प्रधानमंत्री नरेन्द्र मोदी ह किहीन हे कि सरकार ह नक्सल वाले जघा मन म सांति लाय अउ माओवादी मन ल विकास के मुख्यधारा ले जोड़े बर कसम खाय हे। छत्तीसगढ़-तेलंगाना सीमा उपर सफल माओवादी अभियान चलाय के बाद गृहमंत्री अमित शाह के सोशल मीडिया पोस्ट ल साझा करत प्रधानमंत्री ह कहिन कि सुरक्षा बल मनके सफलता ह बताथे कि माओवादी मनके खिलाफ चलत अभियान ह सही दिसा म आगू बढ़त हे।
केन्द्रीय गृहमंत्री अमित शाह ह काली किहीन कि सुरक्षा बल मन ह छत्तीसगढ़-तेलंगाना सीमा के कर्रेगुट्टा पर्वतीय जगह म एक ठिन बड़का अभियान म इकतीस झिन माओवादी मन ल मार गिरईन। ओमन ह अब तक के सबले बड़का अभियान ल अवइया बछर इकतीस मार्च तक नक्सल मुक्त भारत के संकलप के दिसा म ऐतिहासिक सफलता बतईन। श्री शाह ह किहीन कि मौसम के सही नइ होय के संगेसंग पहाड़ी जगह के कठिन परेसानी के बाद घलो केन्द्रीय रिजर्व पुलिस बल, विशेष कार्यबल अउ डिस्ट्रिक्ट रिजर्व गार्ड के जवान मन ह हिम्मत के परिचय दीन।
ऐति, छत्तीसगढ़ के मुख्यमंत्री विष्णुदेव साय ह ए बड़का सफलता उपर सुरक्षा बल मन ल बधाई दीन अउ नक्सल मुक्त भारत के दिसा म ऐतिहासिक कदम बतईन।
एखर पहिली, काली बीजापुर म संवाददाता सम्मेलन म सीआरपीएफ के महानिदेशक ज्ञानेन्द्र प्रताप सिंह, छत्तीसगढ़ के पुलिस महानिदेशक अरूण देव गौतम अउ बीजापुर के पुलिस अधीक्षक जितेन्द्र कुमार यादव ह बतईन कि ए अभियान इक्कीस दिन तक चलीस।
मुख्यमंत्री-बीजापुर
मुख्यमंत्री विष्णुदेव साय ह आज बीजापुर जिला के गलगम म जवान मन ले मिलके उंखर मन ले गोठबात करीन। ए दउरान मुख्यमंत्री ह जवान मनके हौसला बढ़ईन। ओमन किहीन कि जवान मन चवालीस डिग्री तापमान म घलो माओवादी मनके खिलाफ ऑपरेसन चलावत हे। उंखर मनके हिम्मत के नमन करत हन। ओमन किहीन कि माओवाद प्रभावित क्षेत्र मन म सुरक्षा कैम्प के माध्यम ले अब बस्तर के दूर-दराज म घलो कतकोन सुविधा पहुंचत हे।
ए दउरान बीजापुर के पुलिस अधीक्षक ह मुख्यमंत्री ल बतईन कि गलगम म कैम्प बने के बाद ए जगह म नक्सल विरोधी अभियान बर सरलग कार्रवाई करे जात हे।
मुख्यमंत्री-दंतेवाड़ा
ए बेरा प्रदेस म मनाय जात सुशासन तिहार के तीसर चरण म मुख्यमंत्री विष्णुदेव साय ह आज दंतेवाड़ा जिला के मुलेर गांव गीन। मुख्यमंत्री ह अमली के पेड़ के नीचे बइठ के गांव के लोगन मन संग चौपाल लगाके उंखर समस्या सुनीन अउ समस्या के निपटारा करे के आश्वासन दीन। ए दउरान ओमन राशन दुकान जाके हितग्राही मन ले गोठबात करीन। मुख्यमंत्री ह आंगनबाड़ी केन्द्र म लइका मन ले मिलके उंखर मन संग बतअईन। ए मउका म मुख्यमंत्री ह मुलेर गांव म अंदल कोसम माता मंदिर बनाय बर चार लाख रूपिया देके घोसना करीन। संगेसंग गांव म उप स्वास्थ्य केन्द्र बनाय के संगेसंग कतकोन निर्माण काम बर पइसा देके बात किहीन। ओमन किहीन कि गांव म जल्दीच सिविर लगाके वनाधिकार मान्यता पत्र, आधार कार्ड अउ आयुष्मान कार्ड बनाय जाही।
तिरंगा यात्रा
मुख्यमंत्री विष्णुदेव साय ह काली राजधानी रायपुर म होय तिरंगा यात्रा म सामिल होइन। ए मउका म ओमन किहीन कि राष्ट्र के सुरक्षा के जब भी बात आही, त हम जम्मों देसवासी मन ह एक हो जबो। ओमन किहीन कि तिरंगा यात्रा म जम्मों वर्ग के लोगन मन, रिटायर सैनिक, समाजसेवी संगठन अउ लइका मन ह बड़ संख्या म सामिल होके एकता के संगेसंग देशभक्ति के संदेश दे हवय।
रायपुर सांसद बृजमोहन अग्रवाल ह किहीन कि तिरंगा यात्रा के माध्यम ले आज हमन एकजुटता के संदेस देवत हन। त उहें, भाजपा के प्रदेश अध्यक्ष किरण सिंह देव ह किहीन कि पहलगाम आतंकवादी हमला के जवाब ऑपरेशन सिंदूर हमर अभिमान के प्रतीक हरय।
रेत परिवहन-बैठक
खनिज विभाग के सचिव पी. दयानंद ह बरसात के पहिली प्रदेस म रेती के गलत ढंग ले निकासी अउ परिवहन उपर रोक लगाय अउ निर्माण काम पूरा करे के निरदेस देहे। ओमन काली वीडियो कॉन्फ्रेंसिंग के माध्यम ले कलेक्टर अउ खनिज विभाग के अधिकारी मन संग बइठका लीन। बइठका म ओमन रेती ले जुड़े परिवहन के बारे म अधिकारी मन ल निरदेस दीन कि रेती के गलत खनन अउ परिवहन म सामिल लोगन मन उपर कार्रवाई करे जाय। ओमन किहीन कि एखर बर जिला स्तर म बनाय गे टास्क फोर्स के माध्यम ले देखरेख करे जाय। बइठका म यहू निरदेस दे गीस कि अवइया तीन महीना म आधिकारिक रेती खदान मनके चिन्हारी करके ई-नीलामी के माध्यम ले आवंटन बर निविदा जारी करे जाय।
बांग्लादेशी महिला-गिरफ्तार
दुरूग जिला के सुपेला पुलिस ह एक झिन बांग्लादेशी माईलोगिन ल गलत ढंग ले अपन पहिचान बताके इहां रेहे के आरोप म गिरफ्तार करे हे। ए कार्रवाई अवैध अप्रवासी मन बर बनाय गे स्पेशल टास्क फोर्स-एसटीएफ डहार ले करे गीस। ए माईलोगिन ह भारत-बांग्लादेश सीमा ले आके अपन पहिचान ल छुपा के करीबन दू बछर ले सुपेला म नाव बदल के राहत रिहीन। जिला के वरिष्ठ पुलिस अधीक्षक विजय अग्रवाल ह आज पत्रकार मन ले गोठबात करत बतईन कि प्रदेस म एसटीएफ बनाय के बाद ए पहिली कार्रवाई हरय। ए महिला डहार ले आधार कार्ड म फर्जी दस्तावेज तैयार करे गेहे, जेखर परयोग ओमन अपन इलाज म करत रिहीन।
दुर्घटना
बलरामपुर जिला के शंकरगढ़ थाना क्षेत्र म आज बाराती मन ल ले जात एक ठिन बस ह अनते-तनते होके बड़का पथरा ले टकरा गे। ए घटना म एक झिन लइका के संगेसंग तीन झिन लोगन के मउत होगे अउ पच्चीस झिन लोगन मन घायल होगे हे। हमर संवाददाता ले मिले जानबा के मुताबिक बस म सत्तर ले जादा लोगन मन बइठे रिहीन, जउन मन झारखंड म बिहाव के कार्यक्रम म सामिल होय बर जावत रिहीन। इही दउरान चांदो थाना क्षेत्र के कंठी घाट के तीर बस ह अनते-तनते होके करीबन पचास फीट खाई म गिर गे। सूचना मिलतेच चांदो पुलिस ह मउका म जाके घायल मन ल जिला अस्पताल म भर्ती करईन।
ओति, गौरेला-पेण्ड्रा-मरवाही जिला म अमरकंटक-गौरेला रद्दा उपर काली एक ठिन पिकअप गाड़ी के खाई म गिरे ले एक झिन नोनी के मउत होगे। उहें, पन्द्रह झिन आने मनखे मन घायल होगे।
आरक्षक हत्या-आरोपी गिरफ्तार
बलरामपुर जिला के लिबरा गांव पाछु बारह मई के होय एक झिन आरक्षक के हत्या के मामला म पुलिस ह चार झिन आरोपी मन ल झारखंड ले गिरफ्तार करे हे। आरक्षक के हत्या करे बर दू ठिन लाय ट्रैक्टर ल घलो पुलिस ह जब्त कर लेहे। ए मामला म आने आरोपी मनके खोजबीन चलत हे। एखर पहिली, तस्कर मन ल मदद करे के आरोप म सनावल थाना प्रभारी ल निलंबित करे जा चुके हे।
जानबा के मुताबिक ए मामला ल छत्तीसगढ़ उच्च न्यायालय ह खुदे संज्ञान म लेके सुनवाई करत पुलिस महानिदेशक, खनिज सचिव अउ वन विभाग ल नोटिस जारी करे हे। हाईकोर्ट के कहना हे कि गलत खनन ल रोके के निरदेस देके बाद घलो अइसन घटना होना गंभीर बात हरय।
प्रसारण सहायक-आवेदन
आकाशाणी केन्द्र, रायपुर म प्रसारण सहायक के रूप म काम करे बर अरजी मंगाय जात हे। प्रसारण सहायक बर अरजी करइया मन ल स्नातक परीक्षा पास होना जरूरी हे अउ उंखर उमर एक जुलाई दू हजार चौबीस के तीस साल ले पचास साल तक होना चाही। अरजी करइया मन ल हिन्दी अउ अंग्रेजी भासा के ज्ञान होय के संगेसंग कम्प्यूटर टायपिंग के जानबा होना जरूरी हे। अरजी करइया उम्मीदवार बीस मई के संझा छह बजे तक अपन अरजी केन्द्र निदेशक, आकाशवाणी रायपुर के पता म भेज सकथे। रायपुर नगर पालिका क्षेत्र म रहइया इच्छुक आवेदक मन आकाशवाणी केन्द्र रायपुर ले अरजी ले सकथे। पात्र उम्मीदवार मनके साक्षात्कार छब्बीस मई के होही।
मौसम
मौसम विभाग ले मिले जानबा के मुताबिक काली प्रदेस के एक-दू जघा म बरसा होय के संभावना हे। प्रदेस म बरसा के संभावना दक्षिण छत्तीसगढ़ बताय जात हे। ए दउरान गरज-चमक के संग हवा गरेर चले अउ कोनो-कोनों जघा म गाज गिरे के घलो चेतावनी दे गेहे। मौसम विभाग ह उन्नीस मई तक प्रदेस के अधिकतम तापमान म कोनो बिसेस बदलाव नइ होय के संभावना जताय हे।