विकसित कृषि संकल्प अभियान के तहत छत्तीसगढ़ म वैज्ञानिक मनके टीम ह गांव-गांव म जाके किसान मन ले सीधा गोठबात करत हे। इही कड़ी म आज दुरूग जिला के पहांदुर म वैज्ञानिक मन ह पहुंचीन। ए दउरान ओमन किसान मन ल माटी परीक्षण, उद्यानिकी और कृषि शिक्षा बिसय म गोठबात करीन।
उहें, वैज्ञानिक मन ह रायपुर जिला के धरसींवा ब्लॉक म मलौद अउ सिलयारी गांव के दउरा करीन। कृषि वैज्ञानिक डॉक्टर सुशील कुमार ह आकाशवाणी समाचार संग गोठबात करत बतईन कि उंखर टीम ह किसान मन ले रासायनिक खातू के कम करे बर अउ जैविक खेती ल बढ़ावा दे बर प्रेरित करीन।
जांजगीर-चांपा जिला के सिवनी गांव म घलो विकसित कृषि संकल्प अभियान रथ पहुंचीस। इहां के किसान अविनाश मांझी ह कहिन कि ओमन ल वैज्ञानिक मन ह उन्नत खेती, फसल चक्र, पशुपालन के फायदा ल बतईन।
खबर के मुताबिक विकसित कृषि संकल्प अभियान ह बारह जून तक चलही।
मुख्यमंत्री-सुशासन तिहार
सुशासन तिहार के तीसर अउ अंतिम चरण ह आज खतम हो गेहे। आज मुख्यमंत्री विष्णुदेव साय ह धमतरी जिला के रूद्री पहुंचिन। ओमन ह चौपाल लगाके गांव वाले मन ले गोठ करके उंखर समस्या ल सुनिन। ए बेरा म मुख्यमंत्री ह धमतरी म हाईटेक बस स्टैंड, ऑडिटोरियम समेत दू सौ तेरह करोड़ रूपिया के कतकोन विकास योजना के सौगात दीन। ए मउका म ओमन ह किहीन कि सुशासन तिहार के चलत प्रदेसभर म चालीस लाख ले जादा आवेदन मिले हे, जेमा ले पंचानवे फीसदी के समाधान हो चुके हे।
राष्ट्रीय आम महोत्सव
रईपुर के इंदिरा गांधी कृषि विश्व विद्यालय म अवइया छै जून ले तीन दिवसीय राष्ट्रीय आम महोत्सव के आयोजन करे जाही। ए महोत्सव ह उद्यानिकी विभाग अउ प्रक्षेत्र वानिकी, छत्तीसगढ़ शासन अउ ‘‘प्रकृति की ओर‘‘ सोसाइटी कोति ले करे जात हे। एमा छत्तीसगढ़ के अलावा कतकोन राज्य के आमा उत्पादक मन ह सामिल होही। आमा के दू सौ ले जादा प्रकार अउ आमा ले बने छप्पन ठिक व्यंजन के प्रदर्सन करे जाही। इखर अलावा ए कारीकरम म आमा के कतकोन प्रकार के प्रतियोगिता घलो होही। ए प्रदर्सनी म आने-आने प्रकार के आमा, कतकोन उत्पाद अउ आमा के पउधा ह घलो बेचे बर राखे जाही। ए प्रदर्सनी म आमा उत्पादक मन बर तकनीकी मार्गदर्सन अउ परिचर्चा के आयोजन होना हे। जेमा पंजीयन अउ प्रवेस निसुल्क हे।
इंदिरा गांधी कृषि विश्व विद्यालय के कुलपति डॉक्टर गिरिश चंदेल ह काली मुख्यमंत्री विष्णुदेव साय ले भेंट करके ए महोत्सव के सुभारंभ समारोह म अतिथि के रूप म श्री साय ल आय बर किहीन हे।
शिक्षक काउंसिल
प्रदेस म अतिशेष प्रधान पाठक अउ सहायक शिक्षक मनके पद स्थापना बर काउंसिंलिंग के प्रक्रिया ह जारी हवय। कोरबा म कलेक्टर अजीत वसंत के उपस्थिति म अतिशेष प्रधान पाठक अउ सहायक शिक्षक मनके पदस्थापना बर काउंसिंलिंग सुरू होय हे। प्रथम चरण म वरिष्ठता के आधार म अतिशेष प्रधान पाठक मनके काउंसिलिंग करे गीस। त उहें, सहायक शिक्षक मनके काउंसिलिंग प्रक्रिया ह चलत हे, जेमा सामिल शिक्षक मनके नवा पदस्थापना आदेस ल घलो जारी करे गीस।
स्कूल युक्तियुक्तकरण
स्कूल शिक्षा विभाग ह कुछु संगठन अउ मनखे मन कोति ले फैलाय जात युक्तियुक्तकरण ले हजारों के संख्या म स्कूल के बंद होय के बात ल भ्रामक अउ तथ्यहीन बताय हे। विभाग ह केहे हे कि युक्तियुक्तकरण के प्रक्रिया के उद्देस्य काखरो पढ़ई ल रोकना नो हरय बल्कि शिक्षा के गुणवत्ता अउ संसाधन के अच्छा उपयोग ल सुनिश्चित करना हे।
राज्य के कुल दस हजार चार सौ तिरसठ स्कूल म ले सिरिफ एक सौ छैंसठ स्कूल के समायोजन होही। जेमा ग्रामीण जघा के एक सौ तैंतीस स्कूल अइसे हे, जेमा पढ़इया लइका मनके संख्या दस ले कम हे अउ एक किलोमीटर के अंदर म दूसर स्कूल घलो चलत हे। अइसने सहरी क्षेत्र म तैंतीस स्कूल म लइका मनके संख्या तीस ले कम हे। जेखर सेति ए स्कूल मन ल अच्छा शिक्षा के उद्देस्य ले समायोजित करे जात हे। एखर ले कोनो भी लइका के पढ़ाई प्रभावित नइ होही।
विश्व तम्बाकू निषेध दिवस
आज विश्व तम्बाकू निषेध दिवस हवय। ए दिन ह विश्व स्वास्थ्य संगठन कोति ले तम्बाकू के उपयोग ल खतम करे खातिर एक ठिन वैश्विक पहल हे। ए बेरा म प्रदेस म जन-जागरूकता ले संबंधित कतकोन कारीकरम चलाय जात हे। एसो के थीम हवय-‘‘अपील का पर्दाफाश : तम्बाकू और निकोटिन उत्पादों पर उद्योग की रणनीति को बेनकाब करना‘‘। एक रिपोर्ट के अनुसार छत्तीसगढ़ के कुल जन संख्या म ले उनतालीस प्रतिसत ले जादा लोगन मन कोनो न कोनो रूप म तम्बाकू के सेवन करथे।
प्रदेस म तम्बाकू नियंत्रण बर जिला स्तर म सरलग अभियान चलाय जात हे। शैक्षणिक संस्था अउ सार्वजनिक जघा ल तम्बाकू मुक्त बनाय जाय म बिसेस प्रयास होवत हे।
स्वास्थ्य मंत्री श्यामबिहारी जायसवाल ह किहीन हे कि राज्य के शासन ह तम्बाकू नियंत्रण ल लेके गंभीर हवय।
इही बीच, विश्व तम्बाकू निषेध दिवस के मउका म महासमुंद जिला म कतकोन जागरूकता कारीकरम चलाय जात हे।
सर्वदलीय प्रतिनिधिमंडल दौरा
आतंकवाद खतम करे के उद्देस्य ले भारत के सात बहुदलीय संसदीय प्रतिनिधि मंडल ह विदेस म अपन अधिकारिक यात्रा के चलत उच्च स्तरीय वार्ता करत हे। इही कड़ी म कांग्रेस सांसद शशि थरूर ह आज कोलंबिया के उपविदेस मंत्री रोजा योलांडा विलाविसे-नियो अउ एशिया-प्रशांत ले जुड़े उंखर सहयोगी मनले भेंट करीन।
कोयला घोटाला आरोपी रिहा
कोयला घोटाला अउ जिला खनिज संस्थान न्यास-डीएमएफ घोटाला के छै झिन आरोपी मन ल आज केंद्रीय जेल रईपुर ले रिहा कर दे गेहे। सुप्रीम कोर्ट कोति ले आरोपी मनके जमानत ल मंजूर करे जाय के बाद ओमन ल रिहा करे गीस। एमा तत्कालिन मुख्यमंत्री सचिवालय के उपसचिव सौम्या चौरसिया, तत्कालिन कोरबा कलेक्टर रानू साहू, आईएएस समीर विश्नोई के अलावा रजनीकांत तिवारी, विरेन्द्र जायसवाल अउ संदीप नायक ह सामिल हवय।
जानबा के अनुसार आरोपी मने कोति ले गवाह ल प्रभावित करे जाय के आसंका ल देखत हुए ओमन ल जमानत म रिहा होय के बाद छत्तीसगढ़ ले बाहिर रहे बर केहे गेहे। कोर्ट ह आदेस देहे कि सौम्या चौरसिया, रानू साहू अउ समीर विश्नोई ह अगला आदेस तक छत्तीसगढ़ ले बाहिर रइही अउ ओमन ल जांच एजेंसी या फेर ट्रायल कोर्ट म जरूरत के अनुसार उपस्थित रहना होही संगेसंग रिहाई के एक हफ्ता के भीतरी ए सबो आरोपी मन ल राज्य के बाहिर अपन रहे के पता ल कोर्ट म पेस करना होही।
कोरोना-मरीज
प्रदेस म कोरोना संक्रमित मरीज मनके संख्या ह बाढ़के अब छै हो गेहे। राज्य सर्वेलेन्स अधिकारी डॉक्टर खेमराज सोनवानी ह बतइन कि प्रदेस म स्थिति नियंत्रण म हवय। ओमन ह किहीन कि अगर कोनो ल सर्दी, खांसी, बुखार या फेर सांस के तकलीफ होवत हे, त ओमन ह तुरते डॉक्टर ल संपर्क करय।
राज्यपाल-दौरा
राज्यपाल रमेन डेका ह बालोद जिला के दउरा म रिहीन। ए बेरा म ओमन ह उंहा के स्व-सहायता समूह के माईलोगिन मनले भेंट करीन। राज्यपाल ह किहीन हे कि हमर देस अउ राज्य के अर्थव्यवस्था ल सुदृढ़ बनाय म माईलोगिन मनके बड़का योगदान हे। उंखर मनके अच्छा आमदनी हो सके एखर बर ओमन ल सरलग नवा-नवा तकनीक अउ उपाय ल सिखना होही। उहें, ए बेरा म माईलोगिन मन ह राज्यपाल ल बतइन कि जिला प्रशासन कोति ले चलाय जात जल-जतन अभियान म घलो ओमन ह सक्रिय भूमिका निभावत हे।
उहें, राज्यपाल ह मोहला-मानपुर जिला के प्रवास के दउरान जिला मुख्यालय मोहला म प्रशासनिक अधिकारी मनके बइठक लेके शासन के महत्वाकांक्षी योजना, परियोजना के क्रियान्वयन के समीक्षा करीन। ए बइठका म कलेक्टर अउ पुलिस अधीक्षक समेत कतकोन विभाग के अधिकारी अउ कर्मचारी मन मौजूद रिहीन। बाद म राज्यपाल ह मानपुर विकासखंड के फड़की गांव म नवा बने एकलव्य आवासीय विद्यालय के घलो अवलोकन करीन।