मुख्यमंत्री विष्णुदेव साय ह आज जशपुर जिला म बगिया स्थित मुख्यमंत्री कैंप कार्यालय ले कृषि क्रांति अभियान के तहत एग्री-हॉर्टी एक्सपो अउ क्रेता-विक्रेता सम्मेलन के वर्चुअल सुभारंभ करीन। ए बेरा म मुख्यमंत्री ह किहीन कि किसान मन के समृध्दि बर राज्य सरकार दृढ़ संकल्पित हे। नवा तकनीक के जरिया ले किसान आर्थिक रूप ले सशक्त होवत हे। ओमन ह किहीन कि जशपुर के कृषि विकास के इतिहास म आज के दिन मील के पत्थर साबित होने वाला हे। इंहा ले कृषि क्रांति अभियान के सुरूआत होवत हे।
जानबा के मुताबिक दू दिन तक चलइया एग्री-हॉर्टी एक्सपो अउ क्रेता-विक्रेता सम्मेलन म देस के कतकोन बिसेस कृषि कंपनी सामिल होवत हे। सम्मेलन म किसान मन ल उन्नत तकनीकी के जानकारी दे जाही। उहें, ए कंपनी के जरिया ले किसान ऐफपीओ के माध्यम ले अपन उपज के उचित मूल्य पाय बर फसल विक्रय अनुबंध कर सकही। एखर ले बिचौलिया प्रथा खतम होही अउ किसान मन ल उंखर मेहनत के सही मूल्य मिलही।
उहें, मुख्यमंत्री ह आज तपकरा म तहसील कार्यालय अउ कार्यपालिक दंडाधिकारी कार्यालय के सुभारंभ करीन। ए बेरा म श्री साय ह तपकरा ल नगर पंचायत बनाय, खेल स्टेडियम के सौंदर्यीकरण बर पचास लाख रूपिया दे अउ फरसाबाहर म विश्रामगृह बनाय के घोसना करीन।
प्रधानमंत्री-जैन संत जयंती समारोह
प्रधानमंत्री नरेंद्र मोदी ह किहीन कि भारत अपन बिचार, दर्शन अउ ज्ञान के कारण हजारों बछर ले शाश्वत बने हुए हे। आज नई दिल्ली म प्रख्यात जैन संत आचार्य विद्यानंद जी महाराज के सौवां जयंती समारोह के उद्घाटन करत हुए श्री मोदी ह किहीन कि भारत, दुनिया के सबले प्राचीन जीवंत सभ्यता अउ ए शाश्वत दर्शन के स्त्रोत, देस के ऋषि, संत अउ आचार्य म निहीत हे। प्रधानमंत्री ह किहीन कि आचार्य विद्यानंद मुनि प्राचीन भारतीय परंपरा के आधुनिक प्रकाश स्तंभ हे। ओमन ह किहीन कि आचार्य श्री विद्यानंद जी ह अपन जीवन ल केवल आध्यात्मिक साधना तक सीमित नइ राखिन बल्कि, एला समाज अउ संस्कृति ल दुबारा बनाय के एक अच्छा माध्यम घलो बनिन।
श्री मोदी ह किहीन कि ए संकल्प ल धियान म राखत हुए केंद्र सरकार देस के सांस्कृतिक धरोहर अउ तीर्थ स्थल के घलो विकास करत हे। प्रधानमंत्री ह देस ल औपनिवेशिक मानसिकता ले मुक्त करे बर घलो जोर दीन।
माओवादी-आत्मसमर्पण
बीजापुर जिला म काली तेईस लाख रूपिया के तेरह हार्ड कोर माओवादी मन ह पुलिस के आगू आत्मसमर्पण कर देहे। एमा आठ माईलोगिन सामिल हे। ए माओवादी म ले दस झन उपर एक-एक लाख, एक माईलोगिन माओवादी उपर आठ लाख अउ एक आने माओवादी उपर पांच लाख रूपिया के इनाम घोसित रिहीस। जिला के अतिरिक्त पुलिस अधीक्षक मयंक गुर्जर ह बतइन कि आत्मसमर्पण करइया माओवादी मन उपर फायरिंग, आईईडी बिस्फोट, आगजनी अउ हत्या जइसन घटना मन म सामिल रहय के आरोप हे। ओमन बतइन कि आत्मसमर्पित माओवादी मन ल सरकार के पुनर्वास नीति के तहत पचास-पचास हजार रूपिया दे गेहे। जिला म अब तक दू सौ इकचालीस माओवादी हिंसा ल छोड़ देहे।
इही बीच, मुख्यमंत्री विष्णुदेव साय ह केहे हे कि माओवादी मनके आत्मसमर्पण राज्य सरकार के पुनर्वास नीति अउ नियद नेल्लानार योजना के प्रभाव हे। योजना के जरिया ले माओवाद प्रभावित क्षेत्र मन म विश्वास के वातावरण बने हे। ओमन ह किहीन कि प्रधानमंत्री नरेंद्र मोदी के मार्गदर्शन अउ केंद्रीय गृहमंत्री अमित शाह के नेतृत्व म मार्च दू हजार छब्बीस तक पूरा देस ले माओवाद के पूरा उन्मूलन के लक्ष्य ल सुनिश्चित करे बर राज्य सरकार संकल्पबध्द हे।
केंद्र सरकार-खंडन
केंद्र सरकार ह ए दावा के खंडन करे हे कि सरकार खेती-बाड़ी बर प्रयुक्त पानी म कर लगाय के योजना बनावत हे। जल शक्ति मंत्रालय ह स्पष्ट करे हे कि कर लगाय जाय ले जुड़े अइसन सब्बों अफवाह निराधार अउ झूठ हे। मंत्रालय के अनुसार, किसान मन पानी के उपयोग बर सुल्क लगाय के न तो कोई प्रावधान हे अउ न ही सरकार डहार ले अइसन कोनो निरदेस हे। मंत्रालय ह ए भी किहीन कि कृषि अउ पानी-दूनों ही राज्य के बिसय हे अउ एमा कोनो भी प्रकार के सुल्क लगाय जाना राज्य के अधिकार क्षेत्र म आथे।
मन की बात
प्रधानमंत्री नरेंद्र मोदी काली बिहनिया ग्यारा बजे आकाशवाणी ले ‘मन की बात‘ कारीकरम म अपन बिचार साझा करही। ए मासिक रेडियो कारीकरम के एक सौ तेईसवां कड़ी होही। आकाशवाणी अउ दूरदर्शन के सब्बों नेटवर्क, आकाशवाणी समाचार के वेबसाइट अउ न्यूज ऑन मोबाइल ऐप म ए कारीकरम सीधा प्रसारित होही। आकाशवाणी समाचार, दूरदर्सन समाचार, प्रधानमंत्री कार्यालय अउ सूचना अउ प्रसारण मंत्रालय के यू-ट्यूब चैनल मन म घलो एखर सीधा प्रसारण करे जाही।
बिलासपुर-एजुकेशन सिटी
बिलासपुर शहर ल एक आधुनिक एजुकेशन हब के रूप म विकसित करे के दिसा म पहल करे जात हे। एखर बर बिलासपुर नगर-निगम के तेरह एकड़ भूमि म सौ रूपिया के लागत ले एजुकेशन सिटी बनाय जाही। मुख्यमंत्री विष्णुदेव साय ह किहीन कि ए एजुकेशन सिटी म नालंदा परिसर के स्थापना करे जाही, जिहां पांच सौ विद्यार्थी एके संग बइठके फिजिकल अउ डिजीटल लाइब्रेरी के लाभ ले सकही। संगेसंग तीन बहुमंजिला इमारत घलो बनाय जाही, जेमा अड़तालीस हॉल सेटअप तियार करे जाही। एमा एके संग चार हजार आठ सौ विद्यार्थी मनके कोचिंग लेके सुविधा रइही। ओमन ह बतइन कि शैक्षणिक अउ व्यक्तित्व विकास बर सात सौ सीट वाला आधुनिक ऑडिटोरियम घलो बनाय जाही। उहें, बाहिर ले अवइया एक हजार विद्यार्थी मन बर हॉस्टल सुविधा के व्यवस्था घलो करे जाही।
पटवारी-आत्महत्या
भारतमाला प्रोजेक्ट फर्जीवाड़ा मामला म बिलासपुर जिला के निलंबित पटवारी सुरेश शर्मा ह काली गांव जोंकी के एक फार्महाउस म फांसी लगाके आत्महत्या कर लीन। उंखर जेब ले दू आने-आने सुसाइट नोट मिले हे, जेमा ओमन ह अपन आप ल निरदोस बताय हे। फिलहाल सकरी पुलिस सुसाइट नोट ल जब्त करके मामला के जांच करत हे।
इही बीच, प्रदेस कांग्रेस अध्यक्ष दीपक बैच ह निलंबित पटवारी के आत्महत्या मामला म उच्च स्तरीय जांच के मांग करीन। ओमन ह किहीन कि ए मामला के सीबीआई या हाईकोर्ट के जज के निगरानी म जांच होना चाही।
आंगनबाड़ी निरीक्षण-राजवाड़े
महिला अउ बाल विकास मंत्री लक्ष्मी राजवाड़े ह सूरजपुर के आंगनबाड़ी केंद्र अउ शासकीय प्राथमिक शाला के निरीक्षण करीन। ओमन ह लइका मनके शिक्षा, पोषण, स्वच्छता अउ शैक्षणिक व्यवस्था के जायजा लीन। आंगनबाड़ी म लइका मनके उपस्थिति, पोषण आहार के गुणवत्ता, टीकाकरण अउ पोषण ट्रैकर ऐप के उपयोग के जांच करे गीस। मंत्री ह कुपोषण ले जूझत लइका मनके नियमित निगरानी अउ गुणवत्तापूर्ण आहार सुनिश्चित करे के निरदेस दीन।
उहें, श्रीमती राजवाड़े ह प्राथमिक शाला म शिक्षक मनले पाठ्यक्रम, मध्यान्ह भोजन अउ पुस्तक वितरण के जानकारी लीन।
कलेक्टर-दौरा
रईपुर कलेक्टर डॉक्टर गौरव सिंह अउ एसएसपी डॉक्टर लाल उमेद सिंह ह राजधानी के आने-आने प्रमुख क्षेत्र मनके दउरा करके विकास स्थल के निरीक्षण करीन। ए दउरान कलेक्टर ह मठपुरैना, भाटागांव, उरकुरा, एक्सप्रेस-वे के संग आने जरूरी इलाका के दउरा करीन। कलेक्टर ह किहीन कि अवइया चार ले पांच बछर म रईपुर के जनसंख्या अउ ट्रैफिक बाढ़ही। ए चुनौती के सामना करे बर अभी ले रणनीतिक तियारी करे जात हे। ओमन ह किहीन कि सहर म यातायात ल अच्छा बनाय बर नवा सड़क बनाना, एक्सप्रेस-वे अउ फ्लाईओवर के योजना बनाना जरूरी हे।
जिले की चिट्ठी
प्रादेशिक समाचार एकांश, आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ म आकाशवाणी के सबो केंद्र एके संग रिले करही। ए दारी के अंक म ‘‘कोरबा‘‘ जिला के गतिविधि के बारे म जानकारी दे जाही।