केंद्रीय गृहमंत्री ह आज छत्तीसगढ़ के अपन दू दिवसीय प्रवास के दउरान नवा रायपुर के बंजारी गांव नेशनल फॉरेंसिक साईंस विश्वविद्यालय अउ सेंट्रल फॉरेंसिक साईंस लैबोरेट्री के भवन निर्माण खातिर भूमिपूजन करीन। संगेसंग फॉरेंसिक साईंस विश्वविद्यालय रायपुर के अस्थायी परिसर के ई-उद्घाटन घलो करीन। श्री शाह ह ए मउका म आई-हब याने छत्तीसगढ़ छात्र स्टार्टअप अउ नवाचार हब के वर्चुअल सुभारंभ घलो करीन। ए मउका म छत्तीसगढ़ के मुख्यमंत्री विष्णुदेव साय अउ उपमुख्यमंत्री विजय शर्मा घलो सामिल रिहीन।
कारीकरम ल संबोधित करत केंद्रीय गृह मंत्री अमित शाह ह किहीन कि क्रिमीनल जस्टिस सिस्टम ल आधुनिक बनाय खातिर तीन ठिन नवा सुरूआत होय हवय। ए पहल अवइया दिन म न सिरिफ छत्तीसगढ़ बल्कि जम्मों मध्य भारत के क्रिमीनल जस्टिस सिस्टम ल आधार देवय के काम करही।
केंद्रीय गृहमंत्री ह अवइया बछर मार्च तक नक्सलवाद के पूरा तरीका ले सफाया करे के अपन संकल्प ल दोहरात हुए किहीन कि छत्तीसगढ़ समेत आने-आने राज्य मन म सुरक्षाबल, जइसन तरीका ले अभियान चलावत हे, ओखर ले हमन अपन लक्ष्य ल जल्दीच हासिल कर लेबो।
केंद्रीय मंत्री ह किहीन कि छत्तीसगढ़ सरकार ह बड़ सुघ्घर आत्मसमर्पण नीति बनाय हवय। ओमन माओवादी मन ले अपील करीन के, ओमन ए नीति के फायदा उठाके हथियार डाल देवय अउ नवा छत्तीसगढ़ के निर्माण म सहयोगी बनय।
केंद्रीय गृह मंत्री-छत्तीसगढ़-02
केंद्रीय गृहमंत्री रायपुर म छत्तीसगढ़ समेत नक्सल समस्या ले प्रभावित 7 ठिन राज्य मनके बड़का अधिकारी मन के संग बइठका कर नक्सलवाद ल खतम करे बर चलाय जावत अभियान के समीक्षा करत हवय। ए बइठका म छत्तीसगढ़ आंध्रप्रदेस, तेलंगाना, मध्यप्रदेस, महाराष्ट्र, झारखंड अउ ओडिसा के पुलिस महानिदसेक, अतिरिक्त पुलिस महानिदेसक अउ पुलिस प्रशासन के आने अधिकारी मन सामिल होवत हवय।
केंद्रीय गृहमंत्री श्री शाह काली 23 जून के नारायणपुर जिला के अबूझमाड़ क्षेत्र के गांव वाला मन के संग गोठबात करहीं। एखर अलावा केंद्रीय मंत्री इही जिला के इरकभट्ठी बी.एस.एफ. कैम्प के दउरा कर जवान मन संग घलो गोठबात करहीं।
माओवादी-ग्रामीण हत्या
बीजापुर जिला म आज माओवादी मन ह दू झिन गांव वाला मन के हत्या कर दीन हवय। मिले जानबा के मुताबिक पामेड़ थाना के सेंड्राबोर अउ एमपुर गांव म माओवादी मन पहुंचिन अउ दूनों झिन गांव वाला मन ल अगवा कर धारदार हथियार ले उंखर हत्या कर दीन। जेखर जांच पुलिस ह करत हवय।
माओवादी-गिरफ्तार
बीजापुर जिला म आज सुरक्षा बल मन ह पांच झिन माओवादी मन ल गिरफ्तार करीन। ए माओवादी मन ल मद्देड़ गंगालूर अउ जांगला थाना के अंतर्गत करे गे अलग-अलग कार्रवाई म गिरफ्तार करे गेहे। मद्देड़ म एक माओवादी के सहयोगी तीर ले माओवादी, साहित्य, बिस्फोटक साम्रगी, वर्दी के संगेसंग रोजाना बउरे के समान बरामद करे गेहे। उहें, गंगालूर म सुरक्षाबल के संयुक्त कार्रवाई म मुतवेंडी ले तीन झन माओवादी ल बिस्फोटक समान के संग गिरफ्तार करे गेहे।
इही जिला म डीआरजी के जवान मन ह पांच-पांच किलो के दू आईईडी घलो बरामद करे हे। जेला बम निरोधक दस्ता के टीम ह निष्क्रिय कर देहे।
रायपुर-‘साइक्लोथॉन‘
नारकोटिक्स कंट्रोल ब्यूरो-एन.सी.बी. जोनल यूनिट ह आज बिहनिया राजधानी रायपुर के तेलीबांधा मरीन ड्राइव म ‘साइक्लोथॉन‘ के आयोजन करीस। ए कारीकरम म बड़ संख्या म साइकल चलइया मन ह हिस्सा लीन। पुलिस महानिरीक्षक अजय यादव ह ‘साइक्लोथॉन‘ ल हरा झंडी दिखाके रवाना करीन। ए कारीकरम म एन.सी.बी. रायपुर के उप निदेशक रविशंकर जोशी, सहायक पुलिस महानिरीक्षक-यातायात संजय शर्मा अउ आने लोगन मन ह हिस्सा लीन।
गौरतलब हवय कि अंतर्राष्ट्रीय मादक पदार्थ सेवन अउ अवैध तस्करी विरोधी दिवस या विश्व मादक पदार्थ दिवस हर बछर 26 जून के मनाय जाथे। ए बछर 12 ले 26 जून तक ‘‘नशा मुक्त भारत पखवाड़ा‘‘ मनाय जावत हे। एखर तहत स्कूल, रेलवे टेसन, सार्वजनिक जघा अउ गांव के लोगन मन ल नसीला दवा के गलत उपयोग के नुकसान के बारे म जागरूक करे जावत हे।
मुख्यमंत्री-शालू डहरिया
मुख्यमंत्री विष्णुदेव साय ह प्रदेस के सॉफ्टबॉल खिलाड़ी शालू डहरिया ल 1 लाख 70 हजार रूपिया के आर्थिक सहायता प्रदान करीन हे। मुख्यमंत्री ह ओला वीडियो कॉल के जरिया अपन सुभकामना घलो दीन। शालू डहरिया के चयन 14 ले 20 जुलाई तक चीन के सिआन म होवइया एशिया यूथ सॉफ्टबॉल चैंपियनशिप बर भारतीय टीम म होय हवय। छत्तीसगढ़ ले ए ओपन टूर्नामेंट खातिर सिरिफ दू झिन महिला खिलाड़ी मनके चयन होय हे, जेमा शालू डहरिया घलो सामिल हवय।
जांजगीर-चांपा कलेक्टर जन्मेजय महोबे ह शालू डहरिया ल 1 लाख 70 हजार रूपिया के सहायता रासि के चेक सौंपिन।
प्रदेस म काली कुछेक जघा म हल्का ले मध्यम बरसा होय या फेर गरज-चमक के संग छींटा पड़े के संभावना हवय। उहें, एक-दू जघा म गरज-चमक के संग हवा गरेर चले अउ गाज गिरे के आसंका हवय। मौसम विभाग के मुताबिक एक निम्नदाब के क्षेत्र दक्षिण पूर्व उत्तरप्रदेस अउ ओखर तीर-तखार हवय। संगेसंग उपरी हवा के चक्रीय-चक्रवाती घेरा बने हुए हे। उहें, एक ठिन द्रोणिका गुजरात के बीच भाग ले बांग्लादेस के बीच भाग तक हवय। एखर असर ले काली प्रदेस के एक-दू जघा म हल्का ले मध्यम बरसा हो सकत हे।