मन की बात-01
प्रधानमंत्री नरेंद्र मोदी ह किहीन हे कि ऑपरेसन सिंदूर ह दुनिया भर म आतंकवाद ले लड़ई म नवा उछाह भर देहे। आकाशवाणी ले ‘‘मन की बात‘‘ कारीकरम म प्रधानमंत्री ह किहीन कि ऑपरेसन सिंदूर सिरिफ सेना मनके काम के संगेसंग राष्ट्र के संकलप अउ साहस ल बताथे। ऑपरेसन सिंदूर के दउरान हमर सेना मन ह जउन हिम्मत देखइन, ओखर ले हर हिन्दुस्तानी के सिर ऊंचा होगे। हमर सेना मन ह सीमा पार करके आतंकवादी ठिकाना ल खतम कर दीन। प्रधानमंत्री ह किहीन कि ऑपरेसन सिंदूर के दउरान देस के हथियार के परयोग करके भारत ह दुनिया ल अपन ताकत देखाय हे। ए अभियान के बाद पूरा देस म वोकल फॉर लोकल ल लेके एक ठिन नवा ऊर्जा दिखत हे।
श्री मोदी ह देस के जम्मों मनखे मन ले देस म बने उत्पाद मन ल प्राथमिकता देके बिनती करीन। प्रधानमंत्री ह किहीन कि ऑपरेसन सिंदूर ह पूरा देस म राष्ट्र भक्ति के भावना भर देहे अउ देस के तिरंगा ल ऊंचा उठाय हे।
देस के कतकोन सहर मन म तिरंगा यात्रा घलो निकाले गीस। कतकोन सहर मन म सिविल डिफेंस वॉलिटियर बनाय बर बड़ संख्या म युवा मन आगू आवत हे।
मन की बात-02
प्रधानमंत्री ह किहीन कि छत्तीसगढ़ के नक्सलवादी वाले जघा के लइका मन म विज्ञान कोति रूझान जादा हे अउ खेल मन म घलो बढ़िया प्रदर्सन करत हे। ओमन किहीन कि दंतेवाड़ा जिला म कक्षा दसवीं अउ बारहवीं के परीक्षा परिणाम सानदार रिहीस। करीबन पंचानवे प्रतिसत रिजल्ट के संग ए जिला दसवीं के नतीजा म पहिली जघा बनाइस। त उहें, बारहवीं के परीक्षा म ए जिला ह प्रदेस म छठवां स्थान पाय हे। एक समय अइसे रिहीस जब दंतेवाड़ा जिला म माओवाद के डर राहय, फेर आज शिक्षा म इंहा के पढ़इया लइका मन ह झंडा गाड़त हे।
मन की बात कारीकरम म प्रधानमंत्री डहार ले दंतेवाड़ा के प्रशंसा उपर कलेक्टर ह आकाशवाणी ल बतइन कि जिला प्रशासन डहार ले बिसेस रूप ले पोटाकेबिन म चलाय गे ‘‘छू लो आसमान‘‘ कारीकरम ले ए ह संभव हो पाइस।
प्रधानमंत्री ह किहीन कि विश्व मधुमक्खी दिवस भारत म स्वास्थ्य, रोजगार अउ आत्मनिर्भरता के उदाहरण हरय। प्रधानमंत्री ह प्रदेस के कोरिया जिला के उदाहरण देवत किहीन कि इंहा के आदिवासी किसान ह सोन हनी नांव ले एक ठिन सुध्द जैविक सहद ब्रांड बनाय हे।
जानबा के मुताबिक कोरिया जिला के सोनहत गांव म मधुमक्खी पोसे बर किसान मनके चयन करके सात दिन के बिसेस प्रसिक्षण दे गीस। कलेक्टर ह बतइन कि ए परियोजना दिसंबर दू हजार चौबीस ले सुरू करे गेहे।
मन की बात कारीकरम म श्री मोदी ह विश्व योग दिवस ल लेके किहीन कि एसो घलो दुनिया के लोगन मन म योग ल लेके जोस अउ उछाह देखे जात हे।
मन की बात-03
प्रधानमंत्री ह किहीन कि देस म पहिली खेलो इंडिया यूथ गेम्स सफल रिहीस अउ एमा कुल छब्बीस रिकार्ड बनिस। प्रधानमंत्री ह कतकोन स्कूल मन म लगाय जात सुगर बोर्ड के घलो जिकर करीन। ओमन किहीन कि सीबीएसई के ए पहल के उद्देस्य हे लइका मन ल उंखर सुगर इंटेक्ट के बारे म जागरूक करे जाय।
प्रधानमंत्री ह मन की बात कारीकरम म पेपर वेस्ट अउ रिसाईक्लिंग के घलो जिकर करीन। ओमन बतइन कि एक ठन पेपर के रिसाइक्लिंग ले सत्रह ठिन पेड़ कटे ले बचथे अउ हजारों लीटर पानी के बचत होथे। ओमन लोगन मनले विनती करीन कि ओमन घर अउ ऑफिस मन म पेपर ल अलग करके रिसाइक्लिंग के काम म योगदान करय।
मुख्यमंत्री-प्रधानमंत्री आभार
मन की बात कारीकरम म प्रधानमंत्री डहार ले दंतेवाड़ा अउ बस्तर के प्रसंसा उपर मुख्यमंत्री विष्णुदेव साय ह उंखर आभार जताय हे। मुख्यमंत्री ह किहीन हे कि छत्तीसगढ़ के सरकार ह प्रधानमंत्री के विकसित भारत के नक्सा कदम म चलत हे अउ विकसित छत्तीसगढ़ ए अभियान म अपन बड़का भूमिका निभाही।
भारत-अर्थव्यवस्था
नीति आयोग के मुख्य कार्यकारी अधिकारी बीवीआर सुब्रह्मण्यम ह किहीन हे कि भारत ह जापान ल पाछू छोड़त दुनिया के चौथा सबले बड़का अर्थव्यवस्था वाले देस बन गेहे। दिल्ली म नीति आयोग के गवर्निंग काउंसिल के बइठका के बाद डॉक्टर सुब्रहमण्यम ह बिस्वास जतइन कि अवइया दू ले तीन साल म भारत ह तीसर सबले बड़का अर्थव्यवस्था वाले देस बन जाही।
कोरोना-मरीज
रईपुर म एक झिन मरीज म कोरोना संक्रमण के पुष्टि होय के बाद स्वास्थ्य विभाग ह जम्मों जिला बर दिसा निरदेस जारी कर देहे। स्वास्थ्य अउ परिवार कल्याण विभाग ह वीडियो कॉन्फ्रेंसिंग के माध्यम ले जम्मों जिला के सर्वेलेन्स अधिकारी मनके संग बइठका करीन। बइठका म आयुक्त स्वास्थ्य सेवा डॉक्टर प्रियंका शुक्ला ह निरदेस दीन कि अस्पताल मन म अवइया अइसन मरीज जेमन ल सर्दी, खांसी, बुखार या गला म खरास होय त ओखर मनके बने ढंग ले जांच करे जाय। ओमन किहीन कि एकीकृत रोग निगरानी के दिसा निरदेस के मुताबिक सीवियर एक्यूट रेस्पिरेटरी इंफेक्शन वाले मरीज मनके डॉक्टर के सलाह के बाद भर्ती करे जाय। त ऐति, स्वास्थ्य मंत्री श्याम बिहारी जायसवाल ह विभाग के जम्मों अधिकारी मन ल इन्फ्लुएंजा जइसन लक्षण के निगरानी करे के निरदेस दीन हे।
झीरम-श्रध्दांजलि
झीरम घाटी म कांग्रेस नेता मन उपर होय हमला हे आज बारह साल होगे। आज प्रदेस कांग्रेस अध्यक्ष दीपक बैज ह झीरम घाटी म बने सहीद स्मारक जाके कांग्रेस नेता मन ल श्रध्दांजलि दीन।
ऐति, भाजपा के प्रदेस अध्यक्ष किरण सिंह देव अउ कार्यकर्ता मन ल घलो दरभा जनपद पंचायत जाके सहीद मन ल श्रध्दांजलि दीन।
जानबा के मुताबिक पच्चीस मई दू हजार तेरह के झीरम म माओवादी मन डहार ले करे गे हमला म कांग्रेस के बड़का नेता अउ सुरक्षा बल के जवान मनके मउत होगे रिहीस।
दुर्घटना
महासमुंद जिला के तुमगांव म राष्ट्रीय राजमार्ग क्रमांक तिरपन म एक ठिन तेज रफ्तार कार ह खड़े हाइवा ले टकरागे ए घटना म तीन झिन लोगन के मउकच म पराण छूट गे अउ तीन झिन आने मनखे मन गंभीर रूप ले घायल होगे हे। हरम संवाददाता ले मिले जानबा के मुताबिक कांकेर जिला के नरहरपुर म एसबीआई बैंक के मैनेजर चंदन अभिषेक ह अपन गोसाइन, बेटा, मां-बाप अउ ड्राइवर के संग झारखंड के बोकारो ले रईपुर आवत रिहीन, तभेच हुरहा उंखर कार ह कोडार डैम के तीर खड़े हाइवा ले टकरागे।
उहें, इही जिला के सरायपाली म काली संझा एक ठिन फटफटी म बइठे चार झिन मनखे मन बिजली के खंभा ले टकरागे। ए घटना म दू झिन मनखे के मउकच म मउत होगे। त उहें, आने दू झिन मनखे मन के रईपुर म इलाज के दउरान मउत होगे।
सड़क दुर्घटना रोकथाम
गृह विभाग के अपर मुख्य सचिव मनोज पिंगुआ के अगुवई म मंत्रालय म होय समीक्षा बइठका म राज्य म सड़क दुर्घटना मन ल रोके बर निरदेस जारी करे हे। श्री पिंगुआ ह किहीन कि सड़क सुरक्षा उपाय सबके सहभागिता ले होना चाही। संगेसंग सड़क दुर्घटना ल रोके अउ यातायात ल बने ढंग ले बनाय उपर जोर दे गीस। ओमन दुर्घटना वाले जघा के पहिचान करके सुधार करे के बारे म किहीन। बइठका के दउरान परिवहन विभाग के सचिव एस. प्रकाश ह विभागीय गतिविधि के बारे म जानबा दीन।
अउ अब जानन के मौसम के हाल…
मौसम विभाग ह प्रदेस के करीबन आठ जिला मन बर आरेंज अलर्ट जारी करे हे। एमा सुकमा, धमतरी, महासमुंद, जशपुर अउ रायगढ़ सामिल हे। ए जिला मन म जोरदरहा हवा गरेर के संग गाज गिरे अउ बरसा होय के संभावना जताय गेहे।
मौसम विभाग के मुताबिक अवइया चौबीस घंटा के दउरान राज्य के कोनो-कोनो जिला म गरज-चमक के संग हल्का ले मध्यम बरसा हो सकथे।