प्रधानमंत्री नरेन्द्र मोदी ह ऑपरेशन सिंदूर के सफलता के बाद आतंकवाद ले मुकाबला करे बर भारत के उल्लेख करीन। प्रधानमंत्री ह काली संझा देस ल संबोधित करत किहीन कि आतंकवादी मन ल कोनों भी कीमत म छोड़े नइ जा सकय। प्रधानमंत्री ह यहू किहीन कि ऑपरेशन सिंदूर ह आतंकवादी मनके गुट अउ उंखर समर्थक मन ल संदेस देहे कि भारत अउ भारतवासी मन उपर होवइया हमला के जवाब दे जाही। प्रधानमंत्री ह किहीन कि भारत-पाकिस्तान ले आतंकवाद अउ पाकिस्तान के कब्जा वाले कश्मीर-पी.ओ.के. ल छोड़े के कोनों दिगर मुद्दा उपर बात नइ करय।
प्रधानमंत्री ह किहीन कि ऑपरेशन सिंदूर ल अभी अस्थायी रूप ले रोक दे गेहे। ओमन किहीन कि अवइया समय म हमन पाकिस्तान के हर काम ल देखबो अउ पता करबो कि आतंकवाद ल लेके उंखर रवैया कइसन हे। ओमन कहिन कि ऑपरेशन सिंदूर ह सिरिफ एक ठन नाव नो हे। ए ह देस के करोड़ों मनखे मनके भावना ले जुड़े हवय। प्रधानमंत्री ह सशस्त्र बल, सेना, खुफिया एजेंसी अउ वैज्ञानिक मन ल सलाम करीन। ओमन ऑपरेशन के दउरान सशस्त्र बल के वीरता, शौर्य अउ साहस ल देस के हरेक माता-बहनी अउ बेटी मन म समर्पित करीन।
प्रधानमंत्री-आदमपुर संबोधन
प्रधानमंत्री नरेन्द्र मोदी ह पाकिस्तान ल कड़ा संदेस देवत किहीन हे कि पाकिस्तान म अब कोनो अइसन जघा नइ बांचे हे, जिहां आतंकवादी मन ह चैन के सांस ले सकय। ओमन किहीन कि भारत ह आतंकवादी मन ल उंखर घर म घुस के मार सकत हे। श्री मोदी ह ए बात ल आज पंजाब के आदमपुर वायुसेना स्टेशन म वायुसेना के जवान मन ल संबोधित करत किहीन।
ऑपरेशन सिंदूर के सफलता के बढ़ई करत किहीन कि भारत ह पाकिस्तान म नौ ठन आतंकवादी मनके सिविर ल नष्ट कर दीन अउ एक सौ ले जादा आतंकवादी मन ल मार दीन। ओमन यहू किहीन कि जउन पाकिस्तानी सेना ह आतंकवादी मन उपर भरोसा करत रिहीन, ओला भारत के जवान मन ह हरा दीन।
ऑपरेशन सिंदूर-राष्ट्रव्यापी संपर्क अभियान
ऑपरेशन सिंदूर म आज ले ग्यारह दिन के राष्ट्रव्यापी संपर्क अभियान सुरू करे गेहे। मुख्य रूप ले तिरंगा यात्रा नाव के ए अभियान ल पाकिस्तान के खिलाफ भारतीय सेना के सफलता ल लोगन मन तक पहुंचाना हे। ए कार्यक्रम म पूर्व सैनिक, सामाजिक कार्यकर्ता, सामाजिक संगठन अउ भाजपा के प्रमुख नेता मन ह सामिल होही। ए अभियान ल तेईस मई तक चलाय जाही।
केन्द्रीय मंत्री-अंबिकापुर
केन्द्रीय कृषि मंत्री शिवराज सिंह चौहान ह आज अंबिकापुर के पीजी कॉलेज मैदान म राखे गे ‘‘मोर आवास-मोर अधिकार‘‘ कार्यक्रम म सामिल होइन। ए दउरान ओमन प्रधानमंत्री आवास योजना-ग्रामीण के पात्र हितग्राही मन ल गृह प्रवेस कराके चाबी सौंपीन। उहें, कुछेक हितग्राही मन ल आवास स्वीकृति पत्र दीन। कार्यक्रम म बढ़िया काम करइया स्व-सहायता समूह के लखपति दीदी मन ल सम्मानित करीन। कार्यक्रम के अगुवई मुख्यमंत्री विष्णुदेव साय ह करीन।
केन्द्रीय कृषि मंत्री-समीक्षा
केन्द्रीय कृषि मंत्री शिवराज सिंह चौहान ह आज छत्तीसगढ़ के दउरा म आय हे। ए दउरान ओमन नवा रईपुर म पंचायत अउ ग्रामीण विकास के संगेसंग कृषि विभाग के काम के समीक्षा करीन। बइठका म राज्य अउ केन्द्र सरकार के योजना मनके काम के बारे म विस्तार ले गोठबात करे गीस। श्री चौहान ह किहीन कि विकसित भारत के सपना ल साकार करे खातिर उन्नत गांव अउ खुसहाल किसान के सपना ल सशक्त बनाना हे। केन्द्रीय मंत्री ह अमृत सरोवर योजना ल स्थानीय आजीविका ले जोड़े बर बल दीन। ओमन किहीन कि एखर ले गांव वाले मन ल रोजगार मिलही अउ जल संरक्षण के काम ह बने बनही। श्री चौहान ह प्रधानमंत्री आवास योजना-ग्रामीण के समीक्षा करत किहीन कि मंजूर करे गे आवास ल जल्दी ले जल्दी बनाय जाय। ओमन बतईन कि वैज्ञानिक मनके एक ठन टीम ह जल्दी ले जल्दी छत्तीसगढ़ के दउरा करही अउ किसान मन ल वैज्ञानिक कृषि तकनीक के बारे म जानकारी दीहीं।
बइठका म मुख्यमंत्री विष्णुदेव साय ह कहिन कि सरकार के उद्देश्य सिरिफ योजना ल लागू करना नइ हे, भलूक गांव के विकास करना घलो जरूरी हे।
ए दउरान केन्द्रीय मंत्री ह नवा रायपुर के सेंट्रल पार्क म नरियर पेड़ लगईन। ओमन लोगन मन ले जादा ले जादा पेड़ लगाय के अपील करीन।
केन्द्रीय कृषि मंत्री-पत्रकारवार्ता
केन्द्रीय कृषि मंत्री शिवराज सिंह चौहान ह आज एक ठन पत्रकारवार्ता म गोठबात करत किहीन कि पाछु पांच साल कांग्रेस के सरकार रिहीस त प्रधानमंत्री आवास योजना के पइसा ल सही ढंग से इस्तेमाल नइ करीन, जेखर ले लाखों झन हितग्राही मन ह ए योजना के फायदा नइ उठा पईन। ओमन किहीन कि भारतीय जनता पार्टी ह अपन वादा ल पूरा करथे। राज्य म भाजपा सरकार बने के बाद करीबन साढ़े आठ लाख हितग्राही मन ल आवास योजना के फायदा दे गेहे। उहें, बांचे तीन लाख ले जादा हितग्राही मन ल घलो दुरूग म राखे गे एक ठिन कारीकरम म आवास योजना के चाबी ल सौंपे गीस।
खबर के मुताबिक अंबिकापुर म आज राखे गे एक ठिन कार्यक्रम म तीन लाख ले जादा हितग्राही मन ल मकान के मंजूरी पत्र बांटे गीस। श्री चौहान ह बतईन कि मनरेगा के अंतर्गत पउर साल राज्य सरकार ल जारी करे गे तीन हजार तीन सौ पचपन करोड़ रूपिया के बजट ल ए दारी दे जाही।
माओवादी-आत्मसमर्पण
सुकमा जिला म आज पांच झिन महिला माओवादी के संगेसंग चौदह झिन माओवादी मन ह आत्मसमर्पण कर दीन। एमा ले आठ झन माओवादी मन उपर कुल सोलह लाख रूपिया के इनाम राखे गे रिहीस। आत्मसमर्पण करइया ए जम्मों झन माओवादी मन ल राज्य सरकार के पुनर्वास नीति के तहत पचास-पचास हजार रूपिया के प्रोत्साहन राशि दे गीस।
सीबीएसई परिणाम
केन्द्रीय माध्यमिक शिक्षा बोर्ड-सीबीएसई डहार ले आज दसवीं अउ बारहवीं कक्षा के परिणाम के घोसना कर दे गेहे। एसो बारहवीं म अट्ठायासी दशमलव तीन नौ प्रतिशत विद्यार्थी मन पास होय हे। ए दारी नोनी मन ह बाबू मन ले बढ़िया प्रदर्सन करे हे। इंक्यानवे प्रतिशत ले जादा नोनी मन ह परीक्षा पास करे हे, जउन ह बाबू मन ले पांच दशमलव नौ-चार प्रतिशत जादा हे।
उहें, कक्षा दसवीं म तिरानवे दशमलव छह-छह प्रतिशत विद्यार्थी मन ह पास होय हे। दसवीं के परीक्षा म पढ़ईया प्रदर्शन करत पंचानवे प्रतिशत ले जादा नोनी मन ह परीक्षा पास करे हे, जउन ह बाबू मनके मुकाबला म दू दशमलव तीन-सात प्रतिशत जादा हे। परीक्षा परिणाम ल सीबीएसई के वेबसाइट म देखे जा सकत हे।
प्रधानमंत्री नरेन्द्र मोदी ह सोशल मीडिया म पोस्ट करके सीबीएसई के परीक्षा म पास होवइया लइका मन ल बधाई दीन हे।
हाईकोर्ट-सिविल मामले सुनवाई
छत्तीसगढ़ उच्च न्यायालय ह किहीन कि समय सीमा न्याय मिले ले लोगन मनके विश्वास ह न्यायपालिका उपर बने रहिथे। ए बात ल सिविल मामला के सुनवाई करत कोर्ट ह किहीन। ओमन यहू किहीन कि जल्दी न्याय मिले ल मानव अधिकार माने जाथे। मामला के सुनवाई के दउरान न्यायाधीश राकेश मोहन पांडेय ह सुप्रीम कोर्ट के आदेस म करे गे टिप्पणी के हवाला दीन। ओमन अपन फैसला म लिखे हे कि जल्दी सुनवाई ह वादी के कानूनी अधिकार हरय।
राज्यपाल-परिवीक्षाधीन अधिकारी
राज्यपाल रमेन डेका ले आज राजभवन म छत्तीसगढ़ प्रशासन अकादमी के महानिदेशक सुब्रत साहू के अगुवई म बछर दू हजार चौबीस बैच के भारतीय प्रशासनिक सेवा के परिवीक्षाधीन अधिकारी मन ह भेंट करीन। ए दउरान राज्यपाल ह परिवीक्षाधीन अधिकारी मन ले किहीन कि ओमन अपन जिम्मेदारी ल ईमानदारी ले निभावत देस अउ समाज के सेवा करयं। ओमन किहीन कि समाज के कमजोर मनखे मन बर काम करय।
मौसम
राजधानी रायपुर के संगेसंग प्रदेस के कतकोन जघा म आज मंझनिया के बाद अचानक मौसम बदले ले कोनों-कोनों जघा म हवा-गरेर के संग पानी गिरे के समाचार मिले हे।
मौसम विभाग ले मिले खबर के मुताबिक राज्य म घलो काली कुछेक जघा मन म थोरबहुत बरसा होय के संभावना जताय हे। उहें, कोनों-कोनों जघा म हवा गरेर के संग गाज गिरे के चेतावनी घलो दे गेहे।
अउ अब थोरकुन समाचार सार म –
– मुख्यमंत्री विष्णुदेव साय के अगुवई म काली चौदह मई के बिहनिया साढ़े ग्यारह बजे मंत्रालय म राज्य मंत्रिपरिषद के बइठका राखे गेहे।
अउ
– बलरामपुर जिला के रामानुजगंज-अंबिकापुर रद्दा म अलखडीहा अउ झींगों गांव के बीच एक यात्री बस अउ ट्रक के आपस म टकराय ले दस झिन यात्री मन ह घायल होगे।