प्रधानमंत्री नरेंद्र मोदी ह देस के किसान मनके कल्याण बर सरकार के प्रतिबध्दता दोहराय हे। एनडीए सरकार के केंद्र म ग्यारा बछर पूरा होय के संदर्भ म श्री मोदी ह किहीन कि ए सरकार बर गौरव के बात आय कि अपन कार्यकाल म देस के परिश्रमी किसान मनके सेवा करे हे। ओमन किहीन कि सरकार ह माटी के स्वास्थ्य अउ सिंचाई जइसे मुद्दा मन उपर बिसेस ध्यान देहे, जउन ह लाभकारी सिध्द होय हे।
विकसित कृषि संकल्प अभियान
विकसित कृषि संकल्प अभियान के तहत ए बेरा म प्रदेस के आने-आने जघा म जाके कृषि वैज्ञानिक मनके टीम किसान मनले सीधा गोठबात करत हे। वैज्ञानिक मनके टीम ह रायपुर बेमेतरा, दुरूग, बालोद, धमतरी, बिलासपुर, महासमुंद अउ बलौदाबाजार जिला के गांव मन म जाके किसान मनले मिलके उंखर समस्या जानिन। ए दउरान किसान मन फसल बीमा रासि नइ मिले, माटी के घटत उपज क्षमता, जल स्त्रोत के कमी महंगा बीज, खाद के उपलब्धता अउ मंडी म न्यूनतम समर्थन मूल्य नही मिले, जलवायु परिवर्तन के प्रभाव अउ तकनीकी जानकारी के कमी के मुद्दा उठाइन। किसान मनके ए समस्या ल वैज्ञानिक मन गंभीरता ले सुनिन।
ए मउका म रायपुर स्थित राष्ट्रीय जैविक स्ट्रेस प्रबंधन संस्थान-आई.सी.ए.आर. के निदेशक डॉक्टर पी.के. राय ह किहीन कि विकसित कृषि संकल्प अभियान के मुख्य उद्देस्य किसान मन ल आत्मनिर्भर बनाना, जलवायु के प्रति संवेदनसील कृषि अपनाय बर प्रेरित करना अउ विज्ञान आधारित सुझाव देके उंखर आय म वुध्दि सुनिश्चित करना हरय।
मुख्यमंत्री-बोधघाट परियोजना
मुख्यमंत्री विष्णुदेव साय ह काली नई दिल्ली म प्रधानमंत्री नरेंद्र मोदी ले बहुउद्देशीय बोधघाट बांध परियोजना अउ इंद्रावती-महानदी इंटरलिंकिंग परियोजना के राष्ट्रीय परियोजना के रूप म निर्माण के संबंध म चर्चा करीन। श्री साय ह किहीन कि बस्तर संभाग के सर्वांगिन विकास के दृष्टि ले ए परियोजना मनके स्वीकृति महत्वपूर्ण हे। ओमन किहीन कि बस्तर संभाग लंबा समय ले माओवाद ले प्रभावित रेहे हे, जेखर सेति सिंचाई साधन के विकास म पिछड़ गेहे। ए समस्या ल दूर करे बर छत्तीसगढ़ सरकार ए परियोजना उपर काम करत हे। मुख्यमंत्री ह किहीन कि ए परियोजना लंबा समय ले इंद्रावती नदी बर प्रस्तावित हे। ए परियोजना ले एक सौ पच्चीस मेगावाट के बिजली उत्पादन अउ मछली उत्पादन जइसे अतिरिक्त रोजगार के अलावा खरीफ अउ रवि फसल ल मिलाके करीब चार लाख हेक्टेयर भूमि म सिंचाई हो सकही। संगेसंग पूरा संभाग म पेयजल के उपलब्धता घलो सुनिश्चित हो सकही। उहेंं, इंद्रावती-महानदी इंटरलिंकिंग परियोजना ले तीन लाख हेक्टेयर ले जादा भूमि म सिंचाई सुविधा उपलब्ध हो सकही।
ए परियोजना मन के अनुमानित लागत उनचास हजार करोड़ रूपिया हे, जेमा इंद्रावती-महानदी इंटरलिंकिंग परियोजना के लागत लगभग बीस हजार करोड़ रूपिया अउ बहुउद्देशीय बोधघाट बांध परियोजना म लगभग उनतीस हजार करोड़ रूपिया के लागत संभावित हे। ए परियोजना ले दंतेवाड़ा, बीजापुर अउ सुकमा जिला के दू सौ उनहत्तर गांव मन ल फायदा मिलही।
मुख्यमंत्री-प्रधानमंत्री मुलाकात
उहें, मुख्यमंत्री ह प्रधानमंत्री संग मुलाकात के दउरान ओमन प्रदेस म चलत विकास के काम अउ नक्सल उन्मूलन अभियान के जानकारी घलो दीन। मुख्यमंत्री ह प्रधानमंत्री ल बतइन कि बस्तर जइसे माओवाद प्रभावित क्षेत्र मन म अब सांति अउ सुरक्षा के माहौल बनत हे, अउ विकास के नवा द्वार खुलत हे। सुरक्षाबल मनके साहस अउ प्रयास ले माओवाद प्रभावित क्षेत्र मन म उल्लेखनीय सुधार देखे बर मिलत हे।
श्री साय ह केंद्र सरकार के ग्यारा बछर सफलतापूर्वक पूरा होय उपर प्रधानमंत्री नरेंद्र मोदी ल सुभकामना दीन। ओमन किहीन कि प्रधानमंत्री श्री मोदी के नेतृत्व नवा भारत के आत्मनिर्भरता अउ सामर्थ्य के प्रतीक आय, जेन ह वैश्विक मंच म मां भारती के मान बढ़ाय हे।
प्रधानमंत्री श्री मोदी ह मुख्यमंत्री डहार ले प्रस्तुत प्रगति रिपोर्ट के सराहना करीन अउ छत्तीसगढ़ के विकास काम ल अउ गति देबर किहीन।
एखर पहिली, मुख्यमंत्री ह केंद्रीय गृह मंत्री अमित शाह ले घलो नई दिल्ली म मुलाकात कर राज्य के विकास अउ नक्सल उन्मूलन के जानकारी दीन।
अमित शाह-अधिकारी मुलाकात
केंद्रीय गृहमंत्री अमित शाह ह हाल ही म नक्सलवाद के खिलाफ चलाय गे अभियान म अहम भूमिका निभइया अधिकारी मनले आज नई दिल्ली म भेंट कर उंखर सफलता बर उनला बधाई दीन। श्री शाह ह किहीन कि केंद्र सरकार नक्सलवाद के समस्या ले देस ल मुक्त कराय बर संकल्पित हे। ए मउका म मुख्यमंत्री विष्णुदेव साय अउ उपमुख्यमंत्री विजय शर्मा उपस्थित रिहीन।
माओवादी-मुठभेड़
बीजापुर जिला म पाछू तीन दिन ले सुरक्षाबल अउ माओवादी मनके बीच जारी मुठभेड़ म सात झन माओवादी मारे गेहे, जेखर शव बरामद कर ले गेहे। एमा दू झन महिला माओवादी घलो सामिल हे। मुठभेड़ म मारे गे माओवादी मनले दू झन के सिनाख्त कर ले गेहे। एमा ले एक करोड़ रूपिया के इनामी माओवादी सेंट्रल कमेटी सदस्य गौतम उर्फ सुधाकर अउ पच्चीस लाख रूपिया के इनामी तेलंगाना राज्य कमेटी के सदस्य भास्कर घलो सामिल हे। उहें, दूसर पांच माओवादी मनके पहिचान करे जात हे। घटनास्थल ले भारी मात्रा म हथियार अउ गोला बारूद के जखिरा बरामद करे गेहे। जेमा दू ठन एके फोर्टि सेवन रायफल घलो सामिल हे।
मिले जानकारी के अनुसार जिला के नेशनल पार्क क्षेत्र म पाछू तीन दिन ले सुरक्षाबल डहार ले नक्सल विरोधी अभियान चलाय जात हे। ए दउरान तीर-तखार के जंगल म जवान मन माओवादी मन के गतिविधि उपर निगरानी रखे हे। आपरेसन के दउरान सुरक्षाबल के कुछ जवान मन ल सर्पदंश, मुधमक्खी के डंक, डिहाइड्रेसन अउ दूसर कारण ले चोट आय हे। उनला जरूरी चिकित्सा सुविधा उपलब्ध कराय गेहे। फिलहाल जवान मनके स्थिति सामान्य अउ खतरा ले बाहिर हे।
कोयला आवंटन-सजा
कोयला ब्लाक आवंटन मामला म नई दिल्ली स्थित सीबीआई के बिसेस अदालत ह मेसर्स जे.ए.एस. इंफ्रास्ट्रक्चर कैपिटल प्राइवेट लिमिटेड अउ उंखर निदेसक मनोज कुमार जायसवाल ल दोषी ठहराय हे। सीबीआई डहार ले जांच करे गे कोयला ब्लाक आवंटन मामला म ए उन्नीसवीं सजा होही। ए मामला म आरोपी मेसर्स जे.ए.एस. इंफ्रास्ट्रक्चर कैपिटल प्राइवेट लिमिटेड के प्रमोटर मन कंपनी के वित्तीय नेटवर्क के बारे म झूठा अउ भ्रामक दावा करे रिहीन अउ कोयला ब्लाक के आवंटन ल हासिल करे के उद्देस्य ले वित्तीय संस्थान मन डहार ले ऋण के मूल्यांकन अउ सिंडिकेशन ल गलत तरीका ले प्रस्तुत करे रिहीन। अदालत ह ए मामला म तीन झन सरकारी कर्मचारी मन ल बरी कर देहे। सजा के अवधि उपर आठ जुलाई के बहस होही।
ईद-उल-अजहा
ईद-उल-अज़हा आज छत्तीसगढ़ समेत देस के आने-आने भाग म मनाय जात हे। त्याग अउ बलिदान के ए तिहार म मुस्लिम समुदाय के लोगन मन ईदगाह अउ मस्जिद म बिसेस नमाज अदा करीन। ईद-उल-अज़हा हजरत इब्राहिम डहार ले खुदा के आदेस के पालन करत हुए अपन इकलौता बेटा के कुर्बानी दे के याद म मनाय जाथे।
राष्ट्रपति द्रौपदी मुर्मू, उपराष्ट्रपति जगदीप धनखड़ अउ प्रधानमंत्री नरेंद्र मोदी ह देस-विदेस म रहइया भारतीय मन ल ईद-उल-अज़हा के सुभकामना देहे। उहें, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह घलो प्रदेसवासी मन ल ईद-उल-अज़हा के मुबारकबाद देहे।
सौरभ साहू-स्वर्ण पदक
आंध्रप्रदेस के मछलीपट्नम म आयोजित तीसरइयां राष्ट्रीय सी-कयाकिंग प्रतियोगिता म छत्तीसगढ़ के सौरभ साहू ह दू स्वर्ण पदक जीते हे। आज होय प्रतियोगिता म सौरभ साहू ह सी-कयाक के-वन श्रेणी के पांच सौ मीटर अउ दू किलोमीटर म दू स्वर्ण पदक हासिल करीन। सौरभ साहू के ए उपलब्धि उपर छत्तीसगढ़ प्रदेस कयाकिंग केनोइंग एसोसिएशन के अध्यक्ष बलदेव सिंह भाटिया अउ आने पदाधिकारी मन उनला बधाई दीन। ए प्रतियोगिता पांच ले आठ जून तक आयोजित करे जात हे।