आज दिनभर के खबर ल अपन गुरतुर छत्तीसगढ़ी भाखा म पढ़व

बारिश
प्रदेश म पाछू चार दिन ले होवत सरलग बरसा ले कतकोन जिला म जनजीवन प्रभावित होय हे। अउ कतकोन गांव के जिला मुख्यालय ले सड़क संपर्क टूट गेहे।
बस्तर म मुसलाधार बरसा के सेती लोगन के जीवन अस्त-व्यस्त होगे हे। बीते रतिहा होय तेज बरसा के बाद जगदलपुर शहर के निचला बस्ती मन म पानी भर गेहे। संगेसंग जिला के जम्मों नदी, नरवा उफान म हे। इंद्रावती नदी के जलस्तर घलो सरलग बाढ़े ले जगदलपुर के पुराना पुल के उपर पानी बोहात हे। प्रशासन ह ए रद्दा म आवागमन ल रोक देहे। संगेसंग चेरपाल अउ धनोरा समेत कतकोन गांव के संपर्क जिला मुख्यालय ले टूट गेहे।
ओति बिलासपुर जिला म भारी बरसा के सेती मनियारी नदी उफान म हे। बिल्हा ले लगे पर्यटन स्थल तालागंाव तक बाढ़ के पानी पहुंच गेहे। जिला प्रशासन डहार ले सावधानी राखे बर मुनादी कराके प्रभावित लोगन मन ल सुरक्षित जगा म पहुंचाय जात हे ।
इही बीच मौसम विभाग ह अवइया चैबीस घंटा के दौरान प्रदेश म कतकोन जगा म हल्का ले मध्यम बरसा होय के संभावना जताय हे । संगेसंग रायपुर, दुर्ग अउ दुर्ग बस्तर संभाग के दक्षिणी क्षेत्र के कुछएक जगा म भारी बरसा होय के चेतावनी दे गेहे।
मौसम विभाग ले मिले जानकारी के मुताबिक निम्न दबाव के क्षेत्र उत्तर-पश्चिम बंगाल के खाड़ी अउ उंखर तीर तखार म स्थित हे। एखर संगेसंग एक ठिन मानसून द्रोणिका घलो छत्तीसगढ़ ले होके जावत हे। एखर प्रभाव ले प्रदेश के कतकोन जगा म रूक-रूक के बरसा होवत हे।
प्रधानमंत्री अपील
प्रधानमंत्री नरेंद्र मोदी ह देशवासी मनले कोरोना महामारी के सेती मानसून के दौरान विशेष सावधानी राखे के अपील करे हे। श्री मोदी ह एक ठिन ट्वीट म कीहिन हे कि मौसम म बदलाव अउ विषाणुजनित रोग मनके बगरे के बेरा हरय। एला देखत सतर्कता अउ सावधानी जरूरी हे।  ओमन कीहिन हे कि केंद्र सरकार स्थ्तिि उपर नजर राखे के संगेसंग प्रभावित लोगन मनके सही देखभाल सुनिश्चित करत हे।
छत्तीसगढ़ स्वच्छता सम्मान
प्रधानमंत्री नरेंद्र मोदी स्वच्छता के क्षेत्र म सर्वश्रेष्ठ प्रदर्शन बर छत्तीसगढ़ ल काली बीस अगस्त के पुरस्कृत करही। केंद्र सरकार डहार ले हर बछर देश के सब्बो शहर अउ राज्य के बीच आयोजित स्वच्छ सर्वेक्षण म शहरी स्वच्छता के आने आने पैमाना म आकलन करे जाथे।  एमा घर घर ले कचरा इकट्ठा, कचरा के निपटान, खुला म शौचमुक्त शहर अउ कचरामुक्त शहर, स्टार रेंटिंग के थर्ड पार्टी के माध्यम ले आकलन करे के संग आम जनता के फीडबैक ल सामिल कर राज्य अउ शहर के रैंकिंग जारी करे जाथे। ए बछर छत्तीसगढ़ ह स्वच्छता के क्षेत्र म अपन सर्वश्रेष्ठ प्रदर्शन बनाके राखे हे।
राज्य स्वच्छता पुरस्कार
प्रदेश के गांव म स्वच्छता ल बढ़ावा देबर राज्य स्वच्छ भारत मिशन ग्रामीण डहार ले चार करोड़ रूपिया ले जादा के पुरस्कार दे जाही। पंद्रा आने आने श्रेणी म देवइया पुरस्कार बर आवेदन करे के आखरी तारीख बढ़ाके तेईस अगस्त कर दे गेहे। जादा ले जादा प्रतिभागी मन ल ग्राम पंचायत, संस्था, विकासखंड अउ जिला ल ए पुरस्कार बर आवेदन करे के मउका देबर आखरी तारीख ल बढ़ाय गेहे। चुने गे विजेता मन ल राष्ट्रपिता महात्मा गांधी के जयंती म दू अक्टूबर के पुरस्कार दे जाही।
राजीव गांधी किसान न्याय योजना
मुख्यमंत्री भूपेश बघेल ह अपन मंत्रिमंडल के सहयोगी मन संग पूर्व प्रधानमंत्री स्वर्गीय राजीव गांधी के जयंती म वीडियो कॅान्फ्रेसिंग ले अपन निवास कार्यालय म ये राशि किसान मनके खाता म आॅनलाईन जमा करही। ए कार्यक्रम म कंाग्रेस के राष्ट्रीय अध्यक्ष सोनिया गांधी अउ सांसद राहुल गांधी घलो वीडियो कॅान्फ्रेसिंग के माध्यम ले जुड़ही।
मुख्यमंत्री ह ये मउका म तेंदूपत्ता सकलइया मन ल बछर दू हजार अठारा के प्रोत्साहन पारिश्रमिक के रूप म दू सौ बत्तीस करोड़ ले जादा के रकम उंखर खाता म जमा करहीं। संगेसंग गोधन न्याय योजना म गोबर बेचइया मन ल दूसर पारी म बेचे गे गोबर के पइसा आॅनलाइन दे जाही।
कोरोना मरीज
छत्तीसगढ़ म कोरोना संक्रमण के मामला सरलग बाढ़त जात हे। आज घलो आने आने जिला ले कोरोना संक्रमित नवा मरीज मिले के पुष्टि होय हे।  दुर्ग जिला म आज बीएसएफ के दू झिन जवान संग सत्ताईस नवा कोरोना संक्रमित मरीज मिले हे। सदर बाजार वार्ड ले एके परिवार के ग्यारा झिन संक्रमित पाय गेहे। आमदी नगर हुडको म स्वामी स्वरूपानंद सरस्वती महाविद्यालय म एक झिन कर्मचारी के कोरोना संक्रमित पाये के बाद आज ले दू दिन बर काॅलेज ल सील कर दे गेहे।
उंहे कोरबा जिला म इक्कीस कोरोना पाॅजीटिव मरीज के पहिचान होय हे। एमा ले पांच ग्रामीण बैंक के कर्मचारी अउ एक झिन ठेला वाला घलो सामिल हे।
अइसने धमतरी जिला म घलो पांच झिन कोरोना पाॅजीटिव मरीज पाय गेहे। एमा जिला जेल ले दू, रिसईपारा वार्ड बठेना वार्ड अउ मगरलोड ले एक-एक मरीज मिले हे।
जांजगीर चांपा जिला म आज तीन नवा कोरोना पाॅजीटिव मरीज मिले हे। एमा एक झिन डिप्टी कलेक्टर घलो सामिल हे। कोरोना संक्रमण के बाढ़त मामला ल देखत जिला म एक घांव फेर धारा- एक सौ चैवांलिस लागू कर दे गेहे।  एति महासमुंद जिला म कोरोना संक्रमित दू झिन लोगन के मउत होगे। अब तक जिला म कोरोना संक्रमण ले छै लोगन के मउत हो चुके हे। राजनांदगांव जिला के छुईखदान म कोरोना संक्रमण के बाढ़त मामला ल देखत प्रशासन ह आज ले इक्कीस अगस्त तक पूर्ण लाॅकडाउन करे के निर्णय लेहे।
केंद्रीय मंत्री सराहना
केंद्रीय रसायन अउ उर्वरक राज्य मंत्री मनसुखभाई मंडाविया ह छत्तीसगढ़ म किसान मनके मंाग के अनुरूप रसायनिक उर्वरक देवाय बर सुघ्घर प्रबंधन के सराहना करे हे। श्री मंडाविया ह वीडियो काॅन्फे्रसिंग ले छत्तीसगढ़ के संग देश के सबो राज्य के कृषि मंत्री मनले चर्चा करके रसायनिक उर्वरक के आवश्यकता, अउ उपलब्धता के स्थिति के जानकारी लीन। ए दउरान बताए गीस कि छत्तीसगढ़ म चालू खरीफ सीजन बर ग्यारा लाख तीस हजार मीट्रिक टन लक्ष्य के विरूद्ध अब तक बारा लाख छियानबे हजार मीट्रिक टन उर्वरक के भंडारण करे जा चुके हे।