राज्य सरकार ह कृषक उन्नति योजना के प्रचलित निरदेस ल संशोधित करत हुए एखर दायरा ल अउ बढ़ा देहे। अब ए योजना के फायदा चालू खरीफ बछर म धान उत्पादक किसान मनके संगेसंग दलहन, तिलहन, मक्का आदि के फसल लगाय वाले किसान मन ल घलो मिलही। मुख्यमंत्री विष्णुदेव साय के अध्यक्षता म आज मंत्रालय म होय राज्य मंत्री परिषद के बइठका म ए निर्णय ले गीस।
ए बइठका के बाद मंत्रिपरिषद के फइसला के जानकारी देत हुए उपमुख्यमंत्री अरूण साव ह बतइन कि खरीफ बछर दू हजार चौबीस म पंजीकृत किसान जउन मन धान के फसल ल लगाय रिहीन अउ समर्थन मूल्य म धान ल बेचे रिहीन उंखर कोति ले चालू खरीफ म धान फसल के जघा म दलहन, तिलहन, मक्का आदि के फसल के खेती करे जात हे। तब भी ओमन ल कृषक उन्नति योजना के चलत आदान सहायता रासि दे जाही।
श्री साव ह बतइन कि मंत्रिपरिषद के एक ठिक आने फइसला म छत्तीसगढ़ पेंसन फंड के गठन अउ एखर प्रबंधन अउ विनियमन संबंधी विधेयक के प्रारूप के अनुमोदन करे गीस। ए कदम ह सरकारी, अधिकारी-कर्मचारी मनके सेवा निवृत्ति के समय पेंसन भुगतान संबंधी दायित्व के बढ़िया वित्ती प्रबंधन बर उठाय गेहे। एखर संगेसंग राज्य के दीर्घकालिक आर्थिक विकास अउ राजकोषीय स्थिरता सुनिश्चित करे बर छत्तीसगढ़ ग्रोथ एंड स्टेबिलिटी फंड के गठन अउ एखर प्रबंधन अउ विनियमन संबंधी विधेयक के प्रारूप घलो अनुमोदन करे गीस। एखर ले राजस्व म असामान्य वृध्दि या फेर कमी के समुचित प्रबंधन अउ आर्थिक मंदी के समय वित्तीय सुरक्षा मिलही।
राज्य मंत्रिपरिषद-निर्णय-02
मुख्यमंत्री कोति ले राज्य म लॉजिस्टिक सेक्टर के आगू विकास बर छत्तीसगढ़ लॉजिस्टिक पॉलिसी के प्रारूप के अनुमोदन करे गीस। ए पॉलिसी ले छत्तीसगढ़ राज्य लॉजिस्टिक हब के रूप विकसित होही अउ निर्यात अधोसंरचना ल मजबूती मिलही। ए नीति के माध्यम ले ड्राय पोर्ट-इंग्लैंड कंटेनर डिपो के स्थापना ल प्रोत्साहित करे म सूक्ष्म लघु अउ मध्यम उद्योग अउ स्थानीय उत्पादन मनके बाजार तक पहुंचे के मउका मिलही। राज्य के प्रचुर वन संसाधन वनोपज अउ वन औषधि उत्पाद के निर्यात करे बर इको सिस्टम तियार होही।
मंत्रिपरिषद के बइठका म राज्य के कुछ कानून प्रावधान के गैर आपराधिकरण करे बर छत्तीसगढ़ जनविश्वास विधेयक के प्रारूप के अनुमोदन करे गेहे। मंत्रिपरिषद ह प्रदेस के कतकोन विभाग, निगम मंडल, कंपनी के पूर्व निर्मित अउ जर्जर भवन के संग इंखर स्वामित्व के अनुपयोगी शासकीय भुंईया के व्यवस्थित विकास अउ दुरूपयोग करे बर रिडेवलपमेंट योजना के अंतर्गत सात ठिन योजना ल स्वीकृति प्रदान करीन। एमा सांति नगर रईपुर, बीटीआई शंकर नगर रईपुर, कैलाश नगर राजनांदगांव, चांदनी चौक फेस-2 जगदलपुर, सिविल लाइन कांकेर, क्लबपारा महासमुंद, कटघोरा, कोरबा सामिल हे।
मंत्रिपरिषद कोति ले वाणिज्यिक कर-(पंजीयन) विभाग के अंतर्गत उच्च श्रेणी पंजीयन लिपिक-रिकार्ड कीपर ले तीसर श्रेणी कार्यपालिक उप पंजीयक के बाद ए पदोन्नति बर पाछू पांच बछर के न्यूनतम अर्हकारी सेवा जघा म केवल एक ले दू घांव बर एक ले दू जघा ल निर्धारित करे के फइसला ले गेहे।
केंद्रीय गृहमंत्री-माओवाद
केंद्रीय गृहमंत्री अमित शाह ह किहीन हे कि हथियारबंद माओवादी मनले कोनो बातचीत नइ करे जाही। ओमन ह तेलंगाना के निजामाबाद म किसान सम्मेलन ल संबोधित करत हुए किहीन हे कि आदिवासी, पुलिसकर्मी अउ सुरक्षाकर्मी मन के हत्या करइया मन ले कोनो बात नइ हो सकय। केंद्रीय गृहमंत्री ह वामपंथी उग्रवादी मनले हथियार ल छोड़के मुख्यधारा म सामिल होय बर किहीन हे।
संगेसंग किहीन कि सबो लोगन मन हथियार ल छोड़ देवव अउ सरेंडर करव, फेर अगर सरेंडर नइ करही त हमन तय करे हन कि इकतीस मार्च दू हजार छब्बीस के पहिली ए देस ले नक्सलवाद ल हमन खतम कर देबो। हमर सरकार के नीति हे, जिखर हाथ म हथियार हे ओखर ले कोनो बातचीत नइ होही।
मुख्य सचिव-अमिताभ जैन
केंद्र सरकार ह छत्तीसगढ़ के मुख्य सचिव अमिताभ जैन के सेवा विस्तार ल मंजूरी दे देहे। आज राज्य कैबिनेट के बइठक म अमिताभ जैन ह मुख्य सचिव के पद म तीन महिना के सेवा ल विस्तार करे के निर्णय ले गेहे। जानबा के अनुसार आज मुख्य सचिव अमिताभ जैन ह सेवा ले निवृत्त होय वाला रिहीन।
केंद्रीय मंत्री-दौरा
केंद्रीय सामाजिक न्याय और अधिकारिता राज्य मंत्री रामदास अठावले काली एक दिवसीय छत्तीसगढ़ दउरा म रईपुर पहुंचही। ओमन काली प्रदेस के वरिष्ठ अधिकारी मनले भेंट करके केंद्रीय योजना मनके समीक्षा करही। एखर बाद पत्रकारवार्ता ल संबाधित घलो करही।
केंद्रीय कोयला मंत्री-मुख्यमंत्री मुलाकात
मुख्यमंत्री विष्णुदेव साय ले आज रईपुर के उंखर निवास म केंद्रीय कोयला अउ खान राज्य मंत्री सतीशचंद्र दुबे ह भेंट करीन। ए बेरा म राज्य म कोयला खनन उत्पादन ले जुड़े कतकोन बिसय उपर गोठ होइस। बइठका म राज्य म कोयला उत्पादन, खनन कार्य के प्रगति, श्रमिक मनले जुड़े सुविधा अउ विकास के काम ल लेके घलो गोठबात करे गीस। मुख्यमंत्री श्री साय ह किहीन कि केंद्र सरकार के सहयोग ले राज्य म कोयला अउ ऊर्जा क्षेत्र म विकास के संभावना ल साकार करे म सहायता मिलही। श्री साय ह ए बेरा म सीएसआर मद के पइसा के उपयोग ल जादा ले जादा जन कल्याणकारी काम म करे बर बिसेस रूप ले बात करीन।
सहकारिता मंत्री-डीएपी
सहकारिता मंत्री केदार कश्यप ह किहीन हे कि अंतर्राष्ट्रीय बाजार म डीएपी खातु के कमी के सेति प्रदेस म डीएपी खातु के पर्याप्त पूर्ति नइ हो पात हे, त डीएपी के विकल्प के प्रति किसान मन ल जागरूक करे जाय। श्री कश्यप ह आज नवा रईपुर स्थित अपन निवास कार्यालय म सहकारिता अउ उर्वरक कंपनी के अधिकारी मनके बइठका म किसान मन ल खातु के उपलब्धता सुनिश्चित बनाय राखे के संबंध म समीक्षा करे रिहीन। ए बेरा म सहकारिता मंत्री ह किहीन कि रासायनिक खातु के कालाबाजारी बर्दास्त नइ करे जाही। अइसन गतिविधि करत पाय जाने वाला अधिकारी-कर्मचारी अउ केंद्र संचालक मन के खिलाफ बड़का कार्रवाई करे जाय।
वित्तमंत्री-वार्षिक सभा
वित्त मंत्री ओ.पी. चौधरी ह राज्य वित्त सेवा अधिकारी संघ के वार्षिक सभा ल संबोधित करत हुए किहीन कि राज्य के वित्तीय प्रबंधन अउ वित्तीय अनुशासन ल मजबूत बनाय म वित्त सेवा अधिकारी मन के अहम भूमिका हे। ओमन अधिकारी मन ले अपन दायित्व ल अउ जादा पारदर्सी, जवाबदेह अउ निष्ठापूर्वक करे के आह्वान करीन। एखर संगेसंग ओमन संघ कोति ले उठाय गे मांग उपर सहानुभूतिपूर्वक विचार करे के आश्वासन घलो दीन।
उहें, वित्त मंत्री ओपी चौधरी ह छत्तीसगढ़ के नीति प्रबंधन अउ नियंत्रण म राज्य वित्त सेवा के अधिकारी मनके तारीफ करीन अउ किहीन कि राज्य के वित्तीय प्रबंधन म वित्त अधिकारी मनके महत्वपूर्ण भूमिका हे। वित्त मंत्री ह राजधानी रईपुर म आयोजित छत्तीसगढ़ राज्य वित्त सेवा अधिकारी संघ के वार्षिक आम सभा अउ स्नेह सम्मेलन ल संबोधित करत रिहीन।
कवासी लखमा-चालान
शराब घोटाला मामला म पूर्व आबकारी मंत्री कवासी लखमा के खिलाफ आज आर्थिक अपराध अन्वेषण ब्यूरो-ईओडब्ल्यू ह चौथा पूरक चालान पेस करीन। विसेस कोर्ट म ग्यारा सौ पन्ना के चालान पेस करे गीस। ए चार्जशीट म लखमा के अहम भूमिका के बात आगू आय हे। एमा छैंसठ पेज के समरी म प्रकरण के ब्योरा दे गेहे।
ग्रामीण-प्रदर्शन
जांजगीर-चांपा के रद्दा म जर्वे गांव के लोगन मन ह खराब रद्दा ल लेके आज चक्काजाम करीन। विधायक व्यास कश्यप के नेतृत्व म ग्रामीण मन ह प्रदर्सन करत हुए नाराबाजी करीन। जिला के अपर कलेक्टर अउ अतिरिक्त पुलिस अधीक्षक ह मउका म पहुंचके ग्रामीण मन ले गोठ करीन। फेर आश्वासन के बाद ओमन चक्काजाम ल खतम करीन।