केंद्रीय कृषि मंत्री शिवराज सिंह चौहान ह किहीन हे कि देशभर म विकसित कृषि संकल्प अभियान सुरू करे जाही। ए अभियान ए महिना के उनतीस तारीख ले सुरू होही अउ बारह जून तक चलही। ए अभियान के उद्देस्य किसान मन ल कृषि संबंधी उन्नत तकनीकी अउ बीज के बारे म जानकारी देना हे। नई दिल्ली म संवाददाता सम्मेलन म श्री सिंह ह किहीन कि देसभर के सात सौ तेईस जिला मन म ए अभियान चलाय जाही अउ एखर ले लगभग डेढ़ करोड़ किसान लाभान्वित होही।
ओति, छत्तीसगढ़ म विकसित कृषि संकल्प अभियान सबो विकासखंड म चलाय जाही। जेखर समन्वय आईसीएआर राष्ट्रीय जैविक तनाव प्रबंधन संस्थान रईपुर डहार ले करे जाही। आईसीएआर एनआईबीएसएम के निदेशक डॉक्टर पी. के. राय ह बतइन कि ए संस्थान अउ कृषि विज्ञान केंद्र के वैज्ञानिक के संगेसंग कृषि, बागवानी, पशुपालन अउ मत्स्य पालन विभाग के अधिकारी मन ल सामिल करत संयुक्त टीम बनाय गेहे। एखर अलावा जनप्रतिनिधि अउ प्रगतिशील किसान घलो क्षेत्र स्तर के गतिविधि म भाग लिही। ओमन ह बतइन कि टीम मन ह हरेक दिन दू ले तीन चुने ग्राम पंचायत मन के दउरा करही। ए दउरान धान के सीधा बोआई, कीटनाशक के इस्तेमाल बर ड्रोन के इस्तेमाल, प्राकृतिक खेती ल बढ़ावा, उन्नत बीज के कीसम के प्रचार-प्रसार, उर्वरक के संतुलित उपयोग अउ कृषि म राज्य प्रायोजित योजना मनके बारे म किसान मन ल जानकारी दे जाही।
मुख्यमंत्री-सुशासन तिहार
मुख्यमंत्री विष्णुदेव साय सुशासन तिहार म आज गौरेला-पेण्ड्रा-मरवाही जिला के चुकतीपानी गांव पहुंचिन, जिंहा ओमन ह मीडिल स्कूल के प्रांगण म पेड़ तरी चौपाल लगाके लोगन के समस्या सुनिन। ए मउका म मुख्यमंत्री ह चुकतीपानी मीडिल स्कूल के मरम्मत अउ मीडिल स्कूल ग्राउण्ड ल मिनी स्टेडियम के रूप म विकसित करे जाय के घोसना करीन।
उहें, मुख्यमंत्री आज बिलासपुर जिला के आमागोहन गांव अउ मुंगेली जिला के बैगा बाहुल्य गांव बिजराकछार घलो पहुंचिन। ए दउरान ओमन ह चौपाल लगाके गांव वाले मनले गोठबात करीन।
आंगनबाड़ी-सामग्री गुणवत्ता-समिति
प्रदेस के आंगनबाड़ी केंद्र मन म दे जात सामग्री के गुणवत्ता जांच बर बिसेस समिति गठित करे गेहे। महिला अउ बालविकास मंत्री लक्ष्मीराजवाड़े ह मिले सिकायत ल संज्ञान म लेत जांच बर बिसेस समिति के गठन के आदेस दे रिहीन, जेमा विभाग के संचालक पदुमसिंह एल्मा ह रईपुर, दुरूग, बिलासपुर, जांजगीर-चांपा, जशपुर अउ सरगुजा जिला के आंगनबाड़ी केंद्र मन म वितरित समान के गुणवत्ता जांच बर एक ठिन बिसेसज्ञ समिति के गठन करे हे। समिति संदेहास्पद अउ परीक्षण योग्य नमूना ल राज्य शासन डहार ले मान्यता प्राप्त प्रयोगशाला म भेज के वैज्ञानिक विश्लेषण कराही। जांच समिति पंद्रह दिन के भीतर अपन रिपोर्ट प्रस्तुत करही, जेखर आधार म आगू के कार्रवाई करे जाही।
प्रधानमंत्री-मन की बात
प्रधानमंत्री नरेंद्र मोदी पच्चीस मई के आकाशवाणी म ‘‘मन की बात‘‘ कारीकरम म अपन बिचार देस अउ विदेस के लोगन के संग साझा करही। ए मासिक रेडियो कारीकरम के एक सौ बाईसवां एपिसोड होही। लोगन अपन बिचार अउ सुझाव टोल-फ्री नंबर 1800-11-7800 के माध्यम ले प्रस्तुत कर सकत हे। ओमन अपन सुझाव नरेंद्र मोदी ऐप या माई जीओवी-ओपन फोरम के माध्यम ले घलो साझा कर सकत हे। अवइया एपिसोड बर सुझाव ए महिना के तेईस तारीख तक स्वीकार करे जाही।
वित्तमंत्री- जगरगुंडा
वित्त मंत्री ओपी चौधरी ह काली सुकमा जिला के जगरगुंडा म समाधान सिविर म सामिल होके स्थानीय ग्रामीण मन ले मुलाकात करीन अउ ओखर समस्या के जानकारी लीन। ए मउका म वित्त मंत्री ह किहीन कि आज ले पच्चीस साल पहिली इंहा के राज्य ग्रामीण बैंक ल माओवादी मन ह लूट ले रिहीन। वर्तमान म हमर सरकार ह एक बार फेर इंडियन ओवरसिज बैंक के स्थापना करे हे। अब ग्रामीण अउ किसान के बैंकिंग काम जगरगुंडा म ही होही। ए दउरान वित्त मंत्री ह जगरगुंडा म सिंचाई सुविधा बर दु करोड़ रूपिया के लागत ले जलासय निर्माण, क्षेत्रीय युवा मन बर खेल विकास बर मिनी स्टेडियम अउ एक ठिन नवा मीडिल स्कूल के निर्माण करे के घोसना करीन।
सिपेट-कार्यशाला
केंद्रीय पेट्रो रसायान अभियांत्रिकी अउ प्रौद्योगिकी संस्थान सिपेट के रईपुर इकाई डहार ले प्लास्टिक के क्षेत्र म रोजगार बिसय उपर आज एक ठिन कार्यसाला राखे गीस। कार्यसाला म सिपेट के प्रधान निदेसक डॉक्टर आलोक साहू ह बतइन कि ए संस्थान म प्लास्टिक तकनीक ले जुड़े कतकोन पाठ्यक्रम संचालित करे जात हे। एमा दसवीं अउ बारहवीं उत्तीर्ण कोई भी विद्यार्थी प्रवेस ले सकत ह। सिपेट के प्रशासनिक अधिकारी नीतेश कुमार जैन ह बतइन कि ए पाठ्यक्रम बर प्रवेस बर उनतीस मई के परीक्षा आयोजित करे जाही।
प्रसारण सहायक-आवेदन
आकाशवाणी केन्द्र, रायपुर म प्रसारण सहायक के रूप म काम करे बर अरजी मंगाय जात हे। प्रसारण सहायक बर अरजी करइया मन ल स्नातक परीक्षा पास होना जरूरी हे अउ उंखर उमर एक जुलाई दू हजार चौबीस के न्यूनतम बीस साल अउ अधिकतम पचास साल होना चाही। आवेदक ल हिन्दी अउ अंग्रेजी भासा के ज्ञान होय के संगेसंग कम्प्यूटर टायपिंग के जानकारी होना जरूरी हे। इच्छुक उम्मीदवार बीस मई के संझा छह बजे तक अपन आवेदन केन्द्र निदेशक, आकाशवाणी रायपुर के पता म भेज सकथे। रायपुर नगर पालिका क्षेत्र म रहइया इच्छुक आवेदक मन आकाशवाणी केन्द्र रायपुर ले अरजी ले सकथे। पात्र उम्मीदवार मनके साक्षात्कार बाईस मई के होही।
हेरोइन-आरोपी गिरफ्तार
दुरूग जिला के जामुल पुलिस ह नसीला पदार्थ हेरोइन के संग दू आरोपी ल एक ठिन होटल ले गिरफ्तार करे हे। इंखर तीर ले पैंसठ ग्राम हेरोइन, इलेक्ट्रानिक तौल मसीन, दू मोबाइल फोन अउ एक चारपहिया वाहन जब्त करे गेहे। जब्त हेरोइन अउ आने जिनिस के कीमत आठ लाख रूपिया आंके गेहे।
ठगी आरोपी-गिरफ्तार
दुरूग जिला के भिलाई पुलिस ह जमीन, सोना के सिक्का अउ गोवा टूर के नाव म धोखाधड़ी करइया एक झिन मनखे ले गिरफ्तार करे हे। एडीसनल एसपी सुखनंदन राठौर ह आज एक ठिन पत्रकारवार्ता म बतइन कि एक झिन मोईलोगिन के सिकायत म निजी मॉल म टूर-एण्ड-ट्रैवल्स कंपनी चलइया एक झिन युवक ल गिरफ्तार करे गीस। ओमन बतइन कि आरोपी पिंटू रमेश सोनकर नागपुर महाराष्ट्र के रहइया हरय। एहा अलग-अलग लोगन ले लगभग सत्तर लाख रूपिया के ठगी करे हे। आरोपी के खिलाफ बिलासपुर म घलो अइसने दू मामला पहिली ले दरज हे।
अउ अब थोरकुन समाचार सार म –
– छत्तीसगढ़ शराब घोटाला ले जुड़े मनी लान्ड्रिंग मामला म आरोपी अनवर ढेबर ल सुप्रीम कोर्ट ह जमानत दे देहे। फेर ओला ईओडब्ल्यू म दर्ज मामला के सेति जेल म ही रहना होही।
– गरियाबंद जिला के गौरमुंड के जंगल म सुरक्षाबल मन ह पांच-पांच किलो के दू कुकर बम बरामद करे हे। जेला मउका म निष्क्रिय कर दे गीस।
– छत्तीसगढ़ व्यावसायिक परीक्षा मंडल ह व्यापम डहार ले प्री-डीएलएड अउ प्री-बीएड परीक्षा सत्ताईस मई के आयोजित करे जाही।
– कबीरधाम जिला के सिंगारपुर गांव म आकाशीय बिजली गिरे ले पति-पत्नी के मउत होगे। ओमन खेत म राखे गोंदली ल बचाय बर गे रिहीन, ओ बेरा बिजली गिरगे रिहीस।
अउ
– कबीरधाम जिला म लालच देके धर्मांतरण कि सिकायत म एक आरोपी ल गिरफ्तार करे गेहे।