ए अउ दउरा के बेरा मुख्यमंत्री ह भोंगापाल ले डेयरी समग्र विकास योजना म दुधारू पसु प्रदान योजना के सुभारंभ करीन। ए योजना के पायलट प्रोजेक्ट प्रदेस के छह जिला – कांकेर, कोंडागांव, जशपुर, बलरामपुर, महासमुंद अउ सारंगढ़-बिलाईगढ़ के तीन सौ पच्चीस अनुसूचित जनजाति परिवार के महिला हितग्राही मन ल दुधारू मवेशी दे जाही।
उहें, मुख्यमंत्री ह भोंगापाल के जुन्ना शिव मंदिर म महालक्ष्मी महिला स्व-सहायता समूह के सदस्य मन ह कयाकिंग बर पांच ठिन नाव दीन।
‘‘स्वच्छ भारत-हरित भारत अभियान‘‘
उपमुख्यमंत्री अरूण साव ह आज रईपुर के तेलीबांधा तरिया म राखेगे केंद्र सरकार के ‘‘स्वच्छ भारत-हरित भारत अभियान‘‘ के सुभारंभ करीन। ए मउका म ओमन नगरवासी मन ल प्लास्टिक मुक्त रईपुर बनाय के सपथ देवाइन। संगेसंग तेलीबांधा तरिया के तट म झाड़ू लगाके स्वच्छता के संदेस दीन। उपमुख्यमंत्री ह बतइन कि विश्व पर्यावरण दिवस म ए अभियान प्रदेसभर म चलाय जाही। ओमन लोगन ल अपन रोज के कामकाज म स्वच्छता ल सामिल करे बर प्रेरित करीन। उहें, उपमुख्यमंत्री ह महिला समूह कोति ले चलाय जात कियोस्क सेंटर के घलो उद्घाटन करीन, जेमा समूह के माईलोगन मन सहर ल प्लास्टिक मुक्त बनाय बर कपड़ा ले बने थैला बनाही। उपमुख्यमंत्री अरूण साव अउ वन मंत्री केदार कश्यप ह तेलीबांधा तरिया परिसर म राखे गे स्वच्छता रैली ल हरियर झंडी दिखाके रवाना करीन। एखर उद्देस्य पर्यावरण संरक्षण कोति लोगन ल जागरूक करना अउ साफ-सफाई के महत्व बताना हे। ए बेरा म उपमुख्यमंत्री श्री साव ह किहीन कि ‘‘स्वच्छ भारत-हरित भारत अभियान‘‘ ले रईपुर प्लास्टिक मुक्त होही। कारीकरम वन मंत्री केदार कश्यप, विधायक पुरंदर मिश्रा, मोतीलाल साहू, अउ महापौर मीनल चौबे मौजूद रिही।
सर्वदलीय प्रतिनिधिमंडल-दौरा
आंतकवाद के विरूध्द भारत के दृढ़ संदेस देबर सांसद वाले सात सर्वदलीय प्रतिनिधिमंडल आने-आने देस के दउरा म हवय। सर्वदलीय प्रतिनिधिमंडल आतंकवाद अउ एखर सबो रूप ल कतई बर्दास नइ करे के भारत के सशक्त संदेस के पचार करत हे। एनसीपी-एसीपी के सांसद सुप्रिया सुले के अगुवई म प्रतिनिधिमंडल मिस्र पहुंचिस। ए प्रतिनिधिमंडल ह काली अपन इथियोपिया के यात्रा ल खतम करीन। एखर पहिली शिवसेना सांसद श्रीकांत सिंदे के अगुवई म सर्वदलीय प्रतिनिधिमंडल ह लाइबेरिया म भारतीय समुदाय के सदस्य मनले गोठबात करीन। श्री सिंदे ह किहीन कि चार ले पांच दसक तक आतंकवाद के विरूध्द लड़ई लड़े के बादो भारत अभी प्रौद्योगिकी म एक बड़े सक्ती हे।
सहकारिता मंत्री-बैठक
सहकारिता मंत्री केदार कश्यप ह आज मंत्रालय म सहकारिता विभाग के बड़का अधिकारी मनके बइठका लेके राज्य म रासायनिक उर्वरक के आपूर्ति भंडारण अउ किसान मन म वितरण के स्थिति के समीक्षा करीन। श्री कश्यप ह किहीन कि किसान मन ल आसानी ले रासायनिक उर्वरक देवाय के जिम्मेवारी सहकारी समिति के हे। किसान मनके मांग ल देखत समिति म नियमित रूप ले खातू के भंडारण अउ वितरण सुनिश्चित करे जाना चाही। ओमन किहीन कि किसान मन ल डीएपी के जघा आने खातू बउरे बर जागरूक करे जाना चाही। श्री कश्यप ह बइठका म किहीन कि किसान मन ल खातू बर भटकना नइ पड़ही। प्राइवेट क्षेत्र के दुकान म कोनो भी तरीका के गड़बड़ी झन होवय एखर बर निगरानी रखे जाना चाही। ओमन खातू के तय दाम ले जादा कीमत म बेचे अउ कालाबाजारी के सिकइत म कार्रवाई के चेतावनी देहे।
माओवादी-आत्मसमर्पण
सुकमा जिला म आज सोलह झिन माओवादी मन ह आत्मसमर्पण करीन हे। एमा ले एक महिला अउ एक पुरूष माओवादी मन उपर आठ-आठ लाख रूपिया के इनाम घोसित रिहीस। उहें, छै झिन माओवादी उपर कुल पच्चीस लाख रूपिया के इनाम घोसित रिहीस। पुलिस अधीक्षक किरण चव्हान अउ एएसपी उमेश गुप्ता के आगू ए माओवादी मन ह आत्मसमर्पण करीन हे। एमा केरलापेंदा के आखिरी नौ माओवादी घलो सामिल हे। एखर संगेसंगे केरलापेंदा गांव ल नक्सल मुक्त गांव घोसित कर दे गेहे। राज्यशासन कोति ले विकास काम खातिर ए गांव ल एक करोड़ रूपिया के रकम दे जाही।
खबर के मुताबिक सुकमा जिला के बड़ेसट्टी गांव ल पहिलीच नक्सल मुक्त घोसित करे जा चुके हे।
चावल उत्सव
प्रदेस म एक जून ल उचित मूल्य के दुकान म चावल उत्सव मनाए जात हे। ए उत्सव के दउरान रासन कार्डधारी परिवार ल जून, जुलई अउ अगस्त के चाउर एकमुस्त दे जात हे। दंतेवाड़ा जिला के कलेक्टर कुणाल दुदावत ह आज दंतेवाड़ा विकासखंड के ग्राम पंचायत मंगनार अउ पंडेवार के दउरा करीन। ए बेरा म ओमन किहीन कि सबो पात्र हितग्राही मन ल तीन महीना के रासन प्राथमिकता ले दे जाए। कलेक्टर ह दस जून तक सबो रासन कार्डधारी मन ल चाउर देके निरदेस दीन हे।
केंद्रीय मंत्री-चिराग पासवान
केंद्रीय खाद्य प्रसंस्कराण अउ उद्योग मंत्री चिराग पासवान आज अपन एक दिवसीय दउरा म रईपुर पहुंचिन। रईपुर एयरपोर्ट म ओमन मीडिया ले आने-आने बिसय म गोठबात करीन। ओमन किहीन कि छत्तीसगढ़ म लोक जनसक्ति पार्टी के ओमन बढ़वार करही। श्री पासवान ह किहीन कि बिहार, उत्तरप्रदेस अउ छत्तीसगढ़ म पार्टी के विचारधारा के लोगन हे अउ ए सबो राज्य म पार्टी के मजबूती ले बढ़वार हो सकत हे।
राज्यपाल-सहायता राशि
राज्यपाल रमेन डेका ह जम्मू-कश्मीर के पहलगाम म होय आतंकी हमला म जान गंवइया रईपुर निवासी स्वर्गीय दिनेश अग्रवाल के घर गोसाइन नेहा अग्रवाल ल आज राजभवन म दू लाख रूपिया के सहायता रासि चेक दे गीस। ए बेरा म विधायक सुनील सोनी अउ पुरंदर मिश्रा मौजूद रिहीन।
दुर्घटना
महासमुंद जिला के सेरगांव म टै्रक्टर अउ फटफटी के टक्कर म तीन झिन युवक के मउत होगे। उहें, बिलासपुर-रायपुर हाईवे म एक चौपहिया गाड़ी डिवाइडर ले टकरा गे। ए हादसा म एक युवक के मउत होगे। उहें, रतनुपर म घलो मालवाहक गाड़ी पेड़ ले टकरा गे। जेखर ले ओमा बइठे दू झिन गंभीर रूप से घायल होगे। ए युवक मन गाड़ी के केबिन म फंसे रिहीन, जउन मन ल ढ़ाई घंटो रेस्क्यू ऑपरेसन करके गैस कटर ले केबिन ल काट के निकाले गीस।
जेईई एडवांस परीक्षा परिणाम
भारतीय प्रौद्योगिकी संस्थान कानपुर ह आज जेईई एडवांस परीक्षा दू हजार पच्चीस के नतीजा घोसित कर दीस। छात्र-छात्रा वेबसाइट म अपन परीक्षा परिणाम दे सकत हे। जेईई एडवांस परीक्षा भारतीय प्रौद्योगिकी संस्थान अउ तकनीकी शिक्षा के आने सहभागी संस्थान मन म स्नातक पाठ्यक्रम प्रवेस बर ले जात हे।
महतारी वदंन योजना
राज्य सरकार कोती ले महतारी वंदन योजना म आज जून महीना के सोलहवां किस्त के भुगतान जारी कर दे गेहे। महिला अउ बाल विकास विभाग कोती ले प्रदेस के उनतहत्तर लाख तीस हजार ले जादा माइलोगन मन ल कुल छह सौ अड़तालीस करोड़ रूपिया ले जादा के रकम उंखर बैंक खाता म भेजे गीस।
– मुख्यमंत्री विष्णुदेव साय के अगुवई म चार जून के मंत्रालय म मंत्रिपरिषद के बइठका होही।
– काली विश्व साइकिल दिवस मनाए जाही। ए उपलक्ष्य म आज सारंगढ़-बिलाईगढ़ जिला म सारंगढ़ के खेलभाटा मैदान ले विश्रामगृह तक साइकिल रैली निकाले गीस। ऐमा खिलाड़ी, पढ़इया लइका अउ आम लोगन संघरीन।
– नारायणपुर जिला के सोनपुर थाना क्षेत्र के कच्चापाल कैम्प म नवा मोबाइल टावर लगाए गेहे। एखर ले तीर-तखार के क्षेत्र के लोगन ल मोबाइल कनेक्टिविटी, दूरसंचार बेवस्था अउ इंटरनेट के फायदा मिलही। संगेसंग देस-विदेस के घटना अउ आने गतिविध के जानकारी मिल सकही।