मुख्यमंत्री विष्णुदेव साय के रईपुर के निवास म आज आपातकाल स्मृति दिवस कार्यक्रम के आयोजन करे गीस। कार्यक्रम म लोकतंत्र सेनानी मनके सम्मान करे गीस। कार्यक्रम म मुख्यमंत्री ह किहीन कि लोकतंत्र सेनानी मनके अंतिम संस्कार अब राजकीय सम्मान के साथ करे जाही। संगेसंग उंखर परिवार वाला मन ल पच्चीस हजार रूपिया के आर्थिक मदद दे जाही। श्री साय ह किहीन कि कांग्रेस सरकार म पाछु पांच बछर म लोकतंत्र सेनानी मन ल मिलने वाला सहायता रासि नइ दे गे रिहीस, अब राज्य सरकार ओ रासि घलो लोकतंत्र सेनानी मन ल दीही। कार्यक्रम म मुख्यमंत्री ह आपातकाल के दौर ल सुरता करत एला इतिहास के काला अध्याय किहीन।
सुरेन्द्र दुबे-निधन
छत्तीसगढ़ी भाखा के जाने-माने हास्य कवि पद्मश्री डॉक्टर सुरेन्द्र दुबे के आज हार्टअटैक ले निधन होगे। ओमन ह बहत्तर बछर के रिहीन। उंखर तबीयत अचानक बिगड़े ले ओमन ल रायपुर के एडवांस कार्डिएक इंस्टीट्यूट-एसीआई म भर्ती कराय गे रिहीस।
सुरेन्द्र दुबे के जन्म आठ जनवरी उन्नीस सौ तिरपन के दुरूग जिला के बेमेतरा म होय रिहीस। ओमन ह पांच ठन किताब लिखे हवय। ओमन ल भारत सरकार डहार ले बछर दू हजार दस म पद्मश्री सम्मान ले सम्मानित करे गे रिहीस। डॉक्टर दुबे ल बछर दू हजार बारह म पंडित सुंदरलाल शर्मा सम्मान, अट्टहास सम्मान अउ संयुक्त राज्य अमेरिका म लीडिंग पोएट ऑफ इंडिया सम्मान घलो मिले हे।
डॉक्टर दुबे ह देस-विदेस म अपन कविता ले सबके दिल जीते हवय। ओमन ल अमेरिका के वाशिंगटन म अंतर्राष्ट्रीय हिन्दी एसोसिएशन डहार ले हास्य शिरोमणि सम्मान ले सम्मानित करे गे रिहीस। पद्मश्री डॉक्टर सुरेन्द्र दुबे के रचना उपर देस के तीन ठन विश्वविद्यालय ह पीएचडी के उपाधि घलो प्रदान करीन हे।
नशीली दवाएं-अंतर्राष्ट्रीय दिवस
आज मादक पदार्थ अउ अवैध तस्करी रोधी अंतर्राष्ट्रीय दिवस हे। ए दिवस मादक पदार्थ मुक्त अंतर्राष्ट्रीय समाज के लक्ष्य प्राप्त करे बर कार्रवाई अउ सहयोग मजबूत करे के आह्वान करथे।
केन्द्रीय गृहमंत्री अमित शाह ह किहीन हे कि मोदी सरकार ह मादक पदार्थ बनइया गिरोह के खिलाफ कड़ाई करत हे अउ एखर सिकार होय युवा मन ल सामान्य जीवन जीये बर परयास करत हे। एक ठिन सोशल मीडिया पोस्ट म श्री शाह कहिन कि मादक पदार्थ युवा मन बर सबले बड़े समस्या हे।
उहें, रायपुर म नारकोटिक्स कंट्रोल ब्यूरो-एनसीबी के आज नवा रायपुर के कार्यक्रम म उप निदेशक रवि जोशी मुख्य अतिथि के रूप म सामिल होइन। ए मउका म ओमन किहीन कि एनसीबी ह स्थानीय प्रसासन अउ आने-आने संस्था के साथ मिलके बारह ले छब्बीस जून तक युवा मन ल ए राष्ट्रीय मिशन म सामिल करे बर कतकोन जागरूकता कार्यक्रम कराय हे।
सीबीएसई-बोर्ड परीक्षा
केन्द्रीय माध्यमिक सिक्षा बोर्ड-सीबीएसई ह अवइया बछर ले दसवीं के बोर्ड परीक्षा बछर म दू घांव कराय के घोसना करे हे। एखर अनुसार पहिली परीक्षा फरवरी म होही, जउन ह सबो विद्यार्थी मन बर जरूरी होही। दूसर परीक्षा मई म होही, जउन ह ओ विद्यार्थी मन बर वैकल्पिक होही, जउन मन ह अपन प्रदर्शन ल सुधारना चाहत हे। सबो पास होय विद्यार्थी मन ल विज्ञान, गणित, समाज विज्ञान अउ भासा म कोनों भी तीन बिषय म अपन प्रदर्सन सुधारे के अनुमति होही। दूनों चरण के परीक्षा परिणाम अप्रैल अउ जून म घोसित होही।
केन्द्रीय शिक्षा मंत्री धर्मेन्द्र प्रधान ह एला जरूरी कदम बतावत एखर तारीफ करीन हे। ओमन किहीन कि ए राष्ट्रीय शिक्षा नीति के अनुसंसा म प्रमुख रिहीस।
धरती आबा ग्राम उत्कर्ष अभियान
धरती आबा जनजाति ग्राम उत्कर्ष अभियान म आज मोहला-मानपुर-अंबागढ़ चौकी जिला के माओवाद प्रभावित कारेकट्टा गांव म भारत-तिब्बत सीमा पुलिस बल-आईटीबीपी के जवान मन ह ग्रामीण मन संग मिलके पौधारोपण करीन। ए मउका म आईटीबीपी के कमांडेंट विवेक पांडेय ह ग्रामीण मन ले पर्यावरण संरक्षण अउ संवर्धन म सहभागिता करे के अपील करीन। उहें, वनमंडल अधिकारी दिनेश पटेल ह किहीन कि जैव विविधता ल बनाय बर पौधारोपण जरूरी हे।
माओवादी मुठभेड़/गिरफ्तार
नारायणपुर जिला के अबूझमाड़ थाना क्षेत्र के कोहकामेटा म सुरक्षा बल के संग होय मुठभेड़ म दू झन महिला माओवादी मन मारे गीन हे। दूनों के सव ल बरामद कर ले गेहे। मउका ले एक ठन इंसास रायफल, तीन सौ पन्द्रह बोर के बंदूक अउ दूसर माओवादी जिनीस बरामद करे गेहे।
मिले जानकारी के अनुसार म कोहकामेटा इलाका म माओवादी मनके माड़ डिवीजन के बड़े कैडर के मौजदूगी के सूचना उपर डिस्ट्रिक्ट रिजर्व गार्ड-डीआरजी अउ स्पेशल टास्क फोर्स-एसटीएफ के संयुक्त टीम ह सर्चिंग म निकले रिहीस। इही दउरान पाछु रतिहा माओवादी मनके संग सुरक्षा बल के मुठभेड़ होइस। आज बिहनिया जवान मन डहार ले चलाय गे सर्च ऑपरेशन म दू झन महिला माओवादी मनके सव बरामद करे गीस।
नारायणपुर जिला के ही ओरछा थाना क्षेत्र म पुलिस ह दू झन माईलोगिन संघरा चार माओवादी मन ल गिरफ्तार करे हे। ए सबो माओवादी मन उपर ग्राम आदेर-बड़े टोंडेबेड़ा के जंगल म होय मुठभेड़ के घटना म सामिल रेहे के आरोप हे। ए सबो माओवादी मन ह प्रतिबंधित संगठन सीपीआई-एम समर्थित रिहीन। ए माओवादी मनके तीर ले बारह बोर के दू बंदूक, तीन सौ पन्द्रह बोर के रायफल, जिंदा कारतूस अउ डेटोनेटर बरामद करे गेहे।
राज्यपाल-खैरागढ़
राज्यपाल रमेन डेका आज ले खैरागढ़-छुईखदान-गंडई जिला के दू दिन के दउरा म हवय। पहिली दिन श्री डेका ह अधिकारी मनके बइठका लेके विकास काम के जानकारी लीन। अपन गोद ले गांव सोनपुरी म चलत योजना के बारे म चर्चा करीन। राज्यपाल ह सिक्षा, स्वास्थ्य, प्रधानमंत्री आवास योजना, कृषि उद्यानिकी अउ जल जीवन मिशन जइसन बुनियादी सेवा के बारे म जानकारी लीन। ओमन किहीन कि सबो योजना के फायदा हरेक ग्रामीण तक पहुंचाना प्रशासन के जिम्मेदारी हे।
राज्यपाल ह ‘‘एक पेड़ मां के नाम‘‘ अभियान म सबो सासकीय भवन जइसे स्कूल, आंगनबाड़ी, पंचायत भवन अउ स्वास्थ्य केन्द्र म जादा ले जादा पौधा लगाय के आग्रह करीन।
आईपीएस-तबादला
राज्य सरकार ह भारतीय पुलिस सेवा के नौ झिन अधिकारी मनके प्रभार म फेरबदल करे हे। नारायणपुर के पुलिस अधीक्षक प्रभात कुमार के स्थानांतरण पुलिस मुख्यालय करे गेहे। उहें, इही जिला के अतिरिक्त पुलिस अधीक्षक रॉबिन्सन गुरिया ल नारायणपुर के एसपी बनाय गे हवय। दंतेवाड़ा के एएसपी पूजा कुमार के स्थानांतरण बिलासपुर कर दे गेहे। बीजापुर के एएसपी मयंक गुर्जर ल छत्तीसगढ़ सशस्त्र बल बीजापुर, दुरूग जिला के डीएसपी चिराग जैन ल मोहला-मानपुर-अंबागढ़ चौकी जिला के एएसपी अउ दंतेवाड़ा जिला के एएसपी राजनला स्मृतिक ल एसटीएफ बघेरा के एसपी नियुक्त करे गेहे। एखर अलावा भानुप्रतापपुर के एसडीओपी संदीप कुमार ल छत्तीसगढ़ सशस्त्र बल नारायणपुर के सेनानी, सुकमा के एएसपी उमेश प्रसाद गुप्ता ल छत्तीसगढ़ सशस्त्र बल धनोरा के सेनानी अउ एआईजी नवा रायपुर विकास कुमार ल विशेष शाखा सूचना के एसपी बनाय गे हवय।
आकर्षि कश्यप-यूएस ओपन
दुरूग जिला के अंतर्राष्ट्रीय बैडमिंटन खिलाड़ी आकर्षि कश्यप ह योनेक्स यूएस ओपन म महिला एकल ड्रा के राउंट ऑफ म चीनी ताइपे के टिंग यू लियांग ल सीधा सेट म हरा देहे। आकर्षि ह सुरूच ले अपन प्रदर्सन सुघ्घर राखीन, जेखर ले उंखर प्रतिद्वंदी ह सरलग बैकफुट म रिहीन।
आकर्षि एनटीपीसी कोरबा के कॉर्पोरेट सामाजिक जिम्मेदारी पहल के लाभार्थी रेहे हे, जेखर ले ओमन ल प्रसिक्षण, प्रतिस्पर्धा अउ वैश्विक मंच म रैंक के माध्यम ले आगू बाढ़े म मदद मिले हे। एमा आकर्षि कश्यप ह एनटीपीसी कोरबा के आभार जतईन हे।
अउ अब मौसम के हाल….
मौसम विभाग के अनुसार उत्तर-पश्चिम बंगाल के खाड़ी अउ ओखर ले लगे तटीय ओड़िशा अउ पश्चिम बंगाल के उपर एक ठिन निम्नदाब के क्षेत्र बने हे। उहें, एक ठिन उपरी हवा के चक्रवाती घेरा उत्तर-पूर्व मध्यप्रदेश के उपर हे, ेजेखर असर ले प्रदेस म काली जादा ले जादा जघा म हल्का ले मध्यम बरसा होय के या गरज-चमक के संग छींटा पड़े के संभावना हे। मौसम विभाग ह मध्य छत्तीसगढ़ के कुछेक जघा म भारी बरसा होय के अउ आकाशीय बिजली गिरे के चेतावनी देहे।