आर्थिक मामला के मंत्रिमंडलीय समिति ह चौदह ठन खरीफ फसल के न्यूनतम समर्थन मूल्य-एम.एस.पी. म बढ़ोतरी ल मंजूरी दे देहे। सूचना अउ प्रसारण मंत्री अश्वनी वैष्णव ह आज नई दिल्ली म पत्रकार मन ले गोठबात करत बतईन कि सरकार ह अवइया विपणन सत्र बर खरीफ फसल के एम.एस.पी. म बढ़ोतरी करे हे, जेखर ले किसान मन ल उंखर उपज बर फायदा वाले मूल्य तय करे जा सकय।
केन्द्रीय मंत्रिमंडल ह बछर दू हजार पच्चीस-छब्बीस बर संशोधित ब्याज छूट योजना के तहत ब्याज के छूट ल जारी रखे के मंजूरी देहे। एखर उद्देश्य किसान क्रेडिट कार्ड के माध्यम ले किसान मन ल सस्ता ब्याजदर म अल्पकालिक ऋण देवाना हे।
सर्वदलीय प्रतिनिधिमंडल-दौरा
जनता दल यूनाइटेड के सांसद संजय झा के अगुवई म संसदीय प्रतिनिधिमंडल आज इंडोनेशिया के राजधानी जकार्ता पहुंचीन। ए भारत के ऑपरेशन सिंदूर के कूटनीतिक प्रयास के हिस्सा हे। अभी तक ए प्रतिनिधिमंडल ह जापान, दक्षिण कोरिया अउ सिंगापुर के दौरान कर डरे हे, जउन ह भारत डहार ले पाकिस्तान समर्थित आतंकवाद के खिलाफ वैश्विक अभियान के हिस्सा हे। ए दउरान श्री झा ह कहिन कि भारत के नीति आतंकवाद ल बर्दाश्त करे के बिल्कुल नइह हे। ए प्रतिनिधिमंडल ह अंतर संसदीय सहयोग समिति के उपाध्यक्ष मुहम्मद हुसैन फदलुल्लाह अउ इंडोनेशिया-भारत संसदीय मित्रता समूह के अध्यक्ष मोहम्मद रफीक ले भेंट करीन।
उहें, शिवसेना के सांसद श्रीकांत शिंदे के अगुवई म प्रतिनिधिमंडल ह कांगो के यात्रा खतम करके सिएरा लियोन बर प्रस्थान करे हे। एखर पहिली श्री शिंदे ह किहीन कि पूरा दुनिया ह पहलगाम आतंकी हमला के खिलाफ भारत बर अपन संवेदना जताय हे।
भारतीय जनता पार्टी के सांसद रविशंकर प्रसाद के अगुवई म सबो दल के संसदीय शिष्टमंडल ह रोम पहुंच गेहे। ए शिष्टमंडल ऑपरेशन सिंदूर के बारे म सीमा पार आतंकवाद के खिलाफ भारत के मजबूत अउ एकजुट संदेस पहुंचाही।
इही बीच, कांग्रेस सांसद शशि थरूर के अगुवई म पनामा पहुंचे भारतीय शिष्टमंडल ह उहां के संसद के अध्यक्ष डाना कास्टानेडा के संग बइठका करीन। ए दउरान श्री थरूर ह किहीन कि भारत ल युद्ध करे म कोनो दिलचस्पी नइ रिहीस, फेर अइसन सोचे गीस कि आतंकवाद ले जुड़े हरकत के जवाब जरूरी देना चाही।
विकसित कृषि संकल्प अभियान
छत्तीसगढ़ संघरा देसभर म काली उनतीस मई ले ‘‘कृषि संकल्प अभियान सुरू‘‘ होही। केन्द्रीय कृषि मंत्री शिवराज सिंह चौहान काली ओडिसा के पुरी ले ए अभियान के सुरूवात करही। बारह जून तक चलइया ए अभियान के लक्ष्य देस के सात सौ जिला के लगभग डेढ़ करोड़ किसान मन तक पहुंचना हे।
ए अभियान ल लेके छत्तीसगढ़ म सबो तैयारी होगे हवय। कृषि मंत्री रामविचार नेताम ह आज रईपुर म पत्रकार मन ले गोठबात करत बतईन कि ए अभियान राज्य के सबो तैंतीस जिला म चलाय जाही। मुख्यमंत्री विष्णुदेव साय काली रईपुर जिला के आरंग विकासखंड के भैंसा गांव ले ए अभियान के सुरूआत करही। श्री नेताम ह बतईन कि राज्य के सबो जिला के कुल छब्बीस सौ स्थान म सौ ठन टीम डहार ले कार्यक्रम करे जाही। अभियान बर हर जिला म तीन ठन टीम बनाय गे हवय अउ एक ठन टीम ह दू जगह म कार्यक्रम करही, जेमा कृषि विशेषज्ञ अउ वैज्ञानिक मन रइही अउ ओमन ह किसान मन ल खेती-किसानी ले जुड़े सलाह दीहीं। संगेसंग किसान मन ल जैविक खेती बर घलो प्रेरित करही।
पंडीराम मंडावी-पद्मश्री
राष्ट्रपति द्रौपदी मुर्मू ह काली नई दिल्ली म राखे गे एक ठन समारोह म नारायणपुर जिला के ग्राम गढ़बेंगाल के पंडीराम मंडावी ल पद्मश्री सम्मान ले विभूषित करीन। ए सम्मान ओमन ल जनजातीय वाद्य यंत्र निर्माण अउ काष्ठ शिल्प कला के क्षेत्र म उंखर अद्भूत अउ उल्लेखनीय योगदान बर दे गीस।
पद्मश्री सम्मान मिले म मुख्यमंत्री विष्णुदेव साय ह श्री मंडावी ल बधाई देवत किहीन कि ए सम्मान छत्तीसगढ़ के जनजातीय प्रतिभा अउ सांस्कृतिक समृद्धि के गौरवपूर्ण प्रतीक हे। ओमन किहीन कि श्री मंडावी जइसन कलाकार मन ह अपन साधना ले ए सिद्ध करीन हे कि हमर कला विश्व म अपन प्रभाव छोड़ सकत हे। श्री साय ह किहीन कि ए सम्मान बस्तर के लोक परंपरा, शिल्प अउ सांस्कृतिक चेतना ल राष्ट्रीय गौरव दिलाय के दिसा म बड़े उपलब्धि हे।
राज्यपाल-कांकेर
राज्यपाल रमेन डेका ह आज अपन कांकेर प्रवास के दउरान अधिकारी मनके बइठका लेके शासन डहार ले चलाय जावत कतकोन योजना म होय काम के जानकारी लीन। ओमन अधिकारी मन ल एखर बारे म निरदेस दीन। बइठका म राज्यपाल ह जल संरक्षण उपर जोर देवत किहीन कि जिला के सासकीय भवन के संगेच निजी भवन म घलो वाटर हार्वेस्टिंग जरूरी करे जाय। ओमन ह अधिकारी मन ले सड़क के किनारे अउ खाली जघा म सरकारी कार्यालय म जादा ले जादा पौधा लगाय बर किहीन। संगेसंग राज्यपाल ह योजना बनाके बरसा के पानी ल सहेजे उपर जोर दीन।
अपन दउरान म राज्यपाल ह कांकेर जिला पंचायत परिसर म एक पेड़ मां के नाम अभियान के तहत आम के पौधा लगाके पर्यावरण संरक्षण के संदेस दीन।
राज्यपाल आज कांकेर के सिंगारभाट के ‘काउंटर टेरिरिज्म एंड जंगलवार फेयर‘ महाविद्यालय घलो पहुंचीन। ए दउरान ओमन ह जवान मनके अभ्यास के अवलोकन करके उंखर उत्साह बढ़ईन। एखर बाद महाविद्यालय के म्यूजियम म छत्तीसगढ़ के प्रमुख माओवादी घटनाक्रम ल घलो जानीन।
मुख्यमंत्री-कांकेर
सुशासन तिहार के तहत मुख्यमंत्री विष्णुदेव साय आज कांकेर जिला के मांदरी गांव पहुंचीन। ए दउरान ओमन ह चौपाल लगाके ग्रामीण मन ले गोठबात करके उंखर समस्या जानीन। ए मउका म श्री साय ह मांदरी हाईस्कूल म बाउंड्रीवॉल बनाय बर बीस लाख रूपिया, आंगनबाड़ी केन्द्र भवन म बाउंड्रीवॉल बर पांच लाख रूपिया, साल्हेभाट म म सीसी सड़क बनाय बर पन्द्रह लाख रूपिया अउ झूरा नाला ले सिंचाई बर साढ़े तीन करोड़ रूपिया के स्वीकृति दे जाय के घोसना करीन।
युक्तियुक्तकरण-प्रदर्शन
प्रदेस म दस हजार ले जादा स्कूल मनके युक्तियुक्तकरण करे के राज्य सरकार के फैसला के विरोध म कतकोन जिला ले आय सिक्षक मन ह आज नवा रायपुर के तूता के धरनास्थल म प्रदर्शन करीन। ओमन ह राज्य सरकार ले स्कूल के युक्तियुक्तकरण के फइसला ल वापस लेके मांग करीन। प्रदर्शनकारी सिक्षक मन ह किहीन कि राज्य सरकार के फैसला सिक्षा गुणवत्ता ले खिलवाड़ अउ सरकारी स्कूल ल कमजोर करे के प्रयास हे। ओमन किहीन कि राज्य सरकार डहार ले बछर दू हजार आठ के सेटअप म करे जावत बदलाव के प्रदर्शनकारी सिक्षक मन ह विरोध करीन। चौबीस ले जादा सिक्षक संघ ह ए आंदोलन ल अपन समर्थन दीन हे। एखर अलावा छत्तीसगढ़ कर्मचारी-अधिकारी फेडरेशन के संयोजक कमल वर्मा ह बतईन कि फेडरेशन ह घलो सिक्षक मनके मांग के समर्थन करे हे।
धरना के बाद प्रदर्शनकारी सिक्षक मन ह मंत्रालय के घेराव बर निकलीन। ुफेर पुलिस ह ओमन ल रस्ताच म रोक दीस।
सरकारी बैंक घोटाला-आरोपी गिरफ्तार
बलरामपुर जिला के शंकरगढ़ अउ कुसमी सहकारी बैंक म करीबन साढ़े छब्बीस करोड़ रूपिया के घोटाला के ग्यारह झिन आरोपी मन ल पुलिस ह गिरफ्तार कर लेहे। एमा सहायक मुख्य पर्यवेक्षक, संस्था प्रबंधक, लेखापाल अउ कम्प्यूटर ऑपरेटर सामिल हे। आरोप हे कि एमन मिलजुलके फर्जी दस्तावेज के आधार म बहुत अकन खाता खोलीन अउ ए खाता मनके माध्यम ले करोड़ों रूपिया के ट्रांसफर करके फर्जीवाड़ा करीन।
अउ अब पेस हे मौसम के हाल…
दक्षिण-पश्चिम मानसून के प्रवेस आज छत्तीसगढ़ म होगे हे। अवइया दू दिन म छत्तीसगढ़ के अउ कुछ भाग, ओडिशा अउ पश्चिम बंगाल के कुछ भाग अउ सिक्किम म पहुंच के संभावना हे। मौसम विभाग के अनुसार एक ठन कम दबाव के क्षेत्र उत्तर-पश्चिम बंगाल के खाड़ी म बने हे। एखर प्रबल अवदाब के रूप म उत्तर बंगाल के खाड़ी के उपर परिवर्तित होय के संभावना हे, जेखर असर ले काली प्रदेस म कतकोन जघा म हल्का ले मध्यम बरसा होय के या गरज-चमक के संग छींटा पड़े के संभावना आसार हे। उहें, दक्षिण छत्तीसगढ़ म एक-दू जघा म भारी बरसा होय के संभावना हे।