अमृत भारत स्टेशन योजना-01
प्रधानमंत्री नरेन्द्र मोदी ह आज अमृत भारत स्टेशन योजना के तहत प्रदेस के संगेसंग अट्ठारह राज्य अउ केन्द्रसासित प्रदेस के छियासी ठिन जिला मन म एक सौ तीन पुनर्विकसित अमृत स्टेसन मनके उद्घाटन करीन। ए स्टेसन मन म छत्तीसगढ़ के डोंगरगढ़, भानुप्रतापपुर, भिलाई, उरकुरा अउ अंबिकापुर रेलवे स्टेशन सामिल हे। ए मउका म प्रधानमंत्री ह किहीन कि पाछु ग्यारह साल म देस म आधुनिक सड़क अउ रेलवे के क्षेत्र म कतकोन बड़का काम करे गेहे। ओमन किहीन कि एखर ले व्यापार, पर्यटन अउ उद्योग-धंधा ल बढ़ावा मिलही अउ जिनगी ह सरल होही।
प्रधानमंत्री ह किहीन कि अभी देस म करीबन सत्तर ठिन वंदे भारत रेलगाड़ी चलत हे। पाछु ग्यारह साल म कतकोन ओवर ब्रिज अउ रोड अंडर ब्रिज बनाय गेहे। चौतींस हजार किलोमीटर ले जादा के नवा रेल ट्रैक बिछाय गेहे।
आज के कार्यक्रम के मउका म रेलमंत्री अश्वनी वैष्णव ह किहीन कि प्रधानमंत्री के अगुवई म रेलवे म कतकोन सुधार के काम होवत हे।
रायपुर मंडल के उरकुरा रेलवे स्टेसन म होय कार्यक्रम म राज्यपाल रमेन डेका ह मुख्य अतिथि के रूप म सामिल होइन। ए मउका म ओमन किहीन कि प्रधानमंत्री के अगुवई म भारतीय रेलवे ह एक ठिन नवा बदलाव के दउर ले आगू बाढ़त हे।
त ओति, मुख्यमंत्री विष्णुदेव साय ह अंबिकापुर रेलवे स्टेसन म होय उद्घाटन कार्यक्रम म सामिल होइन। ए मउका म ओमन किहीन कि अंबिकापुर के संगेसंग प्रदेस के पांच रेलवे स्टेसन ह नक्सा म अब प्रमुख स्टेसन के रूप म सामिल होगे हे। एखर बर ओमन प्रधानमंत्री ल धन्यवाद दीन।
अमृत भारत रेलवे स्टेशन योजना के तहत कांकेर जिला के भानुप्रतापपुर रेलवे स्टेसन म होय उद्घाटन समारोह म उपमुख्यमंत्री अरूण साव ह सामिल होइन।
अमृत भारत स्टेशन योजना-02
त उहें, केन्द्रीय राज्यमंत्री तोखन साहू ह भिलाई रेलवे स्टेसन म होय उद्घाटन कार्यक्रम म सामिल होइन। ए स्टेसन ल छब्बीस करोड़ बीस लाख रूपिया के लागत ले अउ बने ढंग ले सुघ्घर बनाय गेहे।
नागपुर मंडल म अवइया राजनांदगांव जिला के डोंगरगढ़ रेलवे स्टेसन के घलो आज उद्घाटन होइस। कार्यक्रम सांसद संतोष पांडेय आय रिहीन।
जानबा के मुताबिक अमृत भारत स्टेशन योजना के तहत पुनर्विकसित ए स्टेसन मन ल आधुनिक ढंग ले बनाय गेहे। ए स्टेसन मन म इहां के लोक कला, संस्कृति अउ पंरपरा मनके झलक देखे बर मिलत हे।
प्रधानमंत्री-ऑपरेशन सिंदूर
प्रधानमंत्री नरेन्द्र मोदी ह किहीन हे कि भारत ह ऑपरेशन सिंदूर के दउरान आतंकवादी मनके ठिकाना ल नष्ट करके पाकिस्तान ल जोरदरहा जवाब देहे। राजस्थान के बीकानेर म एक ठिन जनसभा ल संबोधित करत प्रधानमंत्री ह किहीन कि सरकार ह सशस्त्र बल मनके कार्रवाई ल पूरा छूट दे रिहीन। एखर ले तीनों सेना मन ल अपन लक्ष्य ल पूरा करे म मदद मिलीस अउ पाकिस्तान ल घुटना टेके बर मजबूर होना पड़ीस।
प्रधानमंत्री ह किहीन कि पाकिस्तान ह आज तक भारत ले कोनों लड़ई नइ जीत सके हे। प्रधानमंत्री ह किहीन कि पाकिस्तान ल हर आतंकी हमला के भारी कीमत चुकाय बर पड़ही। श्री मोदी ह किहीन कि पाकिस्तान के संग न तो कोनों प्रकार के व्यापार होय अउ न गोठबात होही।
पर्यावरण-अभियान
केन्द्र सरकार ह विश्व पर्यावरण दिवस के पहिली आज राष्ट्रव्यापी जन-आंदोलन अभियान ‘‘एक राष्ट्र-एक मिशन : प्लास्टिक प्रदूषण समाप्त करें‘‘ के सुरूआत करीन। केन्द्रीय पर्यावरण मंत्री भूपेन्द्र यादव ह अपन सोशल मीडिया प्लेटफॉर्म उपर पहिली के एक ठिन वीडियो पोस्ट करत जम्मों लोगन मन ले प्लास्टिक प्रदूषण ल खतम करे बर बने जीवन शैली अपनाए, जागरूकता बढ़ाय अउ समूह के रूप म काम करे के बिनती करीन। मंत्रालय ह केहे गेहे कि ए अभियान भारत के प्रमुख पहल-मिशन लाइफ माने पर्यावरण बर जीवनशैली के संग, पर्यावरण ल बचाय अउ स्थिरता बर भारत के संकलप ल बताथे।
माओवादी-मुठभेड़
बीजापुर-सुकमा जिला के सीमा उपर आज सुरक्षा बल मनके संग होय मुठभेड़ म एक झिन हार्डकोर माओवादी मारे गीस। घटना वाले जघा ले माओवादी के सव के संग हथियार बरामद करे गेहे। ए मुठभेड़ म कोबरा बटालियन के एक झिन जवान सहीद होगे हे। उहें, एक झिन आने जवान घायल होगे हे।
संवाददाता ले मिले जानबा के मुताबिक सुकमा और बीजापुर के सीमा ले लगे तुमरेल म माओवादी मनके होय के सूचना मिले के बाद कोबरा बटालियन, डीआरजी अउ एसटीएफ के संयुक्त टीम ह तलाशी अभियान म निकले रिहीन। इही दउरान तुमरेल के जंगल म मुठभेड़ होइस।
एखर पहिली, काली नारायणपुर जिला के अबूझमाड़ जघा म होय मुठभेड़ म मारे गे सत्ताईस माओवादी मनके सव ल नारायणपुर पुलिस लाइन लाय गीस, जेमा ले दस झिन माओवादी के पहिचान कर ले गेहे।
जवान-श्रद्धांजलि
नारायणपुर जिला के अबूझमाड़ वाले जघा म काली होय मुठभेड़ अउ आईईडी विस्फोट के दू ठिन अलग-अलग घटना म सहीद होय जवान – खोटलूराम कोर्राम अउ रमेश हेमला ल आज नायायणपुर के शहीद स्मारक म श्रद्धांजलि दे गीस। ए मउका म पुलिस अधिकारी, जवान, परिवार वाले अउ जनप्रतिनिधि के संगेसंग कतकोन बड़का लोगन मन आय रिहीन।
जानबा के मुताबिक काली अबूझमाड़ क्षेत्र के जाटलूर-कुड़मेल के जंगल म माओवादी मनके संग होय मुठभेड़ म डीआरजी के जवान खोटलूराम कोर्राम शहीद होगे रिहीन। ए जवान नारायणपुर जिला के औरचा थाना क्षेत्र के भटबेड़ा गांव के रहइया रिहीस। त उहें, काली संझाच माओवादी मन डहार ले करे गे आईईडी विस्फोट के चपेट म आय ले बीजापुर के रमेश हेमला घलो शहीद होगे रिहीन।
खेलो इंडिया बीच गेम्स
केन्द्रसासित प्रदेस दीव के घोघला बीच म उन्नीस ले इक्कीस मई तक होय पहली खेलो इंडिया बीच गेम्स म छत्तीसगढ़ के पुरूष अउ महिला मलखंभ टीम ह स्वर्ण पदक जीते हे। प्रतियोगिता के पहिली दिन पुरूष टीम ह एक सौ चौबीस दशमलव पांच-पांच अंक के संग स्वर्ण पदक जीतीन। त उहें, दूसर दिन महिला टीम ह अस्सी दशमलव छह-शून्य अंक लेके स्वर्ण पदक अपन नाम करीन। एखरे संग पिरामिड प्रतियोगिता म घलो प्रदेस के पुरूष टीम ह रजत पदक जीते हे।
पुलिस विभाग-छुट्टी
समय-सीमा के भीतर प्रकरण मनके निपटारा के हवाला देवत पुलिस विभाग ह सनिच्चर के दे जाय छुट्टी ल अनिश्चिकाल बर रद्द कर देहे। ए बारे म अतिरिक्त पुलिस महानिदेशक कोति ले चिट्ठी जारी कर दे गेहे। चिट्ठी म केहे गेहे कि बाढ़त कामकाज के सेती समय-सीमा म प्रकरण मनके निपटारा करना जरूरी हे।
अउ अब पेस हे मौसम के हाल…
मौसम विभाग ह प्रदेस म काली हल्का ले मध्यम बरसा होय या गरज-चमक के संग बूंदाबांदी पड़े के संभावना जताय हे। उहें, एक-दू जघा म हवा-गरेर के संग गाज गिरे के चेतावनी घलो दे गेहे। मौसम विभाग के मुताबिक बंगाल के खाड़ी ले आवत नमी म कमी होय के सेती मौसम म बदलाव देखे ल मिलत हे।
इही बीच, बलरामपुर जिला के मझौली, जोगियानी अउ सुलसुली गांव म काली संझा गाज गिरे के आने-आने घटना म चाचा-भतीजा के संग तीन झिन लोगन के मउत होगे अउ तीन झिन आने मनखे गंभीर रूप ले घायल होगे हे, जउन मन ल अस्पताल म भर्ती कराय गेहे।
मुख्यमंत्री-जशपुर
मुख्यमंत्री विष्णुदेव साय अउ उंखर गोसइन कौशल्या साय ह काली जशपुर जिला के गांव दोकड़ा के जुन्ना जगन्नाथ मंदिर के जीर्णोद्धार के बाद होय प्राण-प्रतिष्ठा कार्यक्रम म सामिल होइन। मुख्यमंत्री ह भगवान जगन्नाथ के पूजापाठ करके प्रदेश के सुख-सांति के संग खुशहाली के कामना करीन। ए मउका म ओमन दोकड़ा म चौबीस लाख रूपिया ले जादा के लागत ले बने महतारी सदन के भूमिपूजन करीन।
अपन प्रवास के दउरान मुख्यमंत्री ह प्रधानमंत्री आवास योजना-ग्रामीण के हितग्राही संतु चक्रेस ल उंखर आवास के चाबी देके गृह प्रवेस करईन।
उप मंत्रिमंडलीय समिति-बैठक
खाद्य मंत्री दयालदास बघेल के अगुवई म काली मंत्रालय म उप मंत्रिमंडलीय समिति के बइठका होही। बइठका म चालू खरीफ विपणन बछर के बांचे धान के नीलामी के माध्यम ले निष्पादन अउ कस्टम मिलिंग करके मिलर मन ले चाउर जमा के स्थिति के संगेसंग अवइया खरीफ सीजन म किसान मन ले धान खरीदी बर तियारी के व्यवस्था के बारे म गोठबात करे जाही।