मुख्यमंत्री विष्णुदेव साय जशपुर जिला के गांव चराईडांड म आयोजित तिरंगा यात्रा म सामिल होइन। ए मउका म श्री साय ह किहीन कि प्रदेस के ए तिरंगा यात्रा न सिरिफ तिरंगा के प्रति सम्मान हे, बल्कि ए ह शहीद मन ल सच्चा
श्रध्दांजलि घलो हवय। ए अभियान देस के एकता, अखंडता अउ समप्रभुता ल सशक्त बनाय के प्रतीक हवय। ऑपरेसन सिंदूर के सफलता के बाद जम्मों प्रदेस म एके संघरा तिरंगा यात्रा आयोजित करे गीस। जेखर उद्देस्य युवा मन म देस भक्ति के भावना ल जगाना अउ लोगन मनके जरिया ले राष्ट्रीय एकता ल मजबूत बनाना हवय।
उपमुख्यमंत्री अउ गृहमंत्री विजय शर्मा ह सुकमा म आयोजित तिरंगा यात्रा म सामिल होइन।
उहें, प्रदेसभर म निकाले गे ए तिरंगा यात्रा म मंत्रि, सांसद, विधायक, जिला अउ जनपद पंचायत के अध्यक्ष, सदस्यगण अउ पंचायत प्रतिनिधि मन सामिल होइन। यात्रा के अगुवई राष्ट्रीय सुरक्षा बर नागरिक संघर्ष वाला शीर्षक के बैनर ले करे गीस। तिरंगा यात्रा के दउरान ऑपरेसन सिंदूर का अधिकृत लोगन मन ल प्रदर्सन करे गीस। तिरंगा यात्रा के दउरान ऑपरेसन सिंदूर म जादा ले जादा लोगन मन के प्रदर्सन करे गीस। ए यात्रा के मुख्य आकर्षण ‘‘हम सेना के साथ है‘‘ और ‘‘ऑपरेशन सिंदूर के साथ राष्ट्र‘‘ जइसे बैनर रिहिस। यात्रा म पूर्व सैनिक मनके परिजन, छात्र-छात्रा, एन.सी.सी., एन.एस.एस., स्काउड गाइड्स अउ सामाजिक संस्था मन ले जुड़े लोगन मन घलो सामिल होइन।
तिरंगा यात्रा -02
ऐति, आरंग विकासखंड के गांव गनौद म विधायक खुशवंत साहेब अउ इंद्रकुमार साहू के नेतृत्व म तिरंगा यात्रा के आयोजन करे गीस। ए यात्रा म बड़ संख्या म गांव वाला मन भाग लीन। ए मउका म रायपुर कलेक्टर डॉक्टर गौरव सिंह अउ एस.एस.पी. डॉक्टर लाल उमेद सिंह घलो उपस्थित रिहीन।
ओति, राजनांदगांव म घलो आज तिरंगा यात्रा निकाले गीस। ए यात्रा नगर निगम कार्यालय ले सुरू होके गायत्री मंदिर अउ भारतमाता चौक ले होवत जय स्तंभ चौक पहुंचिस। ए दउरान बड़ संख्या म माईलोगिन, लइका अउ युवा मन ह अपन हाथ म तिरंगा लेके देस के एकता अउ अखंडता खातिर एकजुटता दिखाइन।
अइसनेच, महासमुंद म घलो तिरंगा यात्रा के आयोजन करे गीस। ए यात्रा म सांसद रूपकुमार चौधरी, विधायक योगेश्वर राजू सिन्हा समेत जनप्रतिनिधि अउ उंहा के रहइया मनखे मन सामिल होइन। जिला के सांस्कृतिक नगरी सिरपुर म घलो तिरंगा यात्रा निकाले गीस। ए यात्रा म कलेक्टर विनय लंगेह अउ पुलिस अधीक्षक आशुतोष सिंह के अलावा बड़का अधिकारी मन घलो सामिल होइन।
उहें, गौरेला-पेण्ड्रा-मरवाही जिला म आयोजित तिरंगा यात्रा म विधायक प्रणव कुमार मरपच्ची समेत अनेक जनप्रतिनिधि, अधिकारी-कर्मचारी अउ आम लोगन मन सामिल होइन।
दक्षिण पूर्व मध्य रेलवे रायपुर रेलमंडल के कर्मचारी मन ह काली तिरंगा यात्रा निकालीन। ए यात्रा रेलवे इंस्टीट्यूट खारून विहार ले सुरू होके रायपुर रेलवे स्टेसन पहुंचिस, जिहां शहीद मनके सुरता म श्रध्दांजलि सभा के आयोजन करे गीस। ए मउका म बड़का मंडल कार्मिक अधिकारी राहुल गर्ग अउ सहायक वाणिज्यिक प्रबंधक अविनाश कुमार आनंद मौजूद रिहीन।
एसीबी-छापा
प्रदेस म शराब घोटाला मामला म आज पूर्व आबकारी मंत्री कवासी लखमा अउ उंखर करीबी मनके 15 ठिन ठिकाना मन म एंटी करप्शन ब्यूरो-ए.सी.बी. अउ आर्थिक अपराध अन्वेषण ब्यूरो-ई.ओ.डब्लयू के टीम ह छापामार कार्रवाई करीन हवय। मिले जानबा के मुताबिक ए.सी.बी. अउ ई.ओ.डब्ल्यू के टीम ह बस्तर संभाग के सुकमा, तोंगपाल, जगदलपुर अउ दंतेवाड़ा म 13 ठिन अउ रायपुर म दू ठिन ठिकाना मन म दबिस दीन। कवासी लखमा के करीबी कांग्रेस नेता राजकुमार तामो के दंतेवाड़ा के घर के तालासी ले गीस। उहें, सुकमा जिला म 4 ठिन जघा मन म छापा मारे गीस हवय। एमा हार्डवेयर अउ पेट्रोल पंप कारोबारी सामिल हवय। ए.सी.बी. अउ ई.ओ.डब्ल्यू के टीम डहार ले शराब घोटाला मामला ले संबंधित दस्तावेज अउ लेनदेन के जानकारी जुटाय जावत हे।
बांग्लादेेेशी नागरिक-गिरफ्तार
अवैध अप्रवासी मन उपर कार्रवाई बर गठित स्पेसल टास्क फोर्स- एस.पी.एफ. के टीम ह काली भिलाई म एक ठिन बांग्लादेसी दंपत्ति ल गिरफ्तार करीस हवय। ए दंपत्ति वीजा अवधि खतम होय के बाद घलो अवैध रूप ले सुपेला म राहत रिहीन। ओमन फर्जी अउ कूटरचित दस्तावेज के आधार म पैन कार्ड, आधार कार्ड, मतदाता परिचय पत्र अउ बैंक पासबुक बनाय रिहीन। ओमन इंटरनेट अउ व्हाट्सअप के जरिया ले बांग्लादेस के अपन परिजन मन के संपर्क म रिहीन। बड़का पुलिस अधीक्षक विजय अग्रवाल ह बतइन कि गिरफ्तार दंपत्ति के खिलाफ मामला दर्ज कर कार्रवाई सुरू करे दे गे हवय।
मुख्यमंत्री-समीक्षा बैठक
सुशासन तिहार के चलत मुख्यमंत्री विष्णुदेव साय ह काली राजनांदगांव जिला मुख्यालय म राजनांदगांव, मोहला-मानपुर-अंबागढ़ चौकी अउ खैरागढ़-छुईखदान-गंडई जिला म विकास कार्य समीक्षा करीन। बइठका म मुख्यमंत्री ह अधिकारी मन ल विकास अउ जनसेवा बर नियमित भ्रमण अउ ग्रामीण क्षेत्र मन म प्रवास अउ राजस्व न्यायालय मन के समयबध्द संचालन सुनिश्चित करे खातिर निरदेस दीन हवय। ओमन किहीन कि विकसित छत्तीसगढ़ के सपना तभे साकार होही, जब अधिकारी मन जमीनी हकीकत ले जुड़े रइहीं अउ जनता के समस्या के निराकरण सीधा ओखर मनके उपस्थिति म करे जाही। एखर बर जम्मों कमिश्नर, कलेक्टर अउ आने बड़का अधिकारी अपन अधीन जिला अउ ब्लाक मन म सरलग भ्रमण अउ प्रवास करय। संगेसंग क्षेत्र म करे जावत विकास कारज के निगरानी करत जवाबदेही तय करय। मुख्यमंत्री ह बइठका म अधिकारी मन ल साफ किहीन कि योजना मनके जमीनी स्तर म प्रभावी क्रियान्वयन सुनिश्चित हो तथा हर पात्र हितग्राही तक सही बेरा म लाभ पहुंचे।
रेत परिवहन-कार्रवाई
प्रदेस म खनिज के अवैध खोदाई, परिवहन अउ भंडारण म सरलग कार्रवाई करे जावत हे। इही कड़ी म आज बिलासपुर जिला म खनिज विभाग डहार ले ग्राम भिलोनी, जोंधरा, अमलडीहा, उदइबंद अउ आने क्षेत्र मन म खनिज परिवहन करत गाड़ी मनके जांच करे गीस। ए दउरान अमलडीहा अउ उदइबंद रेत खदान क्षेत्र ले अवैध उत्खनन करत दू ठिन चैन माउंटेन मसीन समेत दू ठिन हाईवा घलो जब्त करे गीस। उहें, निरीक्षण के दउरान मस्तूरी रोड तोरवा के तीर डंप करे गे तकरीबन दू सौ हाईवा रेत अउ दू सौ हाईवा मिट्टी जब्त करे गीस हे।
ओति, बलरामपुर जिला म अनुविभागीय अधिकारी राजपुर अउ पुलिस विभाग के मिलेजुले टीम ह अवैध रेत, गिट्टी खोदाई अउ ओला लावत ले जावत तीन ठिन टिप्पर, पांच ठिन ट्रैक्टर अउ एक ठिन हाईवा ल जब्त करीन हवय।
संक्षिप्त समाचार
– दुनियाभर म आज विश्व उच्च रक्तचाप दिवस मनाय जावत हे। एखर उद्देस्य उच्च रक्तचाप ले जुड़े खतरा के बारे म जागरूकता बढ़ाना अउ एखर ले बांचे के उपाय के प्रचार करना हे। ए बछर के बिसय हवय-अपने रक्तचाप को सही तरीके से मापे, नियंत्रित करें और जीएं लंबा जीवन।
– अखिल भारतीय कांग्रेस कमेटी के महासचिव अउ छत्तीसगढ़ प्रभारी सचिन पायलट काल 18 मई के रायपुर आही। श्री पायलट पहलगाम आतंकी हमला म दिवंगत होय कारोबारी रायपुर रहइया स्वर्गीय दिनेश मिरानिया के परिजन मनले भेंटवार्ता करही। उहें, कांग्रेस महासचिव 19 मई के जांजगीर-चांपा म आयोजित संविधान बचाव रैली म सामिल होही।
अउ
– नारायणपुर जिला के गांव रायनार म जिला पुलिस अउ भारत तिब्बत सीमा पुलिस बल आईटीबीपी डहार ले नवा कैंप स्थापित करे गे हवय। एखर ले सुरक्षा के संगेसंग जनसुविधा अउ शासन के जनकल्याणकारी योजना मन ल लोगन मन तक पहुंचाय म मदद मिलही। संगेसंग क्षेत्र म तेजी ले विकास कार्य के विस्तार होही अउ माओवाद उन्मूलन अभियान म तेजी आही।