विकसित कृषि संकल्प अभियान छत्तीसगढ़
प्रदेस म आज ले ‘‘विकसित कृषि संकल्प अभियान‘‘ के सुरूआत हो गेहे। मुख्यमंत्री विष्णुदेव साय ह रईपुर जिला के गांव भैंसा म राखे गे कारीकरम म ए अभियान के सुभारंभ करीन। ए मउका म श्री साय ह विकसित कृषि संकल्प अभियान म दस जागरूकता रथ ल हरियर झंडी दिखाके रवाना करीन। कारीकरम म प्रधानमंत्री आवाय योजना म बने एक सौ दस पक्का मकान के चाबी हितग्राही मन ल सौंपिन। ए दउरान ओमन ल स्पष्ट करीन कि बांचे पात्र परिवार ल ‘‘आवास प्लस-प्लस योजना‘‘ म जोड़े जाही। ए मउका म मुख्यमंत्री ह गांव भैंसा अउ तीर-तखार के क्षेत्र के विकास खातिर करीबन साढ़े तीन करोड़ रूपिया के लागत के आने-आने विकास काम के घोसना करीन। एमा गांव भैंसा म प्राथमिक स्वास्थ्य केंद्र अउ हाई स्कूल भवन बनाय बर डेढ़ करोड़ रूपिया, हायर सेकेंडरी स्कूल बर पचास लाख अउ गांव अमोड़ी म पाइप लाइन बढ़वार खातिर बयालिस लाख रूपिया सामिल हे। एखर संगेसंग श्री साय ह गांव भैंसा म नवा पुलिस चौकी खोले के घोसना करीन।
ओति, बिलासपुर जिला म विकसित कृषि संकल्प अभियान म कलेक्टर संजय अग्रवाल ह प्रचार रथ ल हरियर झंडी दिखाके रवाना करीन। ए प्रचार वाहन ले बिसेसज्ञ गांव-गांव जाके किसान मन ल किसानी ले जुड़े नवा तकनीक के संबंध म जानकारी दीही। संगेसंग कृषि वैज्ञानिक मन कोति ले किसान मन संग सोज्झे गोठबात करत उन्नत खेती, जैविक खेती, नवा तकनीक अउ योजना के संबंध म घलो जानकारी दे जाही।
कृषि संकल्प अभियान-किसान सम्मान
भारतीय कृषि अनुसंधान परिषद-आईसीएआर म आज ले सुरू होय विकसित कृषि संकल्प अभियान म रईपुर के जैविक स्ट्रेस प्रबंधन संस्थान के निदेसक डॉक्टर पी.के.राय अउ वैज्ञानिक के टीम आने-आने जिला म राखे गे जागरूकता कारीकरम तकनीकी प्रदर्सनीय अउ किसान संवाद कारीकरम म सामिल होइन। ए बेरा म डॉक्टर राय ह बतइन कि करीबन डेढ़ करोड़ किसान मन तक पहुंचे के लक्ष्य हरय। ओमन यहू बतइन कि दस ले जादा वैज्ञानिक मनके टीम आने-आने जिला म घूम-घूम के किसान मन संग गोठबात करत हे। ए अभियान म स्मार्ट कृषि उपकरण, ड्रोन वर्टिकल फार्मिंग, कृत्रिम बुध्दिमत्ता आधारित तकनीक, बायो-फोर्टिफाइड फसल, उन्नत सिंचाई विधि, मौसम पूर्वानुमान उपकरण अउ फसल कटई के बाद के प्रबंधन ले जुड़े तकनीक के प्रदर्सन करे जात हे।
उहें, किसान मन बर प्रसिक्षण सत्र घलो राखे जात हे।
खरीफ फसल एमएसपी-मुख्यमंत्री
केंद्रीय मंत्रिमंडल कोति ले काली धान समेत चौदह ठिन खरीफ फसल के न्यूनतम समर्थन मूल्य-एम.एस.पी. म बढ़वार ल मंजूरी देके फइसला म छत्तीसगढ़ के मुख्यमंत्री विष्णुदेव साय ह प्रधानमंत्री नरेंद्र मोदी के आभार जतइन हे। ओमन बतइन कि धान के न्यूनतम समर्थन मूल्य म उनहत्तर रूपिया के बढ़वार होय ले छत्तीसगढ़ के किसान मन ल फायदा मिलही।
उहें, प्रदेस के किसान मन ह ए फइसला के सुवागत करीन हे।
मुख्यमंत्री अभिनंदन-समारोह
मुख्यमंत्री विष्णुदेव साय आज रईपुर के इंदिरा गांधी कृषि विश्वविद्यालय म राखे गे अखिल भारतीय विद्यार्थी परिषद के नागरिक अभिनंदन समारोह म संघरीन। कारीकरम म बोलत मुख्यमंत्री ह किहीन कि युवा सक्ति राष्ट्र के सक्ति हे। ओमन किहीन कि बछर दू हजार सैंतालीस तक भारत ल विकसित राष्ट्र बनाय म युवा मन के महत्ता के भूमिका होही। श्री साय ह किहीन कि नवा शिक्षा नीति ले युवा मन ल रोजगार ले जोड़े जात हे।
सर्वदलीय प्रतिनिधि मंडल-दौरा
भारत के सात बहुदलीय संसदीय प्रतिनिधि मंडल आतंकवाद के खातमा बर अपन विदेस यात्रा के दउरान उच्च स्तरीय गोठबात करत हे। एमा डीएमके सांसद के. कनिमोई के अगुवई म एक प्रतिनिधि मंडल ह ग्रीस म विदेस मंत्रायल के बड़का अधिकारी मनले भेंट करीन। भारतीय प्रतिनिधि मंडल ह आतंकवादी घटना करइया, योजना बनइया अउ वित्तपोषित करइया मन बर जवाबदेही सुनिश्चित करे म ग्रीस के मदद के आह्वान करीन। ओति रोम म भाजपा सांसद रविशंकर प्रसाद ह मीडिया के प्रश्न के जुवाब देत किहीन कि वैश्विक आतंकवाद के अभिसाप के संबंध म दूनों देस के बिचार म समानता हवय। पनामा म सर्वदलीय प्रतिनिधि मंडल के अगुवई करत कांग्रेस सांसद शशि थरूर ह भारतीय दूतावास के एक कारीकरम म किहीन कि पहलगाम म बर्बर आतंकवादी हमला पाकिस्तानी सेना के कुटिल मंसा ल पूरा करे बर करे गे रिहीस।
कोयला घोटाला मामला-जमानत
कोयला घोटाला मामला म निलंबित आईएएस अधिकारी रानू साहू, कारोबारी सूर्यकांत तिवारी अउ पूर्व डिप्टी सेक्रेटरी सौम्या चौरसिया ल सुप्रीम कोर्ट ह सर्त संग अंतरिम जमानत दे देहे। सरत के मुताबिक तीनों आरोपी छत्तीसगढ़ म नइ रइही, काबर कि उंखर कोति ले गवाह मन ल परभावित करे के आसंका हरय। सुप्रीम कोर्ट के न्यायाधीस सूर्यकांत अउ दीपांकर दत्ता के डबल बेंच ह मामला के सुनवई करत निरदेस दीन कि कहू कोनो भी आरोपी गवाह ल परभावित करे सबूत संग छेड़छाड़ करे, या फेर जांच म कोनो कीसम के बाधा डारे के परयास करथे त राज्य सरकार अदालत म अर्जी देके उंखर जमानत रद्द करवा सकत हे।
रानी अहिल्या बाई होल्कर जयंती
रानी अहिल्या बाई होल्कर के तीन सौंवी जयंती म आज मुख्यमंत्री के रईपुर स्थित निवास म संगोष्ठी होइस। कारीकरम के अगुवई मुख्यमंत्री विष्णुदेव साय ह करीन। उहें, मध्यप्रदेस के पंचायत अउ ग्रामीण विकास मंत्री प्रहलाद सिंह पटेल ह प्रमुख वक्ता के रूप म संगोष्ठी ल संबोधित करीन। एमा केंद्रीय आवासन अउ सहरी कार्य मंत्री तोखन साहू, कृषि मंत्री रामविचार नेताम घलो संघरीन। संगोष्ठी म आने-आने वरग के बुध्दिजीवी, समाज सेवी डॉक्टर, इंजीनियर, आर्किटेक्ट, वकील अउ साहित्यकार घलो मौजूद रिहीन। ए मउका म मुख्यमंत्री ह राजमाता रानी अहिल्या बाई होल्कर के योगदान ल सुरता करत भारत के सांस्कृतिक एकता अउ सुशासन के प्रतीक बतइन।
उहे, मध्य प्रदेस के पंचायत अउ ग्रामीण विकास मंत्री प्रहलाद सिंह पटेल ह किहीन कि रानी अहिल्या बाई होल्कर ह अट्ठाईस बछर के शासनकाल म धर्म सत्ता अउ न्याय सत्ता के आवाज बुलंद करीन। ओमन अपन जीवन म कतकोन अनुकरणीय काम करीन। संगोष्ठी ल प्रदेस भाजपा अध्यक्ष किरण सिंह देव अउ छत्तीसगढ़ विधानसभा के पूर्व उपाध्यक्ष नारायण चंदेल ह घलो संबोधित करीन।
मुख्यमंत्री-समीक्षा बैठक
मुख्यमंत्री विष्णुदेव साय ह काली बालोद म तीन जिला नारायणपुर, कांकेर अउ बालोद के अधिकारी मनके बइठका लेके सरकारी योजना के कामकाज के समीक्षा करीन। ए मउका म मुख्यमंत्री ह जम्मों अधिकारी मनले किहीन कि ओमन विकसित छत्तीसगढ़ के सोच ल साकार करे म सक्रिय भागीदारी निभावय। बइठका म मुख्यमंत्री ह सुशासन तिहार के दउरान मिले अर्जी के जल्दी निपटारा करे के निरदेस दीन। ओमन बालोद जिला म गन्ना अउ कांकेर, नारायणपुर जिला के किसान मन ल दलहन-तिलहन फसल के खेती करे बर समझाइस देबर किहीन। संगेसंग आजीविकामूलक गतिविधि ल बढ़ावा दे ड्रोन दीदी कारीकरम म बिसेस धियान देबर अउ अधोसंरचना विकास कारीकरम ल गुणवत्ता संग समय -सीमा के भीतरी करे के निरदेस दीन। ए मउका म मुख्यमंत्री ह बालोद जिला के देवरी अउ डौंडीलोहारा म पांच सौ करोड़ रूपिया के लागत ले उच्चदाब विद्युत उपकेंद्र अउ ग्यारा करोड़ सैंतालीस लाख रूपिया के लागत ले जुनवानी ले चिखली रद्दा बनाय के जानकारी दीन।
चावल उत्सव
प्रदेस म एक ले सात जून तक चावल उत्सव मनाय जाही। ए दउरान प्रदेस के इकयासी लाख ले जादा राशन कारडधारी परिवार ल जून-जुलाई अउ अगस्त महिना के चंउर इकट्ठा बांटे जाही। ए संबंध म राज्य शासन ह प्रदेस के उचित मूल्य के दुकान ल चांउर के आबंटन जारी कर देहे।
अउ अब जानन मौसम के हाल…
दक्षिण-पश्चिम मानसून के आगमन छत्तीसगढ़ के दंतेवाड़ा जिला म हो गेहे। मौसम विभाग के मुताबिक अवइया दू-तीन दिन म दक्षिण-पश्चिम मानसून छत्तीसगढ़ के कुछेक अउ हिस्सा के संगेसंग उत्तर पूर्व के राज्य ओड़िसा अउ पश्चिम बंगाल के कुछेक भाग म पहुंचही। जेखर प्रभाव ले प्रदेस म कतकोन जघा छूटपुट बरसा गरज-चमक संग छींटा बौछार होय के संभावना हे।
इही बीच, आज संझा रईपुर म छूटपुट बरसा होइस। उहें, गौरेला-पेण्ड्रा-मरवाही जिला म हवा गरेर संग भारी बरसा होय के समाचार मिले हे।