संविधान हत्या दिवस
संविधान हत्या दिवस काली मनाय जाही। पच्चीस जून उन्नीस सौ पचहत्तर ह भारत के संविधान ल कुचले के घटना के सुरता देवाथे। ए दिन म ओ सबो झन ल श्रद्धांजलि दे जाथे, जउन मन आपातकाल के बेरा म परेसानी झेले रिहीन। ए ह भारतीय इतिहास के सबले काला समय रिहीस। ए दिन ओ जम्मों लोगन के योगदान ल घलो सुरता करे जाथे, जउन मन ह आपातकाल के कठिन परिस्थिति ल सहन करे रिहीन।
इही बीच, केन्द्रीय राज्यमंत्री तोखन साहू ह आज दुरूग के भाजपा कार्यालय म आपातकाल के पचास बछर पूरा होय के मउका म राखे गे पत्रकारवार्ता म तत्कालीन कांग्रेस सरकार उपर निसाना साधीन।
उहें, वित्तमंत्री ओ.पी. चौधरी ह जाजंगीर म पत्रकार मन ले गोठबात करत किहीन कि भाजपा ह काली पच्चीस जून के देसभर म लोकतंत्र हत्या दिवस के रूप म मनाही। ए दउरान लोकतंत्र सेनानी मन के सम्मान करे जाही। ओमन किहीन कि कांग्रेस ह आपातकाल लगाके लोकतंत्र के हत्या करे रिहीस अउ ओ बखत इंदिरा इन इंडिया-इंदिरा इज इंडिया के महौल बनाय गे रिहीस। श्री चौधरी ह किहीन कि कांग्रेस ह आपातकाल लगाके लोगन मन ल परेशान करे के काम करे रिहीन।
जुएल ओराम-छत्तीसगढ़
केन्द्रीय जनजाति मामला के मंत्री जुएल ओराम काली छत्तीसगढ़ के एक दिन के दउरा म आही। श्री ओराम रायपुर म पत्रकारवार्ता के बाद आपातकाल के पचासवां बरसी म एक संगोष्ठी ल संबोधित करही। ए जानकारी भारतीय जनता पार्टी के प्रदेस महामंत्री अउ कार्यक्रम संयोजक रामजी भारती ह दीन। ओमन बतईन कि श्री ओराम आपातकाल के बरसी म होवइया संगोष्ठी म मुख्य वक्ता के रूप म सामिल होही। संगोष्ठी म कार्यक्रम सह संयोजक सच्चिदानंद उपासने, इंदिरा गांधी कृषि विश्वविद्यालय के कुलपति डॉक्टर गिरीश चंदेल, महात्मा गांधी विश्वविद्यालय के कुलपति डॉक्टर रवि सक्सेना अउ राजनांदगांव के भाजपा सांसद संतोष पांडेय ह अपन विचार राखही। कार्यक्रम म लोकतंत्र सेनानी के सम्मान करे जाही। एखर बाद श्री ओराम पौधारोपण कार्यक्रम म घलो हिस्सा लीहीं।
मध्य क्षेत्रीय परिषद-बैठक
केन्द्रीय गृह अउ सहकारिता मंत्री अमित शाह के पगरइति म आज वाराणसी म मध्य क्षेत्रीय परिषद के पच्चीसवां बइठका होइस। ए बइठका म छत्तीसगढ़ के मुख्यमंत्री विष्णुदेव साय समेत उत्तरप्रदेश के मुख्यमंत्री योगी आदित्यनाथ, मध्यप्रदेश के मुख्यमंत्री मोहन यादव अउ उत्तराखंड के मुख्यमंत्री पुष्कर सिंह धामी घलो मौजूद रिहीन। बइठका म राज्य मनके बीच समन्वय, सुरक्षा, स्वास्थ्य, पर्यटन, परिवहन, आपदा प्रबंधन अउ अवसंरचना विकास जइसन बिसय उपर गोठबात होइस।
केन्द्रीय गृहमंत्री-जवान संवाद
केन्द्रीय गृहमंत्री अमित शाह ह काली नवा रायपुर म सुरक्षा बल के जवान मन संग संवाद करीन। ए दउरान श्री शाह ह कहिन कि सुरक्षा बल मन ह जउन सौर्य, धैर्य अउ समर्पण के संग माओवादी मनके बनाए अड्डा ल तहस-नहस करे हे, ओह विश्व के जम्मों सुरक्षा बल मन ल अंचिभित कर देहे। सुरक्षा बल के इही भरोसा ले केन्द्र सरकार ह देस म इकतीस मार्च दू हजार छब्बीस तक नक्सलवाद के खात्मा ल लेके आश्वस्त हे। श्री शाह ह किहीन कि प्रधानमंत्री नरेन्द्र मोदी के अगुवई म जब देस ह नक्सलवाद ले मुक्त होही, त वो क्षण आजादी के बाद के सबले जादा बिसेस क्षण होही। ओमन किहीन कि नक्सलवाद के खात्मा के इतिहास लिखे के संगेसंग सुरक्षा बल मनके जवान के त्याग, बलिदान अउ मेहनत ह स्वर्णिम अक्षर म अंकित होही।
ए मउका म केन्द्रीय गृहमंत्री ह नक्सली मन डहार ले आदिवासी मनके संहार अउ बस्तर ल बचाय के कोसिस म लिखे गे पुस्तक ‘‘लियोर ओयना‘‘ के लोकार्पण घलो करीन।
ए मउका म मुख्यमंत्री विष्णुदेव साय, उपमुख्यमंत्री विजय शर्मा, केन्द्रीय गृह सचिव, आसूचना ब्यूरो के निदेशक, बीएसएफ के महानिदेशक समेत आने-आने बड़का अधिकारी मन मौजदू रिहीन।
मलेरिया मुक्त छत्तीसगढ़ अभियान
‘‘मलेरिया मुक्त छत्तीसगढ़ अभियान के बारहवां चरण काली ले सुरू होही। ए अभियान के तहत मलेरिया प्रभावित अउ संवेदनशील क्षेत्र म बड़का पैमाना म जांच, उपचार अउ जनजागरूकता गतिविधि आयोजित करे जाही। मलेरिया मुक्त छत्तीसगढ़ अभियान ले बस्तर संभाग म मलेरिया के मामला म बहत्तर प्रतिशत तक के कमी दर्ज करे गेहे। राज्य सरकार अउ स्वास्थ्य विभाग ह बछर दू हजार सत्ताईस तक मलेरिया के खात्मा के लक्ष्य राखे हे। ए अभियान के फोकस विशेष रूप ले बस्तर संभाग के सबो सात जिला – बस्तर, दंतेवाड़ा, बीजापुर, सुकमा, नारायणपुर, कांकेर अउ कोंडागांव के संगेसंग गरियाबंद, खैरागढ़-छुईखदान-गंडई अउ कवर्धा जिला म चिन्हांकित क्षेत्र मन म रइही।
धरती आबा ग्राम उत्कर्ष अभियान
धरती आबा जनजातीय ग्राम उत्कर्ष अभियान के तहत ए दिन प्रदेसभर म आने-आने कार्यक्रम आयोजित करे जावत हे। इही कड़ी म कोंडागांव जिला के बनियागांव अउ माकड़ी विकासखंड म सिविर लगाय गीस। ए सिविर म बस्तर विकास प्राधिकरण के उपाध्यक्ष लता उसेंडी ह किहीन कि धरती आबा जनजातीय ग्राम उत्कर्ष अभियान के उद्देश्य जनजातीय क्षेत्र मन म अधोसरंचना विकास के संगेसंग हितग्राहीमूलक योजना के लाभ पहुंचाना हे। कार्यक्रम म खाद्य विभाग डहार ले चौदह हितग्राही मन ल रासन कार्ड, नौ किसान मन ल किसान क्रेडिट कार्ड, छह हितग्राही मन ल सब्जी-बीज के वितरण अउ स्वास्थ्य विभाग डहार ले आठ हितग्राही मन ल आयुष्मान कार्ड दे गीस।
जशपुर-कृषि क्रांति
जशपुर म ‘‘कृषि क्रांति‘‘ अभियान के तहत अट्ठाईस अउ उनतीस जून के दू दिन के सम्मेलन के आयोजन करे जाही। ए सम्मेलन के उद्देश्य जिला के किसान मन ल राष्ट्रीय स्तर म बाजार ले जोड़के उंखर उत्पाद ल सुघ्घर दाम देवाना हे। जिला म कृषि, उद्यानिकी अउ रेशम उत्पादन ल प्रोत्साहन दे बर जिला प्रशासन डहार ले पहली बखत एग्री-हॉटी क्रेता-विक्रेता सम्मेलन के आयोजन करे जाही। सम्मेलन के पहिली दिन क्रेता-विक्रेता परिचय सत्र, फसल संग्रहण, संरक्षण अउ प्रसंस्करण संबंधी तकनीकी जानकारी के संगेसंग कृषि, उद्यानिकी, रेशम अउ वनोपज के निर्यात ल बढ़ावा दे बर गुणवत्ता मानक, नियम अउ विपणन व्यवस्था के जानकारी दे जाही। एखरे संग आने-आने फसल के प्रदर्सनी घलो लगाय जाही।
उहें, दूसरइया दिन उनतीस जून के देस के आने-आने राज्य ले आय उद्यमी मन ल जिला के खेत अउ उत्पाद मनके घुमाय जाही, जेखर ले ओमन किसान मनके उत्पाद ल जान सकही। ए ह किसान अउ कंपनी मनके बीच किसान उत्पादक संगठन-एफ.पी.ओ. के माध्यम ले सीधा संवाद अउ विपणन के दिसा म बढ़िया कदम होही। एखर ले बिचौलिया मनके भूमिका खतम होही अउ किसान मन ल उंखर उपज के उचित मूल्य मिलही।
सचिन पायलट-प्रेसवार्ता
अखिल भारतीय कांग्रेस कमेटी के महासचिव अउ छत्तीसगढ़ प्रभारी सचिन पायलट ह आज रायपुर स्थित राजीव भवन म पत्रकार मन ले गोठबात करीन। ओमन बतईन कि अवइया सात जुलाई के कांग्रेस पार्टी राजधानी रायपुर के साईंस कॉलेज मैदान म ‘‘किसान, जवान, संविधान‘‘ सभा के आयोजन करही। ए सभा ल कांग्रेस के राष्ट्रीय अध्यक्ष मल्लिकार्जुन खड़गे अउ कांग्रेस के संगठन महासचिव के.सी. वेणुगोपाल संबोधित करही। ए दउरान ओमन प्रदेस के भाजपा सरकार उपर कई ठिन आरोप लगईन।
ऑपरेशन साइबर शील्ड-कार्रवाई
ऑपरेशन साइबर शील्ड के तहत फर्जी सिम बेचइया मन उपर रायपुर पुलिस ह कार्रवाई करे हे। ए मामला म पुलिस ह फर्जी सिम कार्ड विक्रेता, एजेंट, डिस्ट्रीब्यूटर समेत ग्यारह आरोपी मन ल राजस्थान, मध्यप्रदेश, रायपुर, दुरूग अउ धमतरी ले गिरफ्तार करे हे। पुलिस के मुताबिक आरोपी मन ह फर्जी सिम यूनाइटेड अरब अमीरात, श्रीलंका, नेपाल अउ म्यांमार जइसन देश के म्यूल अकाउंट के ब्रोकर, डिस्ट्रीब्यूटर अउ संचालक मन ल बेचे रिहीन। पुलिस कार्रवाई म अब तक सात हजार ले जादा सिम कार्ड अउ पांच सौ नब्बे मोबाइल के पहिचान होय हे।