लंदन जावत एयर इंडिया के यात्री विमान आज गुजरात के अहमदाबाद हवाई अड्डा तीर दुर्घटनाग्रस्त होगीस। उड़ान संख्या एआई-वन सेवन वन विमान अहमदाबाद ले लंदन बर उड़ान भरत रिहीस। नागरिक उड्डयन महानिदेशालय के अनुसार विमान म दू सौ बयालीस लोगन सवार रिहीन, जेमा दू पायलट अउ दस केबिन क्रू सामिल रिहीन। एमा ले एक सौ उनहत्तर भारतीय नागरिक, तिरपन ब्रिटिश नागरिक, एक कनाडाई अउ सात पुर्तगाली नागरिक विमान म सवार रिहीन। दुर्घटना म अधिक जानकारी बर एयर इंडिया ह एक यात्री हॉटलाइन नंबर – एक आठ शून्य-शून्य पांच छह नौ एक चार-चार-चार स्थापित करे गेहे।
प्रधानमंत्री नरेन्द्र मोदी ह विमान दुर्घटना ल ह्दय विदारक बतईन। ओमन ह कहिन कि प्रभावित लोगन मन ल सहायता बर काम करत मंत्री अउ अधिकारी मनके संपर्क म हे। श्री मोदी कहिन कि ए दुख के घड़ी म उंखर संवेदना सबो प्रभावित लोगन मनके संग हे।
उहें, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह घलो हादसा म मारे गे लोगन मनके परिजन के प्रति सोक जताय हे।
मुख्यमंत्री-ग्लोबल वार्मिंग कैंपेन
मुख्यमंत्री विष्णुदेव साय आज रायपुर स्थित इंदिरा गांधी कृषि विश्वविद्यालय म आयोजित ‘‘फाइट अगेंस्ट ग्लोबल वार्मिंग कैंपेन‘‘ कार्यक्रम म सामिल होइन। ए बेरा म मुख्यमंत्री ह कहिन कि हम सबो के भागीदारी ले ही पर्यावरण संरक्षण के संकल्प पूरा होही। ओमन ह कहिन कि आज दुनिया जलवायु परिवर्तन अउ ग्लोबल वार्मिंग के चुनौती ले जूझत हे। केन्द्र सरकार ह बछर दू हजार सत्तर तक कार्बन उत्सर्जन खत्म करे के लक्ष्य राखे हे। इही कड़ी म छत्तीसगढ़ हरित ऊर्जा ल बढ़ावा देके दिसा म आगू बाढ़त हे। मुख्यमंत्री ह बतईन कि राज्य म वृक्षारोपण के बिसेस अभियान चलाय जात हे अउ पाछु बछर चार करोड़ पौधा लगाय गे रिहीस।
कार्यक्रम म इंदिरा गांधी कृषि विश्वविद्यालय के कुलपति डॉक्टर गिरीश चंदेल के संग आने प्रतिनिधि उपस्थित रिहीन।
विकसित कृषि संकल्प अभियान
केन्द्रीय कृषि मंत्री शिवराज सिंह चौहान ह किहीन कि विकसित कृषि संकल्प अभियान ह वैज्ञानिक अनुसंधान अउ जमीनी स्तर म खेती के बीच के अंतर ल सफलतापूर्वक खतम कर देहे। ए अभियान के समापन अवसर म गुजरात के बारडोली म किसान सम्मलेन ल संबोधित करत श्री चौहान ह भारत के कृषि पुनर्जागरण बर केन्द्र सरकार के रोडमैप ल रेखांकित करीन। प्रधानमंत्री नरेन्द्र मोदी के परिकल्पना के बारे म बतात हुए श्री चौहान ह व्यापक विकसित भारत पहल म अवइया विकसित कृषि संकल्प अभियान के तहत जमीनी स्तर के खेती के तरीका ल बदले अउ वैज्ञानिक अनुसंधान के एकीकरण उपर जोर दीन।
छत्तीसगढ़ म घलो विकसित कृषि संकल्प अभियान खतम होगे हे। अभियान के आखिरी दिन कृषि वैज्ञानिक डॉक्टर सौम्या दास ह बतईन कि ए अभियान के तहत छत्तीसगढ़ के किसान मन ल घलो फायदा होय हे।
शिक्षक-युक्तियुक्तकरण
प्रदेस म सोलह जून ले सुरू होवइया नवा सिक्षा सत्र ले पहिली राज्य सरकार ह चार सौ तिरपन सिक्षक विहीन स्कूल म ले चार सौ सैंतालीस स्कूल मन म सिक्षक मनके युक्तियुक्तकरण कर देहे। सिक्षा विभाग ले मिले जानबा के मुताबिक युक्तियुक्तकरण प्रक्रिया के तहत सिक्षक विहीन तीन सौ संतावन प्राथमिक साला अउ तीस माध्यमिक साला मन म नियमित सिक्षक के पदस्थापना कर दे गेहे। राज्य के सिक्षक विहीन छियासठ हाईस्कूल म ले सुकमा जिला के चार हाईस्कूल अउ नारायणपुर जिला के दू हाईस्कूल म सिक्षक मनके पदस्थापना बर अभी काउंसलिंग के प्रक्रिया चलत हे।
मुख्यमंत्री विष्णुदेव साय ह किहीन हे कि सिक्षा राज्य सरकार के सर्वोच्च प्राथमिकता हरय। ओमन किहीन कि राज्य के कतकोन स्कूल सिक्षक विहीन रिहीस। एखर सेती सरकार ह युक्तियुक्तकरण के प्रक्रिया ल पूरा पारदर्सिता ले लागू करे हे।
अंतर्राष्ट्रीय योग दिवस
अंतर्राष्ट्रीय योग दिवस के बेरा म इक्कीस जून के बिहनिया साढ़े छह बजे ले सात बजके चालीस मिनट तक देसभर म एक लाख ले जादा योग कार्यक्रम एके संग आयोजित करे जाही। एमा योग के अभ्यास कराय जाही। ए बछर के बिसय हे – ‘‘एक पृथ्वी, एक स्वास्थ्य‘‘। नई दिल्ली म केन्द्रीय आयुष मंत्री प्रताप राव जाधव ह बतईन कि मुख्य कार्यक्रम आंध्रप्रदेश के विशाखापट्टनम म आयोजित करे जाही। एमा प्रधानमंत्री नरेन्द्र मोदी भाग लीहीं।
स्वास्थ्य विभाग-एमओयू
स्वास्थ्य विभाग ह छत्तीसगढ़ म स्वास्थ्य सेवा मन ल मजबूती देके उद्देश्य ले यूनिसेफ, डब्ल्यूएचओ, एम्स अउ पांच संस्थान मनके संग समझौता ज्ञापन म हस्ताक्षर करीन। आज नवा रायपुर म होवइया कार्यक्रम म ए संस्था मनके संग साझा दायित्व अउ लक्ष्य म सहमति बनीन। ए एमओयू ले संयुक्त राष्ट्र विकास कार्यक्रम डहार ले टीकाकरण कार्यक्रम ल तकनीकी अउ रणनीतिक सहयोग मिलही।
यूपीएससी-परीक्षा परिणाम
संघ लोक सेवा आयोग-यूपीएससी के सिविल सेवा प्रारंभिक परीक्षा के परिणाम घोसित कर दे गेहे। ए परीक्षा म देसभर ले चौदह हजार एक सौ इकसठ उम्मीदवार के चयन मुख्य परीक्षा बर होय हे। सिविल सेवा प्रारंभिक परीक्षा पच्चीस मई के आयोजित करे गे रिहीस। मुख्य परीक्षा बर क्वालीफाई करइया उम्मीदवार मन ल अब यूपीएससी के मुख्य लिखित परीक्षा म सामिल होय के अवसर मिलही, जउन बाईस अगस्त के आयोजित होही।
संघ लोक सेवा आयोग ह अपन आधिकारिक वेबसाइट म सफल उम्मीदवार मनके सूची जारी कर देहे।
रेलवे-टिकट नियम
भारतीय रेल ह तत्काल टिकट बर नवा नियम के घोसना करे हे। एक जुलाई ले लोगन मन भारतीय रेलवे खानपान अउ पर्यटन निगम-आई.आर.सी.टी.सी. के वेबसाइट अउ ऐप म ऑनलाइन तत्काल टिकट बुक कर सकही, जउन मन आधार के संग अपन खाता प्रमाणित करे हे। पन्द्रह जुलाई ले ए नियम आरक्षण काउंटर ले तत्काल टिकट बुक कराय म घलो लागू होही। तत्काल टिकट निप्पक्ष अउ पारदर्सी ढंग ले बुक कराय अउ यात्री मनके हित ल सुरक्षित राखे बर ए फइसला करे गेहे।
विश्व रक्तदाता दिवस
विश्व रक्तदाता दिवस के उपलक्ष्य म प्रदेस के सबो आयुष्मान आरोग्य मंदिर मन म काली रक्तदाता मन बर जन-जागरूकता बढ़ाय के आने-आने कार्यक्रम करे गीस। तीन हजार आठ सौ ले जादा आरोग्य मेला मन म छियालीस हजार ले जादा लोगन मन ह अपन स्वास्थ्य के जांच कराईस। ए दउरान दस हजार ले जादा मनखे मन ह रक्तदान के सपथ लीन।
ए बछर के थीम ‘‘गीव ब्लड गीव होप टूगेदर वी सेव लाइफ‘‘ के तहत सबो आयुष्मान आरोग्य मंदिर मन म रक्तदान पंजीकरण, शपथ समारोह, जागरूकता रैली अउ रक्तदाता सम्मान जइसन कार्यक्रम होइस।
शासकीय कर्मचारी-प्रोफाइल
राज्य सरकार ह शासकीय कर्मचारी मनके प्रोफाइल ल कार्मिक संपदा पोर्टल म अपलोड अउ अपडेट करना अनिवार्य कर देहे। एखर बर एम्प्लाई कॉर्नर मोबाइल ऐप अउ वेबपोर्टल विकसित करे गेहे। ए नवा व्यवस्था ल तत्काल प्रभाव ले लागू कर दे गेहे। राज्य सासन डहार ले बछर दू हजार उन्नीस ले कार्मिक संपदा मॉडयूल के उपयोग करे जावत रिहीस। उहें, ‘डिजिटल प्रशासन – पारदर्शी समाधान‘ के नीति ल आगू बढ़ात हुए राज्य सरकार ह अब कर्मचारी मनके जानकारी मोबाइल ऐप के जरिया ले अपडेट करे के पहल करे हे। ए व्यवस्था के लागू हो जाय ले कर्मचारी मनके सेवानिवृत्ति, पदोन्नति अउ वेतन-विसंगति म कोनों प्रकार के परेसानी नइ होही।
माओवादी आत्मसमर्पण
नारायणपुर जिला म दू माईलोगिन संग तीन माओवादी मन ह पुलिस के आगू आत्मसमर्पण करे हे। एमा पुरूष माओवादी उपर दस लाख रूपिया अउ दूनों माईलोगिन माओवादी उपर कुल नौ लाख रूपिया के इनाम घोषित रिहीस। माईलोगिन माओवादी पी.पी.सी.एम. अउ परतापुर एरिया जनमिलिशिया सदस्य के रूप म सक्रिय रिहीस। उहेंं, पुरूष माओवादी बस्तर डिवीजन म अवइया कंपनी नंबर – छह म सक्रिय रिहीस। आत्मसमर्पण करइया ए माओवादी मन ल राज्य सरकार के पुनर्वास नीति के तहत पचास-पचास हजार रूपिया के प्रोत्साहन रासि दे गीस।
अउ अब मौसम के हाल…
मौसम विभाग के अनुसार एक ऊपरी हवा के चक्रवाती घेरा आंध्रप्रदेश अउ ओमा लगे दक्षिण ओड़िशा के उपर बने हुए हे। उहें, एक द्रोणिका छत्तीसगढ़, मराठावाड़ा अउ कर्नाटक तक फइले हे। एक पश्चिमी विक्षोभ घलो बने हे। एखर असर ले प्रदेस के मौसम म बदलाव होय के संभावना हे। अवइया चौबीस घंटा के दउरान प्रदेस के कुछ जघा मन म हल्का ले मध्यम बरसा होय अउ एक-दू जघा म अंधड़ चले अउ वज्रपात होय के आसार हे। मौसम विभाग के अनुसार अवइया अड़तालीस घंटा म दक्षिण-पश्चिम मानसून के आगू बाढ़े बर अनुकूल परिस्थिति बनत हे।