प्रधानमंत्री नरेंद्र मोदी आज बिहनिया गुजरात के अहमदाबाद सिविल अस्पताल पहुंचिन अउ एयर इंडिया विमान दुर्घटना के घायल मनले मुलाकात करीन। प्रधानमंत्री ह सोसल मीडिया पोस्ट म किहीन कि अहमदाबाद म होय हवाई हादसा ले पूरा देस स्तब्ध हरय। ओमन शोक संतप्त परिवार मन बर संवेदना जताइन। श्री मोदी ह दुर्घटना स्थल के घलो दउरा करीन अउ उंहा बचाव काम म लगे अधिकारी अउ दूसर मनखे मन ले मुलाकात करके स्थिति के जायजा लीन। बाद म प्रधानमंत्री ह अहमदाबाद म अधिकारी मन संग समीक्षा बइठका करीन। ओमन हादसा म मारे गे गुजरात के पूर्व मुख्यमंत्री विजय रूपाणी के परिजन मनले घलो मिलिन।
प्रधानमंत्री ह दुर्घटना म बांचे एकमात्र यात्री भारतीय मूल के ब्रिटिश नागरिक विश्वास कुमार रमेश ले अस्पताल जाके मुलाकात करीन। विश्वास ह दुर्घटना ले जुड़े अनुभव के बारे म प्रधानमंत्री ल बतइन।
इही बीच, सिविल अस्पताल के अधीक्षक डॉक्टर राकेश जोशी ह बतइन कि ए समय म अस्पताल म बत्तीस मनखे मनके इलाज चलत हे। कुछेक डॉक्टर गंभीर रूप ले झुलसे हे अउ बांकी बांचे जम्मों झन के हालत स्थिर हे। ओमन बतइन कि घायल मनके स्वास्थ्य म तुरते सुधार बर अस्पताल म जम्मों जरूरी इंतेजाम करे गेहे।
टाटा समूह के अध्यक्ष एन.चंद्रशेखरन ह हरेक मृतक के परिजन मन ल एक-एक करोड़ रूपिया दे जाय के घोसना घलो करे हे। ओमन किहीन कि टाटा समूह घायल मनके समुचित उपचार सुनिश्चित करही अउ उपचार के खर्चा वहन करही।
धरती आबा जनजातीय ग्राम उत्कर्ष अभियान
प्रदेस म प्रधानमंत्री धरती आबा जनजातीय ग्राम उत्कर्ष अभियान पंद्रह जून ले सुरू होही। उहें, राज्य म सोलह अउ सत्रह जून के दू दिन के राज्य स्तरीय अभियान चलाय जाही। अइसने जिला स्तर म सत्रह ले बीस जून अउ विकासखंड स्तर म बीस ले तीस जून तक सिविर लगाय जाही। ए अभियान के तहत पीएम जनमन योजना ले छूटे जनजातीय परिवार के आधार कार्ड, आयुष्मान कार्ड वनाधिकार पत्र जइसे दस्तावेज बनाय जाही। संघरा सरकारी योजना मन के प्रचार-प्रसार घलो करे जाही।
आईईडी विस्फोट-जांच
सुकमा म होय आईईडी विस्फोट घटना के जांच स्टेट इंवेस्टिगेसन एजेंसी-एस.आई.ए. करही। एखर आदेस गृह विभाग ह जारी कर देहे। जांच टीम म स्टेट इंवेस्टिगेसन एजेंसी के एसपी समेत छै पुलिस कर्मी सामिल हे। डीजीपी अरूण देव गौतम अउ एस.आई.ए. प्रमुख अंकित गर्ग ह जांच टीम ल विसेस निरदेस दीन हे। जल्द ही टीम सुकमा के कांटा पहुंच के घटना के जांच करही।
बतादन कि नौ जून के सुकमा जिला के कोंटा म गस्त के दउरान आईआईडी विस्फोट म एएसपी आकाश राव शहीद हो गे रिहीन।
राज्यपाल-राष्ट्रीय संगोष्ठी
राज्यपाल रमेन डेका पाछू दिन म बिहार के दरभंगा म राष्ट्रीय सनातनी सेवा संघ डहार ले ‘‘सीमा सुरक्षा हम सबकी जिम्मेदारी‘‘ बिसय उपर आयोजित राष्ट्रीय संगोष्ठी म सामिल होइन। ए मउका म ओमन किहीन कि सीमा के सुरक्षा केवल सैनिक अउ सरकार के जिम्मेदारी नइ ए, बल्कि एहा हरेक नागरिक के कर्तव्य हरय। राज्यपाल ह किहीन कि हमर सैनिक जान के बाजी लगाके सीमा के सुरक्षा करथे लेकिन उंखर ए जिम्मेदारी तब अउ जादा प्रभावी होथे, जब समाज अउ नागरिक ओखर साथ देथे।
सहायक शिक्षक-काउंसिलिंग
प्रयोगशाला म सहायक शिक्षक विज्ञान के पद म सहायक शिक्षक मनके समायोजन बर सत्रह जून ले रायपुर म काउंसिलिंग सुरू होही। काउंसिलिंग प्रक्रिया दू पाली म राखे जाही। पहिली अउ दूसर पाली म डेढ़-डेढ़ सौ अभ्यर्थी मनके काउंसिलिंग होही।
बतादन कि स्कूल शिक्षा विभाग डहार ले पाछू तीस अप्रैल के जारी आदेस के मुताबिक सेवा ले समाप्त करे गे बीएड अहर्ताधारी सहायक शिक्षक मन ल सहायक शिक्षक विज्ञान-प्रयोगशाला के पद म समायोजित करे के निर्णय ले गेहे।
कवासी लखमा-संपत्ति अटैच
शराब घोटाला मामला म प्रवर्तन निदेसालय ईडी ह आज बड़का कार्रवाई करत पूर्व आबकारी मंत्री कवासी लखमा के संपत्ति अटैच कर लेहे। सुकमा म निर्मित कांग्रेस भवन ल घलो अटैच कर देहे। जेल म बंद लखमा के सुकमा अउ दूसर जघा म स्थित करीबन छै करोड़ के संपत्ति अटैच करे गेहे, जेमा ओखर धरमपुरा स्थित मकान अउ ओखर बेटा हरीश लखमा के सुकमा के संपत्ति घलो सामिल हे।
आधुनिक बायोगैस संयंत्र
राज्य सरकार कोति ले पर्यावरण हितैषी नीति ल गति देय के दिसा म पहल करत आज रायपुर नगर पालिक निगम, छत्तीसगढ़ बायोफ्यूल विकास प्राधिकरण अउ भारत पेट्रोलियम कार्पोरेसन लिमिटेड के बीच त्रिपक्षीय समझौता म हस्ताक्षर करे गीस। ए समझौता सतत योजना के तहत नगरीय ठोस अपसिष्ट ले बायोगैस उत्पादन बर करे गेहे।
रायपुर के रावांभाटा म प्रस्तावित संयंत्र डहार ले हरेक दिन डेढ़ सौ टन अपसिष्ट ल संसाधित करके बायोगैस के उत्पादन होही। एमा सत-प्रतिसत निवेस भारत पेट्रोलियम कार्पोरेसन लिमिटेड डहार ले करे जाही। जेखर लागत लगभग सौ करोड़ रूपिया के होही।
कारीकरम म रायपुर कलेक्टर गौरव कुमार, सीबीडीए के सीईओ सुमित सरकार, बीपीसीएल बायोफ्यूल के प्रमुख अनिल कुमार पी. नगर निगम रायपुर कमिश्नर विश्वदीप समेत भारत पेट्रोलियम कार्पोरेसन लिमिटेड अउ सीबीडीए के वरिष्ठ अधिकारी मौजूद रिहीन।
श्रमिक-राशि
राज्य सरकार ह प्रदेस के निर्माण श्रमिक अउ ओखर परिवार मन बर अट्ठारह करोड़ नवासी लाख रूपिया के मंजूरी देहे। मुख्यमंत्री विष्णुदेव साय अउ श्रममंत्री लखनलाल देवांगन पंद्रह जून के रायपुर म राखे गे कारीकरम म हितग्राही मनके खाता म रासि अंतरित करे हे। ए दउरान मुख्यमंत्री नोनी-बाबू मेधावी शिक्षा सहायता योजना के तहत छत्तीसगढ़ माध्यमिक शिक्षा मंडल म कक्षा दसवीं के छब्बीस अउ कक्षा बारहवीं के पांच लइका मन समेत कुल इकतीस झन श्रमिक मनके मेधावी लइका मन ल दू-दू लाख रूपिया दे जाही। ए रासि म एक लाख रूपिया दूपहिया वाहन खरीदे बर अउ एक लाख रूपिया नगद प्रोत्साहन रासि के रूप म दे जाही।
बातों-बातों में
प्रादेसिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ ए बखत अंतर्राष्ट्रीय योग दिवस म योग आचार्य मंजू झा ले लेगे भेंटवार्ता के प्रसारण करे जाही। एखर प्रसारण काली चौदह जून के एफएम चैनल म बिहनिया नौ बजे ले करे जाही। उहें, प्रायमरी चैनल म ए कारीकरम के प्रसारण बिहनिया साढ़े दस बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
बाघ-गणना
जल्द ही प्रदेस के अभ्यारण्य मन म बाघ के गिनती सुरू होही। इंखर तियारी तेज कर दे हे। ए दारी के गणना म माओवादी हिंसा ले प्रभावित बस्तर के इंद्रावती टाईगर रिजर्व अउ कांगेर वैली नेशनल पार्क म पहिली घांव ट्रैप कैमरा लगाय जाही। वन विभाग के अधिकारी ह बतइन कि भारतीय वन्यजीव संस्थान के दिसा-निरदेस के अंतर्गत उन्नत तरीका के उपयोग करके चार चरण म गिनती करे जाही।
प्लेसमेंट कैंप
जिला रोजगार कार्यालय अउ जिला कौशल विकास प्राधिकरण रायपुर डहार ले सोलह जून के प्लेसमेंट कैंप आयोजित करे जाही। ए प्लेसमेंट कैंप म अभ्यर्थी जोरा स्थित कालेज म बिहनिया साढ़े दस बजे ले मंझनिया तीन बजे तक रजिस्ट्रेसन करा सकथे। ए प्लेसमेंट कैंप के माध्यम ले पांच नियोजक मन डहार ले लगभग दू सौ चांसठ आने-आने पद म नियुक्ति करे जाही।
अउ अब मौसम के हाल…
एक ठिन द्रोणिका पश्चिम मध्य अरब सागर ले दक्षिण तटीय ओडिसा तक बने हे। उहें, एक पश्चिमी विक्षोभ पूर्व अउ उत्तर म स्थित हे। एखर असर ले प्रदेस म काली कुछेक जघा मन म हल्का ले मध्यम बरसा होय या गरज-चमक के संग छींटा पड़े के संभावना हे। उहें, एक-दू जघा म अंधड़ चले अउ गाज गिरे के आसंका हे। बरसा के क्षेत्र मुख्य रूप ले दक्षिण छत्तीसगढ़ म रहय के संभावना हे।
मौसम विभाग के अनुसार अवइया दू-तीन दिन म दक्षिण-पश्चिम मानसून के आगू बढ़े बर अनुकूल परिस्थिति बनत हे।