केंद्र सरकार ह अहमदाबाद विमान दुर्घटना के जांच बर उच्च स्तर के समिति बनाय हे। नागर विमानन मंत्रालय ह केहे हे कि ए समिति ह वर्तमान मानक संचालन प्रक्रिया अउ अइसन घटना ल रोके अउ निपटे बर जारी दिसा निरदेस के जांच करही। समिति ह भविष्य म अइसन दुर्घटना ले निपटे बर जरूरी दिसा-निरदेस के सुझाव घलो दिही। सरकार ह केहे हे कि ए समिति आने-आने संस्था डहार ले करे जावत जांच ले अलग होही अउ अइसन घटना ले निपटे बर मानक संचालन प्रक्रिया तियार करे बर धियान दिही।
नागर विमानन मंत्री राममोहन नायडू ह विमान हादसा उपर दुख जतइन हे अउ किहीन कि जांच जारी हे। ओमन बतइन कि विमान म साढ़े छै सौ फीट के ऊंचाई म खराबी आय रिहीस अउ पायलेट ह इमरजेंसी के सूचना दे रिहीस। ओमन किहीन कि नागर विमानन मंत्रालय ह ए हादसा के हर पहलू के जांच करत हे। ए दुर्घटना म विमान म बइठे दू सौ इकचालीस यात्री अउ मेडिकल छात्र संघरा दू सौ चौव्वन लोगन के मउत होय हे।
मुख्यमंत्री-चरण पादुका योजना
प्रदेस म चरण पादुका योजना फेर सुरू करे जाही। मुख्यमंत्री विष्णुदेव साय ह आज रईपुर म बाबा गुरूदास राम साहेब के जयंती के मउका म राखेगे कारीकरम म सामिल होय के बाद पत्रकार मनले चर्चा करत ए जानकारी दीन।
खबर के मुताबिक चरण पादुका योजना नवंबर दू हजार पांच म सुरू करे गे रिहीस। ए योजना म तेंदूपत्ता संग्रहक परिवार मन ल हर बछर चरण पादुका दे जाथे।
मुख्यमंत्री-मेधावी शिक्षा सहायता योजना
मुख्यमंत्री नोनी-बाबू मेधावी शिक्षा सहायता योजना म दसवीं अउ बारहवीं के बोर्ड परीक्षा म टापटेन म आय पंजीकृत श्रमिक मनके मेधावी छात्र-छात्रा मन ल मुख्यमंत्री विष्णुदेव साय काली पंद्रह जून के रईपुर म राखे गे कारीकरम म प्रोत्साहन रासि दिही।
श्रममंत्री लखनलाल देवांगन ह बतइन कि ए योजना म दसवीं के छब्बीस अउ बारहवीं के पांच मेधावी लइका मन ल दू-दू लाख रूपिया दे जाही। एमा एक लाख रूपिया दूपहिया गाड़ी बर अउ एक लाख रूपिया नगद प्रोत्साहन रासि के रूप म सामिल हे। अइसने छत्तीसगढ़ भवन अउ दूसर सन्निर्माण कर्मकार कल्याण मंडल ह राज्य के अड़तीस हजार दू सौ निर्माण श्रमिक मन बर उन्नीस करोड़ इकहत्तर लाख रूपिया के सहायता रासि सीधा उंखर बैंक खाता म अंतरित करे जाही।
योग-वैश्विक शिखर सम्मेलन
आयुष मंत्री प्रताप राव जाधव ह किहीन हे कि योग वैश्विक कल्याण बर भारत के महत्वाकांक्षा ल देखाथे। नई दिल्ली म वैश्विक शिखर सम्मेलन-योग कनेक्ट म श्री जाधव ह किहीन हे कि योग भारत डहार ले विश्व सांति बर पूरा दूनिया बर एक ठन उपहार हे। ओमन किहीन कि योग सिरिफ बीमारी ले बचाव नइ करय, फेर रोजगार के नवा मउका घलो देथे।
ए मउका म संस्कृति अउ पर्यटन मंत्री गजेन्द्र सिंह शेखावत ह किहीन कि योग धर्म, लिंग अउ भाषा के सीमा ले उपर हे।
स्कूल-युक्तियुक्तकरण
स्कूल अउ शिक्षक मनके युक्तियुक्तकरण करे ले अब प्रदेस के कोनो भी स्कूल बिना शिक्षक के नइ हे। उहें, युक्तियुक्तकरण ले राज्य के एकल शिक्षकीय शाला के संख्या म अस्सी प्रतिसत के कमी आय हे।
खबर के मुताबिक युक्तियुक्तकरण ले पहिली प्रदेस म चार सौ तिरपन स्कूल शिक्षक विहीन अउ पांच हजार नौ सौ छत्तीस स्कूल म एक-एक शिक्षक रिहीस। ए समस्या ल दूर करे बर राज्य सरकार ह जिला, संभाग अउ राज्य स्तर म तीन चरण म शिक्षक मनके काउंसिलिंग प्रक्रिया सुरू करीन, जेखर बाद आज प्रदेस के कोनो भी स्कूल शिक्षक विहीन नइ हे।
एनटीए-नीट यूजी परिणाम
राष्ट्रीय परीक्षण एजेंसी ह मेडिकल म प्रवेस बर राष्ट्रीय पात्रता सह प्रवेस परीक्षा-नीट-यूजी के परिणाम घोसित कर देहे। ए परीक्षा म राजस्थान के महेश कुमार ह पहला स्थान पाय हे। उहें, मध्यप्रदेस के उत्कर्ष अवधिया दूसर अउ महाराष्ट्र के कृषांग जोशी तीसर स्थान म हवय। स्कोर कार्ड परीक्षा के आधिकारिक वेबसाइट म हवय। उम्मीदवार मन ह अपन स्कोर कार्ड ल डाउनलोड कर सकत हे अउ आधिकारिक वेबसाइट के माध्यम ले मेरिट सूची देख सकत हे। नीट चार मई के देसभर के पांच सौ बावन सहर अउ भारत के बाहिर चौदह ठन सहर के पांच हजार चार सौ ले जादा केंद्र म बाईस लाख ले जादा उम्मीदवार मन बर आयोजित करे गे रिहीस।
जहर सेवन-मौत
कांकेर जिला के परतापुर थाना क्षेत्र म एक झन दंपत्ति ह अपन तीन झन लइका के संग जहर खाके आत्महत्या करे के परयास करीस, जेखर सेति तीनों लइका के मउत होगे हे। उहें, पति-पत्नी ल पखांजूर के अस्पताल म भर्ती कराय गेहे हवय। पुलिस ह मामला के जांच म जूट गेहे। जहर खाय के कारण के पता अभी नइ चल पाय हे।
माओवादी सहयोगी-गिरफ्तार
नारायणपुर जिला म सुरक्षाबल ह एक झन माओवादी सहयोगी ल गिरफ्तार करे हे, जेखर उपर आईईडी बिस्फोट के घटना म सामिल रहय के आरोप हे। ए माओवादी पाछू तीन बछर ले कुतुल एरिया कमेटी म करकाबेड़ा सी.एन.एम. कमांडर के रूप म सक्रिय रिहीस।
जिले की चिट्ठी
आकाशवाणी रईपुर के प्रादेशिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ म आकाशवाणी के सबो केंद्र एके संग रिले करही। ए दारी के अंक म ‘‘बलरामपुर-रामानुजगंज‘‘ जिला के गतिविधि के बारे म जानकारी दे जाही।
खेल अलंकरण
खेल अउ युवा कल्याण विभाग ह बछर दू हजार तेइस-चौबीस अउ चौबीस-पच्चीस बर राज्य खेल अलंकरण पुरस्कार बर आवेदन मंगाय हे। आवेदन करे के आखिरी तारीख छब्बीस जून तय करे गेहे। ए पुरस्कार ह शहीद राजीव पांडेय, शहीद कौशल यादव, शहीद पंकज विक्रम, शहीद विनोद चौबे, वीर हनुमान सिंह सम्मान के संग मुख्यमंत्री ट्रॉफी, प्रोत्साहन नगद रासि, खेलवृत्ति अउ प्ररेणा निधि सामिल हे। पात्रता, उपलब्धि अउ खेल संघ के अनुसंसा के आधार म चयन करे जाही।
सॉफ्टबॉल प्रतियोगिता
चंडीगढ़ म राखेगे जूनियर नेशनल सॉफ्टबॉल प्रतियोगिता म बीजापुर जिला के बालिका टीम ह कांस्य पदक हासिल करे हे। छत्तीसगढ़ के सॉफ्टबॉल टीम ह बीजापुर जिला ले छै झन खिलाड़ी मनके चयन होय रिहीस हे। एमा अनुराधा कवासी, अस्मिता मरपल्ली, ज्योति ओयाम, रिंकी हेमला, लक्ष्मी बघेल अउ पूजा कोरसा सामिल हे। पदक जीतइया ए सबो खिलाड़ी मनके बीजापुर कलेक्टर ह पदक पहराके सुवागत करीन।
अउ अब मौसम के हाल…
अवइया दू दिन म प्रदेस म दक्षिण-पश्चिम मानसून के आगू बढ़े के संभावना हे। मौसम विभाग के अनुसार अवइया चौबीस घंटा के दउरान प्रदेस के कुछेक जघा म हल्का ले मध्यम बरसा होय के अउ गरज-चमक के संग छींटा पड़े के आसार हे। उहें, एक-दू जघा म आकाशीय बिजली गिरे के अउ अंधड़ चले के चेतावनी घलो दे गेहे। एखर प्रभाव ले दक्षिण छत्तीसगढ़ म तापमान म गिरावट दर्ज करे जा सकत हे।
अउ अब थोरकुन समाचार सार म –
– राज्य शासन ह अनुशासनहीनता के मामला म सारंगढ़-बिलाईगढ़ के प्रभारी जिला शिक्षा अधिकारी एल.पी.पटेल ल तुरते प्रभाव ले निलंबित कर देहे।
– दुरूग जिला के मोहन नगर थाना क्षेत्र म ई-रिक्शा के टक्कर ले घर के बाहिर खेलत दू साल के एक झन लइका के मउत होगे।
अउ
– जिला रोजगार अउ स्वरोजगार मार्गदर्शन केंद्र अउ जिला कौशल विकास प्राधिकरण रईपुर डहार ले सोलह जून के बिहनिया साढ़े दस बजे ले मंझनिया तीन बजे तक जोरा के लाइवलीहुड कॉलेज म प्लेसमेंट कैंप के आयोजन करे जाही।