केंद्रीय गृह अउ सहकारिता मंत्री अमित शाह आज रईपुर म सीमा सुरक्षाबल- बीएसएफ के जवान मनले गोठबात करीन।
एखर पहिली, केंद्रीय गृहमंत्री अमित शाह ह नवा रईपुर म सुकमा म आईईडी बिस्फोट म सहीद आकाश राव गिरिपुंजे के परिवार वाले मन ले भेंट करीन अउ संवेदना जतइन। केंद्रीय गृहमंत्री ह सहीद अतिरिक्त पुलिस अधीक्षक आकाश राव गिरिपुंजे के वीरता अउ बलिदान के प्रसंसा करत किहीन कि उंखर सहादत देस ल सुरता रइही अउ उंखर सहादत बेकार नइ जाही। ए बेरा म श्री शाह ह सहीद के परिवार वाले मन ल भरोसा देवाइन कि सरकार उंखर संग हर कदम म खड़े हे अउ सरकार सहीद के परिवार ल हर संभव मदद देबर प्रतिबध्द हवय। ए मउका म मुख्यमंत्री विष्णुदेव साय अउ राज्य के गृहमंत्री विजय शर्मा घलो मौजूद रिहीन।
उहें, केंद्रीय गृहमंत्री अउ मुख्यमंत्री ह नवा रईपुर म बीजापुर के गंगालुर अउ उसूर विकासखंड ले आय लइका अउ युवा मन ले भेंट करत गोठबात करीन।
केंद्रीय गृहमंत्री-नक्सलवाद समीक्षा
केंद्रीय गृहमंत्री अमित शाह ह काली रईपुर म नक्सलवाद ले निपटे बर समीक्षा बइठका के अगुवई करीन। ए बइठका म वाम उग्रवाद ले पीड़ित सात राज्य के पुलिस महानिदेसक अपर पुलिस महानिदेसक अउ बड़का अधिकारी मन सामिल होइन। श्री शाह ह किहीन कि देस अवइया बछर के इकतीस मार्च तक नक्सलवाद ले मुक्त हो जही। ओमन नक्सलवाद के रद्दा म भटके सबो युवा मन ले हथियार डाले के अपील करीन। संगेसंग किहीन कि केंद्र अउ छत्तीसगढ़ सरकार आत्मसमर्पण करइया माओवादी मनले करे गे जम्मों वादा ल पूरा करही।
केंद्रीय गृहमंत्री अमित शाह काली उत्तर प्रदेस के वाराणसी म मध्य क्षेत्रीय परिषद के पचीसवां बइठका के अगुवई करही। मध्य क्षेत्रीय परिषद म छत्तीसगढ़ समेत मध्य प्रदेस, उत्तराखंड अउ उत्तर प्रदेस राज्य सामिल हे। ए बइठका म सदस्य राज्य के मुख्यमंत्री अउ दू बड़का मंत्री सामिल होही। पाछू कुछेक बछर म क्षेत्रीय परिषद के भूमिका आने-आने क्षेत्र म आपसी समझ अउ मदद के स्वस्थ बंधन ल बढ़ावा दे म मुख्य हरय। पाछू ग्यारा बछर म सबो राज्य सरकार केंद्रीय मंत्रालय अउ विभाग के मदद ले आने-आने क्षेत्रीय परिषद अउ उंखर स्थायी समिति के कुल इकसठ बइठका होय हे।
सचिन पायलट-बैठक
कांग्रेस के छत्तीसगढ़ प्रभारी सचिन पायलट ह आज रईपुर म राजनीतिक मामला के समिति के बइठका लीन। बइठका म प्रदेस अध्यक्ष दीपक बैज, पूर्व मुख्यमंत्री भूपेश बघेल, नेता प्रतिपक्ष डॉक्टर चरणदास महंत समेत, पूर्व मंत्री विधायक अउ बड़का नेता संघरीन। बइठका म आने-आने मुद्दा म गोठबात होइस।
श्यामा प्रसाद मुखर्जी-पुण्यतिथि
राष्ट्र आज डॉक्टर श्यामा प्रसाद मुखर्जी ल श्रध्दांजलि देवत हे। प्रधानमंत्री नरेंद्र मोदी ह सोसल मीडिया पोस्ट म किहीन कि डॉक्टर मुखर्जी ह देस के अखंडता ल अक्षुण्ण राखे बर बड़ हिम्मत के परिचय दीन। भाजपा के राष्ट्रीय अध्यक्ष जगत प्रकाश नड्डा ह नई दिल्ली के पार्टी मुख्यालय म डॉक्टर मुखर्जी के पुण्यतिथि म फूलमाला चढ़ाके सुरता करीन। ओमन किहीन कि आज देसभर म कतकोन कारीकरम होवत हे। डॉक्टर मुखर्जी के योगदान ल बतात भाजपा के राष्ट्रीय अध्यक्ष ह किहीन ओमन स्वतंत्रता सेनानी अउ समाज सुधारक रिहीन। छत्तीसगढ़ के मुख्यमंत्री विष्णुदेव साय ह आज अपन निवास कार्यालय म शिक्षाविद अउ भारतीय जनसंघ के संस्थापक डॉक्टर श्यामा प्रसाद मुखर्जी के चित्र म फूलमाला चढ़ाइन अउ उंखर योगदान ल सुरता करीन।
उहें, डॉक्टर मुखर्जी के पुण्यतिथि म प्रदेस भाजपा कार्यालय कुशाभाऊ ठाकरे परिसर रईपुर म क्षेत्रीय संगठन महामंत्री अजय जामवाल, प्रदेस अध्यक्ष किरण सिंह देव, पूर्व विधानसभा अध्यक्ष धरमलाल कौशिक, भाजपा प्रदेस संगठन महामंत्री पवन साय समेत पदाधिकारी मन ह श्रध्दांजलि दीन।
चुनाव आयोग-प्रसिक्षण
नई दिल्ली के इंडिया इंटरनेशनल इंस्टीट्यूट ऑफ डेमोक्रेसी एंड इलेक्सन मैनेजमेंट म आज बूथ स्तर के अधिकारी अउ पर्यवेक्षक मन बर तेरहवां प्रसिक्षण सत्र के सुरूआत होइस। मुख्य चुनाव आयुक्त ज्ञानेश कुमार ह तीन सौ उनयासी प्रतिभागी मन संग गोठबात करत कारीकरम के उद्घाटन करीन। पाछू तीन महिना म चुनाव आयोग कोति ले नई दिल्ली म पांच हजार ले जादा बीएलओ अउ बीएलओ पर्यवेक्षक मन ल प्रसिक्षित करे गेहे। मुख्य चुनाव आयुक्त ज्ञानेश कुमार ह किहीन कि प्रसिक्षण कारीकरम ए जाने बर जरूरी हे, कि मतदाता सूची के तियारी अउ चुनाव जनप्रतिनिधत्व अधिनियम के मुताबिक कड़ाई ले आयोजित करे जाय। ओमन किहीन कि कोनो भी लोकतंत्र म कानून ले जादा साफगोई कुछू नइ हो सकय अउ भारत म चुनाव कानून के मुताबिक होथे।
केके श्रीवास्तव-गिरफ्तार
स्मार्ट सिटी प्रोजेक्ट लिमिटेड म ठेका देवाय के नांव म ठगी करइया केके श्रीवास्तव ल रईपुर पुलिस के टीम ह भोपाल ले गिरफ्तार करे हे। दस महिना पहली रईपुर के तेलीबांधा थाना म स्मार्ट सिटी प्रोजेक्ट लिमिटेड म पांच सौ करोड़ रूपिया के ठेका देवाय के झांसा देके पंद्रह करोड़ रूपिया वसूले अउ धोखाधड़ी करे म केके श्रीवास्तव अउ उंखर बेटा कंचन श्रीवास्तव के खिलाफ एफआईआर दरज करे गे रिहीस, तभे ले केके श्रीवास्तव अउ उंखर बेटा फरार रिहीन। उंखर जमानत याचिका हाईकोर्ट ले घलो खारिज हो गेहे। अब दस महिना बाद केके श्रीवास्तव ल गिरफ्तार करे गेहे। तत्कालिन एसएसपी संतोष सिंह ह केके श्रीवास्तव ल भगोड़ा घोसित करत ओखर उपर ईनाम के घोसना करे रिहीन। संगेसंग ईडी ल घलो जांच खातिर चिट्ठी लिखे रिहीन। ईडी ह घलो जांच के बादे पचास करोड़ रूपिया के मनीलॉन्ड्रिंग के मामला म केके श्रीवास्तव के खिलाफ दरज करे हे।
प्रयास विद्यालय-काउंसलिंग
मुख्यमंत्री बाल भविष्य सुरक्षा योजना म चलाय जात प्रयास विद्यालय म चालू शैक्षणिक सत्र म कक्षा नवमीं बर प्रवेस खातिर विद्यार्थी मन के मेरिट अउ प्रतीक्षा सूची विभाग के वेबसाइट म जारी कर दे गेहे। काउंसलिंग के काम रईपुर म गुढ़ियारी के प्रयास कन्या आवासीय विद्यालय म आज ले सुरू हो गेहे, जउन सत्ताईस जून तक चलही। ए बेरा म विद्यार्थी मन ल जरूरी दस्तावेज, प्रवेस पत्र, निवास अउ जाति प्रमाण पत्र के संगेसंग कक्षा आठवीं के अंकसूची संग आय बर ेकेहे गेहे।
दुर्घटना
बेमेतरा जिला के शिवनाथ नंदिया पूल म एक कार अंतेतंते होके नंदिया म गिरगे। ए हादसा म कार म बइठे एक मनखे के मउकाच म मउत होगे। सूचना मिलतेच सिमगा पुलिस अउ बेमेतरा पुलिस मउका म पहुंचिन, जेखर बाद क्रेन ले कार ल नंदिया ले बाहिर निकाले गीस। मउत होय मनखे के चिन्हारी मध्यप्रदेस के रहवइया अमित बघेल के रूप म होय हे अउ ओहा बेमेतरा के बैंक ऑफ इंडिया म काम करत रिहीस।
अउ अब मौसम के हाल….
प्रदेस म छब्बीस जून ले बरसा होय के संभावना हरय। मौसम विभाग के मुताबिक उपरी हवा के चक्रीय-चक्रवाती घेरा उत्तर प्रदेस के दक्षिणी भाग म हवय। उहें, एक द्रोणिका उत्तर प्रदेस के दक्षिणी भाग ले उत्तर पश्चिम बंगाल के खाड़ी तक उत्तर पूर्व मध्यप्रदेस, झारखंड, उत्तर ओडिसा तक बने हे। अइसने एक उपरी हवा के चक्रीय-चक्रवाती घेरा पश्चिम मध्य बंगाल के खाड़ी अउ ओखर ले लगे उत्तर पश्चिम बंगाल के खाड़ी तक बढ़वार हवय, जेखर प्रभाव ले काली चौबीस जून ले कतकोन जघा म छूटपुट बरसा अउ गरज-चमक संग छींटा बौछार होय के संभावना हरय। उहें, एक-दू जघा म गरज-चमक संग हवा गरेर अउ गाज गिरे के चेतावनी दे गेहे।
अउ अब थोरकुन समाचार सार म –
– राज्यपाल रमेन डेका ह राजभवन म तुलसी शिक्षा अउ कल्याण समिति कांकेर कोति ले चलाय जात तुलसी शिशु मंदिर के भवन विकास खातिर दू लाख रूपिया स्वेच्छानुदान मद ले देके घोसना करीन हे।
– फर्जी प्रमाण पत्र बनवाके नौकरी लगवइया अंतर्राज्यीय गिरोह के फरार आरोपी फैजान खान ल मुंगेली पुलिस ह गिरफ्तार करे हे। ओखर तीर ले फर्जी सील पेनड्राइव, लैपटाप अउ एक मोबाइल फोन जब्त करे गेहे।