प्रधानमंत्री नरेंद्र मोदी ह जम्मू-कश्मीर म दुनिया के सबले ऊंचा रेलवे आर्क ब्रिज, चिनाब पुल अउ उधमपुर-श्रीनगर-बारामूला रेल लिंक म भारत के पहिली केबल आधारित रेल ब्रिज, अंजी पुल के आज उद्घाटन करीन। ए मउका म प्रधानमंत्री ह किहीन कि कश्मीर ले कन्याकुमारी तक देस अब रेलवे नेटवर्क ले जुड़ गेहे। एखर अलावा ओमन छियालीस हजार करोड़ रूपिया ले जादा के लागत वाला कई ठिन विकास परियोजना मनके शिलान्यास, उद्घाटन अउ लोकार्पण करीन।
चिनाब पुल के निर्माण बर स्टील अथॉरिटी ऑफ इंडिया लिमिटेड-ले सोलह हजार मीट्रिक टन स्टील के आपूर्ति करे गीस। जेमा दुरूग के भिलाई इस्पात संयंत्र निर्मित स्टील सामिल हे। भिलाई इस्पात संयंत्र के महाप्रबंधक जनसंपर्क अमूल प्रियदर्सी ह आकाशवाणी समाचार ल बतइन कि चिनाब नदी म बने विश्व के सबले ऊंचा पुल म भिलाई इस्पात संयंत्र के बारा हजार चार सौ मीट्रिक टन ले जादा स्टील लगे हे। एमा स्ट्रक्चर प्लेट अउ टीएमटी बार जइसे उत्पाद सामिल हे। ओमन किहीन कि भिलाई इस्पात संयंत्र के हरेक कार्मिक बर ए गर्व अउ खुसी के क्षण हे।
प्रधानमंत्री-ग्यारह वर्ष
प्रधानमंत्री नरेंद्र मोदी ह भारत के युवा मनके वैश्विक उपलब्धि के उल्लेख करत आज किहीन कि देस के युवा मन ह विश्व म अपन छाप छोड़े हे। केंद्र म राष्ट्रीय जनतांत्रिक गठबंधन के सरकार के ग्यारा साल पूरा करे के मउका म श्री मोदी ह युवा मन ल गतिसीलता, नवाचार अउ दृढ़ इच्छासक्ति के प्रतीक बतइन। ओमन किहीन कि पाछू ग्यारा साल म देस के विकास युवा मनके दृढ़ विश्वास अउ असाधारण ऊर्जा सक्ति ले प्रेरित हे।
वक्फ पोर्टल-शुभारंभ
केंद्रीय अल्पसंख्यक कार्य मंत्री किरेन रिजीजू ह आज नई दिल्ली म उम्मीद केंद्रीय पोर्टल के सुभारंभ करीन। ए पोर्टल ल नवा वक्फ संपत्ति के पंजीकरण, वक्फ विवरण दाखिल करना, औकाफ के रजिस्टर के रखरखाव अउ वक्फ के मुतवल्ली डहार ले खाता मनके रखरखाव प्रस्तुत करे समेत आने-आने उद्देस्य के पूर्ति बर स्थापित करे गेहे। ए मउका म श्री रिजीजू ह किहीन कि उम्मीद केंद्रीय पोर्टल वक्फ संपत्ति प्रबंधन अउ प्रसासन म पारदर्सिता लाही।
माओवादी-मुठभेड़
बीजापुर जिला के नेशनल पार्क इलाका म सुरक्षाबल अउ माओवादी मनके बीच आज फेर मुठभेड़ होइस। एमा तेलंगाना स्टेट कमेटी के पच्चीस लाख रूपिया के इनामी माओवादी नेता मारे गेहे। एखर पहिचान तेलंगाना स्टेट कमेटी के इनामी माओवादी भास्कर के रूप म करे गेहे। घटना स्थल ले माओवादी के शव के संघरा एक ठिन एके- फोर्टिसेवन बरामद करे गेहे।
बतादन कि काली होय मुठभेड़ म एक करोड़ के इनामी माओवादी सुधाकर इही जघा मारे गे रिहीस।
इही बीच, दंतेवाड़ा जिला म आज सात झिन माओवादी मन पुलिस के आगू आत्मसमर्पण कर दीन हे। एमा ले दू माओवादी मन उपर एक लाख रूपिया के इनाम घोसित रिहीस। ए माओवादी मन दंतेवाड़ा के उपमहानिरीक्षक कमलोचन कश्यप, पुलिस अधीक्षक गौरव राय समेत कई झन वरिष्ठ अधिकारी मनके आगू आत्मसमर्पण करीन हे। आत्मसमर्पण करइया जम्मों माओवादी मन ल पुनर्वास नीति के तहत पचास-पचास हजार रूपिया के सहायता रासि दे जाही।
उहें, कांकेर जिला म सुरक्षा बल ह एक झिन माओवादी ल गिरफ्तार करे हे। मिले जानकारी अनुसार बीएसएफ अउ जिला पुलिस बल के संयुक्त टीम ह घेराबंदी करके एक झिन संदिग्ध मनखे ल बिनागुण्डा ले गिरफ्तार करीस। पूछताछ के दउरान ए ह ग्राम झारावार के आगू पहाड़ी करा पुलिस अउ नक्सली मुठभेड़ म सामिल होना कबूल करीस। आरोपी ह अपन नांव राजू नुरेटी बतइस अउ एखर उपर पांच लाख रूपिया के इनाम घोसित रिहीस।
सुप्रीम कोर्ट-नीट परीक्षा
सर्वोच्च न्यायालय ह राष्ट्रीय परीक्षा बोर्ड ल नीट पीजी दू हजार पच्चीस के परीक्षा तीन अगस्त के एक पाली म आयोजित करे के अनुमति दे देहे। एखर पहिली ए परीक्षा पंद्रह जून के निर्धारित रिहीस, लेकिन बोर्ड ह परीक्षा आयोजित करे बर दू महिना ले जादा समय के मांग करे रिहीस। बोर्ड ह तीन जून के समय बढ़ाय के मांग करत एक ठिन आवेदन दायर करे रिहीस, जेमा कहे गीस कि ओला परीक्षा केंद्र के संख्या दुगुना अउ सुरक्षा व्यवस्था के इंतेजाम करे के जरूरत हे। सर्वोच्च न्यायालय ह ए स्पष्ट कर देहे कि नीट-पीजी दू हजार पच्चीस के परीक्षा आयोजित करे बर बोर्ड ल एखर बाद अउ समय नइ दे जाही।
विकसित कृषि संकल्प अभियान
विकसित कृषि संकल्प अभियान के तहत ए दिन म प्रदेस के आने-आने जघा म जाके कृषि वैज्ञानिक के टीम किसान मनले सीधा गोठबात करत हे। रायपुर स्थित राष्ट्रीय जैविक स्ट्रेस प्रबंधन संस्थान आई.सी.ए.आर. के वरिष्ठ वैज्ञानिक डॉक्टर विनोद कुमार चौधरी ह आकाशवाणी समाचार ल बतइन कि अभियान के तहत कृषि वैज्ञानिक के टीम किसान मन ल ए जानकारी देत हे कि सीमित संसाधन म आमदनी कइसे बढ़ाय जाय।
बातों-बातों में
प्रादेसिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ ए बखत केंद्र सरकार डहार ले चलाय जात विकसित कृषि संकल्प अभियान उपर केंद्रित रइही। एखर प्रसारण काली सात जून के एफएम चैनल म बिहनिया नौ बजे ले करे जाही। उहें, प्रायमरी चैनल म ए कारीकरम के प्रसारण बिहनिया साढ़े दस बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
राज्यपाल-टीबी मरीज सहायता
राज्यपाल रमेन डेका ह मोहला-मानपुर-अंबागढ़-चौकी जिला के दस झिन टीबी मरीज मन बर पौष्टिक आहार उपलब्ध कराय बर साठ हजार रूपिया के आर्थिक सहायता प्रदान करीन हे। ए सहायता रासि ओमन अपन स्वेच्छानुदान मद ले दीन हे, जेखर ले मरीज मनके स्वास्थ्य म सुधार म मदद मिलही। हरेक मरीज ल प्रति माह पांच सौ रूपिया के मान ले एक बछर तक सहायता दे जाही।
उल्लेखनीय हे कि पहिली राज्यपाल ह मनेन्द्रगढ़-चिरमिरी-भरतपुर, दंतेवाड़ा, बिलासपुर, कोरिया अउ सारंगढ़-बिलाईगढ़ जिला के दस-दस झिन टीबी मरीज मन बर कुल तीन लाख रूपिया के सहायता रासि स्वीकृत करे रिहीन।
सर्वदलीय प्रतिनिधिमंडल-दौरा
इही बीच, भाजपा के सांसद रविशंकर प्रसाद के अगुवई म सर्वदलीय प्रतिनिधिमंडल जर्मनी पहुंचे हे। जर्मनी म भारत के राजदूत अजीत गुप्ते ह प्रतिनिधिमंडल के सुवागत करीन। चर्चा म भारत-जर्मनी के संबंध उपर अवलोकन सामिल रिहीस। ए चर्चा म रणनीतिक साझेदारी के विस्तार करे अउ व्यापार अउ निवेस, रक्षा, विज्ञान, प्रौद्योगिकीय अउ मोबिलिटी म सहयोग बढ़ाय बर धियान केंद्रीत करे गीस।
आतंकवाद के विरूध्द भारत के कड़ा रूख के संदेस लेगइया सात ठिन प्रतिनिधिमंडल म ले पांच प्रतिनिधिमंडल आने-आने देस के सफल यात्रा करे के बाद भारत लहुट चुके हे।
राष्ट्रीय आम महोत्सव
रायपुर के इंदिरा गांधी कृषि विश्वविद्यालय म आज ले तीन दिवसीय के राष्ट्रीय आम महोत्सव सुरू हो गेहे। ए महोत्सव उद्यानिकी विभाग अउ प्रक्षेत्र वानिकी, छत्तीसगढ़ शासन अउ प्रकृति की ओर सोसायटी डहार ले आयोजित करे जात हे। एमा छत्तीसगढ़ के संग आने-आने राज्य मनके आम उत्पादक सामिल होवत हे। आम के दू सौ ले जादा कीसम अउ आम ले बने छप्पन व्यंजन के प्रदर्सन करे जावत हे। एखर संगेच कारीकरम म आम के आने-आने किसम के प्रतियोगिता घलो आयोजित करे जात हे।
अउ अब थोरकुन समाचार सार म –
– एंटी करप्शन ब्यूरो-एसीबी के टीम ह कोंडागांव जिला म नायब तहसीलदार दिनेश ठाकुर ल पंद्रह हजार रूपिया रिस्वत लेत हुए गिरफ्तार करे हे।
– काली बकरीद के परब प्रदेस भर म धार्मिक श्रध्दा के संग मनाय जाही। राज्यपाल रमेन डेका ह प्रदेसवासी मन ल सुभकामना दीन हे।
– महासमुंद पुलिस ह दु अतंर्राज्यीय तस्कर ल गिरफ्तार करे हे। एमन करा ले छत्तीस लाख रूपिया कीमत के दू कुंटल चालीस किलो गांजा जब्त करे गेहे।