आज विश्व पर्यावरण दिवस हरय। ए दिन बिसेस म राष्ट्रपति द्रौपदी मुर्मू, उपराष्ट्रपति जगदीप धनखड़ अउ प्रधानमंत्री नरेन्द्र मोदी ह लोगन मन ले पृथ्वी के रक्षा करे के अपील करीन। एसो विश्व पर्यावरण दिवस के थीम ह ‘‘प्लास्टिक प्रदूषण समाप्त करें‘‘ राखे गेहे।
विश्व पर्यावरण दिवस म राजधानी रायपुर समेत जगह-जगह म कतकोन कार्यक्रम कराय जात हे। राज्यपाल रमेन डेका ह आज राजभवन परिसर, नवा रायपुर म बनत राजभवन परिसर म पौधा लगईन। ए बेरा म ओमन ह सबो मन ले अपील करीन हे कि जादा ले जादा पेड़ लगावय अउ पर्यावरण ल सुरक्षित राखे म योगदान देवय।
ऐति, कांकेर म काम करत सीमा सुरक्षा बल फ्रंटियर मुख्यालय भिलाई म आज विश्व पर्यावरण दिवस मनाय गीस। भिलाई के सीमा सुरक्षा बल के महानिरीक्षक आनंद प्रताप सिंह ह पौधा लगाके ए अभियान के सुरूवात करीन। ए बेरा म सुरक्षा बल मन ह पांच सौ फलदार अउ छायादार पौधा लगईन।
उहें, एनटीपीसी अउ सेल के संयुक्त उपक्रम-एन.एस.पी.सी.एल. ह विश्व पर्यावरण दिवस म कतकोन कार्यक्रम करीन। एनएसपीसीएल के महाप्रबंधक नील कुमार शर्मा के नेतृत्व म जन-जागरूकता रैली के घलो आयोजन करे गीस, जेखर चलत संयंत्र अउ तीर-तखार के जघा म वृक्षारोपण अभियान चलाय गीस। महाप्रबंधक श्री शर्मा ह बतईन कि पर्यावरण संरक्षण बर सबो ल मिलजुल के काम करना चाही।
विकसित कृषि संकल्प अभियान
विकसित कृषि संकल्प अभियान के चलत राष्ट्रीय जैविक स्ट्रेस प्रबंधन संस्थान-आई.सी.ए.आर. रायपुर कोति ले उनतीस मई ले तीन जून तक राज्य के कतकोन जिला सघन ग्रामीण संपर्क कार्यक्रम चलाय गीस। आई.सी.ए.आर. अउ एन.आई.बी.एस.एम. के निदेशक डॉक्टर पीके राय ह आज रईपुर म पत्रकार मन ले गोठ करत हुए बतईन कि ए अभियान ह पच्चीस ठिन कृषि विज्ञान केन्द्र अउ राज्य कृषि विभाग के सहयोग ले चलाय गीस। ए अभियान म संस्थान के बीस झन वैज्ञानिक मनके टीम ह दस जिला के पच्चीस विकासखंड के उनचास गांव के दौरा करत हुए चार हजार ले जादा किसान मन ले गोठ करीन। ए बेरा म वैज्ञानिक मन ह किसान मन ल जैविक स्ट्रेस प्रबंधन, बीजा के उपचार, माटी के परीक्षण, जैव उर्वरक, जैव कीटनाशक अउ जैव नियंत्रण के एजेंट मनके उपयोग जइसे कतकोन तकनीक के प्रसिक्षण दे गीस। संगेसंग किसान मन ल अच्छा कीसम के बीजा के चयन, धान म एकीकृत कीट प्रबंधन, प्राकृतिक खेती ल अपनाय अउ माटी के स्वास्थ्य प्रबंधन के कतकोन विधि के बारे म बताके घलो जागरूक करे गीस। एखर अलावा केंद्र अउ राज्य सरकार के कतकोन योजना के जानकारी ह घलो किसान मन ल दे गीस। ताकि ओमन ह बीजा, बीमा, उपकरण ले जुड़े सहायता के लाभ ले सकय।
प्रधानमंत्री गरीब कल्याण
प्रधानमंत्री नरेंद्र मोदी ह अपन सरकार ल सहानुभूति ले परिपूर्ण अउ गरीब कल्याण बर समर्पित बतइन हे। श्री मोदी ह राष्ट्रीय जन तांत्रिक गठबंधन सरकार के ग्यारा बछर पूरा होय म लोगन मन ल गरीबी ले उबारे बर केंद्र सरकार के सशक्तिकरण, मजबूत बुनियादी ढांचा अउ समावेसन के दिसा म होय काम के उल्लेख करीन। श्री मोदी ह सोसल मीडिया म पोस्ट म लिखिन कि पीएम आवास योजना, पीएम उज्जवला योजना, जन-धन योजना अउ आयुष्मान भारत जइसे कतकोन पहल ह आवास, खाना पकाय के स्वच्छ ईंधन, बैंकिंग अउ स्वास्थ्य सेवा तक पहुंचाय ल बढ़ावा देहे। ओमन ह किहीन हे कि प्रत्यक्ष लाभ हस्तांतरण, डिजीटल समावेसन अउ मजबूत ग्रामीण बुनियादी ढांचा ह पारदर्सिता के संग लाभ पहुंचाय हे। श्री मोदी ह गरीबी ल हराय म पच्चीस करोड़ ले जादा लोगन मनले मदद करे म ए पहल के भूमिका उपर जोर दीन हे। ओमन ह समावेसी अउ आत्मनिर्भर भारत बनाय बर सरकार के प्रतिबध्दता ल दोहराइन हे, जिंहा हर लोगन मन ल सम्मान के संग जिये के मउका मिल सकय।
सर्वदलीय प्रतिनिधि मंडल
कांग्रेस सांसद शशि थरूर के नेतृत्व म बहुदलीय प्रतिनिधि मंडल ह अमेरिका म आने-आने नेता, वरिष्ठ अधिकारी अउ भारतीय समुदाय के संग कतकोन बइठका के चलत आतंकवाद के खिलाफ भारत के दृढ़ रूख ल मजबूती ले आगू राखे हे। श्री थरूर ह वाशिंगटन म अमेरिकी कांग्रेस के विदेस मामला के समिति के शीर्ष नेतृत्व के संग बइठका के बाद किहीन कि आतंकवादी हमला के निंदा करे अउ भारत के आत्मरक्षा के अधिकारी के मुद्दा म सबो ह पूरा तरीका ले सहमति दे हे।
ऐति, समिति के अध्यक्ष ब्रायन मास्ट ह आतंकवादी हमला के निंदा करीन अउ किहीन कि अइसना हमला बर दुनिया म कोनो जघा नइ हे।
माओवादी मुठभेड़
बीजापुर जिला म माओवादी मनके संग होय मुठभेड़ म सुरक्षाबल मन ह माओवादी मनके सेंट्रल कमेटी के सदस्य नरसिम्हा-चलम उर्फ गौतम उर्फ सुधाकर ल मार गिराइन हे। डीआईजी कमलोचन कश्यप ह बतइन कि ए माओवादी मन उपर तीन राज्य ल मिलाके एक करोड़ रूपिया के इनाम घोसित रिहीस। मारे गे माओवादी सुधाकर ह माओवादी मनके शिक्षा विभाग के प्रभारी रिहीस। उहें, आंध्र प्रदेस के चिंतापालुदी गांव के रहइया रिहीस, अउ पाछू तीन दसक ले नक्सल गतिविधि म सक्रिय रिहीस।
श्री कश्यप ह बतइन कि बीजापुर के माड़ क्षेत्र के अंदरूनी जघा म माओवादी मनके रहय के सूचना मिले म नारायणपुर-बीजापुर अउ दंतेवाड़ा जिला के डिस्ट्रिक्ट रिजर्व गार्ड-डीआरजी के संयुक्त टीम ह आपरेसन चलाइन। जवान मन ह बिहनिया ले ही माओवादी मनके घेराबंदी सुरू कर दे रिहीन। जेखर बाद होय मुठभेड़ म सुरक्षा बल मन ल ए सफलता मिले हे। डीआईजी ह बतइन कि ए जघा म सर्चिंग अभी भी चलत हे घटना वाले जघा ले एक ठिन ऑटोमेटिक रायफल ल जब्त करे गेहे।
राज्यपाल-गरियाबंद
राज्यपाल रमेन डेका ह गरियाबंद जिला के मड़वाडीह गांव ल गोद लेके अच्छा पहल करीन हे, जेखर चलत राज्यपाल ह आज मड़वाडीह गांव पहुंच के लोगन मन ले भेंट करीन। ओमन ह इहां जनसभा ल संबोधित करत हुए गांव के विकास बर ग्रामीण मन ल आश्वस्त करीन। ए बेरा म राज्यपाल ह मड़वाडीह म ‘‘एक पेड़ मां के नाम‘‘ अभियान के चलत आमा के पौधा लगईन अउ लोगन मन ल वृक्षारोपण बर प्रेरित करीन। ए बेरा म राज्यपाल ह रेडक्रास के यूथ वालिंटियर अउ स्वच्छता दीदी मन ले घलो भेंट करीन।
सशस्त्र सेना-भित्ति चित्र
उपमुख्यमंत्री विजय शर्मा ह आज रईपुर के सैनिक कल्याण संचालनालय परिसर म भारतीय सशस्त्र सेना के शौर्य अउ कतकोन ऐतिहासिक काम ल दिखाय वाले नवा बने भित्ति चित्र के लोकार्पण करीन। ए बेरा म श्री शर्मा ह किहीन कि ए भित्ति चित्र ह भारतीय सेना, नौसेना अउ वायुसेना के गौरवसाली योगदान ल दिखाथे। ओमन ह किहीन हे कि ए चित्र ह न सिरिफ परिसर के सोभा ल बढ़ाथे बल्कि जवान लइका मन बर प्रेरणा के स्त्रोत घलो हवय, जउन कि ओमन ल भारतीय सशस्त्र सेना म सामिल होय बर प्रोत्साहित करही। एखर बाद श्री शर्मा ह संचालनालय परिसर म स्थित कल्याण बाग म पउधा घलोक लगाइन।
महिला आयोग-जनसुनवाई
राष्ट्रीय महिला आयोग के अध्यक्ष विजया रहाटकर ह अपन एक दिवसीय छत्तीसगढ़ प्रवास के चलत आज रईपुर म महिला प्रकरण के जनसुनवाई करीन। एखर बाद पत्रकार मन ले गोठ करत ओमन किहीन कि आज आयोग कोति ले छत्तीसगढ़ के चालीस ठिन प्रकरण के सुनवाई करे गेहे, जेमा पारिवारिक विवाद, दुष्कर्म अउ कुछु आने संवेदनसील मामला सामिल हरय। ओमन ह बतईन कि राष्ट्रीय महिला आयोग के अध्यक्ष के प्रभार ग्रहण करे के बाद ओमन ह पहिली घांव छत्तीसगढ़ के दउरा म आय हे।
अपन प्रवास के दउरान ओमन ह मुख्यमंत्री विष्णुदेव साय अउ पुलिस महानिदेशक अरूण देव गौतम ले घलो प्रदेस म महिला सुरक्षा ल लेके गोठ करीन।
अंतर्राष्ट्रीय योग दिवस
अंतर्राष्ट्रीय योग दिवस ल मनाय बर हमन आपमन ल एक ठिक आकर्षक जिंगल बनाय बर आमंत्रित करत हन। अपन संगीत के माध्यम ले योग के संदेस देवत हुए ए महान अभियान के हिस्सा बनव। एखर बर आपमन ल नगद पुरस्कार घलो मिल सकत हे। जादा जानकारी बर आपमन ‘‘माय जीओवी डॉट इन‘‘ म विजिट कर सकत हव।