राष्ट्रपति द्रौपदी मुर्मू अब ले थोरकुन देर बाद नई दिल्ली म राखे गे एक ठन समारोह म देसभर ले चुने गे विभूति मन ल पद्म पुरस्कार ले सम्मानित करही। एमा छत्तीसगढ़ के नारायणपुर जिला के ग्राम गढ़बेंगाल के पंडी राम मंडावी घलो सामिल हे, जउन मन ल राष्ट्रपति पद्मश्री ले सम्मानित करही।
संगीत नाटक अकादमी-आवेदन
संगीत नाटक अकादमी, नई दिल्ली डहार ले बछर दू हजार चौबीस-पच्चीस बर दे जाने वाला पुरस्कार बर सात जुलाई तक आवेदन मंगाय गे हवय। संगीत, नृत्य, रंगमंच, पारंपरिक-लोक-आदिवासी संगीत अउ पपेटरी-मूक अभियन संघरा दूसर श्रेणी म कलाकार मन ह आवेदन कर सकत हे। आवेदक कलाकार के उमर एक अप्रैल दू हजार पच्चीस के न्यूनतम चालीस बछर होना चाही। आवेदक ल अपन बायोडाटा, जन्म प्रमाण पत्र के फोटोकापी, पासपोर्ट साईज फोटो, उपलब्धि के बारे अखबार म छपे लेख के कटिंग के फोटोकापी जमा करना होही। आवेदन पत्र नवा रईपुर अटल नगर के सेक्टर सत्ताईस के संस्कृति अउ राजभाषा कार्यालय म जमा करे जा सकत हे।
उहें, संगीत नाटक अकादमी, नई दिल्ली डहार ले उस्ताद बिस्मिल्लाह खान युवा पुरस्कार बर घलो युवा कलाकार मन ले सात जुलाई तक आवेदन मंगाय गे हवय।
सर्वदलीय-प्रतिनिधिमंडल
भारत के सर्वदलीय प्रतिनिधिमंडल ह आने-आने देस के दउरा करके आतंकवाद बर जीरो टॉलरेंस के संदेस के माध्यम ले वैश्विक स्तर म आतंकवाद बर पाकिस्तान के समर्थन ल उजागर करत हे। फ्रांस म दल के अगुवई करत भाजपा सांसद रविशंकर प्रसाद ह किहीन कि भारत आतंकवाद के खिलाफ लड़ाई म अपन एकजुटता के संदेस दुनिया ल देना चाहत हे।
दूसर सर्वदलीय प्रतिनिधिमंडल ह काली दक्षिण कोरिया, कुवैत, कतर, कांगो गणराज्य अउ स्लोवेनिया के नेता मन ह आतंकवाद के कोनो भी कृत्य ल दृढ़ता ले जवाब दे के भारत के नवा सिद्धांत के बारे म जानकारी दीन। कांग्रेस सांसद शशि थरूर के अगुवई म सर्वदलीय प्रतिनिधिमंडल म सामिल सांसद तेजस्वी सूर्या ह गयाना के नेशनल असेंबली के अध्यक्ष के आगू अपन भाषण म पाकिस्तान के आतंकवादी कृत्य के तथ्य दीन। कुवैत म भाजपा सांसद बैजयंत पांडा ह किहीन कि भारत अब पाकिस्तान ले आतंकवाद के मामला म चुप नइ बइठही अउ एखर कड़ा जवाब दीही। श्री पांडा ह किहीन कि भारत अब परमाणु ब्लैकमेल के आगे नइ झुकही।
स्कूल-युक्तियुक्तकरण
प्रदेस के दस हजार चार सौ तिरसठ स्कूल मनके युक्तियुक्तकरण करे जाही। ए संबंध म स्कूल शिक्षा विभाग ह आदेस जारी कर देहे। विभाग ह ई-संवर्ग के पांच हजार आठ सौ उनचास अउ टी-संवर्ग के चार हजार छह सौ चौदह स्कूल के युक्तियुक्तकरण करे के फइसला लेवत एला तत्काल प्रभाव ले लागू कर देहे।
इही बीच, मुख्यमंत्री विष्णुदेव साय ह मीडिया ले गोठबात करत युक्तियुक्तकरण ल लेके सिक्षक संघ डहार ले करे जावत विरोध के बारे म किहीन कि ए फइसला लइका मनके हित म करे गे हवय। ओमन किहीन कि कोनों-कोनों स्कूल मन म सिक्षक मनके संख्या जादा हे, त कोनो-कोनो स्कूल म बहुत कम हे, युक्तियुक्तकरण के माध्यम ले एला संतुलित करे जाही।
तेंदूपत्ता-संग्रहण
राज्य म ए बखत तेंदूपत्ता संग्रहण के काम चलत हे। अभी तक तेरह लाख बाईस हजार ले जादा मानक बोरा तेंदूपत्ता सकेले जा सके हे। एखर एवज म संग्राहक मन ल सात सौ सत्ताईस करोड़ पचास लाख रूपिया ले जादा के भुगतान करे जाही। छत्तीसगढ़ राज्य लघु वनोपज संघ डहार ले अभी तक एक लाख बत्तीस हजार ले जादा संग्राहक मन ल चौरासी करोड़ चालीस लाख रूपिया के भुगतान करे जा चुके हे।
मुख्यमंत्री-सारंगढ़-बिलाईगढ़
मुख्यमंत्री विष्णुदेव साय आज सारंगढ़-बिलाईगढ़ जिला के कनकबीरा गांव म सुशासन तिहार के अंतर्गत आयोजित जनचौपाल म सामिल होइन। ए दउरान ओमन ह ग्रामीण मन ले संवाद करके उंखर समस्या सुनीन। ओमन ह संबंधित अधिकारी मन ल ग्रामीण मनके समस्या के तुरंत निपटारा करे के घलो निरदेस दीन।
ए मउका म मुख्यमंत्री ह कनकबीरा के आश्रित ग्राम नरगीखोल म लात नाला उपर पुलिया बनाय के संग मंगल भवन, कन्या छात्रावास अउ गोड़म म पंचायत भवन बनाय के घोसना करीन।
खेल मंत्री-निर्देश
खेल मंत्री टंकराम वर्मा ह खेल विभाग म सीधी अउ संविदा पद म भर्ती जल्दी सुरू करे के निरदेस देहे। आज रईपुर म होय खेल अउ युवा कल्याण विभाग के समीक्षा बइठका म श्री वर्मा ह अधिकारी मन ले राज्य खेल अलंकरण बर विज्ञापन जारी करे बर किहीन। बइठका म विभागीय योजना उपर कामकाज अउ चलत खेल गतिविधि जइसन कतकोन मुद्दा उपर अधिकारी मन ले गोठबात करे गीस। ओमन बलौदाबाजार-भाटापारा, रायगढ़, सारंगढ़-बिलाईगढ़, खैरागढ़-छुईखदान-गंडई अउ मोहला-मानपुर-अंबागढ़ चौकी जिला म प्रसिक्षक के नियुक्ति करे के अउ प्रशिक्षण केन्द्र के संचालन ल जल्दी सुरू करे जाय के निरदेस दीन।
माओवादी आत्मसमर्पण/मुठभेड़
सुकमा जिला म आज अट्ठारह झन माओवादी मन ह पुलिस के आगू आत्मसमर्पण करे हे। ए सबो माओवादी मन उपर कुल उनचालीस लाख रूपिया के इनाम रिहीस। एमा बस्तर डिवीजन, अउ पी.एल.जी.ए. बटालियन नंबर-एक ले जुड़े चार हार्डकोर माओवादी मन सामिल हे। आत्मसमर्पण करइया माओवादी मन ल राज्य सरकार के पुनर्वास नीति म प्रोत्साहन राशि के संग दूसर सुविधा घलो दे जाही।
इही बीच, नारायणपुर जिला के अबूझमाड़ इलाका म पाछु इक्कीस मई के माओवादी अउ सुरक्षा बल के बीच मुठभेड़ होय रिहीस, जेमा डिस्ट्रिक्ट रिजर्व गार्ड-डीआरजी के जवान मन ह शीर्ष नक्सली नेता अउ सीपीआई माओवादी संगठन के महासचिव नंबाला केशव राव उर्फ बसव राजू संघरा सत्ताईस झिन माओवादी मन ल मारे रिहीन। मुठभेड़ के बाद मउका के तलासी ले सुरक्षा बल ल बछर दू हजार दस म दंतेवाड़ा जिला म होय ताड़मेटला हमला के दउरान बसवराजू अउ उंखर साथी मन डहार ले लूटे गे एके-सैंतालीस रायफल बरामद करे हे। उहें, बछर दू हजार सत्रह म नारायणपुर जिला के गवादी अउ सुकमा जिला के बुरकापाल हमला के दउरान माओवादी मन डहार ले लूटे गे हथियार घलो बरामद करे गेहे।
ईओडब्ल्यू-चालान
आर्थिक अपराध अन्वेषण ब्यूरो-ईओडब्ल्यू ह डीएमएफ घोटाला मामला म सामिल तत्कालीन उपसचिव सौम्या चौरसिया अउ कलेक्टर रानू साहू संघरा नौ झन दूसर आरोपी मनके खिलाफ चालान पेस कर देहे। करीबन छह हजार पन्ना के ए चालान रईपुर के विशेष न्यायालय म पेस करे गीस। अभी सबो आरोपी मन ह न्यायिक रिमांड म रईपुर के केन्द्रीय जेल म बंद हे।
माओवादी आत्मसमर्पण/मुठभेड़
सुकमा जिला म आज अट्ठारह झन माओवादी मन ह पुलिस के आगू आत्मसमर्पण करे हे। ए सबो माओवादी मन उपर कुल उनचालीस लाख रूपिया के इनाम रिहीस। एमा बस्तर डिवीजन, अउ पी.एल.जी.ए. बटालियन नंबर-एक ले जुड़े चार हार्डकोर माओवादी मन सामिल हे। आत्मसमर्पण करइया माओवादी मन ल राज्य सरकार के पुनर्वास नीति म प्रोत्साहन राशि के संग दूसर सुविधा घलो दे जाही।
इही बीच, नारायणपुर जिला के अबूझमाड़ इलाका म पाछु इक्कीस मई के माओवादी अउ सुरक्षा बल के बीच मुठभेड़ होय रिहीस, जेमा डिस्ट्रिक्ट रिजर्व गार्ड-डीआरजी के जवान मन ह शीर्ष नक्सली नेता अउ सीपीआई माओवादी संगठन के महासचिव नंबाला केशव राव उर्फ बसव राजू संघरा सत्ताईस झिन माओवादी मन ल मारे रिहीन। मुठभेड़ के बाद मउका के तलासी ले सुरक्षा बल ल बछर दू हजार दस म दंतेवाड़ा जिला म होय ताड़मेटला हमला के दउरान बसवराजू अउ उंखर साथी मन डहार ले लूटे गे एके-सैंतालीस रायफल बरामद करे हे। उहें, बछर दू हजार सत्रह म नारायणपुर जिला के गवादी अउ सुकमा जिला के बुरकापाल हमला के दउरान माओवादी मन डहार ले लूटे गे हथियार घलो बरामद करे गेहे।
ईओडब्ल्यू-चालान
आर्थिक अपराध अन्वेषण ब्यूरो-ईओडब्ल्यू ह डीएमएफ घोटाला मामला म सामिल तत्कालीन उपसचिव सौम्या चौरसिया अउ कलेक्टर रानू साहू संघरा नौ झन दूसर आरोपी मनके खिलाफ चालान पेस कर देहे। करीबन छह हजार पन्ना के ए चालान रईपुर के विशेष न्यायालय म पेस करे गीस। अभी सबो आरोपी मन ह न्यायिक रिमांड म रईपुर के केन्द्रीय जेल म बंद हे।
कोयला खदान-हादसा
कोरबा जिला म साउथ ईस्टर्न कोल फील्डस लिमिटेड-एस.ई.सी.एल. के दीपका अउ गेवरा कोयला खदान म आज होय हादसा म दू झन युवक के मउत होगे हे अउ एक झिन युवक गंभीर रूप ले घायल हे। मिले जानकारी के अनुसार ए तीनों झन कोयला चोरी करे बर खदान के अंदर गे रिहीन। इही दउरान खदान के धसके ले दू झन युवक के मउकाच म मउत होगे। उंखर सव ल बाहिर निकाले बर रेस्क्यू ऑपरेशन चलाय जावत हे।
नशीली दवाइयां-कार्रवाई
खाद्य अउ औषधि विभाग डहार ले नशीला दवई उपर रोक लगाय के उद्देश्य ले छापामार कार्रवाई करे जावत हे। इही कड़ी म दुरूग जिला म नशीला दवई के अवैध खरीद-बिक्री म सामिल पाय म एक झन मेडिकल संचालक संघरा चार झन लोगन के खिलाफ नारकोटिक ड्रग्स एंड साइकोट्रॉपिक सब्स्टेंसेस अधिनियम के तहत मामला दर्ज करे गेहे। उहें, सरगुजा जिला म घलो गर्भपात कराय वाला दवई के अवैध व्यापार मन लगे मेडिकल स्टोर्स के खिलाफ औषधि अउ प्रसाधन सामग्री अधिनियम म कार्रवाई करे गेहे।
एखर अलावा धमतरी, बस्तर, दुरूग, बिलासपुर, महासमुंद, बेमेतरा, कोरबा अउ गरियाबंद जिला के औषधि निरीक्षक मन डहार ले कोटपा अधिनियम म शिक्षण संस्थान के तीर के पान दुकान अउ दूसर सार्वजनिक जघा म चलान काटके दस हजार रूपिया ले जादा के जुर्माना वसूले गीस।
खेलो इंडिया-पदक
बिहार के पटना, राजगीर, गया, भागलपुर अउ बेगूसराय म चार ले पन्द्रह मई तक होय खेलो इंडिया यूथ गेम्स म छत्तीसगढ़ के खिलाड़ी मन ह सानदार प्रदर्सन करत चौदह ठन पदक जीतीन हे। एमा तीन स्वर्ण, एक रजत अउ दस कांस्य पदक सामिल हे। ए प्रतियोगिता म छत्तीसगढ़ के एक सौ पैंतीस सदस्यीय दल ह हिस्सा ले रिहीस, जेमा एक सौ छह खिलाड़ी अउ उनतीस सपोर्ट स्टाफ रिहीन। खिलाड़ी मन ह गतका, कलारीपट्टू, स्वीमिंग, बैंडमिंटन, जुडो, रग्बी, फेंसिंग, वेटलिफ्टिंग, थांगता, मलखंभ, कबड्डी, कुश्ती, बास्केटबॉल, शूटिंग अउ बॉक्सिंग जइसन पन्द्रह ठन खेल म सानदार प्रदर्शन करीन।
अउ अब पेस हे मौसम के हाल…
मौसम विभाग के अनुसार अवइया चौबीस घंटा के दउरान प्रदेस के कतकोन जघा म हल्का ले मध्यम बरसा होय के या गरज-चमक के संग छींटा पड़े के संभावना हे। उहें, एक-दू जघा म अंधड़ चले के, आकाशीय बिजली गिरे के अउ भारी बरसा होय के आसंका हे। भारी वर्षा के क्षेत्र मुख्य रूप ले दक्षिण छत्तीसगढ़ रइही।
इही बीच, राजधानी रायपुर संघरा प्रदेस के कुछेक जघा म आज मंझनिया बाद गरज-चमक के साथ तेज बरसा होय हे।
कोरबा जिला के सलवा गांव के छुईडोड़ा म आज मंझनिया आकाशीय बिजली गिरे ले पन्द्रह ठन मवेसी के मउत होगे।