छत्तीसगढ़ विधानसभा के मानसून सत्र चौदह जुलाई ले सुरू होही। अट्ठारह जुलाई तक चलइया ए सत्र म कुल पांच ठिन बइठका होही। ए बारे म छत्तीसगढ़ विधानसभा के सचिव दिनेश शर्मा ह अधिसूचना जारी कर देहे। मानसून सत्र के दउरान वित्तीय अउ आने-आने सरकारी कामकाज करे जाही।
ड्राइविंग प्रशिक्षण केन्द्र
केन्द्र सरकार ह देस के आने-आने भाग म दू हजार ड्राइविंग प्रसिक्षण स्कूल खोले के फइसला लेहे। नई दिल्ली म एक ठिन कार्यक्रम म केन्द्रीय सड़क परिवहन अउ राजमार्ग मंत्री नितिन गडकरी ह किहीन कि ए प्रसिक्षण स्कूल, देस के पिछड़ा अउ जनजातीय क्षेत्र म खोले जाही। ओमन किहीन कि एखर ले युवा मन ल रोजगार के मउका मिलही। श्री गडकरी ह किहीन कि देस म करीबन बाईस लाख ड्राईवर के कमी हे। ओमन यहू किहीन कि उंखर मंत्रालय ह सड़क दुर्घटना म कमी लाय बर कतकोन कदम उठाय हे। ओमन लोगन मन ले यातायात निमय के पालन करे के आह्वान करीन।
राशनकार्ड-ई-केवायसी
केन्द्रीय उपभोक्ता मामला, खाद्य अउ सार्वजनिक वितरण विभाग डहार ले जारी निर्देश के मुताबिक रासनकार्ड मन म पंजीकृत सदस्य मन ले जउन हितग्राही मन ह अभी तक ई-केवाईसी नइ करवाय हे, ओमन ल तीस जून तक जरूरी रूप ले ई-केवाईसी करवाना होही। खाद्य विभाग के अधिकारी मन ह बतईन कि प्रदेस के सबो उचित मूल्य दुकान म संचालित ई-पास मसीन म ई-केवायसी के सुविधा उपलब्ध हवय।
खबर के मुताबिक ‘‘एक राष्ट्र-एक राशनकार्ड योजना म हितग्राही मन ल आधार प्रमाणीकरण के माध्यम ले खाद्यान्न वितरण करे जाना हे। छत्तीसगढ़ म सार्वजनिक वितरण प्रणाली के तहत इक्यासी लाख छप्पन हजार रासनकार्ड प्रचलित हवय। ए रासनकार्ड म दू करोड़ तिहत्तर लाख सदस्य पंजीकृत हवय। एमा ले दू करोड़ पैंतीस लाख सदस्य के ई-केवाईसी पूरा होगे हे। उहें, अड़तीस लाख सदस्य मनके ई-केवाईसी होना बाकी हे। केन्द्र सरकार ह पांच बछर ले कम उमर के सदस्य मन ल ई-केवायसी म छूट देहे हे।
उड़नदस्ता दल-वाहन
मुख्यमंत्री विष्णुदेव साय ह आज रईपुर के अपन निवास कार्यालय ले परिवहन अउ यातायात सुरक्षा म लगे उड़नदस्ता दल के अड़तालीस नवा गाड़ी ल हरियर झंडा देखाके रवाना करीन। ए मउका म मुख्यमंत्री ह कहिन कि सड़क परिवहन अउ यातायात ल सुरक्षित अउ सरल बनाय म राज्य सरकार के सर्वोच्च प्राथमिकता हे। ओमन कहिन कि नवा गाड़ी मनके तैनाती ले दुर्घटना म कमी आही अउ लोगन मन म ट्रैफिक नियम के पालन ल लेके जागरूकता बाढ़ही। ए गाड़ी मनके मदद ले उड़नदस्ता दल ह नियम के उल्लंघन करइया मन उपर तुरते कार्रवाई करही।
मुख्यमंत्री-नया शिक्षा सत्र
शाला प्रवेश उत्सव के संग प्रदेस म काली ले नवा सिक्षा सत्र के सुरूआत होगे हे। पहिली दिन स्कूल अवइया लइका मन ल टीका लगाके अउ मिठई खवाके स्वागत करीन। ए मउका म कतकोन स्कूल मन म न्योता भोज के आयोजन घलो करे गीस। संगेसंग लइका मन ल निःशुल्क पाठ्य पुस्तक अउ ड्रेस घलो दे गीस। उहें, प्रदेस के कई स्कूल मन म लइका मन ल जाति, आय अउ निवास प्रमाण पत्र बनाके दे गीस। अइसने, कई स्कूल म स्कूल सिक्षा विभाग डहार ले एक पेड़ मां के नाम अभियान के तहत पौधारोपण कार्यक्रम के घलो आयोजन करे गीस। एखर संगेसंग युक्तियुक्तकरण के बाद नवा पदस्थ सिक्षक मनके घलो टीका लगाके स्कूल म स्वागत करे गीस।
शाला प्रवेश उत्सव के मउका म मुख्यमंत्री विष्णदेव साय ह स्कूली लइका मन ल सुभकामना दीन। ओमन लइका मन ले किहीन कि ‘‘खूब पढ़ो, आगे बढ़ो अउ छत्तीसगढ़ के गौरव बनो‘‘। मुख्यमंत्री ह कहिन कि राज्य सरकार ह ए सुनिश्चित करत हे कि कोनों भी स्कूल मन मास्टर मनके कमी झन राहय। ओमन स्कूली लइका मनके संगेसंग पालक अउ सिक्षक मन ल घलो नवा सैक्षणिक सत्र के सुभकामना दीन।
प्रधानमंत्री ग्राम सड़क योजना
प्रधानमंत्री ग्राम सड़क योजना के नवा बनत काम के गुणवत्ता परीक्षण बर काली अट्ठारह जून ले राष्ट्रीय गुणवत्ता समीक्षक छत्तीसगढ़ आवत हे। ओमन दुरूग, धमतरी अउ बस्तर जिला के दउरा करके प्रधानमंत्री ग्राम सड़क योजना के अंतर्गत नवा बनत सड़क के परीक्षण करही। राष्ट्रीय गुणवत्ता समीक्षक राम प्रकाश सिंह अउ राम अवतार शर्मा अट्ठारह ले बाईस जून तक धमतरी अउ बस्तर जिला म सड़क मनके गुणवत्ता के समीक्षा करही। उहें, तेईस ले सत्ताईस जून तक दुरूग जिला म सड़क के गुणवत्ता के जांच करे जाही।
अंतर्राष्ट्रीय योग दिवस
अंतर्राष्ट्रीय योग दिवस के मउका म बेमेतरा जिला म पन्द्रह ले इक्कीस जून तक योग सप्ताह मनाय जावत हे। ए दउरान जिला, विकासखंड, नगरीय निकाय अउ पंचायत स्तर म योग सत्र आयोजित करे जावत हे। जिला कलेक्टर ह बतईन कि योग कार्यक्रम म भाग लेवइया लोगन अउ सपरिवार योग करइया मन ल जिला प्रसासन डहार ले पुरस्कार दे जाही। ओमन जिलावासी मन ले जादा ले जादा संख्या म योग कार्यक्रम सामिल होय के अपील करीन हे।
राजस्व मंत्री-समीक्षा
राजस्व मंत्री टंकराम वर्मा ह आज मंत्रालय म राजस्व विभाग के आने-आने योजना अउ कार्यक्रम के प्रगति के समीक्षा करीन। बइठका म श्री वर्मा ह डिजिटल भू-अभिलेख, ई-गिरदावरी, ड्रोन सर्वे आधारित स्वामित्व योजना, नक्शा परियोजना अउ त्रिवर्षीय भू-सर्वेंक्षण कार्यक्रम ल निर्धारित समय-सीमा म पूरा करे के निरदेस दीन।
डायरिया रोको अभियान
लइका मन म डायरिया ले होवइया मउत के रोकथाम बर गौरेला-पेंड्रा-मरवाही जिला म काली ले डायरिया रोको अभियान चलाय जावत हे। जिला कलेक्टर लीना कमलेश मंडावी ह कलेक्टोरेट परिसर ले ‘‘डायरिया रोको अभियान रथ‘‘ ल हरियर झंडा दिखाके रवाना करीन। इकतीस जुलाई तक चलइया ए अभियान के तहत सून्य ले पांच बछर के उनचालीस हजार एक सौ अड़सठ लइका मन ल डायरिया ले बचाय खातिर मितानिन, आंगनबाड़ी कार्यकर्ता अउ स्वास्थ्य कार्यकर्ता मन ह लोगन मन ल जानकारी दीहीं।
क्रांति सेना पदाधिकारी-सजा
जांजगीर के जिला अपर सत्र न्यायालय ह छत्तीसगढ़िया क्रांति सेना के छह पदाधिकारी अउ सदस्य मन ल सात-सात साल के सश्रम कारावास के सजा सुनाय हे। ए मामला सत्ताईस अगस्त दू हजार इक्कीस के हरय। ए मामला म छत्तीसगढ़िया क्रांति सेना के छह पदाधिकारी अउ सदस्य मन ह बम्हनीडीह के एक कीटनाशक दुकान म मारपीट करके लूटपाट के घटना ल अंजाम दे रिहीन। दुकानदार मनके रिपोर्ट म बम्हनीडीह पुलिस ह आरोपी मन ल गिरफ्तार करके प्रकरण ल कोर्ट म पेस करे रिहीस।
अउ अब मौसम के हाल...
दक्षिण-पश्चिम मानसून छत्तीसगढ़ के ज्यादातर जघा म पहुंच गेहे। दक्षिण-पश्चिम मानसून के उत्तरी सीमा, इंदौर, पचमढ़ी, मालदा, अंबिकापुर, हजारीबाग अउ सुपौल हे। मानसून के आगू बाढ़े बर ए बेरा अनुकूल परिस्थिति बने हे।
मौसम विभाग के मुताबिक एक निम्न दाब के क्षेत्र दक्षिणी पश्चिमी बांग्लादेश अउ ओखर ले लगे गांगेय पश्चिम बंगाल के उपर स्थित हे। एखर संगेसंग उपरी हवा के चक्रवाती घेरा घलो बने हे, जेखर असर ले अवइया चौबीस घंटा के दउरान प्रदेस म कई ठिन जघा म हल्का ले मध्यम बरसा होय अउ गरज-चमक के संग छींटा पड़े के संभावना हे। उहें, एक-दू स्थान म हवा गरेर चले अउ गाज गिरे के चेतावनी घलो दे गेहे।
अउ अब थोरकुन समाचार सार म –
– राज्यपाल रमेन डेका ह आज रायपुर म सेन समाज डहार ले राखे गे सम्मान समारोह म सामिल होइन। समारोह म राज्यपाल ह समाज के जम्मों जिला के महिला अध्यक्ष, प्रतिभावान विद्यार्थी, खिलाड़ी अउ विशिष्ट उपलब्धि मिलइया मनखे ल सम्मानित करीन।
– मुख्यमंत्री विष्णुदेव साय के पगरइति म काली अट्ठारह जून के बिहनिया दस बजे ले रायपुर स्थित उंखर निवास कार्यालय म राज्य मंत्रिपरिषद के बइठका होही।
अउ
– रायपुर के सिविल लाइन स्थित पुराना पुलिस मुख्यालय म काली अट्ठारह जून के दिव्यांगजन मन बर बिहनिया ग्यारह बजे ले विशेष प्लेसमेंट कैम्प के आयोजन करे जाही।