कैबिनेट मंत्री विजय शर्मा ह बतईन कि मंत्रिपरिषद ह छत्तीसगढ़ राज्य के कला अउ संस्कृति ल बढ़ावा दे बर कलाग्राम के स्थापना बर नवा रायपुर म संस्कृति विभाग ल दस एकड़ भूमि निःशुल्क आवंटित करे के निर्णय लेहे। उहें, नवा रायपुर म राष्ट्रीय स्तर के तीरंदाजी अकादमी के स्थापना बर खेल अउ युवा कल्याण विभाग ल तेरह एकड़ ले जादा के भूमि निःशुल्क आवंटित करे के प्रस्ताव ल मंजूरी दे गेहे।
मंत्रिपरिषद ह राज्य के निम्न अउ मध्यम वर्गीय परिवार मन ल सहर म किफायती अउ सस्ता भूखंड उपलब्ध कराय बर छत्तीसगढ़ किफायती जन आवास नियम के अनुमोदन करे हे। श्री शर्मा ह बतईन कि प्रदेस म युवा कल्याण के आने-आने क्षेत्र म उल्लेखनीय कार्य करइया मनखे अउ संगठन ल सम्मानित करे बर छत्तीसगढ़ युवा रत्न सम्मान योजना सुरू करे के निर्णय ले गेहे।
उहें, खेल अउ युवा कल्याण विभाग के अंतर्गत कोच के पद म भर्ती बर राष्ट्रीय क्रीडा संस्था पटियाला ले प्रसिक्षक के डिप्लोमा के मापदंड ल एक वित्तीय बछर बर सिथिल करे के निर्णय ले गेहे। एखर संगेसंग मंत्रिपरिषद ह ग्रामीण अउ आदिवासी बहुल क्षेत्र म पर्यटन ल बढ़ावा दे अउ स्थानीय लोगन ल रोजगार के नवा अवसर प्रदान करे बर ‘‘छत्तीसगढ़ होमस्टे नीति‘‘ के अनुमोदन करे हे। उहें, मंत्रिपरिषद ह कुछेक ग्राम पंचायत के नाव बदले के निर्णय घलो लेहे।
प्रधानमंत्री-योग
प्रधानमंत्री नरेन्द्र मोदी ह ए बछर योग दिवस के प्रति लोगन म उछाह देखके खुसी जताय हे। सोशल मीडिया पोस्ट म श्री मोदी ह कहिन कि योग ल लोकप्रिय बनाय बर आंध्रप्रदेश के लोगन के योगांध्र एक ठिन सराहरीय प्रयास हरय। प्रधानमंत्री ह लोगन ले योग दिवस मनाय अउ योग ल अपन जीवन म नियमित रूप ले अपनाय के आह्वान करीन हे।
संसद-मानसून सत्र
संसद के मानसून सत्र इक्कीस जुलाई ले सुरू होही। विपक्षी पार्टी डहार ले ऑपरेसन सिंदूर उपर संसद म चर्चा बर विशेष सत्र बुलाय के मांग ल देखत सरकार ह ए निर्णय लेहे। संसदीय कार्यमंत्री किरेन रिजिजू ह पत्रकार मन ले गोठबात म कहिन कि संसद के मानूसन सत्र बारह अगस्त के संपन्न होही।
सर्वदलीय प्रतिनिधिमंडल-दौरा
आतंकवाद के खिलाफ भारत के दृढ़ रूख के संदेस लेके दुनियाभर के देश मन म गे सात बहुदलीय प्रतिनिधिमंडल म ले चार सफल यात्रा के बाद अपन देस आगे हे। शिवसेना सांसद श्रीकांत शिंदे के नेतृत्व म प्रतिनिधिमंडल संयुक्त अरब अमीरात, लाइबेरिया, कांगो गणराज्य अउ सिएरा लियोन के दउरा के बाद आज बिहनिया भारत लहुटीन।
इही बीच, कांग्रेस सांसद शशि थरूर के नेतृत्व म सर्वदलीय प्रतिनिधिमंडल वाशिंगटन डीसी म अमेरीकी कांग्रेस अउ प्रसासन के सदस्य, विचारक, मीडिया अउ नीति निर्माता ले मिलके ओमन ऑपरेसन सिंदूर अउ आतंकवाद के विरूद्ध भारत के रूख के बारे म जानकारी दीहीं।
उहें, भाजपा सांसद रविशंकर प्रसाद के नेतृत्व म प्रतिनिधिमंडल वर्तमान म बेल्जियम के ब्रुसेल्स म यूरोपीय संघ मुख्यालय के दउरा म हे।
वार्षिक हज यात्रा
भारत संग दुनियाभर ले लगभग अट्ठारह लाख हजयात्री आज ले सुरू होय पांच दिन के वार्षिक हज यात्रा बर सऊदी अरब के मीना म एकत्रित होवत हे। ए लोगन मन ह पवित्र सहर मक्का ले अपन यात्रा सुरू करीन। हजयात्री आज रतिहा मीना म रूकही अउ काली बिहनिया हज के मुख्य रस्म अदा करे बर अराफात के मैदान जाही। भारतीय हजयात्री ‘‘हज सुविधा‘‘ मोबाइल ऐप्लीकेशन अउ समर्पित टोल-फ्री नंबर के माध्यम ले सहायता प्राप्त कर सकत हे।
कृषि मंत्री-खाद/बीज
कृषि मंत्री रामविचार नेताम ह प्रदेस म नकली खाद-बीज बेचइया मन उपर कार्रवाई के निरदेस देहे। ओमन ह एमा अधिकृत विक्रेता मन ल जुड़े पाय जाय म एफआईआर करे के संगेसंग उंखर लाइसेंस रद्दा करे बर घलो केहे हे। श्री नेताम ह विभागीय अधिकारी मन ल खाद अउ बीज विक्रता मन उपर नजर राखे, स्टॉक के नियमित परीक्षण करे, गुणवत्ता अउ मानक के जांच करे अउ ए संबंध म किसान मनके सिकायत म तुरते कार्यवाही के निरदेस दीन हे। प्रदेस म नकली खाद के बिक्री अउ जमा खोरी के बढ़त घटना ल देखत सरकार एला गंभीरता ले लेवत हे। कृषि मंत्री ह किसान मन ले अपील करे हे कि खाद अउ बीजा अधिकृत विक्रय केन्द्र ले ही खरीदय।
शिक्षक काउंसिलिंग प्रक्रिया
स्कूल मन म युक्तियुक्तकरण के तहत राज्य के सोलह जिला के अतिशेष चार हजार चार सौ छप्पन सहायक सिक्षक, प्रधान पाठक अउ व्याख्याता मनके काउंसिलिंग के प्रक्रिया पूरा होगे हे। ए सिक्षक मनके नवा पदस्थापना आने-आने जिला म कर दे गेहे। बांचे जिला म काउंसिलिंग के प्रक्रिया चलत हे।
खबर के मुताबिक दस हजार ले जादा स्कूल म ले सिरिफ एक सौ छियासठ स्कूल के समायोजना होही, जेमा एक सौ तैंतीस स्कूल ग्रामीण इलाका के हरय। एखर ले कोनों भी स्थिति म लइका मनके पढ़ाई प्रभावित नइ होही।
विकसित कृषि संकल्प अभियान
विकसित कृषि संकल्प अभियान के तहत ए दिन प्रदेस के आने-आने जघा म कृषि वैज्ञानिक मनके टीम जाके किसान मन ले सीधा गोठबात करत हे। रायपुर स्थित राष्ट्रीय जैविक स्ट्रेस प्रबंधन संस्थान-आई.सी.ए.आर. के वरिष्ठ वैज्ञानिक डॉक्टर विनय कुमार ह आकाशवाणी समाचार ल बतईन कि आज उंखर टीम बेमेतरा जिला के साजा विकासखंड पहुंचीन, जिहा किसान मन ल कृषि से संबंधित जानकारी दे गीस।
विश्व पर्यावरण दिवस
काली विश्व पर्यावरण दिवस हरय। ए मउका म छत्तीसगढ़ पर्यावरण संरक्षण मंडल डहार ले काल रईपुर स्थित नवीन विश्राम गृह म पोस्टर प्रतियोगिता के आयोजन करे जाही। प्रतियोगिता बिहनिया दस बजे ले सुरू होके साढ़े ग्यारह बजे तक चलही। पोस्टर प्रतियोगिता ल चार आयु वर्ग म बांटे गेहे, जेमा पहिली वर्ग बारह बछर तक, दूसर वर्ग तेरह ले सत्रह बछर, तीसरइया वर्ग अट्ठारह ले इक्कीस बछर अउ चौथा वर्ग दिव्यांग मन बर हवय। ए बछर प्रतियोगिता के बिसय – ‘‘प्लास्टिक प्रदूषण-दुष्प्रभाव एवं समाधान‘‘ राखे गेहे। ए प्रतियोगिता न सिरिफ युवा मन म रचनात्कता ल प्रोत्साहित करही, भलूक प्लास्टिक प्रदूषण जइसन गंभीर पर्यावरण मुद्दा उपर जागरूकता फैलाय म घलो अहम भूमिका निभाही। प्रतिभागी मन ल रजिस्ट्रेस कराय बर बिहनिया साढ़े नौ बजे तक नवीन विश्राम गृह म उपस्थित होना होही।
विश्व पर्यावरण दिवस म काली नौ बजे ले नौ बजके दस मिनट म आकाशवाणी केन्द्र, रायपुर ले विशेष कार्यक्रम के प्रसारण करे जाही। एला छत्तीसगढ़ स्थित आकाशवाणी के सबो केन्द्र रिले करही।
कांग्रेस नेता-न्यायिक रिमांड
सोशल मीडिया प्लेटफॉर्म म प्रधानमंत्री नरेन्द्र मोदी के खिलाफ अश्लील भाषा के प्रयोग करत कमेंट्स करे के मामला म कांग्रेस नेता बृजमोहन सिंह ल न्यायिक रिमांड म दुर्ग सेंट्रल जेल भेज दे गेहे। पुलिस ह उंखर मोबाइल घलो जब्त कर लेहे, जेला जांच बर फॉरेंसिक लैब भेजे जाही। ए मामला ल लेके उंखर खिलाफ भाजपा नेता मन ह वैशाली नगर थाना म सिकायत दर्ज कराय रिहीस।
बालोद-जल संचय जनभागीदारी
जल संरक्षण अउ संवर्धन के क्षेत्र म बालोद जिला ह नवा कीर्तिमान स्थापित करे हे। जल संचय-जनभागीदारी अभियान म करे गे उत्कृष्ट काम बर बालोद जिला, देस म तीसरा स्थान पाय हे। केन्द्रीय जल शक्ति मंत्री सीआर पाटिल अउ जल शक्ति मंत्रालय के सचिव देवाश्री मुखर्जी ह काली वीडियो कान्फ्रेंसिंग के माध्यम ले देस के चौंतीस जिला के अधिकारी मनके संग बइठका करीन। ओमन ह बालोद जिला म जल संरक्षण के क्षेत्र म करे गे काम के सराहना करीन।
खबर के मुताबिक ‘‘कैच द रेन‘‘ अभियान के तहत जिला म वर्षाजल ल संचित करे बर तरिया, कुआं, सोकपिट, गड्डा के निर्माण अउ रेन वॉटर हार्वेस्टिंग जइसन संरचना के निर्माण करे गेहे।