मन ल दू बछर तक प्रोत्साहन लाभ दे जाही।
श्री वैष्णव ह बतईन कि केन्द्रीय मंत्रिमंडल ह एक लाख करोड़ रूपिया के निधि के संग अनुसंधान विकास अउ नवाचार योजना ल घलो मंजूरी दीन हे। देस म खेल परिदृश्य ल बदले अउ खेल गतिविधि संग नागरिक मन ल सशक्त बनाय बर राष्ट्रीय खेल नीति ल घलो मंजूरी दे गेहे। ओमन किहीन कि ए नीति के लक्ष्य भारत ल खेल के क्षेत्र म दुनिया के बड़े पांच राष्ट्र म सामिल करना हे।
लॉजिस्टिक हब
राज्य मंत्रिमंडल के काली होय बइठका म छत्तीसगढ़ लॉजिस्टिक्स नीति ल मंजूरी दे गीस। ए नवा नीति म लॉजिस्टिक क्षेत्र म निजी निवेस ल बढ़ावा दे जाही। एखर बर राज्य सरकार एक सौ चालीस करोड़ रूपिया तक अनुदान राशि अउ कतकोन रियायत दीही। सरकार के लक्ष्य छत्तीसगढ़ ल देस के प्रमुख लॉजिस्टिक्स हब के रूप म बढ़ाना हे, जेखर ले उद्योग, व्यापारी अउ किसान मन ल सस्ता अउ आधुनिक भंडारण के सुविधा मिल सकय। ए नीति म ड्राइ पोर्ट, कंटेनर डिपो अउ एयर कार्गो टर्मिनल के स्थापना ले स्थानीय उद्योग अउ उत्पादक मन ल निर्यात बाजार तक पहुंच के मउका मिलही। संगेसंग वन संसाधन, वनोपज अउ औषधीय पौधा बर निर्यात के नवा रस्ता खुलही। उहें, युवा मन बर रोजगार के नया अवसर मिलही।
रेल किराया
रेल मंत्रालय ह यात्री रेल सेवा किराया म आज ले बदलाव लागू करे हे। गैर-एसी मेल अउ एक्सप्रेस रेलगाड़ी के किराया म थोरकुन बढ़ोतरी करे गेहे। एखर किराया एक पैसा प्रति किलोमीटर अउ एसी श्रेणी म दू पइसा प्रति किलोमीटर बढ़ाय गे हवय। मंत्रालय ह बताय हे कि उपनगरीय एकल यात्रा किराया अउ मासिक सीजन टिकट म कोनों बढ़ोतरी नइ होही। आरक्षण सुल्क, सुपर फास्ट प्रभार अउ दूसर सुल्क म घलो कोनों बदलाव नइ होही। ए कदम के उद्देश्य रेल किराया ल युक्ति संगत बनाना अउ यात्री सेवा बर वित्त पोषण ल बढ़ाना हे।
मुख्यमंत्री-सिंगल विंडो सिस्टम
मुख्यमंत्री विष्णुदेव साय ह आज रईपुर म आयोजित छत्तीसगढ़ इंडस्ट्री डायलॉग-टू कार्यक्रम म ‘‘वन क्लिक सिंगल विंडो सिस्टम टू प्वॉइंट ओ‘‘ के सुरूआत करीन। ए प्रणाली ऑनलाइन आवेदन, विभागीय अनुमोदन अउ सब्सिडी वितरण ल एकीकृत करही। ए मउका म मुख्यमंत्री ह किहीन कि छत्तीसगढ़ अब कोर सेक्टर तक ही सीमित नइ हे। फेर, सेमीकंडक्टर, कृत्रिम बुद्धिमत्ता, फार्मा, रक्षा, अंतरिक्ष प्रौद्योगिकी अउ नवीकरणीय ऊर्जा स्त्रोत जइसन अति आधुनिक उद्योग के राष्ट्रीय केन्द्र बने बर तैयार हे। श्री साय ह किहीन कि इज ऑफ डूइंग बिजनेस म छत्तीसगढ़ देस के अग्रणी राज्य बनही।
केन्द्रीय मंत्री-पत्रकारवार्ता
केन्द्रीय सामाजिक न्याय अउ अधिकारिता राज्यमंत्री रामदास अठावले ह आज एक दिन के दउरा म आज छत्तीसगढ़ पहुंचीन। ए दउरान पत्रकार मन ले गोठबात करत ओमन ह केन्द्र सरकार डहार ले देस म जाति जनगणना कराय के फइसला ल ऐतिहासिक किहीन। ओमन किहीन कि एखर ले सबो जाति के सही जनसंख्या के पता चलही।
कांग्रेस उपर निसाना साधत श्री अठावले ह किहीन कि जाति जनगणना के मांग बहुत बेरा ले करे जावत रिहीस, फेर कांग्रेस ह सत्ता म राहत तक कोनों फइसला नइ लीस। ओमन सुझाव दीन कि स्कूल मन म हिन्दी लागू होना चाही, लेकिन कक्षा पहली ले छठवीं तक क्षेत्रीय भाखा ल ही प्राथमिकता मिलना चाही। ओमन प्रधानमंत्री नरेन्द्र मोदी के प्रयास के तारीफ करत किहीन कि केन्द्र सरकार अनुसूचित जाति अउ जनजाति के लोगन बर कतकोन योजना चलावत हे।
अपन छत्तीसगढ़ प्रवास के दउरान केन्द्रीय सामाजिक न्याय अउ अधिकारिता राज्यमंत्री रामदास अठावले ह मुख्यमंत्री विष्णुदेव साय ले घलो भेंट करीन। ए मउका म मुख्यमंत्री ह केन्द्रीय राज्यमंत्री ले सामाजिक अउ सैक्षणिक रूप ले पिछड़े वर्ग, वृद्धजन अउ दिव्यांगजन बर संचालित योजना के बारे म चर्चा करीन।
सहकारिता-कार्यशाला
केन्द्रीय सहकारिता मंत्री अमित शाह के अध्यक्षता म काली नई दिल्ली म सबो राज्य के सहकारिता मंत्री अउ विभाग के सचिव मनके राष्ट्रीय कार्यशाला आयोजित करे गीस। एमा छत्तीसगढ़ के सहकारिता मंत्री केदार कश्यप अउ सचिव डॉक्टर सी.आर. प्रसन्ना सामिल होइन। कार्यशाला म बताय गीस कि सहकार से समृद्धि के योजना अउ कार्यक्रम ल सबो राज्य के पैक्स सोसायटी, दुग्ध अउ वनोपज समिति म लागू करे गेहे। उहें, सबो पैक्स ल कॉमन सर्विस सेंटर के रूप म विकसित करे जावत हे।
कार्यशाला म विभागीय मंत्री श्री कश्यप ह छत्तीसगढ़ म सहकार से समृद्धि के प्रगति उपर प्रतिवेदन देवत किहीन कि प्रदेस म साढ़े सात सौ नवा मत्स्य, दुग्ध अउ वनोपज समिति बनाय गे हवय। संगेसंग पांच सौ बत्तीस नवा पैक्स बनाय के प्रक्रिया चलत हे। ओमन बतईन कि प्रदेस म एक लाख किसान मनके खाता को-आपरेटिव्ह बैंक म खोले गे हवय। उहें, एक लाख किसान मन ल किसान क्रेडिट कार्ड जारी करे गेहे। श्री कश्यप ह बतईन कि प्रदेस म दू हजार अट्ठाईस पैक्स सोसायटी के कम्प्यूटीकरण अउ डिजिटलाइजेशन करे गेहे।
डॉक्टर डे/चार्टर्ड अकाउंटेंट्स दिवस
देस म आज डॉक्टर्स डे अउ चार्टर्ड अकाउंटेंट्स दिवस मनाय जावत हे। प्रधानमंत्री नरेन्द्र मोदी ह ए मउका म सबो डॉक्टर अउ सीए मन ल सुभकामना दीन हे।
छत्तीसगढ़ के स्वास्थ्य मंत्री श्याम बिहारी जायसवाल ह घलो राष्ट्रीय चिकित्सक दिवस के मउका म सबो चिकित्सक मन ल सुभकामना दीन हे। ओमन किहीन कि प्रदेस के डॉक्टर मन दूरिहा के इलाका म, जंगल म, नक्सल क्षेत्र म मुश्किल रद्दा ल पार करके, कड़ा मेहनत करके लोगन के सेवा करत हे।
राष्ट्रीय चिकित्सक दिवस म भारतीय जनता पार्टी के रायपुर जिलाध्यक्ष रमेश सिंह ठाकुर के अगुवई म विशेषज्ञ डॉक्टर मनके सम्मान करे गीस।
महतारी वंदन योजना
राज्य सरकार ह महतारी वंदन योजना के सत्रहवां किश्त के भुगतान कर देहे। आज प्रदेस के उनहत्तर लाख तेईस हजार ले जादा माईलोगिन मनके बैंक खाता म छह सौ सैंतालीस करोड़ छियासठ लाख रूपिया ले जादा के सहायता रासि भेजे गीस। योजना म इक्कीस ले साठ बछर आयु वर्ग के विवाहित, विधवा, तलाकशुदा अउ परित्यक्ता माईलोगिन मन ल हर महीना एक हजार रूपिया के सहायता रासि दे जाथे।
दुर्घटना
अभनपुर के केन्द्री गांव तीर आज भिन्सरहा एक यात्री बस अउ ट्रक के बीच होय टक्कर म तीन झन के मउत होगे अउ छह झिन गंभीर रूप ले घायल होगे हे, जउन मन ल इलाज बर स्थानीय अस्पताल म भर्ती कराय गेहे।
यातायात विभाग के सहायक पुलिस महानिरीक्षक संजय शर्मा ह बतईन कि आज बिहनिया एक ठिन यात्री बस जगदलपुर ले रईपुर आवत रिहीस। ए दउरान रायपुर जिला के अभनपुर थाना क्षेत्र के केन्द्री गांव तीर बस अउ ट्रक म टक्कर होगे। हादसा म दू झिन पुरूष अउ एक माईलोगिन के मउकाच म मउत होगे।
डिजिटल इंडिया-दस वर्ष
डिजिटल इंडिया के आज दस बछर पूरा होगे हवय। डिजिटल इंडिया ह देस के आम नागरिक मन ल तकनीक ले जोड़े हे, जेखर ले लोगन के जीवन आसान होय हे। प्रधानमंत्री नरेन्द्र मोदी ह किहीन हे कि डिजिटल इंडिया ह एक ठन जनआंदोलन बन गे हवय अउ ए ह आत्मनिर्भर भारत के निर्माण बर अउ भारत ल दुनिया बर एक विश्सनीय नवाचार भागीदार बनाय म अपन बड़े भूमिका निभावत हे। डिजिटल इंडिया कार्यक्रम के दस बछर पूरा होय के मउका म एक ठिन ब्लॉग म ओमन किहीन कि भारत डिजिटल सासन ले वैश्विक डिजिटल नेतृत्व कोति बाढ़त हे।
अउ अब थोरकुन समाचार सार म –
– राज्यपाल रमेन डेका ह डॉक्टर जवाहर सुरीसेट्टी ल दुरूग जिला के भिलाई के एक निजी विश्वविद्यालय के कुलपति नियुक्त करे हे।
– जांजगीर-चांपा जिला म खोखसा ओवरब्रिज चक्काजाम मामला म विधायक व्यास नारायण कश्यप समेत चौदह झिन लोगन के खिलाफ एफआईआर दर्ज करे गेहे। उहें, विधायक बालेश्वर साहू उपर घलो कानूनी कार्रवाई करे गेहे।
अउ
– रईपुर के इंदिरा गांधी कृषि विश्वविद्यालय म चालू सैक्षणिक सत्र बर बी.टेक.कृषि अभियांत्रिकी अउ फूड टेक्नोलॉजी पाठ्यक्रम म प्रवेस के प्रक्रिया सुरू होगे हे। इच्छुक छात्र मन तीन जुलाई तक ऑनलाइन आवेदन कर सकत हे।