केंद्र सरकार ह आज जनगणना कराय जाय के अधिसूचना जारी कर देहे। गृह मंत्रालय के अधिसूचना म केहे गे कि लद्दाख, जम्मू कश्मीर, हिमाचल प्रदेस अउ उत्तराखंड म जनगणना एक अक्टूबर दू हजार छब्बीस ले कराय जाही।
जनगणना दू चरण म होही। पहिली चरण म हरेक परिवार के आवासीय स्थिति, संपत्ति अउ सुविधा के बारे म जानबा सकेले जाही। त उहें, दूसर चरण म हरेक मनखे के जनसांख्यिकीय, सामाजिक आर्थिक, सांस्कृतिक अउ आने जानबा इकट्ठा करे जाही। एखर अलावा ए बार जनगणना म जातीय गनगणना घलो करे जाही। जनगणना के काम बर करीबन चौतीस लाख प्रगणक अउ पर्यवेक्षक के संगेसंग करीबन एक लाख तीस हजार जनगणना पदाधिकारी तैनात करे जाही। ए जनगणना मोबाइल एप्लीकेसन के माध्यम ले करे जाही। ए जनगणना के काम सुरू होय के बाद ले एहा सोलहवां जनगणना होही अउ स्वंतत्रता के बाद आठवां जनगणना हरय।
गृहमंत्री-सम्मेलन
केंद्रीय गृहमंत्री अमित शाह ह किहीन हे कि भारत ह आपदा प्रबंधन के क्षेत्र म वैश्विक नेता बने बर आगू बढ़त हे। नई दिल्ली म राज्य अउ केंद्रशासित प्रदेस मनके राहत आयुक्त अउ आपदा मोचन बल मनके वार्षिक सम्मेलन ल संबोधित करत ओमन किहीन कि भारत ह पूर्व चेतावनी प्रणाली के विकास म बड़का सफलता पाय हे। ओमन किहीन कि एकदम सटिक पूर्वानुमान अउ पूर्व चेतावनी के माध्यम ले राहत अउ बचाव काम सफलतापूर्वक करे गीस। गृहमंत्री ह राहत आयुक्त मन ल नब्बे दिन के भीतर अपन राज्य के जिला मन बर आपदा प्रबंधन योजना तियार करे के निरदेस दीन।
साइबर सुरक्षा अभ्यास
रक्षा साइबर एजेंसी ह आज राष्ट्रीय स्तर म साइबर सुरक्षा ल मजबूत करे बर साइबर सुरक्षा अभ्यास के सुरूआत करे हे। ए कारीकरम म राष्ट्रीय स्तर के एजेंसी अउ रक्षा क्षेत्र के सौ ले जादा हितधारक मन भाग लेवत हे। ए अभ्यास वास्तविक साइबर खतरा के अनुकरण करइया, सुरक्षित कामकाज ल ठीक-ठाक करे अउ प्रतिभागी मनके विश्लेषणात्मक अउ रक्षात्मक साइबर कौशल ल तेज गति वाले, गेमिफाइड वाले माहौल म परखे बर तियार करे गेहे। ए अभ्यास ए महिना के सत्ताईस तारीख तक चलही। रक्षा साइबर एजेंसी ह अइसन अभ्यास के बेरा-बेरा म आयोजन करे के योजना बनावत हे। जेखर ले जम्मों स्तर म सुरक्षा-प्रथम संस्कृति ल बढ़ावा दे जा सके।
शाला प्रवेश उत्सव
प्रदेस म आज ले नवा शिक्षा सत्र सुरू हो गेहे। संगेसंग प्रदेस के जम्मों स्कूल मन म आज ले शाला प्रवेस उत्सव घलो मनाय गीस। ए दउरान स्कूल म नवा प्रवेस करइया लइका मनके तिलक लगाके सुवागत करे गीस। उहें, राज्य सरकार ह ए बेरा बाढ़त गर्मी ल धियान म राखत प्रदेस के जम्मों स्कूल मनके समय म बदलाव करे हे। स्कूल शिक्षा विभाग ले जारी आदेस के मुताबिक सत्रह ले इक्कीस जून तक प्रदेस के जम्मों सरकारी अनुदान प्राप्त, गैर अनुदान प्राप्त अउ प्राइवेट स्कूल मन म कक्षा ह बिहनिया सात बजे ले ग्यारा बजे तक लगही। तेइस जून ले जम्मों स्कूल मन ह तय समय म लगही।
कोरोना-वायरस
प्रदेस म कोरोना के मामला सरलग बाढ़त हे। उहें, राज्य म कोरोना वायरस ले मउत के पहिली मामला आगू आय हे। अस्पताल प्रबंधन ले मिले जानबा के मुताबिक मृतक मनखे ल कोरोना रिहीस। राजनांदगांव के रहइया ए मनखे ल सांस ले म परेसानी के सेति पाछू चौदह जून के रईपुर के एक ठिन प्राइवेट अस्पताल म भर्ती कराय गे रिहीस। इलाज के दउरान ओखर मउत होगे। परिवार के सदस्य मनके सेंपल लेके कोविड-नाइंटीन के जांच बर भेजे जाही। रिपोर्ट आय तक परिवार के सदस्य मन ह होम क्वारंटीन म रइही।
दुर्घटना
गौरेला-पेण्ड्रा-मरवाही जिला म पाछू रतिहा सड़क दुर्घटना म चार झन लोगन के मउत होगे। हमर संवाददाता ले मिले जानबा के मुताबिक सराब के नसा म कार चलइया ह दू ठिन फटफटी ल टक्कर मार दीस। तेज रफ्तार कार के जोरदरहा टक्कर ले दूनों फटफटी म बइठे तीन झिन मनखे मन के मउकच म पराण छूट गे। उहें, ए घटना के बाद गंभीर रूप ले घायल एक झिन नोनी के इलाज बर ले जात खानी रद्दा म उंखर मउत होगे।
धरती आबा जनजातीय ग्राम उत्कर्ष अभियान
प्रदेस म ए बेरा धरती आबा जनजातीय ग्राम उत्कर्ष अभियान चलाय जात हे। एमा सोलह ले तीस जून तक ग्राम स्तर म सिविर राखे जात हे। मोहला-मानपुर जिला के आदिवासी समुदाय के बढ़िया विकास अउ ओमन ल शासन के जन कल्याणकारी योजना मनके फायदा देवाय के उद्देस्य ले धरती आबा जनजातीय ग्राम उत्कर्ष अभियान के अंतर्गत सिविर मनके आयोजन करे जात हे। ए सिविर के उद्देस्य बिसेस रूप ले जनजातीय समुदाय मन तक सरकारी योजना अउ सेवा मनके पहुंच ल बढ़िया बनाना हे। सिविर म हितग्राही मनके आधार कार्ड, रासन कार्ड, आयुष्मान भारत कार्ड, जाति अउ निवास प्रमाण पत्र बनाय जाही।
धरती आबा जनजातीय ग्राम उत्कर्ष अभियान के तहत कलेक्टर तुलिका प्रजापति ह महिला अउ बालविकास विभाग डहार ले चलाय जात सुपोषण प्रचार रथ ल हरा झंडी दिखाके रवाना करीन।
सेना भर्ती-परीक्षा
भारतीय सेना डहार ले सेना भर्ती बर ऑनलाइन कॉमन एंट्रेस एग्जाम-सीईई के तारीख घोसित कर दे गेहे। ज्वाइन इंडियन आर्मी के वेबसाइट म पंजीकरन करइया उम्मीदवार मन बर ए परीक्षा तीन जून ले चार जुलाई अउ सात जुलाई ले दस जुलाई तक ले जाही। प्रदेस के पांच परीक्षा केंद्र बिलासपुर, रायपुर, भिलाई, दुरूग अउ जगदलपुर म रोजे तीन सिफ्ट म ए ऑनलाइन परीक्षा ले जाही।
अग्निवीर क्लर्क/ एस.के.टी. पद बर अर्जी करइया अभ्यर्थी मनके टाइपिंग टेस्ट घलो ऑनलाइन परीक्षा केंद्र म ले जाही। अइसन उम्मीदवार मन बर दू ठिन अलग-अलग प्रवेस पत्र जारी करे जाही। जम्मों उम्मीदवार मन ल प्रवेस पत्र सोलह जून ले भारतीय सेना के आधिकारिक वेबसाइट म मिलही। भारतीय सेना के उम्मीदवार मन ल सलाह दे गेहे कि ओमन बेरा म अपन परीक्षा केंद्र म पहुंचय। कोनो भी प्रकार के अउ जानबा बर उम्मीदवार मन सेना भर्ती कार्यालय नवा रायपुर ले संपर्क कर सकथे।
भाजपा-बैठक
भारतीय जनता पार्टी के विधायक दल के बइठका अवइया अट्ठारा जून के रईपुर स्थित कुशाभाऊ ठाकरे परिसर म राखे जाही। ए बइठका म अवइया मानसून सत्र के तियारी ल लेके गोठबात करे जा सकथे। संगेसंग विधायक मनके क्षेत्र म होवत कामकाज के समीक्षा घलो करे जाही। ए बइठका म भारतीय जनता पार्टी के बड़का नेता अखिल भारतीय सह संगठन मंत्री शिव प्रकाश, प्रदेस प्रभारी नितिन नबीन, मुख्यमंत्री विष्णुदेव साय, प्रदेस अध्यक्ष किरण सिंह देव, क्षेत्रीय संगठन महामंत्री अजय जामवाल अउ प्रांत संगठन मंत्री पवन साय सामिल होही।
अउ अब जानन मौसम के हाल…
दक्षिण-पश्चिम मानसून कोंकण, मध्य महाराष्ट्र, गुजरात के कोनो-कोनो जघा, दक्षिण-पश्चिम मध्य प्रदेस, विदर्भ के कुछेक भाग, छत्तीसगढ के कोनो-कोनो जघा, ओडिसा अउ उप हिमालयीन पश्चिम बंगाल के संगेसंग सिक्किम के कुछेक हिस्सा म पहुंच गेहे। दक्षिण-पश्चिम मानसून के अउ आगू बढ़े बर सही स्थिति बने हे।
मौसम विभाग के मुताबिक एक ठिन उपरी हवा के चक्रीय-चक्रवाती घेरा उत्तर पश्चिम बंगाल के खाड़ी म बने हे। उहें, एक ठिन द्रोणिका पूर्वी मध्य प्रदेस ले बंग्लादेस तक छत्तीसगढ़, झारखंड अउ गंगेटिक पश्चिम बंगाल होवत बाढ़े हे। एखर सेति प्रदेस के कतकोन जघा म हल्का ले मध्यम बरसा अउ गरज-चमक के संग बूंदाबांदी पड़े के संभावना हे।
अउ अब थोरकुन समाचार सार म –
– केंद्रीय स्वास्थ्य अउ परिवार कल्याण मंत्रालय के मुताबिक नर्सिंग अधिकारी भर्ती सामान्य पात्रता परीक्षा साल म एक बार के जघा अब दू बार करे जाही।
– राजस्व अउ आपदा प्रबंधन मंत्री टंकराम वर्मा ह काली मंत्रालय म विभागीय कामकाज के समीक्षा करही।
अउ
– इंदिरागांधी राष्ट्रीय मुक्त विश्वविद्यालय-इग्नू डहार ले जुलाई -दू हजार पच्चीस म प्रवेस बर नामांकन के आखिरी तारीख पंद्रह जुलाई कर दे गेहे।