छत्तीसगढ़ सरकार ह प्रदेस के स्कूली शिक्षा व्यवस्था ल जादा सशक्त, संतुलित अउ गुणवत्ता वाले बनाय के उद्देस्य ले शिक्षक मनके युक्तियुक्तकरण खातिर पहल कर हे। ए निर्णय ह नवा राष्ट्रीय शिक्षा नीति अउ शिक्षा के अधिकार अधिनियम के दिसा-निरदेस मुताबिक ले गेहे, जेखर ले शिक्षक स्त्रोत के जादा ले जादा अउ समान उपयोग तय करे जा सके। शिक्षक मनके युक्तियुक्तकरण ले प्रदेस के सात हजार ले जादा एकल शिक्षक वाले स्कूल मन म शिक्षक मनके कमी ह दूर होही। अवइया शिक्षा सत्र सुरू होय ले पहिली शिक्षक मनके युक्तियुक्तकरण के काम पूरा करे के लक्ष्य राखे गेहे। युक्तियुक्तकरण के प्रक्रिया म ए स्पष्ट करे गेहे कि कोनो भी स्कूल ल बंद नइ करे जाही।
जगरगुंडा-बैंकिंग सुविधा
मुख्यमंत्री विष्णुदेव साय ह सुकमा जिला के जगरगुंडा म इंडियन ओवरसीज बैक के शाखा के वर्चुअल सुभारंभ करीन। ए शाखा के खुले ले तीर-तखार के बारह ठिन गांव मनके करीबन चौदह हजार ग्रामीण मन ल बैंकिंग सहूलियत के फायदा मिलही। ए मउका म मुख्यमंत्री ह किहीन कि माओवाद प्रभावित ए जघा म सरकार के प्रयास ले सांति स्थापित होवत हे अउ एखरे सेति आज इंहा बैंक के नवा शाखा खुले हे। ए शाखा ले गवई के मनखे मन ल अब तेंदूपत्ता बोनस अउ किसान सम्मान निधि असन कई ठिन योजना के रासि गांवे म मिलही।
ए दउरान वित्त मंत्री ओ.पी. चौधरी ह बैंक कैम्पस म केस काउंटर अउ शाखा प्रबंधक कार्यालय के निरीक्षण करत बैंक म अपनो खाता खोलवाइन। बैंक के संगेसंग अब इंहा एटीएम के सहूलियत घलो राखे गीस हे।
अंबिकापुर-रेलवे स्टेशन-उद्घाटन
अमृत भारत स्टेसन योजना के चलत पुर्नविकसित याने फेर ले सुघ्घर बनाय गे अंबिकापुर रेलवे टेसन के वर्चुअल उद्घाटन प्रधानमंत्री नरेंद्र मोदी ह अवइया बाईस मई के करही।
एखर पहिली काली पत्रकार मनले गोठियावत बिलासपुर मंडल के अपर मंडल रेल प्रबंधक योगेश देवांगन ह अमृत भारत स्टेसन योजना के चलत करे गे काम बारे म जानबा दीन। संगे स्टेसन के उन्नयन अउ यात्री मन बर राखे गे अतिआधुनिक सहूलियत बारे म घलो बतइन।
इंहा ए बतादन कि अंबिकापुर रेलवे टेसन के उन्नयन छै करोड़ बयानवे लाख रूपिया के लागत ले करे गेहे। जेमा यात्री सहूलियत, सौन्दर्यीकरण अउ आधारभूत ढांचा के आधुनिकीकरण ल बिसेस महत्व दे गेहे। ए टेसन म दूपहिया अउ चारपहिया वाहन गाड़ी मन के पार्किंग सुविधा घलो राखे गेहे। उहें, दिव्यांगजन मन बर बिसेस टायलेट, वाटर बूथ, पार्किंग अउ बुकिंग काउंटर के व्यवस्था रइही।
तिरंगा-यात्रा
ऑपरेसन सिंदूर के सफलता बाद भारतीय सेना के सम्मान म ए बेरा प्रदेसभर म तिरंगा यात्रा निकाले जात हे। इही कड़ी म आज नारायणपुर जिला के सबो ग्राम पंचायत मन म घलो तिरंगा यात्रा निकाले गीस। ए यात्रा बालक उच्चतर माध्यमिक विद्यालय मैदान ले सुरू होके जयस्तंभ चौक म संपन्न होइस। ए यात्रा म जनप्रतिनिधि, अधिकारी, कर्मचारी, पुलिस के जवान, आम लोगन अउ स्कूली लइका मन बड़ भारी संख्या म सामिल होइन। ए मउका म जिला पंचायत अध्यक्ष नारायण मरकाम ह किहीन कि ए यात्रा ह न सिरिफ तिरंगा बर सम्मान हे, भलूक ए हर शहीद मन ल सच्चा श्रध्दांजलि घलो हे। ऑपरेसन सिंदूर ल लेके निकाले गे ए तिरंगा यात्रा के उद्देस्य लोगन मन म राष्ट्रभक्ति के भावना बगराना, समाज ल जागरूक करना अउ जन सहयोग के माध्यम ले राष्ट्रीय एकता ल मजबूत करना हे।
अरूण साव-मुंगेली
उपमुख्यमंत्री अरूण साव ह आज मुंगेली जिला के जरहागांव म राखेगे भक्तमाता कर्मा जयंती अउ साहू समाज सामुदायिक भवन के भूमिपूजन समारोह म सामिल होइन। ए मउका म ओमन माता कर्मा ल सुरता करत किहीन कि माता कर्मा ह समाज सेवा, तप अउ त्याग के चिन्हारी रिहीन। समारोह म श्री साव ह साहू समाज के सामुदायिक भवन बर बीस लाख रूपिया दे खातिर घोसना करीन। उहें, ओमन समाज के जवान लइका मन ल सुघ्घर संस्कार दे उपर जोर दीन।
सोनमणि बोरा-समीक्षा बैठक
आदिमजाति विकास विभाग के प्रमुख सचिव सोनमणि बोरा के पगरइती म काली अंबिकापुर कलेक्टोरेट परिसर म विभागीय योजना अउ कामकाज बारे म समीक्षा करे गीस। बइठका म पीएम-जनमन योजना, धरती आबा जनजातीय ग्राम उत्कर्ष अभियान, छात्रावास अउ आश्रम भवन निर्माण, प्रयास आवासीय विद्यालय संचालन अउ सुशासन तिहार बेरा मिले मांग अउ सिकइत मन उपर चर्चा होइस।
बइठका म प्रमुख सचिव ह किहीन हे कि बिसेस पिछड़ी जनजाति मन ल विकास के मुख्यधारा ले जोड़ना अउ उंखर जीवन स्तर ल सुघ्घर बनाना राज्य सरकार के सबले बड़का प्राथमिकता हे। ओमन दुर्गम वनांचल जघा मन म रहवइया परिवार मन बर बरसात ले पहिली पक्का घर बनाय के काम ल पूरा करे के निरदेस दीन। श्री बोरा ह नवा ह शिक्षा सत्र सुरू होय ले पहिली सबो छात्रावास अउ आश्रम मनके निरीक्षण के संगेसंग साफ-सफाई पिये के पानी व्यवस्था अउ निकासी सिस्टम ल देख के मरम्मत काम ल पूरा करे बर किहीन।
दुर्घटना
सक्ती जिला म बीते रतिहा होय रोड एक्सीडेंट म तीन झिन जवान लइका मनके मउत होगे। मिले जानकारी मुताबिक मालखरौदा क्षेत्र के सतगढ़ ले फटफटी म तीन झिन जवान लइका जावत रिहीन, तभे मिसन चौक तीर उंखर फटफटी ह हार्वेस्टर ले टकरागे। ए हादसा म तीनों जवान लइका के मउकच म मउत होगे। फेर घटना बाद हार्वेस्टर चालक भाग गीस।
उहें, घटना के सूचना मिलते साठ पुलिस अधीक्षक हरीश यादव समेत पुलिस टीम ह मउका म पहुंचके जांच म लग गेहे।
विकसित कृषि संकल्प अभियान
केंद्रीय कृषि मंत्रालय डहार ले छत्तीसगढ़ समेत देसभर म उनतीस मई ले बारह जून तक विकसित कृषि संकल्प अभियान चलाय जाही। प्रदेस म ए अभियान के सफल संचालन बर कृषि अउ ओखर ले जुड़े विभाग मनके संघरा टीम बनाय गेहे। ए टीम मन हरेक दिन दू ले तीन ठिन चुने ग्राम पंचायत म जाके किसान मन संग वैज्ञानिक गोठबात उपर परिचर्चा राखही। ए परिचर्चा ले किसान मन ल धान बोवई ड्रोन तकनीक के बउरई, प्राकृतिक खेती, बीजा मनके नवा कीसम, संतुलित खातू के बउरई अउ छत्तीसगढ़ शासन डहार ले चलत कृषि, बागवानी, पशुपालन अउ मछली पालन संबंधी योजना बारे म जानबा दे जाही। ए आयोजन म आईसीएआर संस्थान मन, कृषि विज्ञान केंद्र मनके वैज्ञानिक, कृषि विभाग अउ एखर ले जुड़े विभाग मनके अधिकारी, जनप्रतिनिधि अउ आगू बाढ़त किसान मन भाग लेही। ए अभियान बेरा किसान मन संग सोज्झे गोठबात ले उंखर खेती संबंधी समस्या ल समझे जाही अउ ओखर मन डहार ले अपनाय जात नवाचार के जानकारी सकेले जाही।
अंतर्राष्ट्रीय संग्रहालय दिवस
जम्मों विस्व म आज अंतर्राष्ट्रीय संग्रहालय दिवस मनाय जावत हे। ए दिवस ह हरेक बछर सांस्कृतिक आदान-प्रदान, सांस्कृतिक बढ़ोत्तरी, सहयोग अउ सांति ल बढ़ावा देके मुख्य साधन रूप म संग्रहालय या म्यूजियम के भूमिका बारे म जागरूकता बढ़ाय बर मनाय जाथे। ए बछर के बिसय हे-‘‘तेजी से बदलते समुदायों में संग्रहालयों का भविष्य‘‘।
अंतर्राष्ट्रीय संग्रहालय दिवस के मउका म संस्कृति विभाग डहार ले रईपुर के महंत घासीदास स्मारक संग्रहालय म राखेगे तीन दिन वाले राष्ट्रीय संगोष्ठी के आखिरी दिन आज गुजरात, पश्चिम बंगाल अउ मध्यप्रदेस ले पहुंचे दल के सदस्य मन ह पुरखौती मुक्तांगन अउ नवा बने आदिवासी संग्रहालय ल देखिन। ओमन दूनों संग्रहालय मन म प्रदर्सित जनजातीय अउ पुरातत्व वाले धरोहर ल तीर ले देखिन अउ उंखर बारे म जानकारी लीन। समापन सत्र म संगोष्ठी के प्रभारी अधिकारी डॉक्टर पी.सी. पारख, डॉक्टर अमित सोनी, रानी दीवान, अशोक तिवारी, महावीर इंटर कॉन्टिनेंटल सर्विस ऑर्गेनाइजेशन के लोकेश कावड़िया अउ आने पदाधिकारी मौजूद रिहीन।