आज दिनभर के खबर ल अपन गुरतुर छत्तीसगढ़ी भाखा म पढ़व

जवान शहीद-01
सुकमा जिला म आज बिहनिया कोंटा-एर्राबोर रद्दा उपर डोंड्रा के तीर आईईडी विस्फोट के चपेट म आय ले अतिरिक्त पुलिस अधीक्षक आकाश राव गिरपून्जे शहीद हो गेहे। हमर संवाददाता ले मिले जानबा के मुताबिक माओवादी मन डहार ले गाड़ी जलाय के घटना के जांच बर कोंटा के अतिरिक्त पुलिस अधीक्षक आकाश राव, कांटा के उप पुलिस अधीक्षक भानूप्रताप चंद्राकर, निरीक्षक सोनल गवला अउ आने जवान मनके संग पैदल सर्चिंग बर निकले रिहीन। इही दौरान माओवादी मन डहार ले पहिली ले लगाय गे आईईडी म बिस्फोट होगे, जेमा पुलिस बल के अधिकारी मन घायल होगे। जम्मों घायल मन ल सुरूआती उपचार बर कोंटा स्थित अस्पताल लाय गीस, जिहां इलाज के दउरान आकाश राव के मउत होगे। उहें, आने घायल अधिकारी भानूप्रताप चंद्राकर अउ निरीक्षक सोनल गवला ल इलाज बर रायपुर लाय गे हे।
सुकमा म सहीद अतिरिक्त पुलिस अधीक्षक आकाश राव ह रायपुर जिला के रहइया हरय। दू हजार तेरह बैच के डीएसपी रिहीन। ओमन बछर दू हजार चौबीस ले कोंटा के अतिरिक्त पुलिस अधीक्षक के रूप म सेवा देवत रिहीन। ओमन मोहला-मानपुर अउ सुकमा जइसन माओवाद प्रभावित जघा म अपन सेवा दीन।
राज्यपाल रमेन डेका, मुख्यमंत्री विष्णुदेव साय के संगेसंग उपमुख्यमंत्री विजय शर्मा ह एएसपी आकाश राव के सहादत उपर गहरा दुख व्यक्त करे हे। ओमन घायल मनके जल्दी बने होय के कामना करे हे। मुख्यमंत्री ह किहीन हे कि प्रदेस म नक्सली मनके खिलाफ कार्रवाई म सुरक्षाबल मन ल सरलग सफलता मिलत हे। एखरे सेति घुस्साके नक्सली मन ह अइसन कायराना काम करत हे। मुख्यमंत्री ह किहीन कि छत्तीसगढ़ ले माओवादी मन के नामो निसान मिटा दे जाही।

जवान शहीद-02

उहें, बस्तर रेंज के पुलिस महानिरीक्षक सुंदरराज पी. ह घटना उपर दुख जतावत किहीन कि ए बेरा माओवादी संगठन ह कमजोर हो गेहे। इंखर मन म सोज्झे सुरक्षाबल मनले लड़े के हिम्मत नइ हे। एखरे सेति माओवादी मन ह हमर जवान मन ल आईईडी बिस्फोट करे के काम करत हे।

प्रधानमंत्री-11 साल

प्रधानमंत्री नरेंद्र मोदी ह किहीन हे कि एक सौ चालीस करोड़ भारतीय मनके आसिर्वाद अउ सामूहिक भागीदारी ले देस ह पाछू ग्यारा बछर म कतकोन क्षेत्र म तेजी ले बदलाव देखे हे। सोसल मीडिया पोस्ट म ओमन किहीन कि सबका साथ, सबका विकास, सबका विश्वास, सबका प्रयास, के सिध्दांत ल लेके एनडीए सरकार ह तेजी ले जरूरी बदलाव करे हे। प्रधानमंत्री ह लोगन मन ल भारत के विकास यात्रा ल जाने बर नमो एप म देखाय गे वीडियो, इंफोग्राफिक्स अउ आलेख जइसन विधा के माध्यम ले जुड़े बर केहे हे।

केंद्र-11 साल/छत्तीसगढ़

सेवा, सुशासन अउ गरीब कल्याण के सिध्दांत ले प्रेरित होके भारत ह एक दसक म कतकोन बदलाव करे हे। आकाशवाणी समाचार ह आपमन बर पाछू ग्यारा साल म परमुख क्षेत्र मन म सरकार के प्रयास उपर एक ठिन बिसेस फीचर लेके आय हे। नारी सक्ति के यात्रा उपर माईलोगिन मन ल जिनगी के हर क्षेत्र म मजबूत बनाय जात हे। पाछू दसक म महिला सशक्तिकरण कोति भारत के दृष्टिकोण म बदलाव आय हे। छत्तीसगढ़ के सामाजिक कार्यकर्ता पद्मश्री शमशद बेगम ह किहीन कि केंद्र सरकार ह ग्यारा साल म माईलोगिन मन ल सशक्त बनाय वाले नीति ल बढ़ावा देहे।

प्रधानमंत्री-सर्वे

प्रधानमंत्री नरेंद्र मोदी ह जम्मों लोगन मन ले नमो ऐप म भारत के पाछू ग्यारा साल के विकास यात्रा उपर सर्वेक्षण म भाग लेके विनती करे हे। अपन सोसल मीडिया पोस्ट म प्रधानमंत्री ह एक ठिन पोर्टल के लिंक घलो साझा करीन। इंहा कोनो भी मनखे मन पाछू ग्यारा बछर म भारत के विकास यात्रा के बारे  म जनमन सर्वेक्षण म भाग ले सकत हे।

मुख्यमंत्री-चिंतन शिविर

मुख्यमंत्री विष्णुदेव साय ह आज भारतीय प्रबंधन संस्थान आईआईएम नवा रायपुर म मंत्रिमंडल के सदस्य मनके संग योगासन करके चिंतन सिविर के दूसर दिन के सुरूआत करीन। ओमन योग ल स्वस्थ्य जीवनसैली के आधार बतावत किहीन कि योग ह सिरिफ सरीर ल स्वस्थ्य रखे के संगेसंग मन ल सांत करथे अउ हमन ल प्रकृति के अउ जादा तीर लाथे। चिंतन सिविर म आज सुशासन अउ कुशल नेतृत्व के गोठबात होय के बाद आज मुख्यमंत्री ह समापन के घोसना करीन।

विकसित कृषि संकल्प अभियान

विकसित कृषि संकल्प अभियान के तहत ए बेरा छत्तीसगढ़ के कतकोन जघा म कृषि वैज्ञानिक के टीम मन ह किसान मनले सोज्झे गोठबात करत हे। रायपुर स्थित इंदिरागांधी कृषि विश्वविद्यालय के कृषि वैज्ञानिक मनोज कुमार साहू ह बतइन कि विकसित कृषि संकल्प अभियान के तहत कृषि वैज्ञानिक के टीम ह आज रायपुर जिला के गांव पथरी पहुंंचिन। जिहां किसान मन ल खरीफ फसल के उत्पादन ले जुड़े नवा जानकारी अउ नवाचार के बारे म बतइन।

बिरसा मुंडा-पुण्यतिथि

आज भगवान बिरसा मुंडा के एक सौ पच्चीसवां पुण्यतिथि हरय। ओमन ल धरती आबा के नांव ले जाने जाथे। बिरसा मुंडा ह सोसनकारी औपनिवेसिक व्यवस्था के खिलाफ आंदोलन के अगुवई करीन अउ जनजातीय समुदाय मनके अधिकार बर लड़ई लड़िन। प्रधानमंत्री नरेंद्र मोदी ह आज स्वतंत्रता संग्राम के महान नायक बिरसा मुंडा के सहीदी दिवस के मउका म श्रध्दांजलि दीन।
त ऐति, मुख्यमंत्री विष्णुदेव साय ह घलो ओमन ल विनम्र श्रध्दांजलि अर्पित करे हे।

आईआईटी भिलाई-एमओयू

भारतीय प्रौद्योगिकीय संस्थान आईआईटी भिलाई अउ जर्मनी के यूनिवर्सिटी ऑफ सिगेन ह अंतर्राष्ट्रीय सेंसर रिसर्च हब सुरू करे बर आज एमओयू उपर दस्तखत करीन। समझौता ज्ञापन समारोह यूनिवर्सिटी ऑफ सिगेन म ए कारीकरम होइस। ए रणनीतिक साझेदारी सह-शोध, सिक्षा के क्षेत्र म आदान-प्रदान अउ ‘‘सेंसर‘‘ बिसय उपर एक ठिन संयुक्त केंद्र के स्थापना म मदद मिलही। जेला आईआईटी भिलाई म स्थापित करे जाही। ए केंद्र स्वास्थ्य सेवा, स्मार्ट अउ अवसंरचना, पर्यावरण निगरानी जइसन क्षेत्र मन म नवाचार ल बढ़ावा देवइया एक ठिन आधुनिक हब होही।
आईआईटी भिलाई के निदेशक प्रोफेसर राजीव प्रकाश ह किहीन कि ए साझेदारी छात्र अउ सोधकर्ता मन ल वैश्विक दृष्टिकोण, उन्नत अवसंरचना के संगेसंग तकनीकी विसेसज्ञता तक पहुंच देवाही।

वेदमणि सिंह ठाकुर-निधन

चक्रधर सम्मान ले सम्मानित अउ कलागुरू वेदमणि सिंह ठाकुर के आज निधन हो गेहे। ओमन संतानवे बछर के रिहीन। एमन बी.ए., बी.एड. के संगेसंग एम.म्यूजिक, तबला, गायन अउ सितार म बी.म्यूज करे रिहिन। ओमन रायगढ़ के हायर सेकेण्डरी स्कूल म शिक्षक के काम घलो करीन। श्री ठाकुर ह इलाहाबाद, दिल्ली, मुंबई, कोलकाता, भुवनेश्वर, नागपुर अउ उज्जैन जइसन बड़का सहर म अपन प्रस्तुति दीन।
मुख्यमंत्री ह वेदमणि सिंह ठाकुर के निधन उपर दुख व्यक्त करत किहीन कि रायगढ़ के सांस्कृतिक राजधानी के प्रतिष्ठा ल संजो के राखे म इंखर बड़का भूमिका रिहीन। उंखर कला, साधना अउ व्यक्तित्व के छाया ह देस के सांस्कृतिक जिनगी म हर बेरा बने रइही।

अउ अब मौसम के हाल…

मौसम विभाग के मुताबिक एक ठिन उपरी हवा के चक्रीय-चक्रवाती घेरा उत्तर-पश्चिम बंगाल के खाड़ी दक्षिण गंगेटिक पश्चिम बंगाल अउ तटीय ओड़िसा के उपर बने हे। जेखर प्रभाव ले काली प्रदेस के एक-दू जघा म हल्का बरसा या गरज-चमक के संग बूंदाबांदी हो सकथे। उहें, ग्यारा जून ले अधिकतम तापमान म गिरावट सुरू हो जही अउ बरसा होय के संभावना बढ़ जही।