सुकमा जिला म काली होय आईईडी विस्फोट म सहीद एएसपी आकाश राव गिरपुंजे के आज राजधानी रईपुर म अंतिम संस्कार करे गीस। एखर पहिली मुख्यमंत्री विष्णुदेव साय ह आज माना के छत्तीसगढ़ सशस्त्र बल परिसर पहुंचके सहीद के पार्थिव सरीस म पुष्पचक्र अर्पित कर नमन करीन। ए दउरान ओमन सहीद के पार्थिव सरीर ल कंधा देके बिदई दीन। मुख्यमंत्री ह सहीद पुलिस अधिकारी के परिवार वाले मनले भेंट करके अपन संवेदना जतईन अउ हरसंभव मदद के भरोसा देवइन।
पाछु पत्रकार मनले गोठबात करत मुख्यमंत्री ह किहीन कि सुरक्षा बल के कार्रवाई ले नक्सली बौखलाएं हे। छत्तीसगढ़ सरकार ए चुनौती ले निपटे बर हर किसम ले प्रतिबद्ध हवय। ओमन किहीन कि जवान मन के बलिदान बेकार नई जाही।
ए बेरा म विधानसभा अध्यक्ष डॉक्टर रमन सिंह, उपमुख्यमंत्री विजय शर्मा और अरूण साव समेत कतकोन जनप्रतिनिधि अउ आम लोगन मौजूद रिहीन। इही बीच, घटना के बिरोध म काली ब्यापारी मन दोरनापाल बंद के आव्हान करीन अउ आज संझा कैंडल मार्च निकालके श्रद्धांजलि सभा राखे गीस।
खबर के मुताबिक काली सुकमा जिला के डोण्ड्रा तीर आईईडी विस्फोट के चपेट म आए ले अतिरिक्त पुलिस अधीक्षक आकाश राव गिरपुंजे सहीद होगे। उहें, दू आने पुलिस अधिकारी घायल होय रिहीन।
जन-मन सर्वेक्षण
नरेन्द्र मोदी सरकार के ग्यारह बछर पूरा होय के मउका म नरेन्द्र मोदी ऐप या नमो ऐप म सुरू करे गे जन-मन सर्वेक्षण के पहिली दिन देसभर ले पांच लाख ले जादा लोगन अपन प्रतिक्रिया दीन। प्रधानमंत्री नरेन्द्र मोदी ह काली देसवासी मन ले पाछु ग्यारह बछर म भारत के विकास यात्रा के सर्वेक्षण म सामिल होय के आग्रह करे रिहीन। ए सर्वेक्षण लोगन ल सरकार के संग अपन प्रतिक्रिया अउ राय सोज्झे साझा कर बर मंच देथे। ए सर्वेक्षण सुनिश्चित करथे कि लोगन के आवाज सुने जाए अउ भविष्य के नीति बनाए म विचार करे जाए। पहिलीच दिन पांच लाख ले जादा लोगन के प्रतिक्रिया संग ए सर्वेक्षण सोज्झे अउ सही तरीका ले लोगन ले जुड़े के एक महत्ता के मंच बन गेहे, जउन ए सुनिश्चित करथे कि लोगन के आवाज देस के विकास म योगदान देवय।
प्रधानमंत्री-11 साल
प्रधानमंत्री नरेन्द्र मोदी ह पाछु ग्यारह बछर म भारत के रक्षा क्षेत्र म होय उल्लेखनीय परिवर्तन म गोठबात करीन। सोसल मीडिया पोस्ट म प्रधानमंत्री ह किहीन कि रक्षा उत्पादन म आधुनिकीकरण अउ आत्मनिर्भरता पाय म धियान केंद्रित करे गेहे। ओमन किहीन कि ए देखना उत्साहजनक हवय कि कइसे भारत के लोगन राष्ट्र ल मजबूत करे के साझा संकलप के संग एकजुट होय हे।
उहें, रक्षा मंत्री राजनाथ सिंह ह किहीन कि भारत के रक्षा क्षेत्र म पाछु ग्यारह बछर म प्रधानमंत्री नरेन्द्र मोदी के अगुवई म ऐतिहासिक परिवर्तन होय हे। ए सोसल मीडिया पोस्ट म श्री सिंह ह किहीन कि प्रधानमंत्री के अगुवई म मजबूत सीमा, आधुनिक सशस्त्र बल, स्वदेशी हथियार, रिकार्ड रक्षा निर्यात अउ वैश्विक विश्वास ले ए क्षेत्र आत्मनिर्भरता कोती आगु बढ़हिन हे।
विश्व रक्तदाता दिवस-कार्यक्रम
विश्व रक्तदाता दिवस म काली ग्यारह जून के प्रदेशभर के सबो आयुष्मान आरोग्य मंदिर मन म जन-जागरूकता कारीकरम राखे जाही। ए बछर के थीम ‘‘गीव ब्लड-गीव होपः टुगेदर वी सेव लाइव्स’’ के संदेस ल लेके राज्यभर म आयोजन करे जाही। आरोग्य मेला के कारीकरम म नागरिक मन के सक्रिय भागीदारी सुनिश्चित करे जाही अउ ए दउरान रक्तदान खातिर पंजीकरण, सपथ ग्रहण समारोह, रैली अउ सबले बने रक्तदाता के सम्मान जइसन कारीकरम होही। ग्राम पंचायत स्तर म सरपंच के अगुवई म रक्तदान सपथ समारोह राखे जाही, जेमा नागरिक मन ल रक्तदान करे के सपथ देवाय जाही। संगेसंग रैली, पोस्टर प्रदर्सनी अउ आने जन-जागरूकता कारीकरम होही। स्वास्थ्य विभाग ह ए संबंध म सबो जिला अउ ब्लाक अधिकारी मन ल निरदेस जारी कर देहे।
राज्यपाल-टीबी मरीज
राज्यपाल रमेन डेका ह सक्ती जिला के दस झिन टीबी मरीज बर पौष्टिक आहार देवाय बर साठ हजार रूपिया के आर्थिक मदद दीन। ए सहायता रकम ओमन अपन स्वेच्छानुदान मद ले देहे, जेखर ले मरीज मन के स्वास्थ्य म सुधार लाए म मदद मिलही। उहें, मरीज मन ल हरेक महीना पांच सौ रूपिया के मान ले बछर भर तक सहायता दे जाही।
विकसित कृषि संकल्प अभियान
विकसित कृषि संकल्प अभियान म अभी छत्तीसगढ़ म आने-आने जघा कृषि वैज्ञानिक मनके टीम किसान मनले सोज्झे गोठबात करत हे। ऐमा राष्ट्रीय जैविक स्ट्रेस प्रबंधन संस्थान, रईपुर के वैज्ञानिक मन ह रईपुर अउ दुरूग के गांव के दउरा करीन, जिहां कृषि वैज्ञानिक डॉक्टर सौम्या डैश अउ डॉक्टर पी. मूवन्थन के टीम ह किसान मन संग कृषि चौपाल अउ जागरूकता सिविर ले गोठबात करीन। ए दउरान किसान मन ल संतुलित मात्रा म उर्वरक बउरे, प्रधानमंत्री किसान सम्मान निधि योजना, मृदा स्वास्थ्य सुधार, पशुपालन, एकीकृत अउ विविधीकृत कृषि प्रणाली, जैविक अउ प्राकृतिक खेती के संबंध म जानकारी दीन।
शिक्षक-काउंसिलिंग
प्रदेस म नियुक्ति के बाद सेवा समाप्त करे गे दू हजार छह सौ इक्कीस बीएड अर्हताधारी सहायक सिक्षक मन के समायोजन बर रईपुर म सत्रह ले छब्बीस जून तक ओपन काउंसिलिंग होही। ए सहायक सिक्षक मनके समायोजन सहायक सिक्षक विज्ञान प्रयोगसाला के पद म करे जाही। काउंसिलिंग के बाद अभ्यर्थी मन के दस्तावेज के सत्यापन संबंधित जिला के सिक्षा अधिकारी कोती ले पच्चीस जून ले चार जुलई तक करे जाही।
खबर के मुताबिक ए सहायक सिक्षक मन के नियुक्ति बछर दू हजार तेईस म सोज्झे भर्ती ले करे गे रिहीस।
राष्ट्रीय आम महोत्सव-समापन
रईपुर के इंदिरा गांधी कृषि विश्वविद्यालय म राखे गे चार दिवसीय राष्ट्रीय आम महोत्सव काली सिरा गे। कृषि मंत्री रामविचार नेताम समापन समारोह म माईपहुना के रूप म संघरीन। ए मउका म आम उत्पादक किसान अउ संस्था ल इनाम दे गीस। छत्तीसगढ़ म आम उत्पादन के क्षेत्र म सबले बने योगदान देवइया प्रगतिसील किसान मनके सम्मान करे गीस।
समापन समारोह म बोलत कृषि मंत्री ह किहीन कि राष्ट्रीय आम महोत्सव म छत्तीसगढ़ के किसान अउ लोगन मन ल सोलह सौ ले जादा किसम के आमा के जानकारी मिलीस। संगेसंग छत्तीसगढ़ के किसान मन ल घलो आमा के नवा उन्नत प्रजाति के संबंध म जाने के मउका मिलीस। श्री नेताम ह किहीन कि ए किसम के आयोजन राजधानी रईपुर के संगेसंग बस्तर अउ सरगुजा जइसन आदिवासी बहुल संभाग म राखे जाना चाही, जेखर ले इहां के किसान मन ल घलो फायदा मिल सकय।
माओवादी आत्मसमर्पण
कोंडागांव जिला म आज एक माओवादी ह आत्मसमर्पण करे हे। ए माओवादी बेड़मा बस्तर डिवीजन अउ आमदई म एलओएस सदस्य के रूप म सक्रिय रिहीस। एखर उपर बस्तर अउ नारायणपुर के सीमावर्ती क्षेत्र म आने-आने माओवादी घटना म सामिल रहे के आरोप हे। आत्मसमर्पित माओवादी ह पुनर्वास नीति म पचास हजार रूपिया के प्रोत्साहन रासि दे गीस।
उहें, नारायणपुर जिला म पुलिस ह माओवादी मन ल हथियार, कारतूस अउ विस्फोटक जिनीस उपलब्ध कराए के आरोप म एक मनखे के गिरफ्तार करे हे। पुलिस के मुताबिक नाकेबंदी करके ए मनखे ल नारायणपुर-कुतुल रद्दा ले हिरासत म ले गीस। एखर तीर ले बिजली तार, वॉकी-टॉकी, बीस ठिन कारतूस अउ तीन डेटोनेटर बरामद करे गेहे।
इही बीच, बीजापुर जिला के नेशनल पार्क मुठभेड़ म बरामद करे गे सात झिन माओवादी मनके शव म पांच झिन के पहिचान करे ले गेहे।
आबकारी आरक्षक-आवेदन
छत्तीसगढ़ व्यावसायिक परीक्षा मंडल-व्यापमं कोती ल आबकारी विभाग म आरक्षक के खाली पद म लिखित परीक्षा खातिर ऑनलाइन अर्जी देके काम चार जून ले सुरू होगे हे। छत्तीसगढ़ व्यावसायिक परीक्षा मंडल रईपुर ले मिले जानकारी के मुताबिक ए पद बर सत्ताईस जुलई के परीक्षा राखे जाही। आबकारी आरक्षक परीक्षा बर ऑनलाइन अर्जी देके आखिरी तारीख सत्ताईस जून के संझा पांच बजे तय करे गेहे।
अउ अब मौसम के हाल-
प्रदेस म काली ले मानसून के गतिविधि बाढ़ सकत हे। मौसम विभाग के मुताबिक काली ग्यारह जून के एक-दू जघा म छुटपुट बरसा होय या गरज-चमक के संग छीटा-बौछार होय के संभावना हे। उहें, एक-दू जघा हवा गरेर संग गाज गिरे के चेतावनी दे गेहे। प्रदेस के अधिकतम तापमान म गिरावट आए के दउर सुरू हो सकत हे। मौसम विज्ञानी एच.पी. चंद्रा ह बतईन कि दक्षिण-मानसून मानसून के आगू बढ़े बर चौदह जून ले जरूरी परिस्थिति बनत हे।