मुख्यमंत्री विष्णुदेव साय ह बीजापुर म आने-आने विभाग के समीक्षा बइठका लीन। ए दउरान मुख्यमंत्री ह किहीन कि दूरस्त अंचल म रहइया ग्रामीण मन ल समय म अउ सुलभ न्याय देवाय बर न्यायालय म ऑनलाइन गवाही के व्यवस्था सुनिश्चित करे जाय।
बइठका म मुख्यमंत्री ह किहीन कि आत्मसमर्पण करइया माओवादी मन बर रहवास, पुर्नवास, कौशल प्रसिक्षण अउ रोजगार के पूरा व्यवस्था करे जाय। ओमन एनएमडीसी अउ निजी क्षेत्र के भागीदारी ले प्लेसमेंट कैंप आयोजित करे के निरदेस दीन। मुख्यमंत्री ह एक हजार चार सौ साठ पंचायत मन म सुरू होय अटल सेवा केंद्र के जानकारी देत किहीन कि अब गांव वाला मन ल बैंकिंग जइसन सेवा गांवेच म मिलही। संघरा ओमन मुख्यमंत्री ग्रामीण बस सेवा योजना के तहत बीजापुर अउ दंतेवाड़ा कलेक्टर ल रूट ल चिन्हा करके प्रस्ताव भेजे के निरदेस दीन।
मुख्यमंत्री-सुशासन तिहार
सुशासन तिहार के तहत मुख्यमंत्री विष्णुदेव साय आज मोहला-मानपुर-अंबागढ़ चौकी जिला के सीतागांव पहुंचिन। मुख्यमंत्री ह चौपाल लगाके ग्रामीण मनके समस्या सुनिन अउ ओखर निराकरण करे के आस्वासन दीन। ए दउरान मुख्यमंत्री ह सीतागांव हाई स्कूल के हायर सेकेण्डरी स्कूल म उन्नयन, मोहला म बस स्टैंड अउ छात्रावास निर्माण, सीतागांव उप स्वास्थ्य केंद्र के प्राथमिक स्वास्थ्य केंद्र म उन्नयन अउ अंबागढ़ चौकी क्षेत्र म एक सौ बत्तीस केवी सब स्टेसन के स्थापना करे के घोसना करीन। ए दउरान मुख्यमंत्री ह नक्सल मोर्चा म तैनात सुरक्षा जवान मनके हौसला बढ़ाइन। संघरा मेधावी स्कूल लइका मनके सम्मान करीन।
‘‘एक राष्ट्र, एक चुनाव‘‘-संगोष्ठी
बिलासपुर के अटल बिहारी वाजपेयी विश्वविद्यालय म आज ‘‘एक राष्ट्र, एक चुनाव‘‘ बिसय उपर संगोष्ठी के आयोजन करे गीस। कारीकरम म मुख्य अतिथि के रूप म केंद्रीय आवास अउ सहरी विकास राज्य मंत्री तोखन साहू सामिल होइन। उहें, कारीकरम के अध्यक्षता उप मुख्यमंत्री अरूण साव ह करीन। संगोष्ठी म ‘‘एक राष्ट्र, एक चुनाव‘‘ लागू करे के समर्थन अउ ऑपरेसन सिंदूर के सफलता बर प्रधानमंत्री बर बधई प्रस्ताव पारित करे गीस।
इही मउका म श्री साहू ह किहीन कि ‘‘एक राष्ट्र, एक चुनाव‘‘ व्यवस्था लागू हो जाय के बाद पूरा देस म सांसद अउ विधायक मनके चुनई एके संग होही। एखर ले प्रशासन म स्थिरता रइही अउ विकास कार्य मन बर जादा ले जादा समय मिलही।
छत्तीसगढ़ संस्कृत विद्यामंडलम्
छत्तीसगढ़ संस्कृति विद्यामंडलम् के सचिव राजेश पाण्डेय ह आज नौवीं ले बारहवीं तक के परिणाम के घोसना करीन। ए दरी कक्षा दसवीं के परीक्षा परिणाम तिरपन दशमलव चार नौ प्रतिसत अउ कक्षा बारहवीं के इकहत्तर दशमलव सून्य एक प्रतिसत रिहीस। पूरा प्रदेस म ए दारी कुल तीन हजार अंठावन परीक्षार्थी मन बर छत्तीस ठन परीक्षा केंद्र बनाय गे रिहीस।
राष्ट्रीय डेंगू दिवस
आज राष्ट्रीय डेंगू दिवस हरय। ए मउका म स्वास्थ्य मंत्री श्याम बिहारी जायसवाल ह किहीन कि राज्य सरकार ह डेंगू के रोकथाम ल सर्वोच्च प्राथमिकता देहे। बेरा राहत प्रभावी कदम उठाय गीस, जेखर परिणाम हे कि आज डेंगू के मामला म उल्लेखनीय गिरावट देखे बर मिलत हे। ए बछर डेंगू दिवस के थीम ‘‘देखे, साफ करें, ढकें-डेंगू को हराने का उपाय करें‘‘ राखे गीस, जेखर उद्देस्य डेंगू जइसे जानलेवा बीमारी के रोकथाम अउ बचाव के प्रति आमजन मन जागरूकता फैलाना हे।
राष्ट्रीय डेंगू दिवस के मउका म आज प्रदेस के आने-आने जिला मन म जागरूकता कारीकरम राखे जात हे। इही कड़ी म बेमेतरा जिला के मुख्य चिकित्सा अउ स्वास्थ्य अधिकारी डॉक्टर यशवंत कुमार ध्रुव ह जागरूकता रथ ल हरा झंडा दिखाके रवाना करीन। रथ के माध्यम ले जिला के आने-आने क्षेत्र मन म डेंगू ले बचाव संबंधी संदेस प्रसारित करे जाही।
बातों-बातों में
प्रादेसिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ म ए बखत छत्तीसगढ़ म पंजीयन प्रक्रिया ल आसान बनाय बर सुरू करे गे दस नवा व्यवस्था उपर वाणिज्यिक कर-पंजीयन विभाग के सचिव अलरमेल मंगई डी. ले लेगे भेंटवार्ता प्रसारित करे जाही। एखर प्रसारण काली सत्रह मई के बिहनिया साढ़े दस बजे ले करे जाही। एला छत्तीसगढ़ स्थित जम्मों आकाशवाणी केंद्र एके संग रिले करही।
हाईकोर्ट-नया रोस्टर
छत्तीसगढ़ उच्च न्यायालय म गर्मी के छुट्टी के बाद नौ जून ले नवा रोस्टर के मुताबिक मामला के सुनवाई होही। ए बारे म रजिस्ट्रार जनरल ह अधिसूचना जारी कर देहे। नवा रोस्टर के मुताबिक चार डिवीजन बेंच अउ सोलह सिंगल बेंच म याचिका मनके सुनवाई करे जाही। मुख्य न्यायाधीश रमेश सिन्हा अउ न्यायाधीश बिभु दत्ता गुरू के बेंच ह जनहित याचिका, अवमानना मामला, हेबियास कार्पस, क्रिमिनल अपील अउ बीएनएस के मामला उपर सुनवाई करही।
संग्रहालय-राष्ट्रीय संगोष्ठी
रईपुर के महंत घासीदास स्मारक संग्रहालय म ‘‘तेजी से बदलते समुदायों में संग्रहालय का भविष्य‘‘ म आज ले तीन दिन के राष्ट्रीय संगोष्ठी के आयोजन करे जात हे। गुजरात के सरदार पटेल विश्वविद्यालय म्यूजियम के पूर्व संग्रहाध्यक्ष नंदन शास्त्री ह ए संगोष्ठी के सुभारंभ करीन। संगोष्ठी म गुजरात, पश्चिम बंगाल, उत्तर प्रदेस, ओडिसा, मध्यप्रदेस समेत छत्तीसगढ़ के राष्ट्रीय अउ अंतर्राष्ट्रीय स्तर के बिसय बिसेसज्ञ मन व्याख्यान म सामिल होवथे। संगोष्ठी के पहिली दिन आज दू ठिन तकनीकी सत्र के आयोजन करे गीस, जेमा वक्ता मन अपन बिचार रखिन।
इंजीनियरिंग-प्रवेश प्रक्रिया
प्रदेस के आने-आने इंजीनियरिंग, पॉलीटेक्निक, आर्किटेक्चर अउ फार्मेसी संस्थान मन म चलत तकनीकी पाठ्यक्रम मन म चालू सत्र म प्रवेश के काम जल्दी सुरू होही। प्रवेश लेवइया अभ्यर्थी मन बी.ई, डिप्लोमा इंजीनियरिंग, डिप्लोमा इन कॉस्ट्यूम डिजाईन एंड ड्रेस मेंकिंग, होटल मैनेजमेंट, आर्किटेक्चर, बी.फार्मा, डी फार्मा, एम-टेक, एम. फार्मा, एम.बी.ए. एम.सी.ए. जइसन विषय मन म सोझे अउ लेटरल एंट्री के माध्यम ले प्रवेश ले सकही। प्रवेश प्रक्रिया के पूरा जानबा ऑनलाइन काउंसिलिंग पोर्टल म मिल जही।
प्रसारण सहायक-आवेदन
आकाशवाणी केन्द्र, रायपुर म प्रसारण सहायक के रूप म काम करे बर अरजी मंगाय जात हे। प्रसारण सहायक बर अरजी करइया मन ल स्नातक परीक्षा पास होना जरूरी हे अउ उंखर उमर एक जुलाई दू हजार चौबीस के न्यूनतम बीस साल अउ अधिकतम पचास साल होना चाही। आवेदक ल हिन्दी अउ अंग्रेजी भासा के ज्ञान होय के संगेसंग कम्प्यूटर टायपिंग के जानकारी होना जरूरी हे। इच्छुक उम्मीदवार बीस मई के संझा छह बजे तक अपन आवेदन केन्द्र निदेशक, आकाशवाणी रायपुर के पता म भेज सकथे। रायपुर नगर पालिका क्षेत्र म रहइया इच्छुक आवेदक मन आकाशवाणी केन्द्र रायपुर ले अरजी ले सकथे। पात्र उम्मीदवार मनके साक्षात्कार बाईस मई के होही।
मौसम
प्रदेस म अवइया चौबीस घंटा के दउरान एक-दू जघा म हल्का बरसा होय के या गरज-चमक के संग छींटा पड़े के संभावना हे। उहें, कुछेक जघा म गरज-चमक के संग अंधड़ चले अउ गाज गिरे के चेतावनी घलो दे गेहे। मौसम विभाग के अनुसार प्रदेस म अधिकतम तापमान म उतार-चढ़ाव के संग कोनो बिसेस परिवर्तन होय के संभावना नइ हे।
संक्षिप्त समाचार
– देस के एक सौ साहित्यकार मन समेत दुरूग जिला के साहित्यकार किशोर कुमार नशीने के नाव गोल्डन बुक ऑफ वर्ल्ड रिकॉर्ड दरज हो गेहे। ए साहित्यकार मन एक सौ सत्रह छंद म अपन रचना प्रस्तुत करे हे।
– प्रधानमंत्री आवास योजना के क्रियान्वयन म लापरवाही के मामला म रायगढ़ जिला पंचायत के मुख्य कार्यपालन अधिकारी ह तीन ग्राम पंचायत के सचिव मन ल निलंबित कर देहे।
– रायपुर के तेलीबांधा रिंग रोड म आज बिहनिया एक ट्रक ह स्कूटी सवार एक युवती ल अपन चपेट म ले लीस, जेखर ले ओखर मउत होगे।