केंद्रीय गृहमंत्री अमित शाह ह बाईस जून के छत्तीसगढ़ के एक दिवसीय प्रवास म रायपुर अवइया हे। ए बेरा म श्री शाह ह नवा रायपुर म नेशनल फॉरेंसिक साईंस यूनिवर्सिटी के स्थायी कैम्पस के भूमिपूजन करहीं। उप मुख्यमंत्री विजय शर्मा ह बतइन कि केंद्रीय गृह मंत्री ह अपन प्रवास के दउरान कतकोन आने कारीकरम म घलो सामिल होही।
केंद्रीय गृहमंत्री ह छत्तीसगढ़ के आंतरिक सुरक्षा, माओवाद प्रभावित क्षेत्र के स्थिति अउ सुरक्षा बल के जवान मनके चुनौती ल लेके घलो समीक्षा करइया हे। संगेसंग ओमन ह माओवादी मोर्चा म तैनात जवान मनले गोठबात अउ शहीद जवान मनके घर वाला मनले घलो भेंट करही।
जानबा के अनुसार ए फॉरेंसिक साईंस यिनवर्सिटी के स्थापना करीबन चालीस एकड़ के भुंईया म तीन सौ पचास करोड़ रूपिया के लागत ले करे जात हे, जउन कि अवइया बछर म देस के फॉरेंसिक क्षमता ल नवा ऊंचाई दे वाला केंद्र बन सकत हे।
प्रधानमंत्री-योग दिवस
अंतर्राष्ट्रीय योग दिवस ल जन आंदोलन के संग एतिहासिक बनाय बर सबो ग्राम पंचायत ह पूरा तरीका ले तियार हे। पाछू महिना प्रधानमंत्री नरेंद्र मोदी ह ग्राम प्रधान मन ले अपील करे रिहीन कि ओमन ह पंचायत क्षेत्र के लोगन मन ल अंतर्राष्ट्रीय योग दिवस म सामिल होय बर प्रोत्साहित करय। श्री मोदी ह ओखर मनले योगा ल सामुदायिक जीवन के हिस्सा बनाय म अग्रणी भूमिका निभाय के आग्रह करीन हे।
अंतर्राष्ट्रीय योग दिवस
इक्कीस जून के अंतर्राष्ट्रीय योग दिवस हरय। ए बेरा म जिला मुख्यालय म होवइया योगा के कारीकरम बर मुख्य अतिथि मनके घोसना कर दे गेहे। ए संबंध म सामान्य प्रशासन विभाग कोति ले एक ठिक सूची ल जारी करे गेहे। राज्यपाल रमेन डेका राजधानी रायपुर अउ मुख्यमंत्री विष्णुदेव साय ह जशपुर जिला के रणजीता स्टेडियम म होय वाले योग दिवस कारीकरम म मुख्य अतिथि होही। ए बेरा म श्री साय ह जिला के कतकोन विकास कार्य के लोकार्पण अउ भूमिपूजन घलो करइया हे। कारीकरम के अध्यक्षता महिला अउ बाल विकास मंत्री लक्ष्मी राजवाड़े ह करही।
ऐति, उपमुख्यमंत्री अरूण साव ह मुंगेली अउ विजय शर्मा ह कबीरधाम जिला म होवइया योगा कारीकरम म सामिल होही। उहें, केंद्रीय राज्यमंत्री तोखन साहू ह बिलासपुर, विधानसभा अध्यक्ष डॉ. रमन सिंह ह राजनांदगांव, मंत्री रामविचार नेताम ह बलरामपुर-रामानुजगंज, दयालदास बघेल ह बेमेतरा, केदार कश्यप ह नारायणपुर, लखनलाल देवांगन ह कोरबा, श्याम बिहारी जायसवाल ह मनेन्द्रगढ़-चिरमिरी-भरतपुर, ओपी चौधरी ह रायगढ़ अउ टंकराम वर्मा ह महासमुंद म होय वाले योगा के कारीकरम म मुख्य अतिथि होही।
चरण पादुका योजना
मुख्यमंत्री विष्णुदेव साय ह इक्कीस जून के जशपुर जिला के तपकरा म हेवइया कारीकरम म प्रदेसव्यापी चरण पादुका वितरण योजना के सुभारंभ करही। ए बेरा म तेदुपत्ता संग्राहक परिवार के माईलोगिन मन ल चरण पादुका दे जाही।
मुख्यमंत्री श्री साय ह किहीन हे कि राज्य सरकार के प्राथमिकता हमेसा अंतिम पंक्ति के मनखे तक न्याय अउ सुविधा पहुंचाना हे। तेंदुपत्ता संग्राहक परिवार के राज्य के अर्थव्यवस्था अउ वनोपज आधारित आजीविका म महत्वपूर्ण योगदान हे। चरण पादुका योजना संकल्प पत्र के वादा रिहीस, जेला पूरा करे बर जाथन। ओमन किहीन कि ए सिरिफ चरण पादुका के वितरण नइ बल्कि संग्राहक परिवार के स्वाभीमान अउ सुरक्षा के प्रतीक हे।
जानबा के अनुसार ए योजना के क्रियान्वयन बर राज्य सरकार ह चालीस करोड़ रूपिया के स्वीकृति देहे जउन कि सीधा राज्य के बारह लाख चालीस हजार तेंदूपत्ता संग्राहक परिवार मनके माईलोगिन ल फायदा पहुंचाही, जेमन ल चरण पादुका के निसुल्क वितरण करे जाही।
राज्यपाल-टीबी अभियान
राज्यपाल ह आज राजभवन म स्वास्थ्य विभाग के आयुक्त सह-संचालक डॉक्टर प्रियंका शुक्ला ल टीबी के गंभीर मरीज मनके पूरा चिकित्सा व्यवस्था करे के निरदेस दीन। ओमन ह किहीन कि टीबी मरीज जउन के बीच म ही दवई खाय ल बंद कर देथे, अइसने मरीज मन बर बिसेस धियान दे जाय अउ ओमन ल दवई के कोर्स ल पूरा करे बर जागरूक करय। श्री डेका ह टीबी मरीज मन ल योगा बर जागरूक करे बर किहीन ताकि ओखर मनके रोग-प्रतिरोधक क्षमता ह बाढ़ सकय। ओमन ह टीबी मरीज मन ल पर्याप्त पोषण आहार उपलब्ध कराय के घलो निरदेस दीन। श्री डेका ह एखर बर जादा ले जादा निक्षय मित्र बनाय बर किहीन हे।
विश्व सिकल सेल जागरूकता दिवस
आज विश्व सिकल सेल जागरूकता दिवस हरय। ए मउका म प्रदेस समेत देसभर म आने-आने कारीकरम आयोजित करे जात हे। केंद्रीय स्वास्थ्य मंत्री जे.पी.नड्डा ह किहीन कि ए सिकल सेल रोग ले पीड़ित लोगन मनके आगू अवइया चुनौती के बारे म जागरूकता बढ़ाय के महत्वपूर्ण बेरा हे। एक ठिन सोसल मीडिया पोस्ट म श्री नड्डा ह किहीन कि ए दिन ह पीड़ित समुदाय मन ल शिक्षित करे, शीघ्र निदान ल बढ़ावा दे अउ चलत सोध के प्रोत्साहन बर एक ठिक मंच प्रदान करथे।
उहें, छत्तीसगढ़ के स्वास्थ्य मंत्री श्यामबिहारी जायसवाल ह किहीन हे कि सिकल सेल रोग के उपचार बर उपाय के प्रति लोगन मन ल जागरूक करे अउ ए रोग ल जड़ ले खतम करके स्वस्थ्य समाज ल बनाय के संकल्प लेके दिन हे।
सहायक शिक्षक-समायोजन
प्रदेस म बीएड सहायक शिक्षक मनके सहायक शिक्षक-प्रयोगशाला के पद बर समायोजन करे के निर्णय लेके बाद शिक्षक मनके कांउसलिंग सुरू हो गेहे। ए प्रक्रिया ह छब्बीस जून तक चलही। काउंसलिंग रायपुर के शासकीय शिक्षा महाविद्यालय शंकरनगर म हर रोज बिहनिया दस बजे ले करे जात हे। सत्रह जून ले सुरू होय ए काउंसलिंग म अभी तक छै सौ एक झिन शिक्षक मन ल बलाय गे रिहीस, जेमा ले पांच सौ पंचानवे झन शिक्षक मन ह सामिल होइन जउन शिक्षक मन ह अपन काउंसलिंग बर मिले तारीख म नइ आय पाय रिहीन, ओमन ह काउंसलिंग के आने दिन म घलो आ सकत हे।
रथयात्रा-स्पेशल ट्रेन
रेलवे कोति ले भगवान श्री जगन्नाथ रथयात्रा के मउका म श्रध्दालू मनके सुविधा ल देखत हुए अवइया छब्बीस जून ले सात जुलाई तक गोंदिया-खुरदारोड- गोंदिया के बीच रथयात्रा स्पेसल ट्रेन ल चलाय जाही। ए ट्रेन ह गोंदिया ले एक बजके तीस मिनट म निकल के दूसर दिन आठ बजके पैंतालीस मिनट म खुरदारोड पहुंचही। ट्रेन के स्टापेज ह डोंगरगढ, राजनांदगांव, दुरूग, रायपुर मंदिरहसौद, महासमुंद, बागबाहरा अउ खरियार रोड म घलो रइही।
अउ अब मौसम के हाल…
प्रदेस म काली एक-दू जघा म तेज हवा करे अउ गाज गिरे के संभावना हे। मौसम विभाग के अनुसार उत्तर-झारखंड अउ ओखर ले लगे गंगेटिक पश्चिम बंगाल के उपर एक निम्न दाब के क्षेत्र हवय। संगेसंग उपरी हवा म एक ठिन चक्रीय-चक्रवाती घेरा बने हुए हे। एखर धीर-धीरे उत्तर-पश्चिम दिसा म आगू बाढ़े के संभावना हे। एखरे असर ले प्रदेस म काली कतकोन जघा म हल्का ले मध्यम बरसा होय या फेर गरज-चमक के संग बूंदाबांदी हो सकत हे। बरसा के मुख्य क्षेत्र ह उत्तर छत्तीसगढ़ होही।
अउ अब थोरकुन समाचार सार म –
– शराब घोटाला मामला म झारखंड के एसीबी अउ ईओडब्ल्यू के टीम ह राजधानी रायपुर म लाभांडी के एक सोसायटी ले कारोबारी सिध्दार्थ सिंघानिया ल गिरफ्तार करे हे।
– छत्तीसगढ़ इन्फोटेके प्रमोशन सोसायटी अउ भारतीय विशिष्ट पहिचान प्राधिकरण कोति ले काली बीस जून के एक दिन के आधार कार्यशाला के आयोजन होही। ए कार्यसाला ह बिहनिया साढ़े नौ बजे ले मंझनिया तीन बजे तक रायपुर के न्यू सर्किट हाउस म आयोजित करे जाही।
– कबीरधाम जिला के सहसपुर-लोहारा पुलिस ह पशु तस्करी करे के आरोप म पांच झिन माईलोगिन समेत सात झिन आरोपी मन ल गिरफ्तार करे हे। जेखर करा ले सत्ताईस पशु ल बरामद करे हे।