प्रधानमंत्री नरेन्द्र मोदी ह कहिन कि अवइया पीढ़ी के बुनियादी ढांचा बर भारत के प्रयास सतत् अउ दीर्घकालिक दृष्टि ले प्रेरित हे। सोशल मीडिया पोस्ट म श्री मोदी ह कहिन कि ये आत्मनिर्भर भारत के नींव राखत हे। प्रधानमंत्री ह कहिन कि बुनियादी ढांचा म क्रांति के ग्यारह बछर होगे हे। ए दउरान बेहतरी बुनियादी ढांचा बनाय गेहे। एखर ले भारत के विकास म गति आय हे। ओमन कहिन कि रेलवे ले लेके राजमार्ग अउ बंदरगाह ले हवाई अड्डा तक भारत के तेजी ले फइलत बुनियादी ढांचा नेटवर्क जीवन ल आसान बनावत हे।
मुख्यमंत्री-प्रेस कॉन्फ्रेंस
मुख्यमंत्री विष्णुदेव साय ह आज रईपुर म एक ठिन पत्रकारवार्ता ल संबोधित करत प्रधानमंत्री नरेन्द्र मोदी के ग्यारह बछर के कार्यकाल ल ऐतिहासिक बतईन। ए मउका म मुख्यमंत्री ह ‘‘विकसित भारत के अमृतकाल, सेवा, सुशासन अउ गरीब कल्याण के मोदी सरकार के ग्यारह बछर‘‘ के अभियान के आज छत्तीसगढ़ म सुरूआत होइस। ए अभियान इक्कीस जून तक चलही। श्री साय ह किहीन कि प्रधानमंत्री के कार्यकाल म जनजातीय समाज के मान-सम्मान बढ़े हे अउ जनजातीय समाज के विकास बर कतकोन योजना सुरू करे गेहे, जेखर लाभ जनजातीय समाज ल मिलत हे।
एक ठिन सवाल के जवाब म मुख्यमंत्री ह कहिन कि छत्तीसगढ़ म बरसा के दउरान माओवादी मनके खिलाफ अभियान जारी रइही। ओमन कहिन कि छत्तीसगढ़ सरकार माओवादी मोर्चा म बड़का लड़ाई लड़त हे अउ बस्तर म सांति स्थापित करे म सफल होवत हे। श्री साय ह बतईन कि प्रदेस म भाजपा के सरकार बने के बाद अब तक होय मुभेड़ठ म चार सौ पच्चीस माओवादी मारे गेहे। उहें, तेरह सौ ले जादा माओवादी मन ह आत्मसमर्पण करे हे अउ चौदह सौ ले जादा माओवादी मन ल गिरफ्तार करे गेहे।
मुख्यमंत्री-बैंक साखा सुभारंभ
मुख्यमंत्री विष्णुदेव साय आज रईपुर म छत्तीसगढ़ राज्य सहकारी बैंक के नवनियुक्त प्राधिकृत अधिकारी केदारनाथ गुप्ता के पदभार ग्रहण अउ अभिनंदन समारोह म सामिल होइन। ए मउका म श्री साय ह जशपुर जिला के फरसाबहार म अपेक्स बैंक के नवा साखा के वर्चुअल सुभारंभ करीन। ओमन कहिन कि फरसाबहार म अपेक्स बैंक के नवा साखा खुले ले अब किसान मन ल बैंकिंग सुविधा बर पत्थलगांव जाना नइ पड़ही। मुख्यमंत्री ह कहिन कि प्रधानमंत्री नरेन्द्र मोदी अउ सहकारिता मंत्री अमित शाह के नेतृत्व म सहकार ले समृद्धि के संकल्पना ल साकार करे जावत हे।
मुख्यमंत्री-समीक्षा
मुख्यमंत्री विष्णुदेव साय ह कहिन हे कि राज्य सरकार विशेष पिछड़ी जनजातीय अउ आदिवासी समाज के हरेक मनखे तक योजना के लाभ पहुंचाय बर संकल्पित हे। ए बात ओमन ह काली मंत्रालय म आदिम जाति विकास, अनुसूचित जाति विकास, पिछड़ा वर्ग अउ अल्पसंख्यक विकास विभाग के काम के समीक्षा के दउरान कहिन। मुख्यमंत्री ह पीएम जनमन अउ धरती आबा जइसन महत्वाकांक्षी योजना मनके प्रभावी क्रियान्वयन ल सर्वोच्च प्राथमिकता के संग सुनिश्चित करे के निरदेस दीन। ओमन ह पीएम जनमन योजना के तहत स्वीकृत आवास अउ सड़क निर्माण काम ल उच्च गुणवत्ता के संग समय-सीमा म पूरा करे उपर जोर दीन।
अंतर्राष्ट्रीय योग दिवस
अंतर्राष्ट्रीय योग दिवस म इक्कीस जून के होवइया योग संगम के मेजबानी बर देसभर ले पचास हजार ले जादा संगठन मन ह पंजीकरण कराय हे। ए बछर के बिसय हरय – ‘‘एक पृथ्वी, एक स्वास्थ्य के लिए योग‘‘।
आज नई दिल्ली म आकाशवाणी के रंग भवन म ‘‘कार्यस्थल पर योग‘‘ कार्यशाला के आयोजन करे गीस। ए सत्र म आने-आने कार्य-अनुकूल योग अभ्यास उपर इंटरैक्टिव अउ लाइव प्रदर्सन सामिल हे। ए कार्यक्रम म आकाशवाणी के महानिदेशक डॉक्टर प्रज्ञा पालीवाल गौड़ अउ अतिरिक्त महानिदेशक एल. मधु नाग ह घलो भाग लीन।
बस्तर गोंचा पर्व
देव स्नान चंदन जात्रा पूजा विधान के संग बस्तर म आज ले गोंचा पर्व के सुरूआत होगे हे। बस्तर गोंचा समिति के अध्यक्ष चिंतामणी पांडे ह बतईन कि चंदन जात्रा म जगदलपुर के जगन्नाथ मंदिर म देव विग्रह मन ल चंदन ले स्नान कराय गीस। परंपरा के अनुसार गांव आसना ले भगवान शालीग्राम ल लाके जगन्नाथ मंदिर म स्थापित करे गीस। एखर बाद इंद्रावती नदी ले पवित्र जल लाके भगवान शालीग्राम के पंचामृत, चंदन अउ इंद्रावती नदी के जल ले अभिषेक करे गीस। एखर संगेसंग भगवान जगन्नाथ, माता सुभ्रदा अउ बलभद्र के बाईस विग्रह ल मुक्ति मंडप म स्थापित करे गीस। ओमन बतईन कि भगवान जगन्नाथ के अनसर काल काली बारह जून ले सुरू होके पच्चीस जून तक जारी रइही। ए दउरान दर्सन वर्जित होही। छब्बीस जून के नेत्रोत्सव पूजा विधान के संग प्रभु जगन्नाथ के दर्सन के बाद सत्ताईस जून के श्रीगोंचा रथ यात्रा पूजा विधान होही।
उल्लास नवभारत साक्षरता कार्यक्रम
राष्ट्रीय शिक्षा नीति के तहत संचालित ‘‘उल्लास नवभारत साक्षरता कार्यक्रम‘‘ के सफल क्रियान्वयन बर प्रदेस म व्यापक अभियान के सुरूआत करे गेहे। ए अभियान के उद्देश्य पन्द्रह बछर ले जादा आयु वर्ग के असाक्षर नागरिक मन ल बुनियादी साक्षरता, संख्यात्मक ज्ञान अउ जीवन उपयोगी कौशल ले सशक्त बनाना हे, ताकि ओमन ए बछर सितंबर महीना अउ अवइया बछर मार्च म होवइया परीक्षा म सामिल हो सकय।
सामान्य प्रसासन विभाग ह कार्यक्रम के सुचारू संचालन बर राज्य ले ग्राम पंचायत स्तर तक दिसा-निरदेस जारी करे हे। निरदेस म केहे गेहे कि जिला, ब्लॉक अउ नगरीय साक्षारता मिशन प्राधिकरण के बइठका बीस जून तक अनिवार्य रूप ले आयोजित करे जाय।
महिला मृत्यु-जांच समिति
रायपुर के मुख्य चिकित्सा अउ स्वास्थ्य अधिकारी ह बीरगांव के शहरी सामुदायिक स्वास्थ्य केन्द्र म बीते नौ जून के तेईस बछर के माईलोगिन साक्षी निषाद के प्रसव के बाद होय मउत के मामला म चार सदस्यीय जांच समिति के गठन करे हे। ए समिति मामला के जांच करके तीन दिन के भीतर अपन रिपोर्ट प्रस्तुत करही।
जीएसटी चोरी-कारोबारी गिरफ्तार
वस्तु अउ सेवा कर-जीएसटी के टीम ह करीब छब्बीस करोड़ रूपिया के टैक्स चोरी के मामला म राजधानी रायपुर के एक ठिन कारोबारी के ठिकाना म छापा मारीन। छापा के दउरान टीम ह कारोबारी अमन अग्रवाल ल गिरफ्तार करे लेहे। आरोप हे कि अमन अग्रवाल ह बोगस फर्म के माध्यम ले बछर दू हजार तेईस ले दू हजार पच्चीस तक एक सौ चवालीस करोड़ रूपिया के फर्जी खरीद दिखाके लगभग छब्बीस करोड़ रूपिया के टैक्स चोरी करे हे। खबर के मुताबिक अमन अग्रवाल ह ओ मनखे मनके नाव म घलो फर्म बनाय हे, जिखर मउत दू हजार दस म हो चुके हे। एखर बावजूद ओ ह बछर दू हजार तेरह अउ पन्द्रह म मृतक मनखे के नाम ले फर्म खरीदीस।
कबीर जयंती
आज कबीर जयंती हरय। ए मउका म प्रदेसभर म आने-आने कार्यक्रम आयोजित करे जात हे। राजधानी रायपुर समेत कतकोन जघा म घलो आज कबीर पंथ के लोगन ह रैली निकाले हे।
मुख्यमंत्री विष्णुदेव साय ह प्रदेसवासी मन ल कबीर जयंती के बधाई अउ सुभकामना देहे। ओमन कहिन कि संत कबीर सिरिफ एक महान आध्यात्मिक संत नहीं, भलूक समाज सुधारक अउ युग-प्रवर्तक घलो रहिन। मुख्यमंत्री ह प्रदेसवासी मन ल आह्वान करे हे कि हम सबो संत कबीर के विचार ल अपन जीवन म आत्मसात कर सामाजिक एकता अउ सद्भाव ल अउ जादा सशक्त बनावन।
माओवादी सहयोगी-गिरफ्तार
नारायणपुर जिला के छोटेडोंगर थाना क्षेत्र म सुरक्षा बल मन ह एक झिन माओवादी सहयोगी ल गिरफ्तार करे हे। एखर उपर तोयामेटा गांव म रोड निर्माण के दउरान सुरक्षा बल उपर आईईडी विस्फोट अउ फायरिंग करे के घटना म सामिल होय के आरोप हे। ए माओवादी पाछु सात बछर ले अमदई एरिया कमेटी म जनताना सरकार अध्यक्ष के रूप म सक्रिय रिहीस।
अउ अब मौसम के हाल…
मौसम विभाग के अनुसार प्रदेस म काली कुछेक जघा मन म हल्का ले मध्यम बरसा होय अउ गरज-चमक के संग छीटा पड़े के संभावना हे। उहें, एक-दू जघा मन म अंधड़ चले अउ गाज गिरे के आसंका हे। ए दउरान आसमान म बादल छाय रइही, जेखर ले तापमान म थोरकिन गिरावट आही। मौसम विभाग ह दक्षिण-पश्चिम मानसून के आगू बाढ़े बर चौदह जून ले अनुकूल परिस्थिति बने के संभावना जताय हे।