प्रदेस म सड़क दुर्घटना नगदी रहित उपचार योजना लागू कर दे गेहे। ए योजना के तहत सड़क दुर्घटना म घायल मनखे मन ल घटना के तारीख ले सात दिन के भीतर सूचीबद्ध अस्पताल म नगदी रहित उपचार के सुविधा मिलही। ए योजना म पीड़ित मन ल जादा ले जादा डेढ़ लाख रूपिया तक के मुफत इलाज दे जाही। ए बारे म सड़क सुरक्षा के अंतर्विभागीय लीड एजेंसी ह जिला कलेक्टर, वरिष्ठ पुलिस अधीक्षक अउ संबंधित जुड़े अधिकारी मन ल दिसा-निरदेस जारी कर दे गेहे।
एफएसएसएआई-फल
भारतीय खाद्य सुरक्षा अउ मानक प्राधिकरण-एफ.एस.एस.ए.आई. ह जम्मों राज्य अउ केन्द्रसासित प्रदेस मन ले निरीक्षण म तेजी लाय अउ गलत किसम ले फल पकाने वाला एजेंट मन ल रोके बर विशेष अभियान चलाय के आग्रह करे हे। संगेसंग सिंथेटिक रंग अउ मोम के संग फल ल रंगे अउ कोटिंग करे म घलो रोक लगाय हे। एफ.एस.एस.ए.आई. ह ए अधिसूचना म जम्मों राज्य अउ केन्द्रसासित प्रदेस मनके खाद्य सुरक्षा आयुक्त के संगेसंग एफ.एस.एस.ए.आई. के क्षेत्रीय निदेशक मन ले कैल्शियम कार्बाइड जइसन रसायन ले फल पकाने वाला एजेंट के खिलाफ फल बाजार अउ मंडी मन म कड़ी निगरानी राखे के आग्रह करे हे। एफ.एस.एस.ए.आई. ह जम्मों खाद्य व्यवसाय संचालक मन ले सुरक्षित प्रक्रिया के पालन करे के घलो आग्रह करे हे। प्राधिकरण ह कहिन कि मानदंड के कोनों भी उल्लंघन करे म अधिनियम के तहत कार्रवाई करे जाही।
मुख्यमंत्री-सुशासन तिहार
सुशासन तिहार के तहत मुख्यमंत्री विष्णुदेव साय आज दुरूग जिला के मुरमुंदा गांव पहुंचीन, जिहां ओमन अटल आवास योजना के तहत दू सौ छब्बीस आवास मनके लोकार्पण करीन। कार्यक्रम म मुख्यमंत्री ह आवास योजना के हितग्राही तुषार साहू ल घर के चाबी सौंप के प्रवेस करवईन। ओमन सबो हितग्राही मन ल बधाई देवत किहीन कि राज्य सरकार के प्राथमिकता हे कि प्रदेस के हरेक मनखे मन ल सुरक्षित घर मिल सकय। मुख्यमंत्री ह कहिन कि समाधान सिविर सिरिफ एक सरकारी आयोजन नो हे, बल्कि ए ह सासन-प्रसासन अउ जन मानस के प्रति उंखर काम के प्रमाण हरय। ए मउका म मुख्यमंत्री ह मुरमुंदा के हाईस्कूल ल हायर सेकेंडरी स्कूल म उन्नयन करे के घोसना घलो करीन।
एखर पहिली, श्री साय ह अछोटी गांव पहुंच के डायट कॉलेज परिसर म उनतीस लाख रूपिया ले बनत महतारी सदन के निरीक्षण करीन। ए मउका म श्री साय ह कहिन कि महतारी सदन, गांव म माईलोगिन मनके सशक्तिकरण अउ सामुदायिक संवाद के केन्द्र बनही।
निगम/मंडल-अध्यक्ष/उपाध्यक्ष
राज्य सरकार ह निगम-मंडल अउ आयोग म अध्यक्ष अउ उपाध्यक्ष पद के प्रभार म फेरबदल करे हे। केदारनाथ गुप्ता ल दुग्ध संघ के जगह छत्तीसगढ़ राज्य सहकारी बैंक के अध्यक्ष बनाय गेहे। उहें, श्रीनिवास मद्दी ल छत्तीसगढ़ स्टेट ब्रेवरेज कार्पोरेशन के अध्यक्ष नियुक्त करे गेहे। अइसने, चंद्रकांति वर्मा ल छत्तीसगढ़ राज्य पिछड़ा वर्ग के उपाध्यक्ष अउ शालिनी राजपूत ल हस्तशिल्प विकास बोर्ड के अध्यक्ष बनाय गेहे। मुख्यमंत्री विष्णुदेव साय ह पाछु नियुक्ति म संसोधन करत ए नियुक्त मनके अनुमोदन कर देहे।
भू-जल संवर्धन मिशन
मुख्यमंत्री विष्णुदेव साय ह थोरकिन देर बाद रायपुर के पंडित दीनदयाल उपाध्याय ऑडिटोरियम म भू-जल संवर्धन मिशन-शहरी के शुभारंभ करही।
एखर पहिली, भू-जल संवर्धन मिशन के पहली सत्र के उपमुख्यमंत्री अरूण साव ह सुभारंभ करीन। सत्र के दउरान श्री साव ह हाइड्रोलॉजिस्ट, कॉलोनाइजर्स, उद्योग समूह, राज्य सरकार के आने-आने विभाग के संग भू-जल अउ वर्षा जल संरक्षण म संवाद करीन।
तिरंगा यात्रा-जशपुर
ऑपरेशन सिंदूर के सफलता के बाद भारतीय सेना के सम्मान म ए दिन जगह-जगह तिरंगा यात्रा निकाले जावत हे। इही कड़ी म काली जशपुर के श्याम प्लेस ले बस स्टैंड तक तिरंगा यात्रा के आयोजन करे गीस। ए यात्रा म जशपुर विधायक रायमुनि भगत, पत्थलगांव विधायक गोमती साय, भाजपा के जिलाध्यक्ष भरत सिंह समेत भाजपा के आने-आने पदाधिकारी, कार्यकर्ता अउ जनप्रतिनिधि मन सामिल होइन।
माओवादी-गिरफ्तार
कांकेर जिला के बीनागुंड गांव ले सुरक्षा बल ह पांच झिन माओवादी ल गिरफ्तार करे हे। इंखर मन उपर कुल छत्तीस लाख रूपिया के इनाम घोसित रिहीस। ए माओवादी मनके तीर ले एक स्वचलित एसएलआर रायफल, एक थ्री नॉट थ्री रायफल, तीन एसएलआर रायफल, दू भरमार बंदूक समेत भारी मात्रा म दैनिक उपयोग के सामान बरामद करे गेहे।
एसीबी/ईओडब्ल्यू छापा
एंटी करप्शन ब्यूरो-एसीबी अउ आर्थिक अपराध अन्वेषण ब्यूरो-ईओडब्ल्यू के टीम ह सराब घोटाला मामला म पूर्व मंत्री कवासी लखमा के करीबी उद्योगपति, कारोबारी बिल्डर अउ व्यवसायी मनके दुरूग-भिलाई के घर अउ ठिकाना म आज बिहनिया छापा मारीन। मिले खबर के मुताबिक बिहनिया चार बजे ले एसीबी अउ ईओडब्ल्यू के कई टीम ह भिलाई अउ दुरूग म दबिस दीन। कार्रवाई के दउरान संदेही मनके घर अउ आने जगह ले बिसेस दस्तावेज, बैंक अकाउंट अउ जमीन के निवेस ले जुड़े दस्तावेज मिले हे।
उहें, महासमुंद जिला के बसना अउ सांकरा म घलो एसीबी अउ ईओडब्ल्यू के टीम ह दू लोगन के घर म छापामार कार्रवाई करे हे। एमा एक झिन व्यापारी अउ एक एलआईसी एजेंट बताय जावत हे। ए दूनों झन घलो पूर्व मंत्री कवासी लखमा के करीबी बताय जात हे।
बीएमओ-निलंबित
सरगुजा जिला के रघुनाथपुर के एक सरकारी अस्पताल म मृतक लइका के पोस्टमार्टम बर पीड़ित परिवार ल दस-दस हजार रूपिया मांगे अउ सव वाहन नइ मिले के मामला म जिला कलेक्टर ह धौरपुर के बीएमओ डॉक्टर राघवेंद्र चौबे ल निलंबित कर देहे। उहें, रघुनाथपुर प्राथमिक स्वास्थ्य केन्द्र म पदस्थ स्वास्थ्य अधिकारी अमन जायसवाल ल घलो हटा दे गेहे।
खबर के मुताबिक पाछु इतवार के रघुनाथपुर पुलिस चौकी क्षेत्र म दू झिन लइका घर के तीर डबरी म बुढ़ गे रिहीस अउ उंखर मउत होगे रिहीस।
मुख्यमंत्री-मुंगेली
मुख्यमंत्री विष्णुदेव साय ह मुंगेली म स्मार्ट सुरक्षा प्रणाली के तहत तैंतीस लाख रूपिया ले जादा के लागत वाले तैयार अत्याधुनिक सीसीटीवी कैमरा नेटवर्क अउ उन्नत पुलिस कंट्रोल रूम के लोकार्पण करीन। ए मउका म मुख्यमंत्री ह कहिन कि ए प्रणाली सिरिफ निगरानी तक सीमित नइ हे, बल्कि ए ह सहर के कानून व्यवस्था, ट्रैफिक प्रबंधन अउ आपातकालीन प्रतिक्रिया ल घलो अउ बने बनाही। खबर के मुताबिक स्मार्ट सुरक्षा प्रणाली के तहत सहर के सत्रह प्रमुख चउक-चउराहा मन म बैसठ सीसीटीवी कैमरा लगाय गेहे, जउन ल एक केन्द्रीकृत पुलिस कंट्रोल रूम ले सही बेरा म मॉनिटर करे जा सकथे।
उहें, मुख्यमंत्री ह मुंगेली के जिला ग्रंथालय म करीबन तीस लाख रूपिया के लागत ले बने अतिरिक्त कक्ष के लोकार्पण करीन।
अमृत भारत स्टेशन योजना
अमृत भारत स्टेशन योजना के तहत प्रधानमंत्री नरेन्द्र मोदी ह परन दिन बाईस मई के वीडियो कॉन्फं्रेसिंग के माध्यम ले एक सौ तीन पुनर्विकसित रेलवे स्टेसन के उद्घाटन करही। एमा दक्षिण पूर्व मध्य रेलवे के रायपुर मंडल अतर्गत उरकुरा, भिलाई अउ भानुप्रतापपुर स्टेसन घलो सामिल हे।
इही कड़ी म कार्मिक विभाग डहार ले रायपुर, भिलाई अउ भानुप्रतापपुर म स्कूली छात्र-छात्रा मन बर दू दिन के निबंध, स्लोगन अउ पेंटिंग प्रतियोगिता के आयोजन करे गीस, जेखर बिसय ‘‘मेरा अमृत स्टेसन या ऑपरेशन सिंदूर – वीरता के मिसाल‘‘ राखे गे रिहीस। ए प्रतियोगिता के विजेता मन ल बाईस मई के पुरस्कार दे जाही।
दुर्घटना
मुंगेली जिला के शीतलकुंडा गांव के तीर आज बिहनिया एंबुलेंस अउ ट्रक म टक्कर होगे। ए हादसा म एंबुलेंस डाईवर के मउत होगे हे। उहें, दू डॉक्टर समेत छह झिन लोगन गंभीर रूप ले घायल होगे हे। घायल मन ल मुंगेली के जिला अस्पताल म भर्ती कराय गेहे। मिले खबर के मुताबिक एंबुलेंस उत्तरप्रदेश के प्रतापगढ़ ले एक मरीज ल लेके रायपुर आवत रिहीस। इही दउरान शीतलकुंडा गांव के तीर ए हादसा होइस।