उत्तराखंड म आज बिहनिया केदारनाथ पहाड़ी क्षेत्र म एक ठन हेलीकॉप्टर दुर्घटनाग्रस्त होगे, जेमा बइठे सबो सात झन के मउत होगे। एमा छै झन तीर्थयात्री अउ एक पायलट सामिल हे। हेलीकॉप्टर ह केदारनाथ ले गुप्तकासी जावत रिहीस। राज्य आपदा मोचन बल ह बतइस हे कि हेलीकॉप्टर ह पूरा जल गेहे, फेर छयो शव ल निकाल ले गेहे। जिला पर्यटन अधिकारी राहुल चौबे ह बतइन हे कि खराब मौसम के सेति हेलीकॉप्टर अचानक पेड़ ले टकरागे, जेखर ले ए हादसा होइस हे।
ए दुर्घटना म छत्तीसगढ़ के मुख्यमंत्री विष्णुदेव साय ह घलो दुख जतइन हे।
मेधावी शिक्षा सहायता योजना
मुख्यमंत्री विष्णुदेव साय ह आज रईपुर म राखेगे ‘‘मुख्यमंत्री नोनी बाबू मेधावी शिक्षा सहायता योजना‘‘ कारीकरम म सामिल होइन। ए मउका म ओमन दसवीं अउ बारवीं के परीक्षा म पहिली दस म जघा बनाने वाला पंजीकृत मजदूर मनके इकतीस मेधावी लइका मन ल दू-दू लाख रूपिया के प्रोत्साहन रासि बांटिन। कारीकरम म मुख्यमंत्री ह छत्तीसगढ़ भवन और अन्य सन्निर्माण कर्मकार कल्याण मंडल म पंजीकृत राज्य के अड़तीस हजार ले जादा निर्माण मजदूर मन ल आने-आने योजना म उन्नीस करोड़ इकहत्तर लाख रूपिया ले जादा के सहायता रासि सीधा उंखर बैंक खाता म भेजिस।
कारीकरम म गोठियात हुए श्री साय ह किहीन कि राज्य सरकार ह श्रमिक परिवार के सशक्तिकरण अउ उत्थान बर काम करत हे। ओमन किहीन कि आज मजदूर परिवार के लइका ह बिदेस जाके पढ़ना चाहथे त ओखर बर घलो पचास लाख रूपिया तक के सहायता के प्रावधान श्रम विभाग कोति ले करे गेहे।
अंतर्राष्ट्रीय योग दिवस-छत्तीसगढ़
छत्तीसगढ़ समेत देसभर म इक्कीस जून के अंतर्राष्ट्रीय योग दिवस मनाय जाही। मुख्यमंत्री विष्णुदेव साय ह जशपुर के रणजीता स्टेडियम म राज्य स्तरीय योगाभ्यास कारीकरम म सामिल होही। जेमा ओमन आम जनता संग योगाभ्यास करही। एखर तियारी बर जशपुर कलेक्टर रोहित व्यास ह रणजीता स्टेडियम के निरीक्षण करके जरूरी व्यवस्था के जायजा लीन। ओमन संबंधित अधिकारी मन ल पानी-बादर ल देखत हुए वाटरप्रुफ पंडाल लगवाय बर किहीन। संगेसंग बड़ संख्या म योगा मैट, पहुना मन बर बइठे, पार्किंग अउ बेरिकेटिंग के अलावा आने सुरक्षा व्यवस्था पक्का करे के निरदेस दीन।
केशकाल बाईपास निर्माण-स्वीकृति
कोंडागांव जिला म लगभग तीन सौ करोड़ रूपिया ले ग्यारा किलोमीटर से जादा लम्बा फोरलेन ‘‘केशकाल बाईपास‘‘ बनाए जाही। केंद्रीय सड़क परिवहन और राजमार्ग मं़त्री नितिन गडकरी ह एक्स मा ए जानकारी दीन हे। एमा मुख्यमंत्री विष्णुदेव साय ह केंद्रीय मंत्री के आभार जतात हुए एला बस्तर के विकास बर बड़का कदम बताए हे। श्री साय ह किहिन कि ए बाईपास केशकाल घाट खंड म अवई-जवई ले जुड़े समस्या ल दूर करके सुघ्घर, सुरक्षित अउ बिना बाधा के यात्रा पक्का करही। ए बाईपास पेव्ड शोल्डर मानक के अनुरूप होही अउ एखर बने ले बस्तर क्षेत्र म कनेक्टिविटी ल नवा आयाम मिलही।
विश्व रक्तदाता दिवस
विश्व रक्तदाता दिवस के मउका म काली प्रदेस म राखे गे अड़तालीस ले जादा रक्तदान सिविर के माध्यम ले पंद्रह सौ यूनिट ले जादा के रक्त यूनिट जोरे गीस। एमा लगभग ढाई हजार ले जादा लोगन मन स्वैच्छिक रक्तदान के सपथ लीन। ए मउका म आयुक्त सह-संचालक स्वास्थ्य सेवाए डॉक्टर प्रियंका शुक्ला ह घलो रक्तदान करीन अउ लोगन मनले रक्तदान करे के अपील करीन। ओमन किहीन कि रक्तदान बस जीवन रक्षक काम नइ हे, फेर एहा समाज बर मानवीय एकता अउ दयाभाव के प्रतीक घलो हवय। विश्व रक्तदाता दिवस के मउका म प्रदेस के सबो जिला अस्पताल, स्वास्थ्य केंद्र अउ ब्लड बैंक संस्थान मन म आम लोगन, पढ़इया मन, समाज सेवी अउ सरकारी कर्मचारी मन ह बड़ संख्या म भाग लीन।
मुख्यमंत्री-शाला प्रवेश उत्सव
प्रदेश मा काली सोला जून ले नवा शिक्षा सत्र सुरू होही। एखरे संग प्रदेश के सबो स्कूल मा काली ले शाला प्रवेश उत्सव मनाय जाही। मुख्यमंत्री विष्णुदेव साय ह सबो जनप्रतिनिधि मनला चिट्ठी लिखके ‘‘शाला प्रवेश उत्सव‘‘ म भागीदारी निभाए के अपील करे हे। मुख्यमंत्री ह अपन चट्ठी म लिखे हे कि राज्य म शिक्षा के अधिकार अधिनियम लागू हे अउ राष्ट्रीय शिक्षा नीति दू हजार बीस म ए पक्का करे गेहे कि कक्षा बारवी तक स्कूल छोड़े के दर ल धीरे-धीरे शून्य करे जाए।
रईपुर के जिला शिक्षा अधिकारी डॉक्टर विजय खंडेलवाल ह आकाशवाणी समाचार ल बतईन की राजधानी रईपुर के आने-आने स्कूल म शिक्षा विभाग ह शाला प्रवेश उत्सव मानए के तियारी पूरा कर लेहे।
उपमुख्यमंत्री-सोलर बैटरी
उपमुख्यमंत्री अरूण साव ह काली मुंगेली जिला के लोरमी ले सोलर बैटरी ले भरे गाड़ी ल हरियर झंडी दिखाके अचानकमार बर रवाना करीन। ए सबो बैटरी ले अचानकमार जंगल के बिजराकछार क्षेत्र के तेरह ठन गांव म उजियारा होही। ए मउका म श्री साव ह किहीन कि अब अचानकमार म पानी-बादर के दिन म लाइट के व्यवस्था हो जाय ले लोगन ल जंगली-जानवर मनले खतरा नइ होही।
दुर्घटना
प्रदेस म पाछू चौबीस घंटा म होय अलग-अलग सड़क हादसा म कुल तीन लोगन के मउत होगे। जबकि दस झन घायल हो गेहे, जेमा कुछेक के हालत गंभीर बने हुए हे।
कांंडागांव जिला के बड़ेडोंगर थाना क्षेत्र म पाछू रतिहा बिहाव कारीकरम ले लहुटत हुए लोगन मन दुर्घटना के सिकार होगे। एमन के चार चकिया गाड़ी ह अंतेतंते होके खेत म पलट गे। जेखर ले दू माईलोगन के मउत होगे, जबकि, छै झन गंभीर रूप ले घायल हे।
उहें, सरगुजा जिला म जनमदिन मनाके लहुटत हुए युवा मनके तेज रफ्तार दू चकिया ह अंतेतंते होके खंभा ले टकरागे। एमा एक युवक के मउका म ही मउत होगे अउ गंभीर रूप ले घायल दू युवक के इलाज सामुदायिक स्वास्थ्य केंद्र म चलत हे।
एखर अलावा, बलौदा जिला के देहान गांव के तीर कार अउ ट्रक के बीच होय टक्कर म कार म बइठे दू झन मनखे ह गंभीर रूप ले घायल होगे।
दोरनापाल-डॉग केयर सेंटर
सुकमा जिला के दोरनापाल म प्रदेस के पहिली के-नाइन डॉग केयर सेंटर के सुरूआत हो गेहे। ए सेंटर केंद्रीय रिजर्व पुलिस बल-सीआरपीएफ के चौहत्तरवां बटालियन के मुख्यालय म सुरू करे गेहे। सीआरपीएफ के आईजी राकेश अग्रवाल ह बतइन कि के-नाइन डॉग केयर सेंटर के खुल जाय ले आम लोगन घलव सीआरपीएफ के डॉग मन ल गोद ले सकही।
अउ अब जानथन मौसम के हाल…
प्रदेस म दक्षिण-पश्चिम मानसून के आगू बढ़े बर जरूरी परिस्थिति बने हे। मौसम विज्ञानी एच.पी.चंद्रा ह आकाशवाणी समाचार ले गोठबात करत हुए बतइन कि प्रदेस म काली बहुत जघा म हल्का ले मध्धम बरसा होय या गरज-चमक के संग छींटा पड़े के संभावना हे। उहें, एक-दू जघा म हवा गर्रा चले अउ गाज गिरे के चेतावनी दे गेहे।
– एक्सियोम-फोर मिशन के तकनीकी कमी ल दूर करके भारतीय अंतरिक्ष यात्री शुभांशु शुक्ला ल अब उन्नीस जून के अंतर्राष्ट्रीय अंतरिक्ष स्टेशन भेजे जाही।
– सियान मन संग होय दुर्व्यवहार के सेति जागरूकता लाय बर आज वरिष्ठ नागरिक दुर्व्यवहार जागरूकता दिवस मनाय जावत हे।
– रईपुर के कुशाभाऊ ठाकरे पत्रकारिता और जनसंचार विश्वविद्यालय म स्नातक, स्नातकोत्तर अउ पीजी डिप्लोमा के मीडिया पाठ्यक्रम म भर्ती बर ऑनलाइन आवेदन के प्रक्रिया सुरू हो गेहे। इच्छुक अभ्यर्थी मन विश्वविद्यालय के वेबसाइट ले आवेदन कर सकथे।
अउ
– जिला रोजगार और स्वरोजगार मार्गदर्शन केंद्र अउ जिला कौशल विकास प्राधिकरण रईपुर कोति ले काली सोलह जून के बिहनिया साढ़े दस बजे ले मंझनिया तीन बजे तक जोरा के लाइवलीहुड कालेज म प्लेसमेंट कैंप के आयोजन करे जाही।