मुख्यमंत्री विष्णुदेव साय के अगुवई म आज मंत्रालय म राज्य मंत्रिमंडल के बइठका होइस। बइठका म मंत्रिपरिषद ह राष्ट्रीय शिक्षा नीति म राज्य के शासकीय विद्यालय मन म ‘‘मुख्यमंत्री शिक्षा गुणवत्ता अभियान‘‘ चलाय के फइसला लेहे। स्कूल शिक्षा विभाग कोति ले अभियान के संबंध म दिसा-निरदेस जारी करे जाही। अभियान म विद्यालय के सामाजिक अंकेक्षण करके गुणवत्ता के आधार म ग्रेडिंग होही। उहें, पालक-शिक्षक बइठका ले अभिभावक मनके सहभागिता सुनिश्चित करे जाही।
मंत्रिपरिषद ह साहित्य अउ कला के क्षेत्र म कलाकार अउ साहित्यकार मन ल मिलइया मासिक वित्तीय सहायता पेंसन ल दू हजार ले बढ़ाके पांच हजार रूपिया प्रतिमाह करे के फइसला लेहे। उहें, औद्योगिक विकास ल बढ़ावा दे बर छत्तीसगढ़ औद्योगिक भूमि अउ भवन प्रबंधन नियम म संशोधन के प्रस्ताव के अनुमोदन करे गीस। राज्य म उद्योग ल बढ़ावा दे अउ निवेस ल आगू बढ़ाय बर औद्योगिक विकास नीति म कतकोन महत्ता के संसोधन ल मंजूरी दे गेहे। नवा नीति म जउन कंपनी म छत्तीसगढ़ के लोगन ल नौकरी मिलही, ओला सरकार कोति ले अनुदान मिलही। उहें, अब प्रदेस म हाइड्रोपोनिक अउ एयरोपोनिक जइसन आधुनिक खेती हो पाही, जेखर ले किसान मन ल नवा तकनीक जइसे – ऑटोमेशन अउ इंटरनेट ऑफ थिंग्स के फायदा मिलही। एखर संगेसंग युवा मन बर ट्रेनिंग अउ खेल सुविधा, गुणवत्ता पूर्ण विश्वविद्यालय के स्थापना ल प्रोत्साहन, ऑटो मोबाइल रिपेरिंग अउ सर्विस सेंटर ल सबो विकासखंड समूह म मान्यता अउ पर्यटन, होटल व्यवसाय ल बढ़ावा मिलही।
बीजापुर मुठभेड़-पत्रकारवार्ता
छत्तीसगढ़ के बीजापुर जिला म तेलंगाना सीमा म स्थित कर्रेगुट्टा पहाडी म करीबन इक्कीस दिन तक चले माओवादी विरोधी अभियान म इकतीस माओवादी मारे गेहे। एमा सोलह महिला माओवादी सामिल हे।
आज बीजापुर म होय एक पत्रकारवार्ता म केन्द्रीय रिजर्व पुलिस बल-सीआरपीएफ के महानिदेशक ज्ञानेन्द्र प्रताप सिंह, छत्तीसगढ़ के पुलिस महानिदेशक अरूण देव गौतम अउ बीजापुर के पुलिस अधीक्षक जितेन्द्र कुमार यादव ह बतईन कि इसो इक्कीस अप्रैल ले ग्यारह मई तक चले ए ऑपरेसन के दउरान कुल इक्कीस मुठभेड़ होइस। ए दउरान सेल्फ लोडिंग रायफल-एसएलआर, सेमी ऑटोमेटिक हथियार समेत कुल पैंतीस हथियार अउ चार सौ पचास आईईडी बरामद करे गेहे। एखर संगेसंग माओवादी मनके दू सौ चौदह बंकर अउ ठिकाना ल खतम करे गीस। उहें, बारह हजार किलो रासन घलो बरामद करे गेहे। ए ऑपरेसन म जउन माओवादी मारे गेहे, ओमा ले अट्ठाईस झिन माओवादी मनके पहिचान होगे हे। इंखर मन उपर एक करोड़ बहत्तर लाख रूपिया के इनाम घोसित रिहीस।
सीआरपीएफ के डीजी ज्ञानेन्द्र प्रताप सिंह ह बतईन कि मार्च दू हजार छब्बीस तक देस ल नक्सल मुक्त बनाय के सरकार के संकल्प ल पूरा करे बर केन्द्रीय सुरक्षा बल, राज्य के पुलिस मन संग मिलके सरलग माओवाद विरोधी अभियान चलावत हे।
सीजेआई गवई-शपथ
न्यायमूर्ति भूषण रामकृष्ण गवई ह आज भारत के बावनवां मुख्य न्यायाधीश के रूप म शपथ लीन। राष्ट्रपति द्रौपदी मुर्मू ह आज बिहनिया राष्ट्रपति भवन म एक विशेष समारोह म न्यायमूर्ति गवई ल पद अउ गोपनीयता के शपथ देवईन। न्यायमूर्ति गवई ह न्यायमूर्ति संजीव खन्ना के जगह लेहे, जिखर काली कार्यकाल समाप्त होगे। शपथ ग्रहण समारोह म उपराष्ट्रपति जगदीप धनखड़, प्रधानमंत्री नरेन्द्र मोदी, कतकोन केन्द्रीय मंत्री अउ सर्वोच्च न्यायालय के न्यायाधीश समेत कतकोन झन मौजूद रिहीन।
तिरंगा यात्रा
ऑपरेशन सिंदूर के सफलता के बाद सर्व धर्म सर्व समाज कोति ले अब ले कुछेक देर बाद राजधानी रईपुर के तेलीबांधा तरिया स्थित मरीन ड्राईव ले नगर घड़ी चउक तक तिरंगा यात्रा निकाले जाही। ए यात्रा म मुख्यमंत्री विष्णुदेव साय, भाजपा के पदाधिकारी, कार्यकर्ता समेत कतकोन गणमान्य नागरिक सामिल होही।
जनजातीय संग्रहालय-लोकार्पण
करीबन नौ करोड़ रूपिया के लागत ले बने ए संग्रहालय म जनजातीय संस्कृति के झलक देखे बर मिलही। संग्रहालय म डिजिटल अउ एआई तकनीक ले जनजातीय संस्कृति के प्रदर्सन करे जाही। संग्रहालय म चौदह ठिन गैलरी हे, जेमा जनजातीय जीवन शैली के संबंध म सुघ्घर ढंग ले देखाय गेहे।
हाईकोर्ट-बर्खास्त अधिकारी
छत्तीसगढ़ उच्च न्यायालय के डिवीजन बेंच ह बिलासपुर के जिला सहकारी केन्द्रीय बैंक के सेवा ले बर्खास्त करे गे एक सौ दस कर्मचारी मनके बहाली के सिंगल बेंच के फइसला ल रद्द कर देहे। सिंगल बेंच के फइसला ल जिला सहकारी केन्द्रीय बैंक के सीईओ अउ बिलासपुर कलेक्टर ह चुनौती देवत डिवीजन बेंच म याचिका दायर करे रिहीन।
खबर के मुताबिक ए बैंक के तत्कालीन अध्यक्ष देवेन्द्र पांडेय के कार्यकाल म बैंक म बछर दू हजार पन्द्रह म भर्ती के नाव म गड़बड़ी के आरोग लगे रिहीन, जेखर सिकईत घलो करे गे रिहीस। जांच बर बनाय गे कमेटी ह कार्रवाई के अनुसंसा करे रिहीन। एखर बाद बैंक के एक सौ दस कर्मचारी मन ल बर्खास्त करे के आदेस जारी कर दे गे रिहीस।
बर्खास्त के आदेस ल चुनौती देत उनतीस झिन कर्मचारी मन ह हाईकोर्ट के सिंगल बेंच म याचिका दायर करे रिहीन। मामला के सुनवाई के बाद न्यायाधीश ए.के. प्रसाद ह कलेक्टर अउ सीईओ के आदेस ल रद्द करत बहाली के आदेस जारी करे रिहीस। सिंगल बेंच के फइसला ल चुनौती देत सीईओ अउ कलेक्टर डिवीजन बेंच म अपील करे रिहीन। मामला के सुनवाई के बाद डिवीजन बेंच ह सिंगल बेच के फइसला ल खारिज करत सीईओ अउ कलेक्टर के आदेस ल सही बताय हे।
सीएमओ-निलंबित
राज्य शासन ह कुम्हारी नगर पालिका के मुख्य नगर पालिका अधिकारी नेतराम चंद्राकर ल निलंबित कर देहे। खबर के मुताबिक उपमुख्मंत्री अरूण साव ह पाछु नौ मई के कुम्हारी नगर पालिका के औचक निरीक्षण करीन। ए दउरान श्री साव ह अधूरा दस्तावेज, रिकॉर्ड संधारण अउ काम म कोताही बरते बर सीएमओ ल फटकार लगाय रिहीन।
आयुर्वेद दिवस
केन्द्र सरकार ह तेईस सिंतबर ल आधिकारिक रूप ले आयुर्वेद दिवस घोसित करे हे। आयुष मंत्रालय ह बताय हे कि गजट अधिसूचना म ए बदलाव अधिसूचित कर दे गेहे। पहिली आयुर्वेद दिवस धनतेरस के दिन मनाय जात रिहीस। आयुष मंत्रालय ह नागरिक, स्वास्थ्य कर्मचारी, शिक्षण संस्थान अउ अंतर्राष्ट्रीय प्रतिभागी मन ले नवा तिथि अपनाय अउ हरेक बछर तेईस सितंबर के आयुर्वेद दिवस आयोजन म बड़-चढ़के भाग लेके आग्रह करीन हे।
आकार
संस्कृति विभाग कोति ले रईपुर के महंत घासीदास स्मारक संग्रहालय परिसर म काली पन्द्रह मई ले पारंपरिक शिल्प अउ विविध कला प्रशिक्षण शिविर आकार के आयोजन करे जाही। इकतीस मई तक चलइया ए सिविर दू पाली म बिहनिया सात ले दस बजे अउ संझा पांच ले आठ बजे तक लगाय जाही। शिविर के दउरान फाईन आर्ट, नाटक, स्केचिंग, कैनवॉस पेंटिंग, जूट शिल्प, मेंहदी, गोदना, छत्तीसगढ़ ज्वेलरी अउ ट्राईबल वुडन आर्ट समेत आने-आने विधा म प्रसिक्षण दे जाही। आकार सिविर म सामिल होय बर प्रसिक्षण सुल्क दू सौ रूपिया राखे गेहे, जेखर बर रजिस्ट्रेसन ऑनलाइन अउ ऑफलाइन दूनों तरीका ले कराय जा सकथे।
धमतरी-लूट घटना
धमतरी के पावर हाउस के एक ज्वेलर्स दुकान म पाछु रतिहा लूट के नीयत ले पहुंच दो नकाबपोश हमलावर मन ह ज्वेलर्स संचालक अउ ओखर बेटी उपर गोली चला दीन। ए हमला म दूनों घायल होगे हे। घटना के बाद ज्लेवर्स दुकान के बाहिर लोगन के भीड़ लग गे। उहें, हमलावर फरार होगे। सूचना मिले के बाद पुलिस मउका म पहुंचीस। सीसीटीवी फुटेज के आधार म पुलिस ह आरोपी मनके तलाश सुरू कर देहे।