प्रधानमंत्री नरेंद्र मोदी आज रतिहा आठ बजे राष्ट्र ल संबोधित करही। श्री मोदी के ए संबोधन पहलगाम आतंकी हमला के बाद भारत के ऑपरेसन सिंदूर के बाद होवत हे। पहलगाम आतंकी हमला म पचीस झन भारतीय अउ एक झन नेपाली नागरिक मारे गेहे। भारत ह जवाबी कार्रवाई म पाकिस्तान म कई आतंकी अउ सैन्य ठिकाना मन ल नष्ट कर सौ ले जादा आतंकी मनला मार गिराय हे।
प्रधानमंत्री नरेंद्र मोदी ह नई दिल्ली म आज अपन आवास म एक ठन उच्च स्तरीय बइठका के अध्यक्षता करीन। बइठका म रक्षामंत्री राजनाथ सिंह, विदेश मंत्री एस. सुब्रहमण्यम जयशंकर, राष्ट्रीय सुरक्षा सलाहकार अजित डोभाल, प्रमुख रक्षा अध्यक्ष अनिल चौहान, तीनों सशस्त्र सेना मनके प्रमुख अउ आने वरिष्ठ अधिकारी मौजूद रिहीन।
ऑपरेशन सिंदूर-प्रेसवार्ता-01
एखर पहिली ऑपरेसन सिंदूर के बारे म दिल्ली म एक ठन पत्रकारवार्ता म एयर ऑपरेसन के महानिदेसक एयर मार्सल ए.के. भारती ह किहीन कि भारत के लड़ाई आतंकवादी अउ उंखर सहयोगी ढांचा ले हे, न कि पाकिस्तानी सेना ले। ओमन किहीन कि ए दुखद हे कि पाकिस्तानी सेना ह हस्तक्षेप करके आतंकवादी मनके पक्ष लीन, जेखर सेति भारतीय सशस्त्र बल ल ओखर करारा जवाब देना पड़िस। एयर मार्सल भारती ह बतइन कि ऑपरेसन सिंदूर के दउरान सेना ह नागरिक अउ सैन्य बुनियादी ढांचा ल कइसे कम से कम नुकसान पहुंचाय हे। ओमन भारतीय सशस्त्र बलके एकीकृत वायु रक्षा प्रणाली मनके बारे म बतइन कि एमा सेना, नौसेना अउ वायुसेना के रक्षा प्रणाली मन सामिल हे। डीजीएओ ह किहीन कि ए मजबूत वायु रक्षा एडी प्रणाली म कई प्रकार के बहु स्तरीय एडीसेंसर अउ हथियार प्रणाली सामिल हे।
एयर मार्सल भारती ह बतइन कि पाकिस्तान डहार ले बड़ संख्या म इस्तेमाल करे जाना वाला ड्रोन अउ मानव रहित लड़ाकू हवाई वाहन मन ल स्वदेसी रूप ले विकसित सॉफ्ट अउ हार्ड किल काउंटर-यूएएस सिस्टम अउ वायु रक्षा कर्मी मन द्वारा विफल कर दे गीस। ओमन किहीन कि भारत के युध्द प्रणाली समय के कसौटी म खरा उतरे हे।
ऑपरेशन सिंदूर-प्रेसवार्ता-02
एखर पहिली,एयर मार्शल भारती ह किहीन हे कि चीनी मूल के पाकिस्तान के पीएल-15 मिसाइल लक्ष्य ले चूक गे अउ लोइटर म्यूनिशन अउ मानव रहित हवाई प्रणाली मन ल नष्ट कर दे गेहे। भारत के लड़ाई कार्रवाई मन उपर डीजीएओ ह नूर खान एयरबेस अउ रहीम यार खान एयरबेस उपर हमला म ओमन किहीन कि भारत ह दुश्मन के हर हिस्सा ल निसाना बनाइन।
भारत के एयर डिफेंस सिस्टम ह दूश्मन के ड्रोन, लड़ाकू विमान अउ मिसाइल ल नाकाम करीन। एखर ले देस ल कम से कम नुकसान होय हे। सैन्य संचालक महानिदेसक लेफ्टिनेंट जनरल राजीव घई ह किहीन कि जब भी पाकिस्तान के वायु सेना ह नौ अउ दस मई के रात के भारती एयर फिल्ड अउ लॉजिस्टिक प्रतिष्ठान मन म निसाना बनाय के कोसिस करीन, त उनला मल्टीलेयर काउंटर ड्रोन अउ एयर डिफेंस ग्रिड डहार ले रोके गीस। ओमन किहीन कि पाकिस्तान करा भारत के हवाई रक्षा ल भेदे के कोई मउका नइ रिहीस।
दुर्घटना-मौत
रायपुर जिला के बलौदाबाजार मार्ग म पाछू रतिहा होय सड़क दुर्घटना म तेरह झन के मउत होगे। एमा नौ झन महिला अउ चार झन लइका सामिल हे। उहें, चौदह झन दूसर लोगन मन गंभीर रूप ले घायल हो गेहे। सबो मृतक चटौद गांव के रहइया रिहीन।
पुलिस ले मिले जानकारी के मुताबिक ए सबो झन खरोरा के बाना बनरसी गांव ले एक ठन पारिवारिक कारीकरम म सामिल होके लहूटत रिहीन, तभे रतिहा करीब ग्यारा बजे सारागांव करा उंखर वाहन ह तेज रफ्तार ट्रेलर ले टकरा गे। ए हादसा म तेरह झन के मउका म ही मउत होगे। उहें, चौदह झन घायल होगे। सूचना मिलते ही खरोरा थाना पुलिस अउ प्रशासन के टीम मउका म पहुंचिन। सबो घायल मन ल रायपुर के डॉक्टर भीमराव अंबेडकर अस्पताल भेजे गीस।
प्रधानमंत्री नरेंद्र मोदी ह ए सड़क दुर्घटना उपर गहरा दुख व्यक्त करीन। ओमन मृतक मनके परिजन मन ल प्रधानमंत्री राहतकोष ले दू-दू लाख रूपिया अउ घायल मन ल पचास-पचास हजार रूपिया के सहायता रासि प्रदान करे के घोसना करीन।
मुख्यमंत्री विष्णुदेव साय ह ए सड़क दुर्घटना उपर गहरा शोक व्यक्त करत हुए मृतक मनके परिजन मनके प्रति संवेदना प्रकट करीन। मुख्यमंत्री ह घायल मनके समुचित उपचार बर अधिकारी मन ल जरूरी निरदेस देहे। राज्य सरकार मृतक मनके परिजन मन ल पांच-पांच लाख रूपिया अउ घायल मन ल पचास-पचास हजार रूपिया के सहायता रासि प्रदान करही।
ओति, कोंडागांव जिला म राष्ट्रीय राजमार्ग क्रमांक तीस म ग्राम दहीकोंगा करा काली तेज रफ्तार एक ठन ट्रक के टक्कर ले मोटर साइकिल सवार तीन झन के मउका म ही मउत होगे। मृतक मन म दू झन महिला सामिल हे।
माओवादी-ग्रामीण हत्या
बीजापुर जिला के उसूर अउ पामेड़ थाना क्षेत्र म माओवादी मन ह पाछू रतिहा पांच झन ग्रामीण मन के हत्या कर देहे। मृतक मन म ग्राम मारूडबाका के सोसायटी संचालक नागा भंडारी, मीनागट्टा के शिक्षादूत अशोक मुचाकी, कंचाल के रसोइया मडकम हड़मा अउ करतम कोसा सामिल हे। जिला के पुलिस अधीक्षक जितेंद्र यादव ह बतइन कि ग्राम मारूडबाका, कंचाल अउ मीनागट्टा म होय ए घटना के जांच करे जात हे।
इही बीच, बीजापुर जिला के सीमावर्ती क्षेत्र म पाछू दिन होय मुठभेड़ म मारे गे बीस झन माओवादी मनके शिनाख्त कर ले गेहे। एमा ले ग्यारा झन माओवादी मन के शव ल उंखर परिजन मन ल सौंप दे गेहे। उहें, शेष ग्यारा झन माओवादी मन के शव के पहिचान करे जात हे।
आरक्षक-मौत
बलरामपुर जिला के सनावल थाना क्षेत्र म एक झन पुलिस आरक्षक के रेत माफिया मन हत्या कर देहे। ए घटना लिब्रा घाट के आय जिंहा पुलिस के टीम ह रेत के अवैध उत्खनन रोके बर पहुंचे रिहीन। इही दौरान रेत माफिया मन ह आरक्षक शिव भजन सिंह उपर टैक्ट्रर चला दीन, जेखर ले मउका म ही ओखर मउत होगे।
केन्द्रीय कृषि मंत्री-छत्तीसगढ़
केंद्रीय कृषि अउ ग्रामीण विकास मंत्री शिवराज सिंह चौहान आज छत्तीसगढ़ के दू दिवसीय प्रवास म आवत हे। श्री चौहान काली बिहनिया नवा रायपुर स्थित मंत्रालय म बइठका लेके केंंद्रीय योजना मनके समीक्षा करही। एखर बाद ओमन अंबिकापुर जाही, जिंहा प्रधानमंत्री आवास योजना ले संबंधित कार्यक्रम म सामिल होही। ए मउका म श्री चौहान प्रधानमंत्री आवास योजना के तहत हितग्राही मन ल आवास स्वीकृति पत्र प्रदान करही। संगेसंग ओमन एक ठन जनसभा ल घलो संबोधित करही।
राज्यपाल-विद्यार्थी मुलाकात
छत्तीसगढ़ माध्यमिक शिक्षा मंडल डहार ले आयोजित दसवीं अउ बारहवीं बोर्ड परीक्षा म प्रावीण्य सूची म स्थान बनइया रायपुर जिला के विद्यार्थी मन ह आज राजभवन म राज्यपाल रमेन डेका ले मुलाकात करीन। ए मउका म राज्यपाल ह सबो विद्यार्थी मन ल मेडल अउ स्मृति चिन्ह प्रदान कर सम्मानित करीन अउ उनला पांच-पांच हजार रूपिया प्रोत्साहन रासि घलो दीन। राज्यपाल ह विद्यार्थी मन ल किहीन कि उंखर आगू उज्जवल भविष्य हे अउ ओमन जेन भी क्षेत्र म करियर बनाना चाहथे, ओ क्षेत्र म लगन अउ परिश्रम के संग आगू बाढ़य।
बुध्द-पूर्णिमा
महात्मा गौतम बुध्द के जन्म दिवस के मउका म विश्वभर म आज बुध्द पूर्णिमा मनाय जात हे। आजे ही के दिन उनला बोधगया म महाबोधि वृक्ष के नीचे ज्ञान के प्राप्ति होय रिहीस। राष्ट्रपति द्रौपदी मुर्मू, उपराष्ट्रपति जगदीप धनखड़, प्रधानमंत्री नरेंद्र मोदी, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह बुध्द पूर्णिमा के सुभकामना देहे।
आरोपी-गिरफ्तार
बलरामपुर जिला म बरियो पुलिस चौकी के अंतर्गत ग्राम भेस्की निवासी विशेष पिछड़ी जनजाति पहाड़ी कोरवा समुदाय के एक झन मनखे के आत्म हत्या के मामला म पुलिस ह पटवारी समेत तीन झन दूसर लोगन मन ल गिरफ्तार करे हे। एखर पहिली ए मामला म चार झन ल गिरफ्तार करे जा चुके हे। एखर मन उपर सुनियोजित षडयंत्र रचे के पहाड़ी कोरवा के संयुक्त खाता के जमीन ल छल कपट ले धोखाधड़ी कर रजिस्ट्री कराय के आरोप हे।