प्रदेस म चरणबध्द तरीका ले शिक्षक मनके खाली पद मन बर भर्ती करे जाही। पहलइया चरण म पांच हजार शिक्षक मनके भर्ती होही। एला लेके विभागीय स्तर म तियारी सुरू कर दे गेहे। राज्य सरकार डहार ले शिक्षा व्यवस्था ल सुघ्घर बनाय के उद्देस्य ले कई ठिन बड़का पहल करे जात हे। एखर चलत पाछू दिन स्कूल अउ शिक्षक मनके युक्तियुक्तकरण के प्रक्रिया सुरू करे गेहे। एखर पूरा होय बाद शिक्षक मनके रीता पद के जानकारी लेके नवा भर्ती प्रक्रिया सुरू करे जाही।
उपभोक्ता आयोग-पत्रकारवार्ता
राष्ट्रीय उपभोक्ता आयोग के अध्यक्ष न्यायमूर्ति अमरेश्वर प्रताप साही ह अपन दू दिन के छत्तीसगढ़ प्रवास बेरा आखिरी दिन आज रईपुर म वकील मन संग गोठबात करीन। तहां बाद म पत्रकार मन ले चर्चा दउरान न्यायमूर्ति साही ह किहीन कि उपभोक्ता आयोग ह देस म कन्ज्युमर प्रोटेक्शन एक्ट के तहत उपभोक्ता मन ल न्याय देवावत हे। आयोग म अब कई जघा ई-हियरिंग के सहूलियत दे जात हे। संगे सिकायत के ऑनलाइन एंट्री घलो होवत हे। ओमन ए बात उपर संसो व्यक्त करीन कि उपभोक्ता आयोग तीर इंर्फोसमेंट इंफ्रास्ट्रक्चर के अभाव हे।
ओमन यहू बतइन कि उपभोक्ता आयोग ह स्ट्रेचरी अदालत हे। अभी आयोग म मुख्य रूप ले चार ठिन प्रकार-जेमा – बिल्डर ले संबंधित विवाद, मेडिकल नेगलिजेंस, इंश्योरेंस क्लेम अउ बैंकिंग संबंधी डिजीटल फ्राड। ओमन बतइन कि उपभोक्ता आयोग म राज्य सरकार ह कलेक्टर के माध्यम ले अउ केंद्र सरकार ह सचिव के माध्यम ले केस फाईल कर सकत हे।
एखर पहिली, काली रईपुर म जिला उपभोक्ता आयोग के अध्यक्ष अउ सदस्य मनके एक दिन वाले प्रसिक्षण कार्यसाला राखे गे रिहीस। ए वर्कसाप के सुभारंभ खाद्य मंत्री दयालदास बघेल ह करीन। ए मउका म राष्ट्रीय उपभोक्ता आयोग के अध्यक्ष न्यायमूर्ति अमरेश्वर प्रताप साही अउ छत्तीसगढ़ राज्य उपभोक्ता आयोग के अध्यक्ष न्यायमूर्ति गौतम चौरड़िया समेत जिला उपभोक्ता आयोग मनके अध्यक्ष अउ सदस्य मौजूद रिहीन।
सर्वदलीय प्रतिनिधिमंडल-दौरा
ऑपरेसन सिंदूर के चलत आतंकवाद के खिलाफ भारत के सैध्दांतिक अउ कड़ा रूख स्पष्ट करे बर संसद सदस्य मनके सात ठिन सर्वदलीय शिष्टमंडल ह अब्बड़ अकन देस के दउरा म हे। कांग्रेस सांसद शशि थरूर के अगुवई म शिष्टमंडल आज ब्राजील के अधिकारिक यात्रा बर ब्रासिलिया पहुंचिस। श्री थरूर ह किहीन कि ओमन ब्राजील म ठोस रचनात्मक चर्चा खातिर उत्सुक हवय।
उहें, शिवसेना सांसद श्रीकांत शिंदे के अगुवई म सर्वदलीय शिष्टमंडल ह लाइबेरिया म हे। मीडिया ले गोठबात करत श्री शिंदे ह किहीन कि भारत अउ लाइबेरिया के बीच बने विपक्षी संबंध हे।
जनता दल यूनाइटेड सांसद संजय कुमार झा के अगुवई म सर्वदलीय शिष्टमंडल ह इंडोनेशिया के सफल यात्रा के समापन बाद आज मलेशिया के कुआलालम्पुर पहुंचिस।
अल्जीरिया म भरतीय जनता पार्टी सांसद बैजयंत पांडा के अगुवई म सर्वदलीय शिष्टमंडल ह उंहा के मीडिया, भारतीय प्रवासी मनके एक ठिन वर्ग अउ अल्जीरिया म भारत के मित्र मन ल आतंकवाद के विश्व रूप म खतरा बारे म जानकारी दीन। उहें, भारतीय जनता पार्टी सांसद रविशंकर प्रसाद के अगुवई म सांसद मनके शिष्टमंडल ह लंदन पहुंचिस। श्री प्रसाद ह किहीन कि हमन इंहा घलो आतंकवाद के मामला बर भारत के पक्ष ल मजबूती ले राखबो।
विकसित कृषि संकल्प अभियान
केंद्रीय कृषि मंत्री शिवराज सिंह चौहान ह किहीन हे कि विकसित कृषि संकल्प अभियान ह किसान मन ल कीमती जानकारी देवइया एक ठिन जन आंदोलन हे। श्री चौहान ह कई ठिन राज्य मनके विधायक मनले वर्चुअल गोठबात करत किहीन कि अभियान के चलत किसान मनले चर्चा अउ उंखर प्रश्न के समाधान घलो करे जाही।
मुख्यमंत्री-समीक्षा
मुख्यमंत्री विष्णुदेव साय ह धमतरी म रईपुर अउ धमतरी जिला म चलत योजना मनके क्रियान्वयन के समीक्षा करीन। बइठका म ओमन किहीन कि विकसित छत्तीसगढ़ बर तियार करे गे विजन डाक्यूमेंट ह एक ठिन रोड मैप असन हे, जेमा लक्ष्य अउ दिसा-निरदेस स्पष्ट हे। ओमन अधिकारी मन ले किहीन कि ओमन कड़ा मेहनत अउ नवाचारी तरीका ले लोगन मनके समस्या के समाधान करंय। बइठका म मुख्यमंत्री ह राजस्व विभाग म डिजिटल गवर्नेंस ल बढ़ावा देबर अउ समय प्रबंधन उपर धियान दे के बात किहीन। ओमन केंद्र अउ राज्य सरकार के फ्लैगसिप योजना मन ल प्राथमिकता दे उपर जोर दीन। मुख्यमंत्री ह जिला म शिक्षा के गुणवत्ता म सुधार लाय खातिर निरदेस दीन।
दुर्घटना
खैरागढ़-छुईखदान-गंडई जिला म आज होय एक ठिन रोड एक्सीडेंट म दादा अउ पोता के मउत होगे। उहें, एक झिन माईलोगिन गंभीर रूप ले घायल होगे। ए एक्सीडेंट ह गंडई थाना क्षेत्र म सुरही नदी पुलिया तीर होय हे। जिहां तेज रफ्तार हाईवा ह फटफटी ल टक्कर मार दीस। ए हादसा बाद पहुंचे ओ तीर के मनखे मन ह एंबुलेंस अउ पुलिस ल सूचना दीन।
एशियन एथलेटिक्स चैंपियनशिप
एशियन एथलेटिक्स चैंपियनशिप म छत्तीसगढ़ के जशपुर जिला के अनिमेष कुजुर ह दू सौ मीटर दउड़ म कांस्य पदक हासिल करे हे। अनिमेष के ए उपलब्धि बर मुख्यमंत्री विष्णुदेव साय ह उनला बधई अउ सुभकामना दीन। ओमन किहीन कि संघर्ष, समर्पण अउ सरलग मेहनत ले कोनो भी सपना पूरा करे जा सकत हे। ए ऐतिहासिक उपलब्धि ह प्रदेस के हर जवान लइका ल प्रेरणा दिही।
साइकिल रैली
तीन जून के विश्व साइकिल दिवस मनाय जाही। एखर पहिली आज रईपुर म साइकिल रैली निकाले गीस। ए रैली म खेल मंत्री टंकराम वर्मा, विधायक गुरू खुशवंत साहेब अउ मोतीलाल साहू समेत कई झिन आने मनखे सामिल होइन। ए रैली के उद्देस्य लोगन मन ल सेहत अउ फीटनेस बर साइकिल चलाय खातिर प्रेरित करना रिहीस।
उहें, फीट इंडिया मूवमेंट के तहत आज गौरेला-पेण्ड्रा-मरवाही जिला म घलो साइकिल रैली निकाले गीस। ए रैली के सुभारंभ गौरेला नगर पालिका अध्यक्ष मुकेश दुबे अउ पुलिस अधीक्षक सुरजन राम भगत ह करीन।
ओति, जांजगीर म घलो साइकिल रैली म बड़ भारी संख्या म लोगन मन सामिल होइन। ए दउरान ओमन ल सपथ घलो देवाय गीस।
स्वतंत्रता दिवस-प्रतियोगिता
केंद्र सरकार डहार ले अठहत्तरवां स्वतंत्रता दिवस के उपलक्ष्य म आज ले अब्बड़ अकन प्रतियोगिता राखे जात हे। एखर चलत द्विभाषीय निबंध प्रतियोगिता के बिसय-ऑपरेसन सिंदूर -‘‘आतंकवाद के खिलाफ भारत की नीति को फिर से परिभाषित करना‘‘ राखे गेहे। प्रतियोगिता के शीर्ष तीन विजेता मन ल दस-दस हजार रूपिया के नगद पुरस्कार दे जाही। इच्छुक प्रतिभागी मन प्रतियोगिता म भाग लेबर माय जीओवी के वेबसाइट म जा सकत हे। प्रतियोगिता ह ए महिना के तीस तारीख तक खुले रइही।
एक ठिन आने प्रतियोगिता म सोसल मीडिया प्रभावसाली लोगन मनल भारतीय स्वतंत्रता के कोनो भी स्मारक अउ जघा म घूमे जाय के वीडियो अउ रील बनाय खातिर नेवते गेहे। इच्छुक प्रतिभागी मन ल रील अउ वीडियो ल अपन सोसल मीडिया पेज म हैसटैग न्यू इंडिया, हैसटैग इंपावर्ड इंडिया अउ हैशटैग इंडेपेंडेंस डे दू हजार पच्चीय हैशटैग के संग पोस्ट करना होही।
इही बीच, नवा भारत सशक्त भारत थीम उपर एक ठिन प्रतियोगिता घलो राखे गेहे। ए बारे म जादा जानकारी माय जीओवी वेबसाइट म मिल सकत हे।
विश्व दुग्ध दिवस
आज विश्व दुग्ध दिवस हरय। ए मउका म बिलासपुर जिला के मस्तुरी विकासखंड के सीपत म पशुधन विकास विभाग अउ छत्तीसगढ़ राज्य दुग्ध सहकारी महासंघ मर्यादित देवभोग डहार ले एक ठिन कारीकरम राखे गे रिहीस। जेमा किसान अउ मवेसी पलइया मन ल दूध उत्पादन बारे म जानकारी दे गीस। फेर, झलमला दुग्ध उत्पादक सहकारी समिति के सुभारंभ घलो करे गीस।