विकसित कृषि संकल्प अभियान के चलत छत्तीसगढ़ म वैज्ञानिक मनके टीम ह गांव-गांव म जाके किसान मनले गोठ करत हे। इही कड़ी म आज दुरूग जिला म विकसित कृषि ल बढ़ावा दे खातिर बिसेसज्ञ अउ किसान मन एकजुट होइन। ए सत्र म आधुनिक कृषि तकनीक, बागवानी म प्रगति अउ कृषि के वैज्ञानिक हस्तक्षेप के महत्व म जोर दीन। ए कारीकरम म लगभग पचास झिन किसान मन सामिल होइन।
इही बीच, रईपुर के कृषि वैज्ञानिक डॉक्टर विनोद कुमार चौधरी ह आकाशवाणी समाचार ल बतइन कि कृषि वैज्ञानिक मन ह आज मंदिरहसौद अउ खुटरी गांव के दउरा करके उंहा के किसान मन ल कृषि अउ पशुपालन के बारे म जानकारी लीन।
मुख्यमंत्री-सुकमा
सुशासन तिहार के चलत मुख्यमंत्री विष्णुदेव साय ह आज सुकमा जिला के तोंगपाल गांव म पहुंचिन। ए बेरा म ओमन ह चौपाल लगाके गांव वाला मन ले गोठबात करके उंखर मनके समस्या ल सुनिन। श्री साय ह तोंगपाल म चलत समाधान सिविर म सोलह करोड़ पच्चीस लाख ले जादा के विकास कार्य के लोकार्पण करीन। ओमन ह स्टाल के अवलोकन करके सिविर म मिले आवेदन के निराकरण करे के निरदेस दीन। ए मउका म मुख्यमंत्री ह सुकमा, दंतेवाड़ा रद्दा बर दू सौ तीस करोड़, झीरम व्यपवर्तन योजना बर बत्तीस करोड़ पचास लाख, कावरा-कोपा अउ जैमर म पुलिया निर्माण, हमीरगढ़ म सामाजिक भवन, टहक-वाड़ा म पुल-पुलिया, तोंगपाल म समूह बर प्रसिक्षण केंद्र, मारेंगा म सीसी सड़क, एलेन-नार म पंचायत भवन ल बनाय के घोसना करीन।
उहें, मुख्यमंत्री ह आज बस्तर जिला के नारायणपाल गांव घलो पहुंचिन, जिहां ओमन ह गांव वाला मन ले गोठ करीन। संगेसंग कतकोन विकास कार्य बर कुल एक करोड़ ग्यारा लाख रूपिया देके घोसना करीन।
राज्य म सर्दी, खांसी अउ बुखार जइसे लक्षण वाले मरीज मनके बाढ़त संख्या ल देखत हुए स्वास्थ्य विभाग ह सजग हो गेहे। एखर बर जरूरी दिसा-निरदेस जारी करे गेहे। सबो सरकारी अउ निजी अस्पताल ल आईएचआईपी पोर्टल म एखर जरूरी प्रविष्टी करे बर कहे गेहे। उहें, मितानिन मनके माध्यम ले समुदाय स्तर म अइसने लक्षण के रिपोर्टिंग सुनिश्चित करे बर जोर दे गेहे। संगेसंग स्वास्थ्यकर्मी मन ल एखर इलाज अउ प्रबंधन के प्रसिक्षण देके संग मास्क लगाय बर घलो कहे गेहे। अस्पताल मन म जरूरी दवाई अउ सुरक्षा उपकरण के उपलब्धता सुनिश्चित करे बर निरदेस दे गेहे, जउन मरीज मन उपर लक्षणात्मक उपचार के असर न हो या फेर जउन मन ल आने बीमारी घलो हवय ओमन ल कोविड-नाइंटीन जांच बर भेजे जाही अउ जरूरत पड़े म उंखर मनके सैंपल ल एम्स रईपुर म जीनोम सीक्वेंसिंग बर भेजे जाही।
सुप्रीम कोर्ट नीट परीक्षा
सर्वोच्च न्यायालय ह आज निरदेस दीन हे कि पंद्रह जून के होवइया राष्ट्रीय स्नात्कोत्तर पात्रता-सह प्रवेस परीक्षा-नीट पीजी ह दू पाली के जघा म अब एके पाली म करे जाही। न्यायमूर्ति विक्रमनाथ के अध्यक्षता वाले पीठ ह अधिकारी मन ल निरदेस दीन हे कि ओमन ह एखर बर व्यवस्था करय अउ ए सुनिश्चित करे जाय कि ए जम्मों प्रक्रिया म पारदर्सिता बने रहय।
सर्वदलीय प्रतिनिधिमंडल-दौरा
आतंकवाद ल खतम करे बर भारत के दृढ़ प्रतिबध्दता ल दुनिया के आगू प्रस्तुत करे के उद्देस्य ले सात सर्वदलीय संसदीय प्रतिनिधि मंडल मन ह आने-आने देस म उच्च स्तरीय चर्चा करत हे। कांग्रेस सांसद शशि थरूर के अगुवाई म एक प्रतिनिधिमंडल ह कोलंबिया के राजधानी बोगोटा पहुंचिन। श्री थरूर ह किहीन कि आतंकवादी अउ ओमन ल पइसा उपलब्ध कराय, प्रसिक्षित करे, हथियार दे अउ ओमन ल रहय बर सुरक्षित जघा दे वाला मनके बीच के मिलीभगत ल दुनिया देखत हे।
उहें, भारत के एक आने सर्वदलीय संसदीय प्रतिनिधि मंडल ह काली सउदी अरब म अपन तीन दिवसीय राजनयिक मिसन ल संपन्न करीन। प्रतिनिधिमंडल ह हाले म सीमा पार हमला ल देखत हुए आतंकवाद के खिलाफ भारत के अडिग रूख म जोर दीन।
पीबी-शब्द
प्रसार भारती प्रसारण अउ प्रसार बर साझा ऑडियो-विजुअल, पीबी सब्द ह यूट्यूबर, पॉडकास्ट करइया अउ वीडियो संपादक मन ल निसुल्क सेवा देके उद्देस्य ले पंजीकरण करे बर आमंत्रित करे हे। पीबी सब्द ह कापी राइट-मुक्त, प्रमाणिक अउ उपयोग म सुरक्षित सामग्री बर एक अच्छा स्त्रोत हवय।
आईईडी विस्फोट
बीजापुर जिला म माओवादी मन कोति ले लगाय गे आईईडी के चपेट म आय ले तीन झिन गांव वाला मन ह घायल हो गेहे। जानबा के अनुसार एमन ह दम्पाया, एर्रागुफा पारा के रहइया हे, जउन कि अपन कुछु पारिवारिक काम ले बंदेपारा कोति जात रिहीन। इही बेरा म आज बिहनिया माओवाद मन कोति ले लगाय गे आईईडी म बिस्फोट होय ले तीन झिन लोगन के पैर अउ चेहरा म चोट आय हे, जेमन ल अस्पताल म भर्ती कराय गेहे।
दुर्घटना
खैरागढ़-छुईखदान-गंडई जिला के छुईखदान म आज एक ठिन बड़का रद्दा हादसा होगे। जेमा तीन झिन मजूर मनके मउत होगे। उहें, आने नौ झिन लोगन मन ह घायल हो गेहे। एमा तीन झिन के हालत नाजूक बताय जात हे। जेमन ल राजनांदगांव मेडिकल कालेज भेजे गेहे।
जानबा के अनुसार आज बिहनिया छुईखदान के छिंदारी बांध वाले रद्दा म एक ठिन गाड़ी म सवार होके लगभग बारह झिन मजूर मन देवरचा गांव कोति जात रिहीन, फेर इही बेरा म उंखर मन के गाड़ी ह अनियंत्रित होके एक ठिन पेड़ ले टकरा गे रिहीस। ए घटना म तीन झिन मजूर मनके गाड़ी के नीचे दबे ले मउका म ही मउत होगे।
ओति, जांजगीर-चांपा जिला के बम्हनीडीह म थाना करा दू ठिन मोटर साइकिल म टक्कर होगिस। एमा एक झिन जवान लइका के मउत होगे। उहें, तीन झिन आने लोगन मन ह गंभीर रूप ले घायल हो गेहे। जउन मन ल जिला अस्पताल म भर्ती कराय गेहे।
हज यात्रा
हज बर मुंबई के अंतर्राष्ट्रीय विमानतल ले छत्तीसगढ़ के दू सौ बयालीस हाजी मनके जत्था ह रवाना हो गेहे। ए जत्था म एक सौ बत्तीस झिन पुरूष अउ एक सौ दस झिन महिला हज यात्री ह सामिल हवय।
एखर ले पहिली छत्तीसगढ़ राज्य हज कमेटी के पूर्व अध्यक्ष मोहम्मद असलम खान अउ कार्यपालन अधिकारी डॉक्टर एस.ए.फारूकी ह बिसेस बस ल हरा झंडी दिखाके एयरपोर्ट बर रवाना करीन।
उच्च न्यायालय-एसईसीएल नोटिस
छत्तीसगढ़ उच्च न्यायालय ह सरायपाली ओपन कास्ट परियोजना बर बुदबुद गांव के भुंइया के अधिग्रहण के बाद गांव वाला मन ल नौकरी देके के मामला म एसईसीएल सीएमडी ल एक ठिक नोटिस देहे।
जानबा के अनुसार एक भुंइया के अधिग्रहण ह बछर दू हजार सात म एसईसीएल कोति ले करे गे रिहीस। जेखर बाद गांव वाला मन ल नौकरी देके वादा घलो करे गे रिहीस, फेर कई बछर के बाद घलो ओमन ल नौकरी नइ मिलिस। एखरे ले नाराज होके ग्रामीण मन ह उच्च न्यायालय म एक ठिन याचिका लगाय रिहीन।
बातों-बातों में
ननकी राम कंवर-पुलिस महानिदेशक पत्र
पूर्व गृह मंत्री ननकी राम कंवर ह राजधानी रईपुर समेत प्रदेस के आने जिला म ट्रैफिक पुलिस उपर अवैध वसूली करे के आरोप लगइन हे। श्री कंवर ह पुलिस महानिदेसक ल चिट्टी लिखके किहीन हे कि ट्रैफिक पुलिस ह गाड़ी चलइया मन ले जबरन वसूली करत हे। ओमन ह आरोप लगइन हे कि राजधानी के कतकोन प्रमुख रद्दा म ट्रैफिक पुलिस अउ दलाल मनके मिलीभगत ले ‘‘नाका सिस्टम‘‘ चलत हे। जेमा गाड़ी ल रोकके चालक ले पइसा वसूले जात हे।