काली दिल्ली म आयोजित होवइया एक ठिन समारोह म राष्ट्रपति द्रौपदी मुर्मू देसभर ले चुने गे विभूति मन ल पद्म पुरस्कार ले सम्मानित करही। एमा नारायणपुर जिला के गांव गढ़बेंगाल के पंडी राम मंडावी घलो सामिल हे, जेला राष्ट्रपति काली पद्मश्री सम्मान ले सम्मानित करही।
पारंपरिक कलाकार पंडी राम मंडावी ल एखर पहिली छत्तीसगढ़ सरकार डहार ले दाऊ मंदरा जी सम्मान ले सम्मानित करे जा चुके हे। श्री मंडावी पारंपरिक वाद्ययंत्र हाथ ले बजाय जाने वाला बांसुरी, दूसीर, सिंग के तोड़ी, कोटोड़का अउ उसूड़ ल बनाय म परांगत हे। श्री मंडावी न सिरिफ भारत म भलूक रूस, फ्रांस, जर्मनी, इटली जइसन देस म घलो अपन कला के प्रदर्सन कर चुके हे।
एआई डेटा सेंटर
रईपुर म जल्दी ही देस के परमुख आर्टिफिसियल इंटेलिजेंस आधारित डेटा सेंटर स्थापित होही। ए संबंध म आज टेक्नालाजी कंपनी ईएसडीएस सॉफ्टवेयर सौल्यूशन लिमिटेड ह छै सौ करोड़ रूपिया ले जादा के निवेस के प्रस्ताव मुख्यमंत्री विष्णुदेव साय के आगू प्रस्तुत करे हे। मुख्यमंत्री ले नई दिल्ली स्थित छत्तीसगढ़ सदन म भेंट के दउरान कंपनी के चेयरमेन पीयूष सोमानी अउ उपाध्यक्ष लोकेश शर्मा ह किहीन कि ए सेंटर न सिरिफ छत्तीसगढ़ भलूक पूरा भारत के डिजीटल भविष्य ल गति दिही। ए प्रस्ताव के माध्यम ले छत्तीसगढ़ ल एआई, क्लाउड टेक्नालाजी, साइबर सिक्योरिटी अउ डिजिटल स्टोरेज के क्षेत्र म अग्रणी राज्य बनाय के दिसा म ठोस पहल होही।
मुख्यमंत्री विष्णुदेव साय ह ए प्रस्ताव के स्वागत करत किहीन कि डिजीटल इंडिया के भावना ल छत्तीसगढ़ के धरती म उतारे बर ए निवेस ह मील के पथरा साबित होही।
दिल्ली दउरा के दउरान ही करमवीर इलेक्ट्रानिक्स लिमिटेड ह मुख्यमंत्री विष्णुदेव साय के आगू रईपुर म अत्याधुनिक ट्रांसफार्मर निर्माण इकाई स्थापित करे के प्रस्ताव प्रस्तुत करीन। ए इकाई म तीन सौ करोड़ रूपिया ले जादा के निवेस करे जाही, जेखर ले छत्तीसगढ़ के नांव देस के सबले बड़का ट्रांसफार्मर निर्माण केंद्र मन म सामिल हो जही।
विकसित कृषि संकल्प अभियान
देसभर म उनतीस मई ले विकसित कृषि संकल्प अभियान सुरू होही। बारह जून तक चलइया ए अभियान के लक्ष्य देस के सात सौ जिला के करीबन डेढ़ करोड़ किसान मन तक पहुंचना हे। केंद्रीय कृषि मंत्री शिवराज सिंह चौहान ह किसान मन ले विकसित कृषि संकल्प अभियान म भाग ले के अपील करे हे।
प्रधानमंत्री-कार्यकाल
प्रधानमंत्री नरेंद्र मोदी ह आज अपन कार्यकाल के ग्यारा बछर पूरा कर लेहे। आजे के दिन बछर दू हजार चौदह म श्री मोदी ह भारत के प्रधानमंत्री के रूप म सपथ ले रिहीन। ए ह देस के आधुनिक राजनीतिक इतिहास म एक ठिन महत्वपूर्ण बेरा रिहीस, काबर कि एमन भारत म गठबंधन के राजनीति के तीस बछर के युग ल खतम कर दे रिहीन अउ लोगन ह भारतीय जनता पार्टी ल स्पष्ट अउ निर्णायक जनादेस दे रिहीन।
स्काउट्स-गाइड्स-समारोह
आज राजभवन म स्काउट्स अउ गाइड्स के राज्य स्तरीय अलंकरण समारोह आयोजित करे गीस। समारोह के मुख्य अतिथि राज्यपाल रमेन डेका ह सर्वश्रेष्ठ स्काउटर, गाइडर, रोवर, रेंजर अउ स्काउट-गाइड ल राज्यपाल पुरस्कार ले सम्मानित करीन। ए मउका म राज्यपाल ह किहीन कि जलवायु परिवर्तन के समस्या ल देखत प्रकृति अउ पर्यावरण ल बचाना हम सबो के जिम्मेदारी हरय। स्काउट्स अउ गाइड्स ल एमा अपन सक्रिय योगदान देना चाही।
श्री डेका ह छत्तीसगढ़ के स्काउट्स, गाइड्स, रोवर, रेंजर डहार ले आपदा प्रबंधन, पर्यावरण संरक्षण, जल संरक्षण, पेड़ लगाना अउ ओला बचाय रखना, साइबर अपराध, जाति-भेदभाव जइसन आने बिसय उपर आने-आने माध्यम ले समाज ल जागरूक करे के दिसा म करे जात काम के प्रशंसा करीन।
ए कारीकरम म आने-आने जिला ले आय स्काउटर, गाइडर, रोवर, रेंजर उपस्थित रिहीन।
पीएम आयुष्मान वय-वंदना कार्ड
छत्तीसगढ़ ह पीएम आयुष्मान वय-वंदना कार्ड बनाय म देस म पांचवां स्थान पाय हे। राज्य के तीन लाख साठ हजार ले जादा वरिष्ठ नागरिक मन ल एखर माध्यम ले निसुल्क इलाज मिलत हे। पाछू अक्टूबर महिना ले आयुष्मान वय-वंदना कार्ड के पंजीयन म तेजी आय हे, जेखर सेति छत्तीसगढ़ वय-वंदना कार्ड बनाय के मामला म पांचवां स्थान म आ गेहे। मुख्यमंत्री विष्णुदेव साय के निरदेस म राज्य के सबो जिला म बिसेस अभियान चलाके सरलग आयुष्मान वय-वंदना कार्ड बनाय जात हे, जेखर ले कोई भी पात्र वरिष्ठ नागरिक निसुल्क इलाज पाय ले छूटे झन।
मतदान केंद्र-मोबाइल
मतदान दिवस म व्यवस्था ल अच्छा बनाय के उद्देस्य ले आयोग ह प्रचार के अनुमति सीमा ल निर्वाचन कानून के अनुरूप मतदान केंद्र ले सौ मीटर के दूरिहा राखे हे। मतदान दिवस म मतदान केंद्र के सौ मीटर के दूरिहा म चुनाव प्रचार के अनुमति नइ होही।
भिलाई-पावर प्लांट
दुरूग जिला के भिलाई स्थित एन.एस.पी.सी.एल. पावर प्लांट म चार हजार करोड़ रूपिया के लागत ले आठ सौ मेगावाट क्षमता वाले नवा पावर प्लांट स्थापित करे जाही। ए संयंत्र एनटीपीसी अउ स्टील अथारिटी ऑफ इंडिया लिमिटेड-सेल डहार ले संयुक्त रूप ले लगाय जाही। ए परियोजना ले ऊर्जा उत्पादन म बढ़ोत्तरी के संगेसंग स्थानीय विकास, रोजगार, आधारभूत संरचना अउ क्षेत्रीय कनेक्टिविटी ल घलो मजबूती मिलही। ए प्लांट ल सुचारू रूप ले चलाय बर कोयला के आपूर्ति कोरबा अउ ओडिसा ले करे जाही। उहें, जल आपूर्ति बर बालोद जिला के मोहड़ जलासय ले पानी ले जाही।
खबर के मुताबिक एनटीपीसी-सेल के संयुक्त उद्यम एन.एस.पी.सी.एल. पावर प्लांट भिलाई म संचालित हे, जेमा दू सौ पचास मेगावाट के संयंत्र ले बिजली उत्पादन करे जात हे। आठ सौ मेगावाट क्षमता वाले नवा पावर प्लांट के स्थापित होय ले अब तेरह सौ मेगावाट बिजली के उत्पादन करे जा सकही।
अउ अब मौसम के हाल….
दक्षिण-पश्चिम मानसून के आगू बढ़े बर अनुकूल परिस्थिति बने हे। अवइया तीन दिन म दक्षिण-पश्चिम मानसून के मध्य अरब सागर के कुछके भाग, महाराष्ट्र, कर्नाटक, तेलांगाना, आंध्रप्रदेस के कुछेक भाग पश्चिम मध्य बंगाल के खाड़ी अउ उत्तर बंगाल के खाड़ी के कुछेक भाग उत्तर पूर्व म स्थित राज्य मनके बांचे भाग अउ उप हिमालयीन पश्चिम बंगाल अउ सिक्किम म पहुंचे के संभावना हे।
प्रदेस म काली कतकोन जघा म हल्का ले मध्यम बरसा होय अउ गरज-चमक के संग छींटा पड़े के संभावना हे। उहें, एक-दू जघा मन म गरज-चमक के संग हवा गरेर, गाज गिरे के संग भारी बरसा होय के संभावना हे। भारी बरसा के क्षेत्र मुख्यतः बस्तर संभाग के जिला दुरूग अउ रईपुर संभाग के कुछेक जिला संभावित हे।
अउ अब थोरकुन समाचार सार म –
– प्रदेस म आज माईलोगिन मन ह पारंपरिक श्रध्दा अउ आस्था के संग वट सावित्री उपास पूजा करीन। ए मउका म सुहागिन माईलोगिन मन ह बरगद पेड़ के पूजा करके अपन पति के लंबा उमर, सुख-समृध्दि अउ परिवार के मंगल कामना करीन। सारंगढ़-बिलाईगढ़ जिला के राजापारा म आज माईलोगिन मन ह पारंपरिक श्रध्दा अउ आस्था के संग वट सावित्री उपास पूरा करीन। ए दउरान माईलोगिन मन ह कथा सुन के अउ बरगद पेड़ के चक्कर लगात पूजा-पाठ करीन।
– दुरूग जिला म पचास पुलिस कर्मी मनके तबादला करे गेहे। एसएसपी विजय अग्रवाल ह दू निरीक्षक, तीन उपनिरीक्षक अउ पांच प्रधान आरक्षक संग चालीस आरक्षक के स्थानांतरण करे हे। ए संबंध म आज आदेस जारी कर दे गेहे।
अउ
– गौरेला-पेण्ड्रा-मरवाही जिला के पेंड्रा स्थित लोहारी मोड़ म आज एक ठिन ट्रेक्टर के चपेट म आय ले क्षेत्र के प्रधान पाठक के मउका म ही मउत होगे।