आज देसभर म भगवान जगन्नाथ के रथयात्रा निकाले जावत हे। छत्तीसगढ़ म घलो रथयात्रा के परब उछाह के संग मनाय जावत हे। आज बिहनियच ले मंदिर मन म श्रध्दालु मनके भीड़ उमड़े रिहीस अउ पूजा-पाठ होवत रिहीस। ए मउका म आने-आने जघा म भगवान जगन्नाथ, बलभद्र अउ देवी सुभद्रा ल रथ म बइठा के यात्रा निकाले गीस।
राज्यपाल रमेन डेका अउ मुख्यमंत्री विष्णुदेव साय आज रईपुर के गायत्री नगर के जगन्नाथ मंदिर म राखे गे रथयात्रा महोत्सव म सामिल होइन। ओमन ह भगवान जगन्नाथ के पूजापाठ करके प्रदेसवासी मनके सुख-समृध्दि के कामना करीन। ए मउका म ओमन ह भगवान के पहिली सेवक के रूप म छेरा-पहरा के रसम निभाइन। ए मउका म राज्यपाल अउ मुख्यमंत्री ह प्रदेसवासी मन ल रथयात्रा के बधाई देवत किहीन कि ए परब ओडिसा बर जतका बड़े हे, ओतके छत्तीसगढ़ बर घलो हे।
रथयात्रा महोत्सव म राजस्व मंत्री टंकराम वर्मा, सांसद बृजमोहन अग्रवाल अउ विधायक पुरंदर मिश्रा घलो मौजूद रिहीन।
गोंचा-पर्व
रथयात्रा के संगेच बस्तर म घलो आज प्रसिध्द गोंचा पर्व मनाय गीस। दू ठन रथ म भगवान जगन्नाथ, देवी सुभद्रा अउ बलभद्र के कुल बाईस देव विग्रह ल विराजित करके रथयात्रा निकाले गीस। ए दउरान श्रध्दालु मन ह भगवान ल बांस के तुपकी ले सलामी दीन। जगदलपुर के सिरहासार भवन के आगू के जगन्नाथ मंदिर ले रथयात्रा निकल के गोलबाजार, दंतेश्वरी मंदिर चौक होवत वापिस सिरहासार पहुंचिस। ए भवन ल जनकपुरी कहे जाथे, जिहां भगवना जगन्नाथ, देवी सुभद्रा अउ बलभद्र के देव विग्रह ल स्थापित करे जाथे।
छत्तीसगढ़-रेल लाइन परियोजना
तेलंगाना के कोठागुडेम ले छत्तीसगढ़ के किरंदुल तक प्रस्तावित करीब एक सौ साठ किलोमीटर लंबा नवा रेल लाइन के सर्वे अब आखिरी चरण म हे। ए प्रस्तावित रेल लाइन के एक सौ अड़तीस किलोमीटर हिस्सा सुकमा, दंतेवाड़ा अउ बीजापुर जइसन नक्सल प्रभावित जिला के आने-आने क्षेत्र ले गुजरही जउन ह अभी तक रेल कनेक्टिीविटी ले वंचित हे।
रेलवे डहार ले आधुनिक लिडार तकनीक के माध्यम ले सर्वे काम करे जावत हे। ए रेल लाइन परियोजना के निगरानी केंद्रीय गृह मंत्रालय डहार ले करे जावत हे। माओवाद प्रभावित क्षेत्र होय के सेति एला आंतरिक सुरक्षा के संगेसंग क्षेत्रीय विकास के मामला म घलो महत्वपूर्ण माने जावत हे।
मुख्यमंत्री विष्णुदेव साय ह किहीन हे कि ए रेल परियोजना नक्सल प्रभावित सुकमा, दंतेवाड़ा अउ बीजापुर जिला बर सामाजिक अउ आर्थिक बदलाव के द्वार खोलही। ओमन ह केंद्र सरकार अउ भारतीय रेल बर आभार जतावत किहीन कि आपसी मेलजोल ले ए सपना साकार होवत हे।
‘रक्त शक्ति महाअभियान‘
गौरेला-पेण्ड्रा-मरवाही जिला ह ‘‘रक्त शक्ति महाअभियान‘‘ के तहत एके दिन म तेरह ले पैंतालीस बछर आयु वर्ग के इंक्यावन हजार ले जादा माईलोगिन मनके हिमोग्लोबिन जांच के गोल्डन बुक ऑफ वर्ल्ड रिकार्ड म अपन नांव दर्ज कराइन हे। गोल्डन बुक ऑफ वर्ल्ड रिकार्ड के स्टेट हेड सोनल राजेश शर्मा ह आज पेण्ड्रा म राखेगे पत्रकार वार्ता म एखर घोसना करत जिला के कलेक्टर लीना कमलेश मंडावी ल प्रमाण पत्र दीन। कलेक्टर ह बतइन कि आदिवासी बहुल ए जिला म माईलोगिन मन एनिमिया के प्रभाव रेहे हे। सरीर म खून के कमी होय ले बहुत अकन समस्या होथे। ओमन बतइन कि ए अभियान छब्बीस जून के जिला भर के दू सौ तीस ठन अलग-अलग जघा म चलाय गीस। एखर उद्देस्य माईलोगिन मन ल एनीमिया ले मुक्त कराना अउ स्वास्थ्य बर जागरूक करना रिहीस।
जशपुर-कृषि क्रांति
जशपुर म ‘‘कृषि क्रांति‘‘ अभियान के तहत काली अट्ठाईस अउ उनतीस जून के दू दिन के सम्मेलन के आयोजन करे जाही। ए सम्मेलन के उद्देश्य जिला के किसान मन ल राष्ट्रीय स्तर म बाजार ले जोड़के उंखर उत्पाद ल सुघ्घर दाम देवाना हे। जिला म कृषि, उद्यानिकी अउ रेशम उत्पादन ल प्रोत्साहन दे बर जिला प्रशासन डहार ले पहली बखत एग्री-हॉटी क्रेता-विक्रेता सम्मेलन के आयोजन करे जाही। सम्मेलन के पहिली दिन क्रेता-विक्रेता परिचय सत्र, फसल संग्रहण, संरक्षण अउ प्रसंस्करण संबंधी तकनीकी जानकारी के संगेसंग कृषि, उद्यानिकी, रेशम अउ वनोपज के निर्यात ल बढ़ावा दे बर गुणवत्ता मानक, नियम अउ विपणन व्यवस्था के जानकारी दे जाही। एखरे संग आने-आने फसल के प्रदर्सनी घलो लगाय जाही।
उहें, दूसरइया दिन उनतीस जून के देस के आने-आने राज्य ले आय उद्यमी मन ल जिला के खेत अउ उत्पाद मनके जानकारी दे जाही। ए ह किसान अउ कंपनी मनके बीच किसान उत्पादक संगठन-एफ.पी.ओ. के माध्यम ले सीधा संवाद अउ विपणन के दिसा म बढ़िया कदम होही। एखर ले बिचौलिया मनके भूमिका खतम होही अउ किसान मन ल उंखर उपज के उचित मूल्य मिलही।
आरटीई-आवेदन
निसुल्क अउ अनिवार्य शिक्षा के आधार अधिनियम-आरटीई के तहत निजी स्कूल मन म प्रवेस बर दूसर चरण के आनलाइन आवेदन के प्रक्रिया एक जुलाई ले सुरू होही। लोक शिक्षण संचालनालय डहार ले ए संबंध म राज्य के सबो जिला के कलेक्टर अउ जिला शिक्षा अधिकारी मन ल आदेस जारी कर दे गेहे। जारी कारीकरम के अनुसार एक ले बारह जुलाई तक नोडल अधिकारी मन डहार ले दस्तावेज के जांच करे जाही। लॉटरी के माध्यम ले स्कूल के आवंटन बाईस अउ तेईस जुलाई के करे जाही। स्कूल म दाखिला के प्रक्रिया पचीस ले इकतीस जुलाई तक करे जाही।
सुरेन्द्र दुबे-अंतिम संस्कार
साहित्यकार अउ छत्तीसगढ़ी भाखा के जाने-माने हास्य कवि पद्मश्री डॉक्टर सुरेन्द्र दुबे के आज मारवाड़ी शमसानघाट म अंतिम संस्कार करे गीस। अंतिम संस्कार म वित्त मंत्री ओपी चौधरी, गृह मंत्री विजय शर्मा, कृषि मंत्री रामविचार नेताम, विधायक सुनील सोनी, अनूज शर्मा अउ भाजपा प्रदेस संगठन महामंत्री पवन साय सामिल होइन। उहें, कवि कुमार विश्वास, सूफी भजन गायक, पद्मश्री मदन चौहान, कवि सुदीप भोला संघरा दूसर कतकोन प्रसिध्द लोगन मौजूद रिहीन।
एखर पहिली, मुख्यमंत्री विष्णुदेव साय ह काली डॉक्टर दुबे के निवास म जाके ओमन ल अपन श्रध्दांजलि दीन अउ उंखर परिवार बर अपन संवेदना प्रकट करीन।
माओवादी-आत्मसमर्पण
नारायणपुर जिला म छै झन माओवादी मन ह पुलिस के आगू आत्मसमर्पण करीन हे। एमा चार महिला माओवादी घलो सामिल हें। ए सबो माओवादी मन जिला के माड़ डिवीजन अउ अमदेई एरिया कमेटी म सक्रिय रिहीन। ए माओवादी मन ल राज्य सरकार के पुनर्वास नीति म प्रोत्साहन रासि के रूप म पचास-पचास हजार रूपिया के चेक दे गीस।
ओम प्रकाश व्यास-आईआईटी निदेशक
राज्यपाल अउ कुलाधिपति रमेन डेका ह प्रोफेसर डॉक्टर ओम प्रकाश व्यास ल डॉक्टर श्यामा प्रसाद मुखर्जी अंतर्राष्ट्रीय सूचना प्रौद्योगिकी संस्थान-ट्रिपल आईटी रईपुर के निदेशक नियुक्त करे हे। अभी प्रोफेसर व्यास ट्रिपल आईटी प्रयागराज म डीन के पद म कार्यरत हे। ए संबंध म राजभवन सचिवालय ह आदेस जारी कर देहे।
बातों-बातों में
प्रादेसिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ म ए बखत संविधान हत्या दिवस म छत्तीसगढ़ साहित्य अकादमी के अध्यक्ष शशांक शर्मा ले लेगे भेंटवार्ता के प्रसारण करे जाही। ए कारीकरम के प्रसारण काली अट्ठाईस जून के एफएम चैनल म बिहनिया नौ बजे ले करे जाही अउ प्रायमरी चैनल म ए कारीकरम के प्रसारण बिहनिया साढ़े दस बजे ले करे जाही। एला छत्तीसगढ के सबो आकाशवाणी कंेद्र मन ह एके संघरा रिले करही।
मौसम
मौसम विभाग ह अवइया चौबीस घ्ंाटा के दउरान मध्य छत्तीसगढ़ म भारी बरसा के चेतावनी देहे। मौसम विज्ञानी एच.पी.चंद्रा ह बतइन कि प्रदेस म काली जादा ले जादा जघा म हल्का ले मध्यम बरसा होय के या गरज-चमक के संग छींटा पड़े के संभावना हे।
अउ अब थोरकुन समाचार सार म –
– मुख्यमंत्री विष्णुदेव साय के अध्यक्षता म राज्यमंत्री परिषद के बइठका तीस जून के मंझनिया बारह बजे मंत्रालय म होही।
– महासमुंद जिला के राष्ट्रीय राजमार्ग क्रमांक-तिरपन म तुमगांव तीर एक ठन फटफटी ह ट्रक ले टकरागे। ए हादसा म दू झन युवक के मउकच म मउत होगे।
– जांजगीर-चांपा जिला के सिटीकोतवाली पुलिस ह एक शिक्षक ले साढ़े छैः लाख रूपिया के ठगी करइया दू झन आरोपी मन ल गिरफ्तार करीन हे।