प्रधानमंत्री नरेंद्र मोदी ह किहीन हे कि स्वास्थ्य ल लेके सामाजिक सुरक्षा
तक देस ह सबो क्षेत्र म सरलग आगू बाढ़त हे। आकाशवाणी ले ‘मन की बात‘ कारीकरम म श्री मोदी ह किहीन हे कि आज देस के जनता ह कोनो न कोनो प्रकार के सामाजिक सुरक्षा के फायदा लेवत हे। ओमन अंतर्राष्ट्रीय श्रम संगठन के एक ठिन रिपोर्ट बारे म उल्लेख करीन, जेमा केहे गे हे कि देस के चौसठ प्रतिसत ले जादा आबादी ल कोई न कोई सामाजिक सुरक्षा के फायदा मिलत हे। श्री मोदी ह किहीन कि भारत ह सामाजिक सुरक्षा देवइया दुनिया के सबले बड़का देस मन म सामिल हे। प्रधानमंत्री ह विश्व स्वास्थ्य संगठन के रिपोर्ट के घलो उल्लेख करीन, जेमा भारत ल आंखी के बीमारी ट्रेकोमा ले मुक्त घोसित करे गेहे।
मन की बात-02
प्रधानमंत्री ह आपातकाल के उल्लेख करत किहीन कि जनभागीदारी ले कइसनो बड़ संकट हो मुकाबला करे जा सकत हे। ओमन किहीन कि आपातकाल लगइया मन न सिरिफ संविधान के हत्या करीन, भलूक ओखर इरादा न्यायपालिका ल घलो अपन गुलाम बनाय रखना रिहीस। श्री मोदी ह किहीन कि ए दउरान कई झिन मनखे मन ल कठोर सजा दे गीस। पढ़ईया लइका मन ल हलाकान करे गीस अउ अभिव्यक्ति के आजादी के गला घोटे गीस।
देस म इमरजेंसी थोपे के पचास बछर कुछेक दिन पहिलीच पूरा होय हे, जेला हम देसवासी मन संविधान हत्या दिवस मनाय हे। हमन ल सबरदिन ओ सबो झिन मन ल सुरता करना चाही। जेमन इमरजेंसी के मुकाबला डट के करे रिहीन। एखर ले हमन ल अपन संविधान ल मजबूत बनाय राखे म सरलग सावचेत रेहे के प्रेरणा मिलथे।
श्री मोदी ह किहीन कि पाछू एक्कीस जून के राखे गे अंतर्राष्ट्रीय योग दिवस म दुनिया भर के करोड़ो मनखे मन हिस्सा लीन। उहें, प्रधानमंत्री ह कैलाश मानसरोवर यात्रा, अमरनाथ यात्रा अउ जगन्नाथ रथयात्रा घलो चर्चा करीन।
प्रधानमंत्री ह किहीन कि माईलोगिन मनके अगुवई म विकास के मंत्र ह भारत के नवा भविष्य गढ़े बर तियार हे। ओमन यहू किहीन कि पाछू महिना भगवान बुध्द के पवित्र अवशेष भारत ले वियतनाम ले जाय गीस अउ ओला नौ ठिन जघा म जनता के दर्सन बर राखे गे रिहीस। मन की बात कारीकरम म श्री मोदी हाले म अंतर्राष्ट्रीय अंतरिक्ष केंद्र गे भारत के ग्रुप कैप्टन शुभांशु शुक्ला के घलो जिकर करीन।
मन की बात -छत्तीसगढ़
छत्तीसगढ़ म घलो जघा-जघा मन की बात कारीकरम ल सुने गीस। मुख्यमंत्री विष्णुदेव साय ह रईपुर स्थित अपन निवास कार्यालय म मन की बात कारीकरम ल सुनीन अउ एला प्रेरणादायी बतइन। मुख्यमंत्री ह किहीन कि प्रधानमंत्री के विचार मनले प्रेरणा लेके छत्तीसगढ़ म जनभागीदारी के संगे स्वास्थ्य अउ प्रकृति के रक्षा बर सरलग काम करे जावत हे। ओमन किहीन कि प्रधानमंत्री ह आज ‘मन की बात‘ कारीकरम म स्वस्थ्य जीवन सैली ल बढ़ावा देबर फिटनेस अउ पर्यावरण संरक्षण सोज चलत नवाचार बारे म घलो बतइन।
ए मउका म निरंजन पीठाधीश्वर महामंडलेश्वर स्वामी कैलाशनंद गिरी महाराज, केंद्रीय महिला अउ बाल विकास राज्य मंत्री सावित्री ठाकुर, कैबिनेट मंत्री लक्ष्मी राजवाड़े समेत कतकोन प्रतिनिधि मौजूद रिहीन।
मुख्यमंत्री-आयुर्वेदिक औषधि प्रसंस्करण
मुख्यमंत्री विष्णुदेव साय ह आज दुरूग जिला के जामगांव एम म राखे गे कारीकरम म चरणपादुका योजना के सुरूआत करीन। ओमन माईलोगिन तेंदुपत्ता सकलइया मन ल पनही पहिनाके ए योजना के एक घांव फेर ले सुभारंभ करीन। मुख्यमंत्री ह किहीन कि चरणपादुका योजना ल भाजपा ह अपन संकल्प पत्र मोदी के गारंटी म राखे रिहीस।
इही कारीकरम म मुख्यमंत्री ह करीबन साढ़े छत्तीस करोड़ रूपिया के लागत ले बने आयुर्वेदिक औषधि प्रसंस्करण इकाई के लोकार्पण घलो करीन। छत्तीसगढ़ राज्य लघुवनोपज सहकारी संघ मर्यादित डहार ले ए इकाई ल करीबन अट्ठाईस एकड़ क्षेत्र म बनाय गेहे। ए इकाई ले हर बछर करीबन पचास करोड़ रूपिया कीमत के प्रोडक्ट तियार करे जाय के अनुमान हे। ए इकाई ह जंगल म मिलइया औषधि अउ लघुवनोपज ले गुणवत्ता वाले आयुर्वेदिक प्रोडक्ट बनाही। ए परियोजना ले वोकल फॉर लोकल के चलत दू हजार ले जादा लोगन मन ल प्रत्यक्ष अउ अप्रत्यक्ष रूप ले रोजगार के मउका मिलही।
बिजनेस कॉन्क्लेव एक्सीलेंस अवॉर्ड्स
दलित चेंबर ऑफ कॉमर्स एंड इंडस्ट्री डहार ले रईपुर म राखे गे डॉक्टर आंबेडकर बिजनेस कॉन्क्लेव अउ एक्सीलेंस अवॉर्ड्स समारोह म मुख्यमंत्री विष्णुदेव साय सामिल होइन। समारोह म बोलत श्री साय ह किहीन कि छत्तीसगढ़ म खेती के संगे कारखाना मन बर घलो सुघ्घर माहौल बनत हे। एखर फायदा अनुसूचित जाति-जनजाति वर्ग के उद्यमी मन ल घलो मिलही। कारीकरम म मुख्यमंत्री ह अनुसूचित जाति-जनजाति वर्ग के नवा उद्यमी मन ल सम्मानित करीन।
मुख्यमंत्री-केंद्रीय राज्यमंत्री मुलाकात
केंद्रीय महिला अउ बाल विकास राज्यमंत्री सावित्री ठाकुर ह आज रईपुर म मुख्यमंत्री विष्णुदेव साय ले उंखर निवास म भेंट करीन। ए दउरान श्री साय ह प्रदेस म माईलोगिन अउ लइका मन के कल्याण बर चलत कई ठिन योजना बारे म श्रीमती ठाकुर संग गोठबात करीन। मुख्यमंत्री ह किहीन कि राज्य सरकार ह माईलोगिन अउ लइका मन ल मजबूत बनाय खातिर बिसेस धियान देवत हे। ओमन बतइन कि नक्सल प्रभावित बीजापुर, सुकमा, कांकेर, दंतेवाड़ा अउ नारायणपुर जिला म नियद नेल्लानार योजना के चलत महिला अउ बाल विकास विभाग डहार ले एक सौ ओनसठ ठिन आंगनबाड़ी केंद्र चलाय जात हे।
अरूण साव-आपातकाल
संविधान हत्या दिवस के मउका म आज महासमुंद म राखे गे संगोष्ठी म उप मुख्यमंत्री अरूण साव सामिल होइन। कारीकरम म बोलत श्री साव ह किहीन कि कांग्रेस ह बछर उन्नीस सौ पचहत्तर म आपातकाल लगाके लोकतंत्र के चारो स्तंभ ल कमजोर करे के काम अउ कांग्रेस ह ए दउरान एक लाख मनखे मन ल जेल भीतरी डाल के लोकतंत्र के हत्या करे रिहीस। एखरे सेति, भारतीय जनता पार्टी ह देसभर म आपातकाल के ए काला दिन ल संविधान हत्या दिवस के रूप म मनात हे।
माओवादी-गिरफ्तार
नारायणपुर जिला के कोहकामेटा थाना क्षेत्र ले पुलिस ह एक झिन माओवादी ल गिरफ्तार करे हे। एखर उपर गांव जड्डा-मरकुड म आईईडी लगाय के घटना म सामिल रहय के आरोप हे। ए रद्दा म करे गे आईईडी बिस्फोट के चपेट म आय ले एक झिन गंवई के मनखे के मउत होगे रिहीस। उहें, एक झिन आने मनखे घायल होगे रिहीस। ए माओवादी ह बीते तीन बछर ले नक्सली संगठन ले कुतुल एरिया कमेटी म करकाबेड़ा मिलिशिया सदस्य के रूप म सक्रिय रिहीस।
साइबर ठगी-आरोपी गिरफ्तार
बलौदाबाजार पुलिस ह साइबर ठगी के मामला म दू झिन आरोपी मन ल हरियाणा के कुरूक्षेत्र ले गिरफ्तार करे हे। ए आरोपी मन कई झिन मनखे ले ऑनलाइन ट्रेंडंग प्रसिक्षण कोर्स के नांव म साढ़े पचीस लाख रूपिया ले जादा के ठगी करे गीस। ए घटना ल अंजाम देबर आरोपी मन डहार ले कई ठिन मोबाइल नंबर अउ बैंक खाता के उपयोग करे गे रिहीस।
मानसून
देस म सामान्य तिथि ले नौ दिन आगूच देसभर म मानसून ह सक्रिय होगे हे। आकाशवाणी समाचार ले गोठबात म भारत मौसम विज्ञान विभाग के महानिदेशक डॉक्टर मृत्युंजय महापात्रा ह बतइन कि छत्तीसगढ़ समेत झारखंड, ओडिसा, बिहार, मध्य प्रदेस, हिमाचल प्रदेस, उत्तराखंड, उत्तर प्रदेस, गोवा, गुजरात अउ पूर्वोत्तर भारत के कई ठिन जघा म अवइया सात दिन के दउरान जोरदरहा पानी गिर सकत हे।
बीजापुर पुनर्वास केंद्र-प्रशिक्षण
बीजापुर स्थित पुनर्वास केंद्र म आत्मसमर्पित माओवादी मन ल जेसीबी ट्रक ड्राइविंग अउ राज मिस्त्री असन तकनीकी क्षेत्र म व्यवसायिक प्रसिक्षण दे जात हे। एखर उद्देस्य आत्मसमर्पण करइया माओवादी मन ल आत्मनिर्भर बनाना हे। ट्रेनिंग के संगे ए केंद्र म सामूहिकता अउ अनुशासन के विकास बर अब्बड़ अकन गतिविधि राखे जात हे।